Iunite 6: Aso 3
Mataio 25
Folasaga
A o aoao atu e Iesu Keriso na o Ona soo i luga o le Mauga o Olive e uiga i Lona Afio Mai Faalua, sa Ia aoao atu ia faataoto i taupou e toasefulu ma taleni. Sa Ia faamatala foi o le a Ia tuueseesea e amiotonu mai e amioleaga pe a toe foi mai o Ia.
Mataio 25:1–13
Ua aoao atu e Iesu Keriso le faataoto i taupou e toasefulu.
Mafaufau pe o a ni ou lagona pe a faapea o oe o le alii talavou i le tala lea na faamatala e Elder Jeffrey R. Holland o le Korama a Aposetolo e Toasefululua, o e sa faalogo i lenei faifetautalai talavou ua uma mai le misiona o faasoa lona aafiaga patino i se sauniga molimau.
“Sa … ia faamatalaina le taimi sa foi mai ai i le fale mai se tafaoga faamasani ae lei leva ona faauuina o se toeaina i le 18 tausaga. sa iai se mea na tupu i lena aso lea na le fiafia ai o ia. na te lei faamatalaina auiliili mai, e le tatau foi ona ia faamatalaina i se nofoaga faitele. E oo mai lava i lenei aso ou te le iloa lava le tulaga o le mea na tupu, ae na taua tele ia te ia aua na aafia ai lona agaga ma lona tulaga faatauaina faaletagata lava ia.
“Ao nofo o ia i lana taavale mo sina taimi i le auala taavale o lona fale, ma mafaufau loloto ma lagonaina le faanoanoa. moni mo le mea ua tupu, sa tamoe mai ma le popole lona tina e le lotu mai le fale ma agai sao mai lava i lana taavale. I lena lava taimi sa tau atu e le tina ia te ia sa pau le uso laititi o lenei alii i le fale, ma sa malosi le tau o lona ulu i lalo ma e foliga mai ua tau oso ai sona mai maliu. Sa vave ona valaauina e le tama le lotu le taavale a le falemai, ae e fai sina tuai o le taimi e o’o mai ai le fesoasoani.
“Sau e fai se mea,’sa tagi mai ai o ia. ‘E leai se mea a le tou Ekalesia e te faia i taimi faapenei? O loo i a oe le latou perisitua. Sau e fai se mea.’ …
“… ae ui o lea ina ua manaomia lona faatuatua ma lona malosi i lena po e se tasi na te matuai alofa lava i ai, sa le mafai ona tali atu lenei alii talavou. ”o le tauiviga ma lagona ma le fetuunaiga na ia lagonaina sa na faia—po le a lava lena mea—sa le mafai ai ona ia alu atu i luma o le Alii ma ole atu mo le faamanuiaga lea sa manaomia. (“O le Talitonuina o le Agavaa,” Liahona, Ape. 2014, 58–59).
Mata o a ni ou mafaufauga pe ana fai o oe le taulealea lea i lea tulaga? Aisea e matuai taua ai le saunia i taimi uma?
Mataio 25 o se faaauauga o le aoaoga a le Faaola i luga o le Mauga o Olive, ma e aofia ai faataoto e tolu o le sauniuniga lea o loo aoao ai i tatou i le ala e saunia ai e fetaiai ma le Alii pe a toe afio mai o Ia.
A o i ai i luga o le Mauga o Olive, sa aoao atu e Iesu Keriso Ona soo e uiga i le Afio Mai Faalua (tagai Mataio 24). O le faataoto i taupou e toasefulu, na aoao mai ai e Iesu e tatau ona tatou saunia mo Lona Afio Mai Faalua.
Faitau le Mataio 25:1–4, ma vaavaai mo elemene autu o le faataoto. Atonu e te manao e faailoga mea e te maua.
E tusa ai ma tu ma agaifanua i faaipoipoga faa-Iutaia, o le alii faaipoipo, po o le faatoafaiava faatasi ai ma ana uo mamae, e o atu i le po i le fale o le faatoanofotane. A maea le solo o le faaipoipoga iina, ona faaauau atu lea o le au valaaulia o le faaipoipoga i le maota o le faatoafaiava mo se tausamiga. O le au valaaulia o le faaipoipoga sa auai i le solo sa faamoemoe e avea a latou lava lamepa po o sulu“ e ta’u atu ai o i latou o se vaega o le faaipoipoga ma ia faaopoopo ai i le malamalama ma le matagofie o le faamoemoe (Tusi lesona a le Tagata Aoga o le Feagaiga Fou [Church Educational System manual, 2014], 78).
Faitau le vaega o totoe o le faataoto i le Mataio 25:5–13, ma vaavaai mo mea na fai e taupou popoto e toalima ma mea na fai e taupou valea e toalima.
Nai lo le faitau o le Mataio 25:5–13, e mafai ona outou maimoaina se vaega o le vitio “O i Latou o E e Popoto” (time code 0:00–5:46), lea e faaalia ai le faataoto i taupou e toasefulu. O loo maua lenei vitio i le LDS.org. A o matamata le vitio, vaavaai mo mea na fai e taupou popoto e toalima ma mea na fai e taupou valea e toalima.
Mafaufau i elemene ia e lima o le faataoto, ma tusi po o le a le mea e te manatu o faatusa i ai mea taitasi:
O le faatoafaiava
O taupou popoto
O taupou valea
Lamepa
Suauu
O fasifuaitau “ua tuai mai le faatoafaiava” (Mataio 25:5) ma le “ua oo i le tulua o po ma ao ona sau ai lea o le alaga” (Mataio 25:6) e faasino i le Afio Mai Faalua o Iesu Keriso. Mafaufau po o le a se mea o mafai ona e aoao mai e uiga i le Afio Mai Faalua mai nei fuaitau. Atonu e te manao e tusi Iesu Keriso i le laina i autafa o le fuaiupu 5–6.
Na faamatalaina e Elder Dallin H. Oaks o le Korama a Aposetolo e Toasefululua le mea e faatusa i ai taupou e toasefulu: “O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava. Ae sa na o le afa o i latou sa saunia ina ua sau o ia” (“Sauniuniga mo le Afio Mai Faalua,” Ensign po o le Liahona, Me 2004, 8).
Atonu e te manao e tusi le Tagata o le Ekalesia i le laina i autafa o le Mataio 25:1–2.
Toe iloilo le Mataio 25:8–9, ma mafaufau pe aisea na le avatu ai e taupou popoto a latou suauu i taupou valelea. Na aoao mai e Peresitene Spencer W. Kimball le mea e mafai ona faatusa i ai le suauu ma pe aisea foi e le mafai ai ona faasoa atu:
“Sa le o se manatu faapito po o le agaleaga lea mea. O le ituaiga suauu e manaomia e faamalamalama ai le ala ma faasusulu i le pogisa e le mafai ona faasoaina. E mafai faapefea e se tagata ona faasoa atu le usiusitai i mataupu faavae o le sefuluai; se mafaufau toafilemu ona o le ola amiotonu; se faaputuga o le malamalama? E mafai faapefea e se tasi ona faasoa atu le faatuatua po o le molimau? E mafai faapefea e se tasi ona faasoa atu uiga auaumama po o le ola mama, po o le aafiaga o se misiona? E mafai faapefea e se tasi ona faasoa atu faamanuiaga o le malumalu? E tatau ona tofu ma lena ituaiga o suauu mo le tagata lava ia. …
“I le faataoto, e mafai ona faatau le suauu i le maketi. I o tatou olaga, o le suauu o le saunia e faaputuina o lea mataua ma lea mataua i le ola amiotonu. … O aga taitasi o le tuuto ma le usiusitai o se mataua e faaopoopo i lo tatou faleoloa” (O le Faatuatua e Auala Mai ai le Vavega [1972], 255–56).
-
Mafaufau po o le a le mea e faatusa i ai le suauu i le faataoto. I lau api talaaga mo le suesueina o tusitusiga paia, fai ai se lisi o aga o le tuuto atu ma le usiusitai e mafai ona faamaea ai le fuaiupu lea: E tusa ai ma Peresitene Spencer W. Kimball, o nisi o mea e mafai ona faatusa i ai le suauu o …
O se tasi lea o upumoni e mafai ona tatou aoao mai le faataoto ma le saunoaga a Peresetene Kimball: E le mafai ona tatou nonoina mai se tapenaga faaleagaga mai isi. O le tapenaga faaleagaga e aofia ai le molimau, liua, faatuatua, ma isi meaalofa ia e oo mai patino e ala i le Agaga Paia.
Na faamalamalama mai e Elder David A. Bednar o le Korama a Aposetolo e Toasefululua faapea:
“Ua ou manao nei e faaaoga se tasi o le mau faamatalaga talafeagai o taupou e toasefulu e faamalamalamaina ai le sootaga i le va o le molimau ma le liuaina. O taupou e toasefulu, o e sa popoto ma le toalima sa valelea, na ave a latou lamepa ma o e faafetaiai i le faatoafaiava. Faamolemole ia mafaufau i lamepa na faaaoga e taupou, o ni lamepa o le molimau. Na ave e taupou valelea a latou lamepa o molimau ae leai se suauu na aveina. Mafaufau i le suauu, o le suauu o le liuaina. …
“Pe na manatu faapito ea taupou popoto ma lē mananao e faasoa atu, pe na latou ta’u sa’o atua e le mafai ona nonoina le suauu o le liuaina? Pe mafai ea ona e tuuina atu i se isi tagata le malosiaga faaleagaga lea e te maua mai i le usiusitai e le aunoa i poloaiga? Pe mafai ona pasi atu i se tasi o manaomiaina, le malamalama e maua mai i le suesue o tusitusiga paia ma le maelega ma le mafaufau loloto? Pe mafai ona sii atu i se tagata o loo feagai ma mafatiaga po o se luitau tele, le filemu e aumaia e le talalelei i se tagata faamaoni o le Au Paia o Aso e Gata Ai? O le tali manino lava i nei fesili o le leai.
“E pei ona faamamafa lelei mai e taupou popoto, e tatau ia i tatou taitoatasi ona ‘faatauina mo i tatou lava.’ E pei ona faamamafa lelei mai e taupou popoto, e tatau ia i tatou taitoatasi ona “faatauina mo i tatou lava.” Sa le’i faamatalaina e nei tamaitai musuia se faiga faapisinisi; ae, sa latou faamamafaina lo tatou tiutetauave faaletagata lava ia, e faamumu a tatou lamepa o molimau ma ia lava se sapalai o le suauu o le liuaina. O lenei suauu taua, e maua i le tasi le mataua i le taimi—“o lea upu [ma] lea upu lea mataupu ma lea mataupu” (2 Nifae 28:30), i le onosai ma le faifai pea. E leai ni auala ‘alo o i ai; leai ni taimi faafuasei e tapena ai.
“O le mea lea, ia faamaoni, tatalo e le aunoa, ia teuteu a outou lamepa ma faamumu, ia iai a outou suauu, ina ia mafai ai ona outou saunia i le afio mai o le Faatoafaiava’ (MF&F 33:17)” (“Liua i le Alii,” Ensign po o le Liahona, Nov. 2012, 109).
O le isi lea upumoni e mafai ona tatou aoao mai le faataoto: Tatou te saunia mo le Afio Mai Faalua e ala i le faateleina o a tatou molimau ma le liua e ala i le amiotonu i aso taitasi.
-
Ina ia malamalama i isi auala e mafai ona e faaputuputu ai lea mataua ma lea mataua o le suauu e ala i le ola amiotonu, e mafai ona outou matamata i le vaega o totoe o le vitio “O i Latou o E Popoto” (time code 5:46–8:44). A o matamata le vitio, faaopoopo i le lisi o manatu i lau api talaaga mo le suesueina o tusitusiga paia.
I faaaliga i ona po nei sa faamautu ai e le Alii i “lena aso [le Afio Mai Faalua], pe a ou alu atu i lo’u mamalu, o le a faataunuu ai le faataoto na Ou tautala atu ai e faatatau i taupou e toasefulu” (MF&F 45:56).
Faitau le Mataio 25:10–12, ma vaavaai mo mea na fetalai ai le faatoafaiava i taupou valea. E ono fesoasoani le iloa o le Faaliliuga a Iosefa Samita ua faamanino mai ai na fetalai le faatoafaiava, “Tou te le iloa a’u” (Faaliliuga a Iosefa Samita, Mataio 25:11 [i le Mataio 25:12, vaefaamatalaga a]).
O le a le mea ua ta’u mai e le fetalaiga “Tou te le iloa a’u” e uiga i taupou valea e toalima? E faapefea ona ese le iloaina o le Alii mai le na o le iloa e uiga ia te Ia? (Tagai Ioane 17:3.)
Mai fuaiupu nei ua tatou aoao ai faapea ina ia saunia mo le afio mai o le Alii ma agavaa e tumau ai i Lona afioaga, e tatau ona tatou iloa o Ia.
-
-
O a ni auala ua e iloa atili ai le Faaola?
-
E mafai faapefea e le iloa o le Faaola ona faatosinaina lau tapenaga faaleagaga mo Lona Afio Mai Faalua?
-
Faaauau le tala mai le amataga o le lesona—e uiga i le talavou e umia le perisitua sa lei saunia i se taimi na manaomia ai—na faamatala e Elder Holland faapea na faanatinati atu le alii talavou i le fale o se toeaina o lana uarota. Sa tuu atu e le toeaina i le uso laitiiti se faamanuiaga na faamautuina ai lona tulaga seia taunuu ane fomai mo faalavelave faafuasei. Sa faaauau le saunoaga a Elder Holland:
“Ona fai mai lea o le faifeautalai ua foi mai le misiona lea na ou ta’ua: ’E leai se tasi e lei feagai ma le mea na ma feagai i lena po o le a iloaina lo’u maasiasi ma le faanoanoa na ou tauaveina ona o lo’u le agavaa e faaaoga le perisitua sa ia te au. O se manatua e sili atu ona tiga ia te au ona o lo’u lava uso laitiiti sa manaomia a’u faapea o’u matua pele e le lolotu, o e sa matua fefefe ma sa i ai le aia tatau e faamoemoe tele mai ai ia te au. Ae a o ou tu atu i o outou luma i le aso, e mafai ona ou folafola atu ia te outou le mea lenei,’ na ia fai mai ai. ’Ou te le atoatoa, ae mai lena po seia oo mai i le taimi nei ou te lei toe faia lava se mea e taofia ai au mai lo’u alu atu i luma o le Alii ma le talitonu mautinoa ma ole atu ia te Ia mo se fesoasoani pe a manaomia. O le agavaa patino o se tauia i lenei lalolagi lea tatou te ola ai,’ sa ia faailoa mai ai, ’peitai o se taua o loo ou manumalo ai. Sa ou lagonaina se limatusi o le tausalaga o tusitusi mai ia te au i se taimi o lo’u olaga, ma ou te le o faamoemoe ou te toe lagonaina lava pe afai e mafai ona ou faia i ai se mea. Ma, ioe,’ na faaiu mai ai, ’E mafai ona ou faiamea uma i ai’” (“O le Mautinoa o le Agavaa,” 59).
Mafaufau po o le a se mea e manaomia ona e faia ina ia saunia ai faaleagaga mo le afio mai o le Alii. E mafai ona e lioina se tasi pe lua foi o faatinoga na e lisiina i lau ata o le lamepa suauu ma faatu se sini e faatino ia auala lea o le a faateleina ai au tapenaga faaleagaga.
Mataio 25:14–46
Ua aoao e Iesu Keriso Ona soo i faataoto i taleni ma mamoe ma oti.
Afai e savavali atu ou matua i se potu ma avatu ia te oe se tupe tele, mata o le a lau mea o le a fai ai?
A o faaauau ona aoao atu e le Faaola Ona soo e uiga i Lona Afio Mai Faalua, sa Ia faamatalaina le faataoto lea i taleni. I lenei faataoto sa tuu atu e le tagata sa tuua mo se malaga i ana auauna e toatolu ni tupe: taleni e lima i le auauna muamua, lua taleni i le lona lua, ma le tasi i le lona tolu. (O le taleni o se aofaiga o tupe.)
faitau le Mataio 25:16–18, ma vaavaai mo mea na fai e auauna ia latou tupe.
I le Mataio 25:19–23, ua tatou aoao ai ina ua toe foi mai le matai, sa ia fai atu i ana auauna e lipoti atu mea na latou faia i a latou tupe. Na faaaoga e auauna na i ai taleni e lima ma taleni e lua ma faaluaina ai tupe a lo la matai. Ae o le auauna na i ai le taleni e tasi sa nanaina ma o le taunuuga e leai se faatelega e avatu i lona matai.
Faitau le Mataio 25:24–25, ma vaavaai pe aisea na nana ai e le auauna le taleni.
I le faataoto lenei, e mafai ona faatusa ia taleni i meaalofa ma tomai ua tuu mai e le Alii ia i tatou. O le fefe e mafai ona taofia ai i tatou mai le faaaogaina o meaalofa ma tomai na tuu mai e le Alii ia i tatou.
E te manatu o le a le mea e tupu pe afai tatou te le atinaeina a tatou meaalofa ma tomai ona o le fefe?
faitau le Mataio 25:26–30 e iloa ai po o le a le mea na tupu i le auauna le aoga.
O se upumoni e mafai ona tatou aoao mai lenei faataoto o le afai tatou te le atinaeina ma faaaoga a tatou meaalofa faaleagaga mo le lelei, ona tatou le toe maua lea.
Mafaufau i ni auala e mafai ona e faaaoga ai meaalofa ma tomai e faalautele ai le galuega a le Alii. O se isi taleni e mafai ona e faaaoga o lau molimau (tagai MF&F 60:2–3). Fuafua e fai se fuafuaga e faaaoga ma le faamaoni ma atinae au meaalofa ma tomai.
I le Mataio 25:31–46 ua tatou aoao ai faapea i le Afio Mai Faalua o Iesu o le a tuueseese ai e amiotonu mai e amioleaga i le ala lava e tasi e tuueseese ai e se leoleo mamoe ia mamoe mai ’oti. E faapefea ona fuafua e le Alii le eseesega i le va o i latou e alolofa ia te Ia (mamoe) ma i latou e le alolofa ia te Ia (’oti)?
Faitau le Mataio 25:40, ma vaavaai mo mea na aoao atu e le Faaola e uiga i le ala tatou te faailoa atu ai lo tatou alolofa ia te Ia.
Mai lenei fuaiupu ua tatou aoao ai a tatou alolofa ma auauna atu i isi, ua tatou faaalia lo tatou alolofa i le Ali.
Ina ia malamalama atili i le ala tatou te faaalia ai lo tatou alolofa mo le Alii e ala i le alolofa ma auauna atu i isi, matamata le vitio o le “O le Peleue,” lea e faaalia mai ai se mea na tupu a o laitiiti Peresitene Heber J. Grant. A o matamata, vaavaai mo le tamaitiiti ma lona tina sa taufai feauaunaa’i.
Mafaufau pe na faapefea ona e faia isi i le 24 itula talu ai. Mafaufau pe e te filifili e ese sau faatinoga pe a faapea e te i ai i se tulaga faapena i le lumanai. I le isi 24 itula, vaavaai mo ni avanoa e mulimuli ai i uunaiga a le Agaga Paia ma auauna atu i isi.
-
Ua ou suesueina le Mataio 25 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: