Folasaga i le 1 Peteru
Aisea e Suesue ai Lenei Tusi?
O se autu o loo maua atoa i le Tusi Faalauaitele Muamua a Peteru o le, e ala i le Togiola a Iesu Keriso, e mafai ai e soo o le Faaola ona onosaia faamaoni ma tali atu ai i puapuaga ma sauaga. O mataupu uma o le 1 Peteru o loo talanoa mai e uiga i tofotofoga po o puapuaga, ma na aoao mai Peteru, o le onosaia ma le faapalepale o tofotofoga e “silisili ona aoga i le auro” ma o le a fesoasoani ai i soo ia maua “le faaolaina o o [latou] agaga” (1 Peteru 1:7, 9). Sa faamanatu foi e Peteru i le Au Paia e uiga i lo latou faasinomaga “o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai” (1 Peteru 2:9). O le suesueina o le fautuaga a Peteru na tuuina mai i lenei tusi, e mafai ai ona e maua le faamoemoe, faamalosiauga, ma le malosi e mafai ona fesoasoani ia te oe i faafitauli lua te feagai.
O Ai na Tusia Lenei Tusi?
O le tusitala o le tusi lenei o “Peteru, o le aposetolo a Iesu Keriso” (1 Peteru 1:1).
“O Peteru sa igoa muamua ia Simona (2 Peteru 1:1), o se faifaiva o Petesaita na nofo i Kapenaumi ma lona toalua. … Sa valaauina Peteru faatasi ma lona uso o Aneterea e avea ma ni soo o Iesu Keriso (Mataio 4:18–22; Mareko 1:16–18; Luka 5:1–11). …
“… Sa filifilia e le Alii ia [Peteru] e umia ki o le malo i luga o le fogaeleele (Mataio 16:13–18). …
“Sa avea Peteru ma Aposetolo sinia i lona vaitaimi” (Guide to the Scriptures, “Peter,” scriptures.lds.org).
O tusitusiga a Peteru ua faaalia ai lona tuputupu ae mai se tagata faifaiva faatauvaa i se Aposetolo malosi.
O Anafea ma o Fea na Tusia ai?
Sa tusia e Peteru le tusi muamua lenei pe o se mea o le ogatotonu o le T.A. 62 ma le 64. Sa ia tusia mai “Papelonia” (1 Peteru 5:13), atonu o se faatatauga faafaatusa ia Roma.
Ua matele lava ina taliaina o Peteru na maliu i le taimi o le nofoaiga a le taitai Roma o Nero—atonu i le mavae o le T.A. 64, ina ua amata ona sauaina e Nero le au Kerisiano (tagai Bible Dictionary, “Peter, Epistles of”).
O Ai Na Faatatau i ai ma Pe Aisea Foi?
Sa tusi atu e Peteru lenei tusi i tagata o le Ekalesia sa nonofo i itumalo e lima o Roma o Asia Minor, lea o loo i Take i ona-po nei (tagai 1 Peteru 1:1). Sa mafaufau Peteru o lana au faitau o le au “filifilia” a le Atua (1 Peteru 1:2). Sa ia tusia ina ia faamalosia ma faamalosiau atu i le Au Paia i le “tofotofo foi o lo [latou] faatuatua” (1 Peteru 1:7) ma ia saunia ai i latou mo se “tofotofoga pei o le afi” i le lumanai (1 Peteru 4:12). O le savali a Peteru na aoaoina ai foi i latou i le ala e tali atu ai i sauaga (tagai 1 Peteru 2:19–23; 3:14–15; 4:13).
O le fautuaga a Peteru sa matuai fetaui tonu lava aua sa toeitiiti oo atu tagata o le Ekalesia i se vaitau o le faateteleina o sauaga. Ana le oo lava i le pe tusa o le T.A. 64, pe o le vaitaimi lea na tusia ai e Peteru le tusi lenei, na faatagaina ai loa faalauaitele e le malo o Roma le faaKerisiano. Ia Iulai o le tausaga lena, sa faaleagaina ai e se afi le vaega tele o Roma, ma o tala feaveai sa faapea o le Taitai lava ia o Nero na faatonuina le amataina o le afi. I se taumafaiga e sui le tuuaiga mo le faalavelave, sa tuuaia ai e nisi o taitai iloga o Roma le au Kerisiano i le amataina o le afi. O lenei mea na oo atu ai i sauaga ogaoga o le au Kerisiano i le Malo atoa o Roma. Sa faailoa mai e Peteru e faapea, afai e “faatigaina [le Au Paia] …aua o [i latou] o Kerisiano” (1 Peteru 4:16), e mafai ona latou lagona le olioli i le iloa o loo latou mulimuli i tulaga aao o Iesu Keriso (tagai 1 Peteru 2:19–23; 3:15–18; 4:12–19).
O a Nisi o Vaaiga Iloga o Lenei Tusi?
I le totonugalemu o puapuaga ma sauaga sa feagai ma le Au Paia i lona vaitaimi, sa apoapoaina ai e Peteru i latou ia liliu atu i le tasi ma le isi i le alofa ma le agalelei (tagai 1 Peteru 1:22; 3:8–9). E le gata i lea, tatou te faitau i le 1 Peteru 5 e faapea, na faamatala mai e Peteru le auala e tatau ai i taitai o le Ekalesia ona faamalosia ai a latou aulotu.
O lenei tusi atonu o loo i ai faatatauga faaletusi paia aupito manino i le lalolagi o agaga ma le galuega o le faaolataga o loo fai ai iina. Sa taua puupuu e Peteru e faapea, sa asiasi atu Iesu Keriso i le lalolagi o agaga e talai atu i agaga le usiusitai o e sa ola i le vaitaimi o Noa (tagai 1 Peteru 3:18–20). Sa ia faaopoopo mai, sa talai atu le talalelei i e ua maliliu ina ia maua ai e tagata taitasi na maliliu le avanoa ina ia faamasinoina ai i tulaga tutusa ma e o loo soifua (tagai 1 Peteru 4:5–6). I lo tatou tisipenisione, sa mafaufau loloto ai Peresitene Iosefa F. Samita i le uiga o le 1 Peteru 3:18–20 ma le 1 Peteru 4:6 ma ona mauaina ai se faaaliga ua faamanino mai ai aoaoga faavae e uiga i le lalolagi o agaga (tagai MF&F 138).
1. Otootoga
1 Peteru 1:1–2:10. Ua tusi Peteru e uiga i le manaomia e le Au Paia ona tuputupu ae faaleagaga ina ia mafai ona maua taui e faavavau. O le folafolaga o le faaolataga e mafai ona tupu e ala i le toto pele o Iesu Keriso. O le Au Paia o “se tupulaga ua filifilia …,o tupu ma ositaulaga, o le nuu paia, ma le nuu na faatauina mai” (1 Peteru 2:9) o e ua mauaina le alofa tunoa o le Atua.
1 Peteru 2:11–3:12. E saili soo o Iesu Keriso e faamamalu i tagata uma ma usitai atu i pulega ma tulafono faalemalo. Ua saunoa atu Peteru i ni vaega faapitoa o le Au Paia: o tagatanuu saoloto, auauna, ava, ma tane.
1 Peteru 3:13–5:14. Pe afai o sauaga e mafua ai ona pagatia le Au Paia, e tatau ona latou manatua le faataitaiga a Iesu Keriso, o le na puapuagatia ona maua ai lea o le faaeaga. Sa talai atu e Iesu Keriso le talalelei i e ua oti ina ia mafai ona latou maua se faamasinoga tonu. E mulimuli taitai o le Ekalesia i le faataitaiga a Iesu Keriso i le tausiga o le lafu a le Atua. E tatau i le Au Paia ona lotomaualalo i latou lava ma lafo atu o latou faafitauli i le Atua.