Folasaga i le Iuta
Aisea e Suesue ai Lenei Tusi?
I le Tusi Faalauaitele a Iuta, o loo faamatala ai le au o le liliuese lea sa galulue i le Ekalesia anamua. Ao e suesue i lenei tusi, e mafai ona e aoao ai i auala e iloatino ai i latou o e saili e faaliliu ese soo o Iesu Keriso mai le faatuatuaga. E mafai foi ona e lagonaina le taua o le finau ma le filiga mo le faatuatuaga ma tumau faamaoni i ai.
O Ai na Tusia Lenei Tusi?
O le tusitala o lenei tusi na faailoa mai o ia lava o “Iuta, o le auauna a Iesu Keriso, o le uso foi o Iakopo” (Iuta 1:1). O le mea masani lava, sa malamalama o le tusitala o Iuta , o le uso o Iesu Keriso la te tina faatasi (tagai Mataio 13:55; Mareko 6:3; Bible Dictionary, “Jude”).
O Iuta sa faamaonia lava o se tagata o le Ekalesia e faaaloalogia i Ierusalema, ma atonu sa malaga o ia o se faifeautalai (tagai Galuega 1:13–14; 1 Korinito 9:5). E leai se faailoaga po o le a le perisitua sa umia e Iuta, ae o le tusi lava ia ua fautuaina mai ai, sa i ai sona tulaga faaletaitai lea na agavaa ai o ia e tusi ni tusi o fautuaga.
O Anafea ma o Fea na Tusia ai?
Tatou te le iloa po o fea na tusia ai le Tusi a Iuta. Afai e moni sa tusia lenei tusi e Iuta le uso o Iesu, atonu sa tusia i le va o le T.A. 40 ma le 80.
O Ai sa Tusi I Ai ma Aisea?
O le Tusi a Iuta sa faatatau atu i Kerisiano faamaoni—“i e ua faapaiaina e le Atua le Tama, ma leoleoina e Iesu Keriso” (Iuta 1:1). O le faamoemoe na tau mai o Iuta, ia faamalosia ana au faitau e “faamalolosi ona finau mo le faatuatua” (Iuta 1:3) e faasaga i aoao e le faaleatua o e na ulufale atu i le Ekalesia ma sa faalauteleina amioga le mama ma aoaoga sese ia e teenaina ai le Alii o Iesu Keriso.
O A Nisi o Vaaiga Iloga o Lenei Tusi?
E ui lava o se tasi o tusi aupito sili ona puupuu o le Feagaiga Fou, o le Tusi a Iuta o loo i ai ni faamatalaga e le o maua i se isi lava mea i totonu o le Tusi Paia. Sa tusi Iuta e uiga i “agelu foi o e na le taofi i lo latou mamalu” (Iuta 1:6; tagai foi Aperaamo 3:26), i se finauga i le va o Mekaeli ma Lusifelo i le tino o Mose (Iuta 1:9), ma e uiga i se valoaga a Enoka e uiga i le Afio Mai Faalua o le Faaola (Iuta 1:14–15; tagai foi Mose 7:65–66).
Na taua e Elder Bruce R. McConkie o le Korama a Aposetolo e Toasefululua ni nai vaega e tulaga ese ai le tusi a Iuta:
“I le Tusi Paia atoa, e na o Iuta lava na ia faasaoina mo i tatou le mataupu lea e faapea, o le muai olaga o le tatou uluai tofi lea ma sa le pasia e nisi o agelu a latou tofotofoga.
“O ia foi tatou te sue i ai mo lo tatou malamalamaaga itiiti e uiga i le finauga i le va o Mekaeli ma Lusifelo e uiga i le tino o Mose.
“O Ia foi e toatasi ua faamaumauina le valoaga matagofie a Enoka e uiga i le Afio Mai Faalua o le Atalii o le Tagata” (Doctrinal New Testament Commentary, 3 vols. [1965–73], 3:415).
O upu a Iuta e maai faasaga ia i latou o e teena le Atua ma Ana auauna, ma faasaga ia i latou o e o loo faia tapuaiga le mama o le ifo i tupua ma folafola mai e tuusaunoa i latou mai le tatau ona usitai i poloaiga a le Atua, e aofia ai le tulafono o le le gavia. Sa ia faamatalaina nisi o uiga o nei tagata piopio.
Otootoga
Iuta 1. Sa apoapoai atu Iuta i tagata o le Ekalesia e “faamalolosi ona finau mo le faatuatua” (Iuta 1:3). Ua ia faamalamalama mai e faapea, ua fetolofi faanana atu tagata i totonu o le Au Paia ma o loo faasalalauina aoaoga faavae sese ma faalauiloa atu faiga amioleaga. Ua Ia lapata’i mai e uiga i faamasinoga e oo mai i luga o i latou o e liliu ese mai le Atua, ma ia fautuaina tagata o le Ekalesia e atiina ae o latou faatuatua ma “faatumau [i latou] i le alofa o le Atua” (Iuta 1:21).