Iunite 29: Aso 3

1 Peteru 1–2

Folasaga

Sa tusi atu le Aposetolo o Peteru e faamalosi le faatuatua o le Au Paia a o latou tigaina i sauaga mamafa mai le Malo o Roma. Sa ia faamamafa atu, na faaolaina i latou e ala i le toto pele o Iesu Keriso, ma faamanatu atu ia i latou e uiga i lo latou tupuaga paia i le avea ai ma tagata tulaga ese o le Atua. Sa ia faatonuina le Au Paia ia viia le Atua i tagata ma onosai i sauaga e pei ona sa faia e Iesu Keriso.

1 Peteru 1

Ua aoao e Peteru le Au Paia e uiga i o latou tofi faaolioli ma le alagatatau ai o tofotofoga

Na saunoa Elder M. Russell Ballard o le Korama a Aposetolo e Toasefululua e faapea, “A o ou fealuai i le Ekalesia atoa, ou te vaai ai i le aupaia ua tofotofoina i puapuaga ogaoga” (“Hyrum Smith: ‘Firm As the Pillars of Heaven,’” Ensign, Nov. 1995, 9).

O se kate o se koneteina e faamama ai metala po o isi mea, o lona uiga e tafu ma faaliusuavai ina ia mafai ona aveese otaota ma faamalosia ai le oloa e maua mulimuli ane ai. E pei ona sa faaaoga e Elder Ballard, “o le ogaoga o puapuaga” e mafai ona faatatau i tofotofoga luitauina o le olaga. O a ni tofotofoga po o “puapuaga ogaoga,” ua e oo i ai?

Sa tusia e le Aposetolo o Peteru lenei tusi ia faamalosia ai ma uunaia ai le Au Paia a o latou feagai ma tofotofoga. Seia oo ane i le tusa o le T.A. 64, i le taimi na tusia ai e Peteru lenei tusi, na faaalia ai e le malo o Roma se faapalepale faalauaitele mo le faaKerisiano. Ia Iulai o le tausaga lena, sa faatamaia ai e se afi [se vaega] tele o Roma. Sa tuuaia e nisi o tagata maualuluga o Roma le au Kerisiano i le amataina o le afi. O lenei mea na oo atu ai i le ogaoga o sauaga o le au Kerisiano i le Malo atoa o Roma. O nisi o faiga le lelei sa oo i le au Kerisiano na oo mai mai a latou uo ma tuaoi sa i ai muamua.

A o e suesue i le 1 Peteru 1–2, vaavaai mo upumoni e mafai ona fesoasoani e te tumau faamaoni ai i taimi o ou tofotofoga.

I le 1 Peteru 1:1–2, sa faafeiloai ai e Peteru le Au Paia i itumalo o Roma o Asia Laitiiti (o Take i aso nei) ma faamanatu atu ia i latou o i latou o se nuu filifilia.

Faitau le 1 Peteru 1:3–5, ma vaavaai mo faamanuiaga i le lumanai sa folafola atu i le Au Paia. Mafaufau e faailoga mea e te mauaina.

I tusitusiga paia o upu faaolataga ma le faaeaga e masani ona faaaoga e faauiga i le mea lava e tasi. I le 1 Peteru 1:5, sa faatatau atu Peteru i le faaeaga, po o le ola e faavavau, o le nofo ai i le afioaga o le Atua ma faaauau ai o ni aiga (tagai MF&F 132:19–20).

Faitau le 1 Peteru 1:6, ma vaavaai pe na faapefea ona tali mai le Au Paia i le folafolaga o nei faamanuiaga i le lumanai. Ia matau o le upu tofotofoga e faatatau i tofotofoga ma puapuaga (tagai 1 Peteru 1:6, vaefaamatalaga e).

E mafai ona tatou aoao i le upumoni lenei mai le 1 Peteru 1:3–6: E ui ina tatou oo i tofotofoga, e mafai ona tatou oiloli i le Togiola a Iesu Keriso ma i faamanuiaga i le lumanai ua folafola mai le Atua e tuuina mai ia i tatou.

Na aoao mai Peteru, e ui lava i faigata tatou te oo i ai, e mafai ona tatou olioli aua o le a tatou maua faamanuiaga e tele e ala i le Togiola a Iesu Keriso. E mafai faapefea e le manatuaina o le Togiola a Keriso ona fesoasoani ina ia e fiafia e tusa lava pe o e feagai ma ni tofotofoga.

Faitau le 1 Peteru 1:7–9, ma vaavaai mo le mea na aoao atu e Peteru e uiga i le tofotofoina o le faatuatua o le Au Paia. Mafaufau e faailoga le mea na ia faatusaina i ai le tofotofoina o le faatuatua o le Au Paia.

O le faatuatua, e pei o le auro, e aoga. Ae peitai, o le faatuatua e silisili ona aoga i le auro ona o le auro e “faaumatia ai” (1 Peteru 1:7) ae o le faatuatua ia Iesu Keriso e oo atu ai le faaolataga (tagai 1 Peteru 1:9), lea e faavavau. Ma le isi, o le auro e faamamaina i le afi aasa, ma e faapena foi, o lo tatou faatuatua ma talitonuga e luitauina i nisi o taimi i faalavelave, fesili, ma masalosaloga. O le tasi o upumoni e mafai ona tatou aoao mai i upu a Peteru i le Au Paia o le, e tofotofoina ma faamamaina o tatou faatuatua ia Iesu Keriso a o tatou onosaia ma le faamaoni tofotofoga.

1. Tali fesili nei i lau api talaaga mo le suesueina o tusitusiga paia:

   1. O a ni tofotofoga o loo feagai ma oe po o au uo i le taimi nei?

   2. O a ni auala o tofotofoina ai e nei tofotofoga lou po o o latou faatuatua?

Faitau le faamatalaga lenei a Elder Neil L. Andersen o le Korama a Aposetolo e Toasefululua, ma faailoga le mea sa ia uunaia i tatou e fai pe a tatou oo i le tofotofoina o o tatou faatuatua:

“E faapefea ona e tumau ma le ‘mausali ma le le mafaagaeetia’ [Alema 1:25] i se taimi o le tofotofoga o le faatuatua? E te faatofu oe lava ia i mea moni o loo fesoasoani e fausia le fatu o lou faatuatua [a o le’i oo i le tofotofoga]: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.

“Pe a tatou fetaiai ma se tofotofoga o le faatuatua—po o le a lava lau mea o fai, e te le laa ese lava mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua ua tai pei lava o le tuua o le saogalemu o se malutaga malupuipuia o afā ae ua oo mai se asiosio” (“Tofotofoina O Lo Outou Faatuatua,” Ensign po o le Liahona, Nov. 2012, 40}.

Aisea e te manatu e taua ai le faia o mea na uunaia i tatou e Elder Anderson e fai pe a tofotofoina o tatou faatuatua?

Faitau le 1 Peteru 1:13–17, ma vaavaai mo le mea na uunaia e Peteru le Au Paia e fai ina ia onosaia faamaoni ai o latou tofotofoga. Mafaufau e faailoga mea e te maua. O le fuaitau “fusi ae i sulugatiti o outou mafaufau” i le fuaiupu 13 o lona uiga o le saunia o oe lava.

Faitau le 1 Peteru 1:18–21, ma vaavaai mo ni upumoni faaopoopo na aoao e Peteru i le Au Paia e fesoasoani ia i latou ia onosaia ma le faamaoni o latou tofotofoga nai lo o le lafoaia o o latou faatuatua.

O nisi nei o upumoni sa aoao atu e Peteru i le Au Paia i nei fuaiupu: Ua faaolaina i tatou e ala i le toto taua o Iesu Keriso. Ona sa soifua Iesu Kerios i se soifuaga e leai se agasala, ua mafai ai ona Ia ofoina mai o Ia lava o se taulaga atoatoa mo i tatou. Na muai faauuina Iesu Keriso e avea ma o tatou Faaola.

Na aoao mai le Perofeta o Iosefa Samita, “I le muai faapotopotoga i le lagi sa tatou i ai uma faatasi ma vaai ai i le Faaola ua filifilia ma tofia ma le ata o le faaolataga ua faia, ma tatou taliaina” (Aoaoga a Peresitene o le Ekalesia: Iosefa Samita [2007], 209).

E mafai faapefea e le manatuaina o nei upumoni ona fesoasoani i le Au Paia ia onosaia faamaoni o latou tofotofoga?

2. Mafaufau i se taimi na e filifili ai, pe na filifili ai se tasi e te iloa e onosai i se tofotofoga ma le faatuatua ia Iesu Keriso nai lo o le lafoai o lona faatuatua ia te Ia. I lau api talaaga mo le suesueina o tusitusiga paia, tusi ai e uiga i lena aafiaga ma ni auala na faamalosia ai i le faagasologa lou faatuatua po o le faatuatua o lena tagata i le Faaola.

I le 1 Peteru 1:22–25, sa uunaia e Peteru le Au Paia ia alofa le tasi i le isi ma ia manatua na toe fanauina i latou e ala i le afioga a le Atua, lea e tumau e faavavau.

1 Peteru 2:1–12

Ua faamamafa atu e Peteru tiutetauave o le Au Paia

O a nisi o auala e ese ai tagata o le Ekalesia mai ia i latou o e mulimuli atu i ala o le lalolagi? O a nisi o luitau tatou te ono fetaiai ona e ese i tatou?

A o e suesue i le 1 Peteru 2:1–12, vaavaai mo se mataupu faavae e mafai ona faamalosia ai lou manao ia ese mai le lalolagi.

E pei ona tusia i le 1 Peteru 2:1–8, ua aoao mai Peteru o le Au Paia faamaoni ua pei o ni maa ola ua atiina ae i luga o le maatulimanu o Iesu Keriso ma o i latou e le usiusitai e tiga ona o Ia aua e le lagolagoina e Ia lo latou le usiusitai.

Faitau le 1 Peteru 2:9–10, ma vaavaai pe na faapefea ona faamatala e Peteru le Au Paia faamaoni. Mafaufau e faailoga fuaitau e tulaga ese ia te oe.

O le fea o faalagiga na tuuina atu e Peteru i le Au Paia e sili ona e fiafia i ai?

Ina ia malamalama i le uiga o le, ia avea “o le nuu na faatauina mai,” faitau le 1 Peteru 2:9, vaefaamatalaga f.

E mafai faapefea e upu na faaaoga e Peteru e faamatala ai le Au Paia i le 1 Peteru 2:9–10 ona fesoasoani ia i latou ia maua le lototele a o latou feagai ma sauaga faalelotu?

Faitau le 1 Peteru 2:11–12, ma vaavaai mo le mea na aioi atu Peteru i le Au Paia e fai, i le avea ai ma nuu na faatauina mai pe faapelepeleina o le Alii. Ia matau, atonu na ta’ua e Peteru le Au Paia o “tagata ese” ma “e aumau” a le ona sa latou nonofo i se nuu sa ese tulaga faaleaganuu ma faaletapuaiga nai lo o le Au Paia, pe ona sa latou o ese mai lo latou aiga faalelagi, ae nonofo le tumau o ni tagata ola.

Sa ta’u atu e Peteru i le Au Paia e mafai ona avea i latou ma faataitaiga ia i latou e siomia i latou ma fesoasoani i isi e viia le Atua (tagai 1 Peteru 2:12). Mai le 1 Peteru 2:11–12 ua tatou aoao ai, Ua valaau le Atua i Lana Au Paia ina ia vavaeese ma tulaga ese mai le lalolagi ina ia mafai ona iloa e isi a latou faataitaiga ma viia ai o Ia. Mafaufau e tusi le mataupu faavae lenei i totonu o au tusitusiga paia.

Na saunoa Sister Elaine S. Dalton a o avea o ia ma peresitene aoao o Tamaitai Talavou: “Afai e te manao e fai se suiga i le lalolagi, e tatau ona e ese mai le lalolagi” (“Now Is the Time to Arise and Shine!” Ensign po o le Liahona, Me 2012, 124).

3. Tali fesili nei i lau api talaaga mo le suesueina o tusitusiga paia:

   1. O a nisi o auala ua talosagaina ai le autalavou o le Au Paia o Aso e Gata Ai ia vavaeese ma tulaga ese ai mai le lalolagi?

   2. O a auala ua aafia ai isi mo le lelei pe fesoasoani e taitai atu i latou i le Atua, ona o lau filifiliga ina ia vavaeese ma tulaga ese mai le lalolagi?

   3. O le a se mea e mafai ona e faia ia lelei atu ina ia vavaeese ma tulaga ese ai mai le lalolagi, ina ia mafai ona avea oe ma se faataitaiga? (Tusi se sini e uiga i le mea ua e fuafua e fai e avea ai o se faataitaiga i isi.)

1 Peteru 2:13–25

Ua fautuaina e Peteru le Au Paia ia onosai i puapuaga e pei ona sa faia e le Faaola

I le 1 Peteru 2:13–18, na aoao ai e Peteru le Au Paia ia gauai atu i latou lava i tulafono ma taitai o le malo na taitaia i latou (e aofia ai le malo o Roma lea na matua faamalosia sauaga ogaoga e faasaga ia i latou). Sa ia uunaia i latou o e sa puapuagatia i faigata o ni auauna ia onosaia o latou puapuaga i le faapalepale ma ia manatua sa silafia lelei i latou e le Atua.

Faitau le 1 Peteru 2:19–20, ma vaavaai mo le fautuaga a Peteru i le Au Paia i le ala e tatau ona latou onosaia ai puapuaga.

Sa uunaia e Peteru le Au Paia e tumau ma le onosai i o latou puapuaga. Faitau le 1 Peteru 2:21–25, ma vaavaai mo le faamatalaga e Peteru o le auala na tali atu ai Iesu Keriso i sauaga. Mafaufau e faailoga mea e te mauaina.

E tusa ai ma le 1 Peteru 2:21, o le a se mea e mafai ona tuuina mai mo i tatou e le puapuagatia o le Faaola?

E mafai ona tatou aoaoina le upumoni lenei mai aoaoga a Peteru e uiga i le onosaia o tofotofoga: E mafai ona tatou mulimuli i le faataitaiga a le Faaola e ala i le onosaia ma le faapalepale o tofotofoga.

Mafaufau i se mea e mafai ona e faia e mulimuli lelei ai i le faataitaiga a le Faaola i le onosaia ma le faapalepale o tofotofoga.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 1 Peteru 1–2 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lou faiaoga: