I lana tusi i le Au Paia i Efeso, na aoao atu ai le Aposetolo o Paulo, ua faavaeina e le Alii Lana Ekalesia ma valaauina taitai ina ia faaatoatoa ma faalotogatasi le Au Paia. Sa ia uunaia foi tagata o le Ekalesia e faataatiaese o latou olaga sa i ai muamua, ma amatalia ni olaga fou o ni soo o Keriso. Ona aoao atu lea o Paulo i le Au Paia i auala e faamalosia ai o latou sootaga faaleaiga ma uunaia i latou e “oofu i ofutau atoatoa mai le Atua” (Efeso 6:11) ina ia mafai ona tetee atu i faaosoosoga a Satani.
Ua aoao mai e Paulo le taua o le Ekalesia a Iesu Keriso
Mafaufau i vaaiga nei e lua:
I le aoga, ua fai atu lou faiaoga i le vasega e faaali mai o latou manatu e uiga i se mataupu sa finauina. Ao faasoa mai e tamaiti aoga o latou manatu, ua e matauina o le toatele o i latou e lagolagoina se tulaga e ese mai i aoaoga a le Ekalesia.
O loo mafaufau le au faitulafono i le tou atunuu e faataga amioga ua aoao mai taitai o le Ekalesia e sese.
Aisea e ono faigata ai nei tulaga mo se tagata o le Ekalesia?
Ao e suesue i le Efeso 4:1–16, vaavaai mo se upumoni i auala e mafai ona e iloa ai le mea sao ma le mea sese i se lalolagi e fesuisuiai ia tulaga faatauaina ma talitonuga.
Faitau le Efeso 4:1–6, ma vaavaai mo le mea na aoao mai e le Aposetolo o Paulo e uiga i le Ekalesia ma ona aoaoga faavae.
O le a lou manatu i le uiga o le mea na aoao mai e Paulo e faapea, e “tasi le Alii, tasi le faatuatuaga, [ma] tasi le papatisoga” (Efeso 4:5)?
I aso o Paulo, e pei foi o o tatou aso, e na o le tasi lava le Ekalesia moni a Iesu Keriso i luga o le fogaeleele (tagai MF&F 1:30).
E pei ona tusia i le Efeso 4:7–10, na aoao mai Paulo, e ala i le Togiola a Iesu Keriso, ua tuuina mai ai ia i tatou uma lava le avanoa e maua ai le meaalofa o le alofa tunoa a le Atua (o Lona mana gafatia e laveai ai i tatou). Na ia aoao mai foi, ua tuuina mai e Keriso isi meaalofa i le fanauga a tagata.
Faitau le Efeso 4:11, ma vaavaai po o a tofi na tuuina mai e le Alii, pe faavaeina, i Lana Ekalesia. (O le Efeso 4:11–14 o se fuaitau o mau tauloto. Atonu e te manao e faailoga pe faailoa i se auala e iloagofie ai ina ia fesoasoani i lou sueina i le lumanai.)
O igoa o tofi o le perisitua i le Ekalesia a Iesu Keriso i aso nei, atonu e le tutusa ma igoa na faaaogaina i aso o Paulo, ma atonu sa lei i ai i le Ekalesia anamua a Iesu Keriso ia valaauga uma ua i ai i le Ekalesia i aso nei. Mo se faataitaiga, na aoao mai le Perofeta o Iosefa Samita e faapea, “o se fai evagelia o se Peteriaka” (Aoaoga a Peresitene o le Ekalesia: Iosefa Samita [2007], 140). Ma le isi foi, o se faifeau o se leoleo mamoe, po o se tasi e taitaia se lafu—o se faauigaga e fetaui lelei i epikopo, peresitene o le paranesi, peresitene o le siteki, ma peresitene o itu i aso nei. Atonu e te manao e tusi pe faailoga i au tusitusiga paia le faauigaga tutusa o nei faaupuga.
Tusi le upumoni e lei uma lenei i lau api talaaga mo le suesueina o tusitusiga paia. Ua valaauina e le Alii ia aposetolo, perofeta, ma isi taitai o le Ekalesia e fesoasoani … (O le a e faaopoopo atu i lenei faamatalaga.)
Faitau le Efeso 4:12–13, ma vaavaai mo le mea na aoao mai Paulo o le mafuaaga na tuuina mai ai e le Alii i le Ekalesia ia aposetolo, perofeta, ma isi taitai.
Ia matau na tuuina mai e le Alii i tagata o Lana Ekalesia ia aposetolo, perofeta, ma isi taitai o le Ekalesia e faaatoatoa le Au Paia. Faaopoopo le fuaitau lenei i le upumoni e lei uma lea sa e tusia i lau api talaaga mo le suesueina o tusitusiga paia. Ia tusi foi i lau api talaaga mo le suesueina o tusitusiga paia ni nai auala e mafai ai e aposetolo, perofeta, ma isi taitai o le Ekalesia ona fesoasoani e faaatoatoa i tatou.
Faitau le Efeso 4:14, ma vaavaai mo se isi pogai na tuuina mai ai e le Alii i Lana Ekalesia ia aposetolo, perofeta, ma isi taitai.
Mai le fuaiupu lenei tatou te aoao ai na tuuina mai foi e le Alii i le Au Paia nei taitai e puipui i latou mai aoaoga faavae sese. Faaopoopo le fuaitau lenei i le faamatalaga sa e tusia i lau api talaaga mo le suesueina o tusitusiga paia.
Mai le Efeso 4:11–14 tatou te aoao ai i le upumoni lenei: Ua valaauina e le Alii ia aposetolo, perofeta, ma isi taitai o le Ekalesia e fesoasoani e faaatoatoa le Au Paia ma puipuia i latou mai aoaoga faavae sese.
Ata
vaa i le matagi
Mafaufau i le mea e mafai ona tupu i se vaa e felafoaiina i luga o le sami i le taimi o se afa matautia.
Toe faitau ia vaaiga e lua mai le amataga o le lesona lenei. Ona tali lea o fesili nei i lau api talaaga mo le suesueina o tusitusiga paia:
E mafai faapefea ona faatusa se vaa e felafoaiina i luga o vai sousou ma matagi louloua i se tasi e “felafoaiina” (Efeso 4:14) e ala i matagi fesuisuiai o aoaoga sese ma manatu lautele?
E mafai faapefea ona fesoasoani aoaoga a aposetolo, perofeta ma isi taitai o le Ekalesia i soo o le Atua, ia feoai i nei vai sousou ma toe foi saogalemu atu ai le Tama Faalelagi?
I lau api talaaga mo le suesueina o tusitusiga paia, tusi ai pe na faapefea ona fesoasoani se aposetolo, perofeta, peteriaka, epikopo, po o se faiaoga ia te oe e faaleleia atili pe tuputupu ae faaleagaga pe na fesoasoani e puipuia oe mai aoaoga faavae sese ma taufaasese. Afai o le tagata ua e filifilia o se taitai i le lotoifale, mafaufau e tusi atu se tusi faafetai i lenei tagata e faamatala ai le ala sa ia fesoasoani ai ia te oe.
Faitau le Efeso 4:15–16, ma vaavaai mo le auala e tatau ona aoao ai i tatou e o tatou taitai o le Ekalesia i upumoni o le talalelei.
Ina ia fesoasoani i lou faataitaia ona faamalamalama atu le aoaoga faavae ua aoaoina i le Efeso 4:11–14, aoao se tagata o le aiga po o se uo i le pogai na faatuina ai e le Alii i Lana Ekalesia ma valaauina taitai e auauna ai. Ia mautinoa e faaaoga aoaoga a Paulo i le Efeso 4:11–14 o se vaega o lau aoaoga. A uma ona e aoao atu, fai atu i le tagata sa e aoaoina e saini i lau api talaaga mo le suesueina o tusitusiga paia.
Ua uunaia e Paulo le Au Paia e to ese le tiapolo ae avea ma se [tagata] fou e ala ia Iesu Keriso
O le toatele o tagata o e sa tusi i ai Paulo i Efeso atonu o ni tagata fou liliu mai i le Ekalesia. Ao e suesue i le Efeso 4:17–32, vaavaai mo le mea na aoao atu e Paulo i nei tagata o le Ekalesia e tatau ona latou faia o ni soo o Iesu Keriso
Faitau le Efeso 4:17–20, ma vaavaai mo upu po o fuaitau e faamatala ai le tulaga faaleagaga o Nuuese o e sa lei auai i le Ekalesia. Ia matau le mea na fai mai Paulo o le pogai na i ai isi tagata Nuuese i lenei tulaga faaleagaga.
Faitau le Efeso 4:21–24, ma vaavaai mo le mea sa fesoasoani i tagata o le Ekalesia ia ese mai isi tagata. Mafaufau e faailoga pe faailoa mea e te maua i au tusitusiga paia.
O le a le mea na fai mai Paulo e tatau i se tagata ua aoaoina i le upumoni ona “to ese” (Efesos 4:22)?
Tatou te “oofu i le tagata fou” (Efeso 4:24) pe a tatou maelega e ola i le talalelei a Iesu keriso i aso taitasi e ala i le atiina ae o le faatuatua ia Keriso, salamo i agasala, maua sauniga faaola, ma tausi poloaiga. Mai aoaoga a Paulo e mafai ai ona tatou iloa ai upumoni nei: O soo o Iesu Keriso e to ese o latou ala tuai, agasala, ae oofu i ala fou, ma amiotonu.
Faitau le Efeso 4:25–32, ma vaavaai mo mea e tatau i soo o Keriso ona “to ese” (fuaiupu 22) pe “tea” (fuaiupu 31) ma mea e tatau i soo o Keriso ona “oofu” ai (fuaiupu 24). Atonu e te manao e faailoga pe faailoa i au tusitusiga paia mea e te maua. Ia matau o le Faaliliuga a Iosefa Samita o le Efeso 4:26 e amata i le “Pe mafai ona e ita, ae le agasala ai?” (i le Efeso 4:26, vaefaamatalaga a).
I lau api talaaga mo le suesueina o tusitusiga paia, tusi se ata pe faamatala se vaaiga e faaalia ai ni amioga e ono i ai a se tasi e tatau ona to ese lona natura agasala i se tasi o vaega na faamatalaina e Paulo. Ia tusi foi se ata pe faamatala se vaaiga e faamatala ai le auala e ono amio ai lena lava tagata pe afai e sau o ia ia Keriso ma avea ma se tagata fou. Atonu e te manao e aumai mai ou lava aafiaga po o aafiaga o isi ao e faamaeaina lenei galuega atofaina.
Ia manatua o le to ese o o tatou ala tuai ae mulimuli atoa atu ia Iesu Keriso o se faagasologa faifaipea ae e le o se mea e tasi lava ona tupu.
Ua fautuaina e Paulo le Au Paia e uiga i a latou sootaga, ma ia “oofu i ofutau atoatoa mai le Atua”
Tatou te faitau i le Efeso 5 na aoao e le Aposetolo o Paulo tagata o le Ekalesia e tatau ona latou faaaoga le sootaga a le Faaola ma le Ekalesia o se taiala i a latou sootaga faaleaiga faapea ma isi. O le fuaitau “usiusitai le tasi i le tasi” i le Efeso 5:21 o lona uiga o le faamuamua o isi ia i tatou lava, ae o le fuaitau “ma le matau i le Atua” e faatatau i lo tatou alolofa ma le faaaloalo mo le Atua.
Faitau le Efeso 6:1–4, ma vaavaai mo le fautuaga a Paulo i tamaiti e uiga i a latou sootaga ma o latou matua.
Mafaufau loloto po o a auala o le a faamalolosia ai ou sootaga faaleaiga e ala i le mulimuli i lenei fautuaga.
Ina ua uma ona uunaia tagata o le Ekalesia e “oofu i le tagata fou” (Efeso 4:24) ina ia amiotonu ma paia, sa fautuaina i latou e Paulo ia oofu i isi mea mo le puipuiga.
Faitau le Efeso 6:11–13, ma vaavaai mo le mea na aoao atu e Paulo e tatau i le Au Paia a le Atua ona oofu ai.
O a mafuaaga na tuuina mai e Paulo mo le pogai e tatau ai ona tatou “oofu i ofutau atoatoa mai le Atua” (Efeso 6:11)? Atonu e te manao e faailoga pe faailoa ia nei pogai i au tusitusiga paia.
Faitau le Efeso 6:14–17, ma vaavaai mo vaega eseese o le ofutau faaleagaga na fai mai Paulo e maua ai le ofutau atoatoa i le Atua.
E mafai faapefea ona fesoasoani le oofu i nei vaega o le ofutau e aloese ai mai le agasala? O le a se mea e mafai ona e faia e ofu ai le ofutau atoatoa i le Atua i aso taitasi?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Efeso 4–6 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: