Iunite 14: Aso 2

Ioane 8

Folasaga

A o i ai le Faaola i Ierusalema mo le Tausamiga o Fale Fetafai, sa aumaia e nisi o tusiupu ma Faresaio ia te Ia se fafine sa tausalaina i le mulilua ma fai atu pe ua tatau ona fetogia o ia, e tusa ai ma le tulafono a Mose. Sa Ia faafememeaiina i latou na molia maia ae faaali atu le alofa mutimutivale i le fafine. Sa tautino atu foi e Iesu o loo molimau mai le Tama ia te Ia, ma sa Ia aoao atu foi e uiga i le saolotoga mai le agasala. Ina ua folafola atu e Iesu Keriso o Ia o le Ieova silisili, sa taumafai le au Faresaio e fetogia o Ia i maa.

Ioane 8:1–11

O se fafine na molia i le mulilua ua aumaia i luma o le Faaola

Sa mananao le au tusiupu ma le au Faresaio e faamaasiasi Iesu i luma o tagata ma faatuina se mafuaaga e tuuaia ai o Ia ona sa latou mananao e puefaapagotaina o Ia ma fasiotia o Ia (tagai Ioane 7:1, 32).

Faitau le Ioane 8:2–5, ma vaavaai mo mea na fai e le au tusiupu ma le au Faresaio a o aoao atu Iesu i le malumalu i Ierusalema.

E tusa ai ma le Ioane 8:6, aisea na aumaia ai e tusiupu ma Faresaio le fafine mulilua ia Iesu?

Sa faamatala e Elder Bruce R. McConkie o le Korama a Aposetolo e Toasefululua, le ala na mafai ai e tusiupu ma Faresaio ona faaaogaina lenei mea o se mafuaaga e tuuaia ai Iesu:

“E oo mai i le taimi o Iesu … ua le o toe faasalaina le mulilua i le oti. Ioe, e le mafai ona toe faasalaina i le oti e aunoa ma le faatonuga ma le faamaoniga a alii sili o Roma, ma o le mulilua, sa lei faasalaina i le oti i le tulafono a Roma.

“O le aumaia o lenei fafine mulilua ia Iesu, sa faufau e tusiupu ma le au Faresaio le mailei lea mo le Matai: (1) A faapea e ioe o ia faatasi ma Mose e tatau ona fetogia o ia i maa, o le a (a) fafaguina e ia le ita o tagata ona e foliga mai ua fautuaina le toe laga mai o se faasalaga sa lei lagolagoina tele, ma (e) feteenai [faasaga] i le tulafono faalemalo o loo agiagia nei e ala i le faatagaina o mea faasaina e Roma. (2) Afai e le ioe o ia faatasi ma Mose ma fautuaina se isi mea e itiiti ifo i lo le oti e ala i le fetogia i maa, o le a molia o ia i le mimiloina o le tulafono, ma le fautuaina o le le faaaloalo ma le se’e ese mai faiga paia o aso ua tuanai” (Faamatalaga o Aoaoga Faavae o le Feagaiga Fou, 3 vols. [1965–73], 1:450–51).

Nai lo le tali atu ia i latou, sa ”punou i lalo, ma tusi i lona tamatamaai lima i le eleele” (Ioane 8:6).

Faitau le Ioane 8:7–8, ma vaavaai mo le tali a le Faaola i le au tusiupu ma Faresaio.

O le a sou manatu o a ni mafaufauga o tusiupu ma Faresaio po o ni lagona ia ua latou faalogo atu i le tali a Iesu?

Ina ua uma ona faalogo atu i le tali a le Faaola, sa lagona le tausalaina o e na molia atu le fafine ma sa latou tuua e aunoa ma le faasalaina o le fafine (tagai Ioane 8:9).

O a ni lagona e te manatu na i ai i lenei fafine ina ua faailoa atu agasala ia Iesu ma se anoanoai o tagata? Faitau le Ioane 8:10–11, ma vaavaai mo mea na fai atu ai le Faaola i le fafine ina ua o ese tagata uma.

O le Faaliliuga a Iosefa Samita o le Ioane 8:11 ua faaopoopo ai mea nei: “Ma sa vivii atu le fafine i le Atua mai lena lava ituaso, ma sa talitonu i lona suafa” (Faaliliuga a Iosefa Samita, Ioane 8:11 [i le Ioane 8:11, vaefaamatalaga i]).

E lei taliaina e le Faaola le agasala a lenei fafine ae sa faatonuina o ia e “alu, ma aua nei toe agasala” (Ioane 8:11). Mai le fuaiupu 11 ua tatou aoao ai i le upumoni lenei: E faaalia e le Faaola le alofa mutimutivale ia i tatou i le tuuina mai o avanoa e salamo ai. Mafaufau pe mafai faapefea e lenei tala ona faateleina lou mautinoa e alofa mutimutivale Iesu Keriso ma agalelei ma finagalo e faamagalo i latou o e salamo faamaoni.

Ioane 8:12–30

Ua aoao mai Iesu faapea e molimau mai le Tama ia te Ia

Mafaufau i se mea teuteu. Ona moeiini lea o ou mata ma, taumafai e tusi i se isi fasipepa se ata faigofie o le mea e aunoa ma lou tilotilo i ai.

O faape’i lau ata pe a faatusatua ma le mea na e mafaufauina?

E ese mai le atatusi, o a nisi mea e mafai ona sili atu ona e faia pe a mafai ona e vaai i mea o loo e faia?

I le taimi o le Tausamiga o Fale Apitaga, e fa tuugalamepa auro tetele (e faaigoa foi o menora po o moliga’o) e faamalamalama ai laufanua o le malumalu i le taimi o siva ma isi faafiafiaga sa faia i le tuneva o le po ma le taeao po. O nei tuugalamepa sa le gata ina maua ai le malamalama mo faafiafiaga, ae sa faatusa foi ia Isaraelu e tatau ona avea ma malamalama i e o savavali i le pogisa.

Faitau le Ioane 8:12, ma vaavaai mo mea na tautino atu e Iesu e uiga ia te Ia lava a o Ia aoao atu i le malumalu i talaane o le mea sa faatutu ai tuugalamepa. Mafaufau e faailoga mea e te maua.

Ua tatou aoao mai lenei fuaiupu o Iesu Keriso o le Malamalama o le Lalolagi.

Sa faamalamalamaina e menora tetele laufanua o le malumalu i le taimi o le Tausamiga o Fale Apitaga.

Faamaea le mataupu faavae lenei mai mea e mafai ona tatou aoao mai le aoaoga a le Faaola i le Ioane 8:12: Afai tatou te mulimuli i le Faaola, o le a tatou

1. Tali le fesili lenei, i lau api talaaga mo le suesueina o tusitusiga paia: O a ni ou lagona i le fesoasoani a le Faaola e te aloese ai i le savali i le pogisa faaleagaga?

O le tele o valoaga i le Feagaiga Tuai o loo ta’u mai ai o le a avea le Mesia ma malamalama i nuu uma (tagai, mo se faataitaiga, Isaia 49:6; 60:1–3). O le mea lea, i le tautino atu o Ia lava o le Malamalama o le Lalolagi, sa folafola mai ai e Iesu o Ia o le Mesia.

Sa tausalaina e le au Faresaio ia Iesu i le molimau mai ia te Ia lava (tagai Ioane 8:13). Sa tautino atu e Iesu o Ia ma Lona Tama ua molimau mai i le Faaola ma le Alo o le Atua (tagai Ioane 8:14–18).

Faitau le Ioane 8:19, ma vaavaai mo mea na fetalai ai Iesu e uiga i le malamalama o le au Faresaio i le Tama Faalelagi.

E faavae i le fuaiupu 19, ua tatou aoao ai le mataupu faavae lenei: A o tatou aoao ma iloa Iesu Keriso, ona tatou iloa lea o le Tama.

Na aoao mai Elder Jeffrey R. Holland o le Korama a Aposetolo e Toasefululua i le ala tatou te iloa ai e uiga i lo tatou Tama Faalelagi a o tatou aoao e uiga i Lona Alo o Iesu Keriso:

“O le aotelega silisili lea o le upumoni na afio mai Iesu e fetalai i ai ma fai, aemaise lava i Lana taulaga togiola ma le puapuaga, na Ia aoao mai ai ia i tatou po o ai le Atua lo tatou Tama Faavavau ae pe faapei foi o ia, faapea le atoatoa o le gauai atu o Ia i Lana fanau i soo se augatupulaga ma soo se atunuu. Sa taumafai Iesu e ala i upu ma galuega e faaali ma faamanino mai ia i tatou le natura moni o Lona Tama, lo tatou Tama o i le Lagi. …

“O le fafagaina la o e sa fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Le e “alofa tunoa ma alofa mutimutivale, e telegese lona toasa, e onosai ma tumu i le agalelei’ [Lauga i le Faatuatua (1985), 42]” (“O Le Silisiliese o le Atua,” Ensign po o le Liahona, Nov. 2003, 70, 72).

I le Ioane 8:21–30 tatou te faitau ai sa lapataia e le Faaola le au faresaio afai latou te lei talitonu ia te Ia, o le a oti i latou ia latou agasala. Sa Ia aoao atu foi faapea Na te le faia lava se mea na o Ia lava; ua na o mea lava e aoao atu o Ia e le Tama Na te faia.

Ioane 8:31–36

Ua aoao atu e Iesu le saolotoga mai le agasala

Pe na i ai se taimi na le mafai ai ona e gaoioi, pei o se taimi na saisai ai oe pe ua le mafai ona e alu ese mai i si ou pausisi? Na faapefea ni ou lagona? A o e suesueina le vaega lenei o le lesona, vaavaai mo mea e taitai atu ai i tapu faaleagaga ma mea e tau atu i le saolotoga faaleagaga.

Faitau le Ioane 8:31–32, ma vaavaai mo mea na fetalai le Faaola e manaomia ona tatou faia ina ia saoloto ai. Ona, faavae lea i mea sa e aoaoina, faatumu lea o avanoa taitasi i le atalea:

Na lisi mai e Elder Bruce R. McConkie nisi o saolotoga e mafai ona tatou olioli ai pe afai e tatou te tumau i le afioga a Keriso, avea ma Ona soo, ma iloa le upumoni: “O le saoloto mai le mana faataumaoi o aoaoga faavae pepelo; saoloto mai le noanoataga o le manao ma le tuinanau; saoloto mai filifili o le agasala; saoloto mai mea leaga uma ma faatosinaga piopio ma mai mana uma e tuuitiitia ai ma faataumaoia ai; saoloto mai le oo atu i saolotoga e le faatuaoia e olioli ai i lona atoatoaga e sapi ai na o tagata ua faaeaina” (Faamatalaga o Aoaoga Faavae o le Feagaiga Fou, 1:456–57).

Faitau le Ioane 8:33, ma vaavaai mo mea na talitonu ai Iutaia sa faasaolotoina ai i latou.

Na talitonu sese Iutaia faapea, sa na o le avea lava o i latou o e tupuga mai ia Aperaamo ma suli o le feagaiga faa-Aperaamo o le a faasaolotoina ai i latou faaleagaga. Faitau le Ioane 8:34–36, ma vaavaai mo mea na fetalai ai Iesu sa manaomia e tagata e faasaoloto mai ai.

Mai nei fuaiupu ua tatou aoao ai afai tatou te faia se agasala ae le salamo ai, ona avea lea o i tatou ma pologa a le agasala. O le a lou manatu i le uiga o le avea ma “pologa a le agasala” (Ioane 8:34)? O le upu na faaliliuina o le auauna i i e mafai foi ona faaliliuina o le pologa.

Suesue le ata lea:

Ua fememeai nisi o tagata, ma talitonu o le mulimuli i upu a Keriso ua tapu ai i latou, ae o le ola i faiga a le lalolagi e faasaoloto ai i latou. Ua aoao mai Elder D. Todd Christofferson o le Korama a Aposetolo e Toasefululua le ala e moni ai le faafeagai

“O le gauai atu i faaosoosoga a [Satani] e oo atu ai i ni filifiliga vaiti ma vaiti tele e iu lava ina leai se mea o totoe ma o mausa ua tuua i tatou e aunoa ma se puipuiga. …

“… O le lalolagi … [e manatu] o le usiusitai i tulafono a le Atua e ‘pologa’ (Alema 30:24, 27). E faapefea la ona faasaolotoina e le usiusitai ma le mea moni i tatou? E faigofie lava ona tatou manatu i se auala masani e aumaia ai e le mea moni se tomai e faia ai mea e le mafai ona fai po o le alofia o ni faalavelave e ono tatou tigaina ai. …

“… E i ai se isi e masalosalo e, ala i le maua uma o le malamalama ma mea moni, o loo i ai i le Atua le saolotoga silisili i le mea e avea ai ma le mea e fai?

“E pei lava, a o tuputupu lo tatou malamalamaaga i mataupu faavae ma aoaoga, o le faalauteleina foi lea o lo tatou saolotoga. Muamua, e tele atu a tatou filifiliga ma e tele atu mea tatou te ausia ma mauaina faamanuiaga silisili ona e tele tulafono e mafai ona tatou usitaia. Mafaufau i se apefai—soo se tulafono po o se poloaiga fou tatou te aoaoina e pei lava o se isi vae o le apefai ua mafai ona tatou aea i luga atu. Lona lua, i le maua ai o se malamalamaaga faaopoopo e mafai ona tatou faia ni filifiliga poto ona ua mafai ona tatou iloa manino e le gata i isi filifiliga ae faapea foi i taunuuga e mafai ona oo i ai” (“Filifiliga Saoloto,” Ensign, Iuni 2009, 49–51).

2. Vaavaai i le tamaitusi Mo Le Malosi o le Autalavoumo faataitaiga pe faapefea e le usiusitai i poloaiga ma tulaga faatonuina ona tau atu i le saolotoga ma pe faapefea e le le usitai ona tau atu i le saisaitia. Filifili se tulaga faatonuina se tasi mai le tamaitusi, ma i lau api talaaga mo le suesueina o tusitusiga paia, kopi ma faatumu le siata lea:

   Faaaoga tulaga faatonuina mai le Mo Le Malosi o le Autalavou.
   O a ni auala e aumaia ai le saolotoga i le ola ai i lenei tulaga faatonuina?	O a ni auala e aumaia ai le saisaitia i le le ola ai i lenei tulaga faatonuina?

3. O a saolotoga na folafola mai i le Mo Le Malosi o le Autalavou ua e iloa e oe lava ia o se taunuuga o le usitai i poloaiga ma tulaga faatonuina? I lau api talaaga mo le suesueina o tusitusiga paia, tusi ai ia le itiiti ifo i le tasi le ala patino o le a e saili ai ia saoloto e ala i le ola e tusa ai ma aoaoga a le Faaola.

Ioane 8:37–59

Ua molimau mai Iesu i Lona paia

Mafaufau i se tasi e te iloaina e pei uma lava o lona tama. Mafaufau i se tasi e matuai ese lava mai lona tama.

O le Ioane 8:37–50 o loo tusia ai na ta’u atu e Iesu Keriso i Iutaia le talitonu e faapea, na Ia fetalai i afioga a Lona Tama, sa latou faia galuega a lo tatou tama. Sa tetee atu, ma fai atu Iutaia o lo latou tama o Aperaamo. Ona aoao atu lea e le Faaola o i latou o fanau a Aperaamo “e faia galuega a Aperaamo” (Ioane 8:39) ma o le a le sailia lava e fasiotia se tasi o le aoaoina atu upumoni. Na ta’u atu e Iesu i nei Iutaia (o le au Faresaio) o lo latou tama o le tiapolo. Sa Ia faamatala atu o i latou o e talia le afioga a le Atua e o le Atua. Sa fai mai Iutaia le talitonu ma feitai, o Iesu o se Samaria (lea sa talitonu Iutaia o tagata aupito maualalo ia) ma sa uluitino e se temoni.

Faitau le Ioane 8:51–53, ma vaavaai mo mea na fesili ai Iutaia i le Faaola.

Faitau le Ioane 8:56–58, ma vaavaai mo le tali a Iesu i le fesili a le au Faresaio. Faitau foi le Ioane 8:58, vaefaamatalaga e,ma vaavaai mo le uiga o le faaupuga “O AU.” (Manatua: O le Septuagint o le faaliliuga faa-Eleni o le Feagaiga Tuai.)

O le faaupuga “O Au” e taua aua e faailoa mai ai Ieova, o le suafa na iloa ai e Iutaia le Atua o Aperaamo, Isaako, ma Iakopo i taimi o le Feagaiga Tuai. O le faaigoaina o Ia lava “O a’u” na tautino mai ai e Iesu o Ia o le Atua o le Feagaiga Tuai. E mafai ona e tusia le aoaoga faavae lea i le laina o lau tusi paia i autafa o le Ioane 8:58: O Iesu Keriso o Ieova, o le Atua i le Feagaiga Tuai.

Aisea e te manatu ai e taua mo i tatou le iloa o Iesu Keriso o Ieova, o le Atua o le Feagaiga Tuai?

Faitau le Ioane 8:59, ma vaavaai pe na faapefea ona tali atu Iutaia i le tautinoga a le Faaola o Ia o Ieova.

Sa fetagofi tagata Iutaia i maa ma le faamoemoe e fasiotia ai Iesu, ma le talitonu ua Ia upuleaga e ala i le faailoa mai o Ia lava o Ieova.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Ioane 8 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga:

Tali mo le ata e faavae i le Ioane 8:31–32: Afai tatou te tumau i le afioga a Iesu Keriso, ona avea lea o i tatou ma Ona soo ma iloa ai le upumoni, lea o le a faasaoloto ai i tatou.