Na faamagalo atu e Iesu ma faamalolo se tagata supa, ma sa Ia valaauina Mataio e mulimuli atu ia te Ia. Sa Ia aoao atu le au tusiupu ma le au Faresaio e uiga i le aso Sapati. Sa faaauau pea e Iesu ona faamalolo i tagata e toatele, sa Ia auina atu Ana Aposetolo e folafola atu, ma sa Ia lapataiina i latou mai i le upu leaga i le Agaga Paia.
Ua faamagalo e Iesu ma faamalolo le tagata ma’i supa
Mafaufau faapea sa mafatia se tagata e te alofa i ai mai se lu’itau taufaamata’u ma sa moomia ai se togafitiga faapitoa. Mata o ai e te sailia e fesoasoani i le ua pele ia te oe? Aisea? O le a le mea o le a e naunau e fai pe afai e na o le toatasi le fomai e mafai ona fesoasoani, ae e faigata ona faatulaga se taimi e vaai ai lena fomai?
E pei ona tusia i le Mareko 2:1–4, i le nuu o Kapanaumi i Kalilaia, sa i ai se tagata “ma’i supa“ (Mareko 2:3), Sa fata atu e nisi tagata se toafa o ia i le fale sa i ai Iesu, ae sa feoma’i le fale ma sa le mafai ona latou ulufale atu i ai. Sa aveese e nei tagata e toafa se vaega o le taualuga o le fale ae tuutuu ifo ai le tagata supa i le mea sa i ai le Faaola.
Ata
O Iesu ua faamaloloina le tagata
Faitau le Mareko 2:5, ma vaavaai pe o le a le fetalaiga a Iesu i le tagata supa.
Faitau le Mareko 2:6–12, ma vaavaai pe o le a le mea na sosoo ai.
Matau o “nisi o le au tusiupu“ Mareko 2:6 sa masalosalo i le gafatia e le Faaola ona avatu le faamagaloga mo agasala. Mafaufau po o le a le mea na fesili atu ai Iesu i le au tusiupu (tagai Mareko 2:9).
O le upumoni lenei e mafai ona tatou faailoa mai i lenei tala: E ia Iesu Keriso le mana e faamalolo ai i tatou faaleagaga ma faaletino.
Ua valaauina e Iesu ia Mataio e mulimuli atu ia te Ia, ma ua Ia talisua faatasi ma le au telona ma e agasala
Ina ua vaai atu le au tusiupu i le tagata supa ua tulai ae mai lona moega ma savali, sa tuuina atu ia i latou le faamaoniga e le mafaafitia e faapea o loo ia Iesu Keriso le mana sili e faamalolo ai ma’i, ma sa latou faalogo atu o Ia molimau atu e mafai ona Ia faamagaloina o agasala. Peitai, i le tala lenei e le o iloa pe na toe o atu nei tagata ia Iesu mulimuli ane ma sailia se faamagaloga mo a latou lava agasala.
I lau api talaaga mo le suesueina o tusitusiga paia, tusi ai se lisi o mafuaaga pe aisea e le sailia ai e tagata le faamagaloga a le Alii mo a latou agasala. Fesili i se tagata o le aiga po o se uo mo se fesoasoani i le lisi.
A o faaauau pea ona e suesueina le Mareko 2, vaavaai mo upumoni e mafai ona fautuaina ai oe e saili i le faamagaloga a le Alii.
Faitau le Mareko 2:13–15, ma vaavaai mo mea na faia e Iesu ina ua uma ona faamalolo le tagata supa.
O Levi na mulimuli ane iloa o Mataio. O Mataio lava lea e tasi na tusia le Evagelia a Mataio. O le fasifuaitau “ua nofo i le fale e tali ai taulaga“ (Mareko 2:14) o lona uiga o Mataio o se telona, “o se ao lafoga mo tagata Roma i Kapanaumi, [ma] atonu o le nofoaiga a Herota Anetipa“ (Taiala i Tusitusiga Paia, “Mataio,” scriptures.lds.org). E toatele tagata Iutaia e le fiafia i telona aua ua latou vaai atu i telona o ni tagata faalata, o e aoina tupe mai o latou lava tagata mo tagata Roma.
Matau e toatele telona ma tagata agasala sa auai atu i le tausamiga a Mataio ma Iesu ma Ona so’o. I le taimi lea, o le talisuaga ma nisi ua sili atu lea i le na o sina tausasami faatasi. E ta’u mai ai ua i ai se noataga faaleuo ma le filemu ia i latou o e auai.
Faitau le Mareko 2:16, ma vaavaai pe na faapefea ona tali atu le au tusiupu ma le au Faresaio ina ua latou vaai o talisua faatasi le Faaola ma nei tagata.
O le a sou manatu aisea na faitio ai e le au tusiupu ma le au Faresaio ia Iesu i le talisua faatasi ma le au telona ma e agasala?
Faitau le Mareko 2:17, ma vaavaai mo le tali a le Faaola i faitioga a le au tusiupu ma le au Faresaio. Fuafua e li’o ia upu na faaaoga e le Faaola e faamatala ai Ia lava.
O le faaaogaina o le upu fomai na faamautu atu ai e le Faaola Lona mana e faamalolo ai faaleagaga ma le faaletino. Mai le fuaiupu 17 ua tatou aoao ai e faapea o le finagalo o le Faaola o le fesoasoani ia i tatou ia salamo mai i a tatou agasala ma ia faamaloloina.
Mafaufau pe aisea e taua ai le talitonu e finagalo Iesu e fesoasoani ia tatou salamo ma ia faamaloloina.
Na saunoa mai Elder Craig A. Cardon o le Fitugafulu:
Ata
Elder Craig A. Cardon
“E alofa le Alii ia i tatou ma e finagalo ia tatou malamalama i Lona naunau e faamagalo. …
“… I Lona alofa mutimutivale, ua Ia faatagaina ai le alu o le taimi o tatou faaleleia nai lo le faia faamalosi ia atoatoa i le taimi lava lea. E tusa ai ma le tele o agasala e afua i vaivaiga o le olaga nei, o le faateleina ona tatou salamo ma saili atu i Lana faamagaloga, Na te faamalolo pea lava pea [tagai Moronae 6:8].
“Ona o lenei, o i tatou uma, e aofia ai i latou o loo tauivi e faatoilalo amioga ua fai ma vaisu e pei o le faaaoga sese o fualaau ma vailaau faasaina po o ponokalafi faapea ma i latou e vavalalata ia i latou, e mafai ona iloa o le a silafia e le Alii a tatou taumafaiga amiotonu ma o le a faamagaloina mai ma le alofa pe a atoatoa le salamo. … Ae e le faapea ai la e mafai ai e se tagata ona foi atu ma le loto i ai i le agasala e aunoa ma le faasalaina [saoloto mai taunuuga]“ (“e Finagalo le Faaola e Faamagalo Atu,” Ensign po o le Liahona, Me 2013, 16).
Mafaufau pe e te pei o telona ma tagata agasala (o e sa faailoa lo latou manaomia o le Faaola ma o mai ia te Ia) pe faapei o le au tusiupu ma le au Faresaio (o e e lei o mai i le Faaola e sailia Lana faamagaloga ma le mana faamalolo). Filifili nei e sau i le Faaola ma tuu atu ia te Ia e fesoasoani ia te oe i ou manaoga faaletino ma faaleagaga.
E pei ona tusia i le Mareko 2:18–22, sa aoao atu e Iesu le mafuaaga na lei anapopogi ai Ona so’o a o latou mafuta ma Ia. Na Ia aoao atu foi le mafuaaga na faigata ai i nisi tagata ona talia Lana talalelei (tagai foi Mataio 9:14–17).
Pe na e filifili ea e te le auai atu i se gaoioiga ina ia e usitaia le poloaiga e tausi ia paia le Sapati? Ao e suesueina pea le Mareko 2–3, mafaufau i le fesili lea: E faapefea ona e iloa pe e talafeagai ona faia se gaoioiga i le Sapati?
Faitau le Mareko 2:23–24 ma le Mareko 3:1–2, ma vaavaai po o a mea na faia e le Faaola ma Ona so’o lea na talitonu le au Satukaio o se solia o le tulafono o le Sapati.
Manatua sa faaopoopo e taitai Iutaia a latou lava tulafono ma faaliliuga, sa faaigoa o le tulafono tuugutu po o uputuu, i le tulafono a Mose. O nei tulafono faaopoopo sa faamoemoe e puipuia ai le solia o tulafono a le Atua, ae sa puipuia ai nisi tagata mai le malamalama i le faamoemoega moni o ni poloaiga patino, e aofia ai le poloaiga e tausia ia paia le aso Sapati.
Faitau le Mareko 2:27–28, ona matau lea pe o faapefea ona faamanino mai e le Faaliliuga a Iosefa Samita le mafuaaga na aumai ai e le Alii ia i tatou le Sapati:
“O le mea lea na tuuina atu ai le Sapati i le tagata o se aso e malolo ai; ma ia vivii atu ai le tagata i le Atua, ae le faapea e le tatau ai ona ’ai le tagata;
“Aua na faia e le Atalii o le tagata le aso Sapati, o le mea lea o le Atalii o le tagata o le Alii foi ia o le Sapati“ (Faaliliuga a Iosefa Samita, Mareko 2:26–27 [i le faaopoopoga i le Tusi Paia]).
Faitau Mareko 3:3–5, ma vaavaai pe o a mea na aoao mai e le Faaola e uiga i le faamaloloina o le tagata sa gase lona lima i le Sapati.
E fua i mea ua tatou aoao mai i le Faaliliuga a Iosefa Samita ma le Mareko 3:3–5, faamaea le upumoni lea: E mafai ona tatou tausia le aso Sapati ia paia e ala i le .
Tali fesili nei i lau api talaaga mo le suesueina o tusitusiga paia:
O a ni auala e mafai ai ona tatou vivii atu i le Atua i Lona aso paia?
O a ni faataitaiga o le faia o galuega lelei i le Sapati?
Faitau le Mataupu Faavae ma Feagaiga 59:9–13 Ona faitau lea o le saunoaga lea a Peresitene James E. Faust o le Au Peresitene Sili, ma mafaufau pe mafai faapefea ona e fuafua pe o le a le mea e talafeagai ona fai i le Sapati:
Ata
Peresitene James E. Faust
“O fea e iai le laina faatapulaa i mea e faatagaina ma faasaina i le sapati? I luga o taiala, e tatau ona tali lava e i tatou lenei fesili mo i tatou lava. A o i ai nei taiala i totonu o tusitusiga paia ma upu a perofeta i onaponei, e tatau foi ona tusia i totonu o o tatou loto ma puleaina e o tatou mafaufau. … E leai lava se solia matuia o le sapati pe a tatou o mai ma le lotomaualalo i luma o le Alii ma tuuina atu o tatou loto uma, agaga, ma le mafaufau. (Tagai Mat. 22:37.)
“O le mea e agavaa pe e le agavaa i le aso Sapati o le a faamasinoina e le tagata lava ia e ala i le faamaoni i le Alii. I le Sapati e tatau ona tatou faia le mea e tatau ona faia, ma le mea e tatou te iloa e tatau ona faia e tusa ma amioga faaletapuai ona faatapulaa lea o isi a tatou gaioiga,” (“O le Aso o le Alii,” Ensign, Ian. 1992, 35).
Tali fesili nei i lau api talaaga mo le suesueina o tusitusiga paia:
O faapefea ona e lagona le faamanuiaina o oe a o e taumafai e tapuai i le Atua ma faia galuega lelei i le Sapati?
O le a se auala se tasi o le a e tausia atili ai le paia o le Sapati?
Ua faamalolo e Iesu le toatele o tagata, ma auina atu Ana Aposetolo e folafola atu, ma lapataia isi e uiga i le upu leaga
E pei ona tusia i le Mareko 3:7–35, na maliu atu Iesu i le Sami o Kalilaia ma faamalolo ai le toatele o tagata o e sa mulimuli atu ia te Ia iina, e aofia ai ma nisi sa i ai agaga leaga. Ina ua uma ona filifili Aposetolo e Toasefululua, sa faauuina e Iesu i latou ma auina atu e folafola atu, faamalolo, ma tutuliese temoni. Ona Ia lapataia lea o le au tusiupu e uiga i le upu leaga i le Agaga Paia ma aoao atu faapea o Lona aiga o tagata o e faia le finagalo o le Tama Faalelagi. Sa aoaoina nisi o nei mea na tutupu ina ua e suesueina le Mataio 12:22–35.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mareko 2–3 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: