A o lei puapuagatia le Faaola i Ketesemane, sa Ia ofoina atu Lana Tatalo maoae o le Faatoga. Sa Ia tatalo ina ia iloa e Ona soo ma i latou uma o e mulimuli ia te Ia le Tama Faalelagi ma maua le ola e faavavau, ma sa Ia tatalo ia tasi i latou ma Ia ma Lona Tama.
Ua faalupe e Iesu Keriso le Tama Faalelagi i le tatalo
Mafaufau i nisi o tagata iloga e te iloaina se mea e uiga i ai.
Mafaufau laia i tagata i lou olaga e sili ona e iloa.
O le a le eseesega i le va o le iloaina e uiga i se tasi ma le iloaina moni o lena tagata? I le avanoa lea, tusi ai ni nai mea e mafai ona e faia ia e iloa moni ai se tasi:
Na aoao mai e le Faaola le taua o le iloaina o le Tama Faalelagi ma Ia. A o e suesueina le Ioane 17, vaavaai mo upumoni o le a fesoasoani e te mulimuli ai i le ala o le a taitai atu ai oe i le taimi, e le gata ia iloa atili ai e uiga i ai, ae iloa lelei atili ai foi le Tama Faalelagi ma Iesu Keriso.
Ata
Iesu Keriso
Ina ua uma le Talisuaga Mulimuli, sa savavali le Faaola faatasi ma Ona soo i le Faatoaga o Ketesemane. Ae latou te lei taunuu i le faatoaga, sa tu Iesu e ofo atu se tatalo. Ua lauiloa o le Tatalo Faapuluvaga. O se tasi uiga o le upu puluvaga o le tautala atu i se tasi e fai ma sui o se isi tagata. I le tulaga lea, sa fetalai Iesu Keriso i le Tama Faalelagi e fai masui o Ona soo, e aioi atu ai ina ia latou maua le ola e faavavau.
Faitau le Ioane 17:1–3, ma vaavaai pe na faapefea ona faamatala e le Faaola le ola e faavavau. O le (Ioane 17:3 o se fasifuaitau o se mau tauloto. Atonu e te manao e faailoga le fuaiupu lea i se auala e iloagofie ai ina ia fesoasoani i lou sueina i le lumanai.)
Mai le Ioane 17:3 ua tatou aoao ai le upumoni lenei: Ina ia maua le ola e faavavau, e tatau ona tatou iloa le Tama Faalelagi ma Lona Alo o Iesu Keriso.
Tali le fesili lenei, i lau api talaaga mo le suesueina o tusitusiga paia: E faapefea e le iloaina o le Tama Faalelagi ma le Alo ona ese mai le iloaina e uiga ia i Laua?
Ata
Elder Bruce R. McConkie
Faitau le saunoaga lea a Elder Bruce R. McConkie o le Korama a Aposetolo e Toasefululua, ma maka mea na ia ta’u mai o le uiga o le iloa o le Tama ma le Alo: “E ese le iloa e uiga i le Atua ese le iloa o ia. Tatou te iloa e uiga ia te ia pe a tatou iloa o ia o se tagata patino o lona faatusa lea a foafoa ai le tagata; pe a tatou iloa o le Alo ua tusa ia ma lona Tama; pe a tatou aoao o le Tama ma le Alo ua i ai i uiga faaleatua ma mana patino. Ae tatou te iloa i la’ua; e tusa ai ma le mauaina o le ola e faavavau, pe a tatou olioli ma iloa mea e tasi la te faia. O le iloa o le Atua o le mafaufau lea i mea e mafaufau i ai o ia, ia lagona mea na te lagonaina, ia maua le mana o ia te ia, ia malamalama i upumoni ua ia malamalama ai, mafaia ma na te faia. O i latou o e iloa le Atua ma avea e faapei o ia, ma maua lona ituaiga soifuaga, o le ola e faavavau lea” (Faamatalaga o Aoaoga Faavae o le Feagaiga Fou, 3 vols. [1965–73], 1:762).
O le iloaina o le Atua ma ave e faapei o Ia e mafai mo i tatou pe a tatou talia le Agaga Paia ma aai ma feinu i faamanuiaga uma o le Togiola a le Faaola. Peitai, o se faasologa lea o le a faifai pea i lenei olaga atoa ma pe a mavae foi lenei olaga (tagai Moronae 7:48; 10:32–33).
Tali fesili nei i lau api talaaga mo le suesueina o tusitusiga paia:
Aisea e le mafai ai e se tagata ona maua le ola e faavavau e aunoa ma le iloaina o le Atua le Tama ma Iesu Keriso?
O a ni auala e mafai ai ona tatou iloa atili le Tama ma le Alo?
I le Ioane 17:4–5 tatou te aoao ai na logo atu e le Faaola i Lona Tama ua uma le galuega na Ia tuu atu ia te Ia e fai. Sa Ia talosagaina Lona Tama ia faamamaluina o Ia i le mamalu lava e tasi sa ia te Ia i le muai olaga.
Faitau le Ioane 17:6–8, ma vaavaai mo mea na faia e Ona soo na latou iloa ai le Faaola. Atonu e te manao e faailoga mea e te maua.
Faitau leotele le kopi lea o le fuaitau o le mau tauloto Ioane 17:3:
“O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.“
O le isi, kolosi ese ni upu se tolu ina ia le mafai ai ona e toe iloa, ma toe faitau leotele le fuaitau, e aofia ai ma upu sa kolosi ese. Toe fai pea le mea o le kolosi ese o upu ma faitau leotele le fuaitau seia oo ina kolosi ese uma upu. Ona fai lea o le mea sili e te mafaia e toe tusi ai le fuaitau mai lou manatua i lau api talaaga mo le suesueina o tusitusiga paia.
Faitau le Ioane 17:9, 11–18, ma vaavaai po o a mea a tatalo ai Iesu mo Ona soo.
Matau sa ta’ua e le Faaola faapea, o le a nonofo pea Ona soo i se lalolagi sa leaga ma inoino ia i latou. Mai le Ioane 17:14–16 tatou te aoao ai, i le avea ai ma soo o Iesu Keriso, e ao ona tatou i ai i le lalolagi ae e le o ni o le lalolagi. Atonu e te manao e tusi le mataupu faavae lenei i autafa o au tusitusiga paia.
O le a sou manatu o le a le uiga o le i ai i le lalolagi ae le ni o le lalolagi?
O le saunoaga lea a Elder M. Russell Ballard o le Korama a Aposetolo e Toasefululua, e mafai ona fesoasoani e te malamalama ai pe faapefea ona ola i le lalolagi ae le o ni o o le lalolagi:
Ata
Elder M. Russell Ballard
“Tatou te sii mai soo lava i le Ekalesia le fuaitau lea: ’Ia i ai i le lalolagi a ia le avea ma ni o le lalolagi.’ …
“Atonu ua tatau ona tatou ta’ua le fuaitau … o ni lapataiga eseese se lua. Muamua,’Ia i ai i le lalolagi.’ Ia auai; ia logoina. Taumafai ia e malamalama ma ia faapalepale ma talisapaia le eseesega e i ai i tagata. Ia faia ni fesoasoani aoga i tagata e ala i le auauna atu ma auai. Lua, ’Ia le avea ma ni o le lalolagi.’ Aua le mulimuli i ala sese pe gauai atu foi e faataunuu pe talia le mea e le sa’o. …
“E manaomia ona sili atu ona faatosina e tagata o le Ekalesia isi nai lo o le faatosinaina o i tatou. E tatau ona tatou galulue e taofi le peau o le agasala ma le amioleaga, nai lo o le tafiesea e le peau. E manaomia e i tatou taitoatasi ona fesoasoani e foia le faafitauli nai lo o le aloese pe o le le amanaia foi o le faafitauli” (“O Iuga o le Televise,” Ensign, Me 1989, 80).
Mafaufau pe aisea ua finagalo ai le Alii ia tatou i ai pea i le lalolagi ae e le o ni o o le lalolagi.
I lau api talaaga mo le suesueina o tusitusiga paia, faamatala ai pe mafai faapefea e se tagata ona i ai i le lalolagi ae le o ni o o le lalolagi i mea taitasi nei: i le aoga, faatasi ma uo, ma i le upega tafailagi. Ona tusi lea o se auala patino se tasi o le a e saili ai e mulimuli atili i le Faaola e ala i le i ai i le lalolagi ae le o ni o o le lalolagi.
Ua tatalo le Faaola mo tagata uma o e talia Lana talalelei
E ui i a tatou taumafaiga silisili, tatou te le tumau ona mama atoatoa mai agasala ma mea leaga o loo i ai i le lalolagi. Afai e le mafai ona faamamaina i tatou mai a tatou agasala, o le a tapunia i tatou i fafo atu o le afioaga o le Atua e faavavau aua e leai se mea eleelea e mafai ona mau i Lona afioaga (tagai 1 Nifae 15:33–34).
Faitau le Ioane 17:20–23, ma vaavaai po o le a le mea na tatalo atu ai Iesu Keriso. Atonu e te manao e faailoga le upu tasi po o fea lava e ta’ua ai i nei fuaiupu.
Matau a tatalo le Faaola e le gata mo Ana Aposetolo ae faapea foi i latou o le a talitonu ia latou upu ina ia tasi i latou uma e faapei o Iesu ma le Tama e tasi. O nei fuaiupu ua faamanino ai o le Tama ma le Alo o tamalii maioio e toalua. Sa tatalo Iesu mo le lotogatasi faaleagaga, ae le o le faaletino.
O le a le mea e mafai ai e i tatou ona tasi ma le Tama ma le Alo?
Ata
Elder Jeffrey R. Holland
Na faamalamalama e Elder Jeffrey R. Holland o le Korama a Aposetolo e Toasefululua le auala tatou te tasi ai ma le Tama ma le Alo: “O le uiga sao o le upu faaperetania o le Togiola e malamalama gofie: at-one-ment, o le aumaia faatasi o ni mea sa tuu eseeseina pe vaevaeina” (“O le Togiola a Iesu Keriso,” Liahona, Mat. 2008, 34–35).
O le upumoni taua e tasi e mafai ona tatou aoao mai le Ioane 17:20–23 o le, a o tatou o mai ia Iesu Keriso ma talia faamanuiaga o Lana Togiola, e mafai ona tasi i tatou ma le Tama ma le Alo.
Mai mea ua e iloa e uiga i le Tama Faalelagi ma Iesu Keriso, aisea e te manao ai ia tasi ma i la’ua?
Faitau le saunoaga lea a Peresitene James E. Faust o le Au Peresitene Sili, ma vaavaai mo faamanuiaga e maua e i latou o e saili ia tasi ma le Tama Faalelagi ma Iesu Keriso.
Ata
Peresitene James E. Faust
“E tatau ona tatou saili ma le faamaoni e le na ona iloa le Matai, ae ia taumafai, e pei ona Ia valaau mai, ina ia tasi tagata uma ia te Ia (tagai Ioane 17:21), ina ‘ia faamalosia outou i le mana e lona lava Agaga i le tagata i totonu’ (Efe. 3:16). …
“O lau molimau lenei, ua tatou feagai ma taimi faigata. E ao ona tatou usiusitai ma le lototoa. O lau molimau o le a valaauina i tatou ina ia faamaoni lo tatou malosi ma mo aso o loma o lea faatumulia i mala ma faigata. Ae a iai se sootaga vavalalata ma le Atua, o le a tuuina mai se lototoa filemu” (“Ina Ia Matou Iloa Oe,” Ensign, Fep. 1999, 2, 5).
Tali le fesili lenei, i lau api talaaga mo le suesueina o tusitusiga paia: O le a sau mea e fai ina ia e iloa atili ai le Tama Faalelagi ma Iesu Keriso ma faamalosia ai lau sootaga ma i La’ua?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Ioane 17 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: