Mataio 4

Folasaga

Ina ua mavae Lona papatisoga, sa faaalu e Iesu aso e 40 e anapogi ma fesootai atu ai i le Tama Faalelagi i le vao. Ina ua mavae lea aafiaga, sa faaosoosoina Iesu e le tiapolo. O le faaaogaina o tusitusiga paia, na teena ai e Iesu faaosoosoga taitasi. Na maliu atu le Faaola i Kalilaia, lea na Ia tofia ai Peteru ma isi e mulimuli ia te Ia ma sa Ia aoao atu, talai, ma faamalolo.

Mataio 4:1–11

Ua teena e Iesu ia faaosoosoga a le tiapolo

Alu i se faamalama lata ane, ma mo le 30 sekone taulai lou mafaufau i se mea patino o i fafo ma aua e te tilotilo ese. (Afai e le mafai ona e tilotilo i fafo o se faamalama, taulai atu i se mea i totonu.)

Pe na i ai se mea na faalavelaveina ai oe mai le mea sa e taulai atu i ai? O le a se mea na e mafaufau i ai mo le 30 sekone?

A o tatou taumafai e taulai atu ma usitai i poloaiga a le Tama Faalelagi, e taumafai mea faatosina e ala i faaosoosoga e tosoese mai la tatou taulaiga ma tatai atu ai i tatou i le agasala. Mafaufau i auala e faaosooso ai oe e Satani ia fai le agasala. A o e suesueina Mataio 4, vaavaai mo se mataupu faavae e mafai ona e faaaoga e fesoasoani ai ia te oe e tetee ia faaosoosoga.

Ina ua maea Lona papatisoga, sa i ai se aafiaga o le Faaola lea na fesoasoani e saunia ai o Ia mo Lana galuega i le lalolagi nei. Faitau le Mataio 4:1–2, e faaaoga ai faasa’oga mai le Faaliliuga a Iosefa Samita i vaefaamatalaga mo fuaiupu uma ia. A o e faitau, maitau mea na oo i ai Iesu i le vao. (Matau i le talaaga lea, o le fesootai o lona uiga ia maua se fesootaiga vavalalata faaleagaga.)

Na fesoasoani faapefea le anapogi ma le fesootai ma le Tama Faalelagi e saunia ai Iesu mo Lana galuega i le lalolagi?

O Le Faaosoosoina o Iesu — Na teena e Iesu ia faaosoosoga.

O le siata lenei e mafai ona fesoasoani e te aoao ai e uiga i le aafiaga o Iesu ina ua faaosoosoina o Ia e le tiapolo. Suesue ia mau faasino o i le koluma agavale o le siata lenei. Ona tusi lea po o le a le mea na faaosooso e Satani ia Iesu e fai ma faamatala pe na faapefea ona tali atu Iesu i le faaosoosoga. A o e suesue, ia e iloa o le Faaliliuga a Iosefa Samita ua faasa’o ai faamatalaga o i le Mataio 4:5, 8 e faaalia ai o le Agaga, ae le o le tiapolo, na aveina le Faaola i ni nofoaga eseese (tagai foi Faaliliuga a Iosefa Samita, Luka 4:5 [i le Luka 4:5, vaefaamatalaga a]; Luka 4:9 [i le Luka 4:9, vaefaamatalaga a]).

	O mea na faaosooso e Satani ia Iesu e fai	Na faapefea ona tali atu Iesu i le faaosoosoga
Mataio 4:3–4
Mataio 4:5–7
Mataio 4:8–11

Tali le fesili lenei, i lau api talaaga mo le suesueina o tusitusiga paia: O le a se mea o faapupula mai e le tala lenei e uiga i auala a le tiapolo e faaosooso ai i tatou e fai le agasala?

Matau le talitutusa o tali a le Faaola i faaosoosoga taitasi. O mau na faaaoga e le Faaola na faamanino ai le ala sa’o o faatinoga mo faaosoosoga taitasi, ma sa Ia faaaogaina ia upumoni e aoao atu ai i nei mau. O se tasi lenei o mataupu faavae e mafai ona tatou aoao mai ai le faataitaiga a le Faaola: A tatou manatua ma faaaoga upumoni e aoao mai i tusitusiga paia, e mafai ona tatou teena faaosoosoga a le tiapolo. (Atonu e te manao e tusi lenei mataupu faavae i le autafa o au tusitusiga paia i autafa o le Mataio 4:3–11.

Mafaufau e uiga i le mataupu faavae lenei, aisea e taua ai le suesue e le aunoa i tusitusiga paia?

Na saunoa Elder Richard G. Scott o le Korama a Aposetolo e Toasefululu i le fautuaga lenei e uiga i le taulotoina o fuaitau o mau: “Ia atamai i le ala e te taulima ai tekinolosi. Faailoga mau taua i lau masini ma ia toe alu soo i ai e faitau. Afai e faitau soo e outou tagata talavou ni mau e faapei o le tele o taimi e auina atu ai e nisi o outou ia savali i tesi, o le a le umi ae outou taulotoina ni mau se fia selau. O fuaitau na o le a faamaonia ai se punavai mamana o musumusuga ma le taitaiga a le Agaga Paia i taimi e manaomia ai” (“Mo Le Filemu i le Aiga,” Ensign po o le Liahona, Me 2013, 30).

Faauma galuega atofaina nei i lau api talaaga mo le suesueina o tusitusiga paia:
1. Fai ni koluma se tolu i se itulau e tasi. I le koluma muamua, tusi ai agasala e tolu e ono faaosoosoina le autalavou o lau tupulaga e fai. I le koluma e lua, tusi ai se auala o taumafai Satani e faatosina ai se tasi e faia agasala taitasi na e lisiina i le koluma muamua. Ona sue lea o se mau patino o loo aoao mai ai upumoni e mafai e se tasi ona manatua ma faaaoga pe a faaosoosoina e fai agasala taitasi na e lisiina, ma tusi se mau faasino i le koluma lona tolu. (Mafauafu e faasino i fuaitau o mau tauloto, e pei o le Kenese 39:9 po o le Mataupu Faavae ma Feagaiga 10:5.)
2. I se isi itulau, tusi ai se mau o le a e manatua ma faaaoga i le isi taimi o le a faaosoosoina ai oe e fai le agasala. Mafaufau e tauloto le mau sa e filifilia.

Mataio 4:12–17

E nofo Iesu i Kalilaia

E tele ni mea na tutupu i le va o le faaiuga o aso e 40 o le Faaola i le vao (Mataio 4:11) ma le faafalepuipuia o Ioane le Papatiso (Mataio 4:12; tagai “Ogatusa o Evagelia”).

I le Mataio 4:12–15, ua tatou aoao ina ua maea Lona aafiaga i le vao, sa maliu atu Iesu i Kalilaia ma nofo ai i le aai o Kapanaumi. Na ta’ua e Mataio o le galuega a le Faaola i Kalialia na faataunuuina ai se valoaga na faia e Isaia (tagai Isaia 9:1–2). Faitau le Mataio 4:16, ma mafaufau e maka mea na vavalo ai Isaia o le a tupu.

Mai lenei valoaga ua tatou aoao ai ua aumaia e Iesu Keriso le malamalama i olaga o i latou o e i le pouliuli. A o e faaauau pea ona suesueina le Mataio ma isi Evagelia, vaavaai pe na faapefea ona faia e le Faaola lenei mea i Lana galuega.

E pei ona tusia i le Mataio 4:17, na amata ona talai atu e le Faaola le salamo e saunia ai mo le malo o le lagi (Lana Ekalesia) ua faatuina i tagata.

Mataio 4:18–22

Ua valaauina e Iesu ia Peteru ma isi e mulimuli ia te Ia

Vaavaai i le ata o le Faaola o valaau ia Peteru ma Aneterea, ma matau mea a Peteru ma Aneterea sa fai i le upega fagota.

A o vaavaai atu isi tagata i lena taimi atonu e faapea o Peteru ma Aneterea ua na o ni faifaiva masani, ae sa silasila atu Iesu i lo la gafatia tele ma le mea sa mafai ona avea ai i la’ua. Mafaufau i auala e pei ai i tatou o Peteru ma Aneterea.

A o faaauau pea ona e suesue i le Mataio 4, vaavaai mo mea e tatau ona tatou fai e avea ai ma tagata uma e finagalo ai le Alii mo i tatou.

Faitau le Mataio 4:18–22, vaavaai mo fegalegaleaiga i le va o le Faaola ma nisi o faifaiva.

Tuu oe lava i le tulaga o se tasi o nei alii. Mafaufau i mea e te ositaulagaina e mulimuli ai i le Faaola ma fesoasoani i Lana galuega i le taimi atoa. Aisea e ono faigata ai?

Manatu pe na faapefea ona tali atu nei faifaiva—o Peteru, Aneterea, Iakopo, ma Ioane—i le valaaulia a le Faaola. O le a se mea o faaali mai i lo latou tali vave atu e uiga i o latou tagata?

O a “faifaiva i tagata” Mataio 4:19?

Mafaufau pe aisea o le a tele atu ai mea lelei e faia e nei tagata i o latou olaga o ni “faifaiva i tagata” pe a faatusatusa i le avea ai o ni faifaiva.

Ua tatou aoaoina le mataupu faavae lenei mai le faataitaiga a nei tagata: Afai tatou te tali vave atu i valaaulia a le Faaola e mulimuli ia te Ia, e mafai e Ia ona tele atu mea na te faia i o tatou olaga nai lo mea tatou te mafaia na o i tatou lava.

Na tuu mai e Elder Joseph B. Wirthlin o le Korama a Aposetolo e Toasefululua se fesili e faatatau i “upega” i o tatou olaga:

“ ’Afai ae valaau mai le Faaola ia te oe i le aso, mata e te naunau e tuua au upega ae mulimuli atu ia te Ia?’ …

”E tele ituaiga o upega. O upega na tuua e Peteru, Aneterea, Iakopo, ma Ioane o ni mea faitino—o meafaigaluega sa fesoasoani e maua ai tupe e ola ai. …

“O upega e tele lava ina faauigaina o ni fuafuaga ia mo le pu’eina o se mea. I se isi manatu ae sili atu ona taua, e mafai ona tatou faauigaina se upega o soo se mea lea e toso ese maia pe taofia ai i tatou mai le mulimuli atu i le valaau a Iesu Keriso, le Alo o le Atua soifua.

“O le faaaogaina o upega i le tulaga lea e mafai ona faatusa i a tatou galuega, o mea tatou te fiafia i ai, o o tatou faanaunauga, ma le vaega e silisili atu, o o tatou faaosoosoga ma agasala. A faapuupuu, e mafai ona avea soo se mea e fai ma upega e tosoeseina mai i tatou mai la tatou sootaga ma lo tatou Tama Faalelagi po o Lana Ekalesia toefuataiina. (“Mulimuli Mai ia te Au,” Ensign, Me 2002, 15).

E fua i le faauigaga a Elder Wirthlin o “upega,” i lau api talaaga mo le suesueina o tusitusiga paia, faamatala ni faataitaiga se 3–4 pe mafai faapefea e upega o ona po nei ona taofia se tasi i o tatou taimi mai le tali atu i valaaulia a le Faaola e mulimuli ia te Ia.

Na aoao mai e Peresitene Ezra Taft Benson ia faamanuiaga e mafai ona maua pe a tatou mulimuli i le Faaola: “O alii ma tamaitai o e ua liliu atu o latou ola i le Atua o le a latou iloa ai e mafai ona ia faia le anoanoai o mea aoga i o latou olaga nai lo mea latou te mafaia. O le a Ia faalolotoina lo latou olioli, faalautele la latou vaaiga, faamataala o latou mafaufau, faamalolosia o latou musele, sii a’e o latou agaga, faatele o latou faamanuiaga, faateleina o latou avanoa, faamafanafana o latou agaga, faatulai uo, ma liligi mai le filemu. O ai lava e faamaumauina lona ola i le galuega a le Atua o le a maua le ola e faavavau“ (“Iesu Keriso—Meaalofa ma Faamoemoega,” Ensign, Tes. 1988, 4).

Tali fesili nei i lau api talaaga mo le suesueina o tusitusiga paia:
1. O le a se taimi na e, po o se tasi e te iloa, na maua ai ni faamanuiaga faapena ona o le tuua o popolega o le lalolagi ina ia e mulimuli ai i le Faaola?
2. A o e mafaufau i faamanuiaga tatou te mauaina i le mulimuli i le Faaola, aisea e te manatu ai e taua le tali vave atu i Ana valaaulia e mulimuli ia te Ia?

Mafaufau e faatu se sini mo se ala se tasi e mafai ona tali lelei atili atu ai i valaaulia a le Faaola e mulimuli ia te Ia.

Mataio 4:23–25

Na femaliuai Iesu i Kalilaia e aoao atu, folafola atu, ma faamalolo

Faitau le Mataio 4:23–25, ma mafaufau e maka ia mea na fai e le Faaola.

I lau suesuega atoa o Evagelia, o le a e aoao ai i mataupu patino o aoaoga a le Faaola, folafola atu, ma le faamalologa i le taimi o Lana galuega i le lalolagi.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataio 4 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: