1 Peteru 3–5

Folasaga

Sa uunaia e le Aposetolo o Peteru le Au Paia ia saunia i taimi uma e molimau atu ia Iesu Keriso ma ia ola amiotonu ina ia mafai ona tafi ese tuuaiga sese na fai e faasaga ia i latou. Sa ia aoao mai sa talai atu e Iesu Keriso le talalelei i le lalolagi o agaga ina ua mavae Lona maliu. Sa tima’i foi e Peteru toeaina o le Ekalesia e tausia le lafu a le Atua i le tausiga lava e tasi e pei ona [faia ai] e Iesu Keriso, le Leoleo Mamoe Sili.

1 Peteru 3:1–17

Ua fautuaina e Peteru le Au Paia ina ia tutufaatasi i le amiotonu ma ia saunia i taimi uma e molimau ia Keriso

Faitau atu le tala lenei mai ia Peresitene Thomas S. Monson:

“O le a tatou maua pea avanoa i o tatou olaga e faasoa atu ai o tatou talitonuga, e ui lava tatou te le iloa pea le taimi o le a valaauina ai tatou e faia lena mea. O sea avanoa faapea na oo mai ia te au i le 1957 a o ou faigaluega ai i se pisinisi lomitusi ma sa faatonuina au ou te alu i Dallas, Texas, [ISA,] o nisi taimi sa ta’ua ai ‘o le aai o lotu,’ ou te lauga i se fonotaga faapisinisi. Ina ua maea le fonotaga, sa ou alu ai i se maimoaga e malaga i le pasi i nuu tau lalata ane i le aai. A o matou pasia le tele o lotu, e faapea mai le avepasi, ‘I le itu agavale tou te vaaia ai le lotu Metotisi,’ po o le, ‘I le itu taumatau o le falesa Katoliko.’

Ao matou pasia se fale matagofie piliki mumu sa tu mai se mapuepue, sa valaau mai le avepasi, ‘O le fale le la e potopoto ai le Au Mamona.’ Sa valaau mai se tamaitai i le pito i tua o le pasi, ‘Avepasi, e mafai ona e tau mai ia i matou se mea e uiga i le Au Mamona?’

“Sa faatu e le avepasi le pasi i autafa o le ala, faliu mai i lona nofoa, ma tali mai, ‘Tamaitai, na o le pau le mea ou te iloa e uiga i le Au Mamona, e potopoto i le falepiliki mumu le la. Pe i ai se tasi i luga o lenei pasi e iloa se mea e uiga i Mamona?’” (“Ia Lototele e Tu Na o Oe,” Ensign po o le Liahona, Nov. 2011, 67).

Ana faapea sa e i ai i luga o lena pasi, o le a se mea e te faia pe fai atu ai?

O a ni auala e ono manaia ai lenei ituaiga o avanoa ia te oe? O a ni auala e ono luitauina ai mo oe?

A o e suesue i le 1 Peteru 3:1–17, vaavaai mo se mataupu faavae e mafai ona fesoasoani ia te oe pe a e maua ni avanoa e faasoa atu ai le talalelei i isi.

I le 1 Peteru 3:1–11 tatou te faitau ai, na apoapoai atu le Aposetolo o Peteru i ava e fesoasoani e aumai tane le talitonu ia Keriso e ala i a latou amioga amiotonu (tagai Faaliliuga a Iosefa Samita, 1 Peteru 3:2 [i le 1 Peteru 3:2, vaefaamatalaga e]). Sa ia fautuaina tane e faamamalu i a latou ava. Sa ia fautuaina foi tagata o le ekalesia ina “ia lotogatasi” (1 Peteru 3:8) ma ia ola e tusa ai ma tulaga faatonuina o le talalelei.

Faitau le 1 Peteru 3:14–16, ma vaavaai mo le mea na fautuaina ai e Peteru le Au Paia e fai, pe a latou fetaui i tagata o e fesiliga o latou talitonuga pe sauaina i latou ona o na talitonuga.

O le upu tali atu i le fuaiupu 15 e mafai foi ona faaliliuina o le “puipuia” (tagai 1 Peteru 3:15, vaefaamatalaga e). Sa tima’iina e Peteru le Au Paia e faasoa atu ma puipuia o latou talitonuga faalelotu. Ia matau foi na fautuaina e Peteru ina ia latou faia o lea mea i le agamalu ma le mata’u. O le agamalu o lona uiga o le agavaivai, lotomaualalo, ma le onosai (tagai Guide to the Scriptures, “Meek, Meekness,” scriptures.lds.org). O le upu mata’u o lona uiga o le migao po o le faaaloalo (tagai 1 Peteru 3:15, vaefaamatalaga a).

O se upumoni e tasi e mafai ona tatou aoao mai le 1 Peteru 3:15 o le, i le avea ai ma soo o Iesu Keriso, e tatau ona tatou taumafai ia saunia i taimi uma e faasoa atu ma puipuia o tatou talitonuga i le agamalu ma le faaaloalo. Mafaufau e tusi lenei upumoni i au tusitusiga paia i talaane o le 1 Peteru 3:15.

Faitau le vaega o loo totoe o le tala a Peresitene Monson e uiga i lona aafiaga i luga o le pasi:

“Sa ou faatali mo se tasi e tali mai. Sa ou faataupupula atu i foliga o tagata taitasi mo se faailoga e iloa ai, sina manao e faamatala mai. E leai ma se mea. Sa ou iloa ai e pule lava la a’u pe fai e pei ona fautua mai le Aposetolo o Peteru, ina ‘ia saunia pea lava outou e tali atu … ia i latou uma o e fesili mai ia te outou i le uiga o le faamoemoe o loo ia te outou.’ Sa ou iloa ai foi le moni o le muagagana, ‘A oo mai le taimi mo faaiuga, ua le toe i ai se taimi e sauni ai.’

“Mo le isi 15 minute pe ā, sa ou maua ai le avanoa e faasoa atu ai ia i latou i luga o le pasi la’u molimau e uiga i le Ekalesia ma o tatou talitonuga. Sa ou faafetai mo la’u molimau ma faafetai foi sa ou saunia e faasoa atu” (“Ia Lototele e Tu Na o Oe,” 67).

Tali ni fesili se lua po o fesili uma nei i lau api talaaga mo le suesueina o tusitusiga paia:
1. O a nisi o mea e mafai ona e faia ia saunia ai i taimi uma e faasoa atu ou talitonuga?
2. Aisea e te manatu e taua ai le faasoa atu o ou talitonuga i le agamalu ma le faaaloalo?
3. O le a se taimi na e faasoaina atu ai ou talitonuga po o le molimau i isi?

Mafaufau po o a ni auala o le a e sauni ai e faasoa atu ma puipuia ou talitonuga. Ia faatino i soo se uunaiga e te maua.

1 Peteru 3:18–4:19

Sa talai atu e Iesu Keriso le talalelei i le lalolagi o agaga ina ua mavae Lona maliu

Vaai faalemafaufau e faapea, o oe o se faifeautalai faamisiona. Mafaufau e uiga i se auala o le a e tali atu ai i se tasi e faia mai le faamatalaga lenei: “Ou te talitonu i mea o loo e aoao mai ia te a’u ua moni, ae ou te mafaufau i tagata o e e maliliu e aunoa ma le maua o le avanoa e faalogo ai i le upumoni . E foliga mai e le fea i le Atua ona faasala i latou pe taofia i latou mai le toe nonofo faatasi ma Ia pe afai latou te le’i maua le avanoa e aoao ai e uiga i Lana ata o le faaolataga.”

Faitau le 1 Peteru 3:18–20, e aofia ai le Faaliliuga a Iosefa Samita i le 1 Peteru 3:20, vaefaamatalaga a. Ona faitau lea o le 1 Peteru 4:5–6, e aofia ai le Faaliliuga a Iosefa Samita i le 1 Peteru 4:6, vaefaamatalaga a. A o e faitau, vaavaai mo upumoni na aoao mai e Peteru e mafai ona e faasoa atu i le tagata o loo i le vaaiga o loo i luga. O “agaga i le falepuipui” i le 1 Peteru 3:19 e faatatau ia i latou i le lalolagi o agaga o e e le’i taliaina le talalelei pe maua le avanoa e faalogo i ai a’o i ai i le olaga i le tino.

O le a se mea tatou te aoao mai i nei fuaiupu e uiga ia i latou i le lalolagi o agaga o e e le’i talia le talalelei pe maua le avanoa e maua ai i lenei olaga?

Sa mafaufau loloto Peresitene Iosefa F. Samita i le uiga o le 1 Peteru 3:18–20 ma le 1 Peteru 4:6 ae ona maua se faaaliga ma se faaaliga vaaia o le asiasiga a le Faaola i le lalolagi o agaga. O lenei faaaliga ua tusiaina o le Mataupu Faavae ma Feagaiga 138. Sa vaai Peresitene Samita ia Iesu Keriso, i le va o le taimi o Lona maliu ma le Toetu, o talaiina atu le talalelei ma auauna patino atu i agaga amiotonu i le lalolagi o agaga. Ona faatulagaina lea e Iesu Keriso ma faatagaina auauna amiotonu e aoao atu le talalelei i agaga i le falepuipui o agaga (tagai MF&F 138:1–12, 18–19, 27–30).

E tusa ai ma le 1 Peteru 4:6, aisea na talaiina atu ai le talalelei ia i latou o e ua maliliu?

O se upumoni e mafai ona tatou aoao mai i lenei fuaiupu o le, e talaiina atu le talalelei ia i latou o e ua maliliu ina ia latou maua ia avanoa tutusa e pei o i latou o e faalogo i le talalelei i le olaga nei. (Ia matau o le 1 Peteru 4:6 o se fuaitau o le mau tauloto. Atonu e te manao e faailoga i se auala e iloagofie ai ina ia faigofie ai ona e maua i le lumanai.)

Toe iloilo le vaaiga sa e faitau i ai i le amataga o le vaega lenei. I lau api talaaga mo le suesueina o tusitusiga paia, tusi ai pe o le a faapefea ona e faaaogaina le 1 Peteru 4:6 e tali atu ai i le atugaluga sa e faitau e uiga i ai. Ia aofia ai ou lagona e uiga i le auala e avea ai le aoaoga faavae o le faaolataga mo e maliliu, o le faamaoniga o le alofa mutimutivale ma le agalelei o le Atua i Lana fanau.

I le 1 Peteru 4:7–19 tatou te faitau ai, na uunaia e Peteru le Au Paia ia i ai le alofa mama faamaoni aua o le alofa mama e ufitia pe taofiofia ai se anaoanoa’i o agasala. Sa ia ta’ua foi se “tofotofoga e pei o le afi” (1 Peteru 4:12) lea atonu e ono tatau ona onosaia e le Au Paia, ma sa ia aoaoina le Au Paia ia olioli pe a latou tigaina i tofotofoga ma sauaga ona o lo latou talitonu ia Iesu Keriso.

Mau Tauloto—1 Peteru 4:6

Tusi upu mai le 1 Peteru 4:6 i se kata laitiiti po o se fasipepa. I le isi itu tusi ai se mea e mafai ona e faia e fesoasoani ai i ou tuaa o e ua mauaina le talalelei i le lalolagi o agaga ma o loo faatalitali ina ia faasaolotoina mai le falepuipui o agaga. I lau api talaaga mo le suesueina o tusitusiga paia, tusi ai ua e faamaeaina le vaega lenei o le galuega atofaina. I le aluga o le vaiaso a sau, galue i le taulotoina o le 1 Peteru 4:6 e ala i le taulotoina i taeao ma afiafi taitasi a’o le’i faia au tatalo faaletagata lava ia. Ia toe iloilo foi mea sa e tusia e uiga i auala e auai ai i le galuega o le faaolataga mo ou tuaa.

1 Peteru 5

Na fautuaina e Peteru toeaina e tausi le lafu a le Atua ma uunaia le Au Paia ia tumau le mausali i le faatuatua

Ina ia fesoasoani e tapena le Au Paia mo tofotofoga o le a latou oo i ai, sa aoao ai e le Aposetolo o Peteru ia toeaina o le Ekalesia e uiga i o latou tiutetauave o ni taitai o le Ekalesia. Faitau le 1 Peteru 5:1–3, ma vaavaai mo le fautuaga a Peteru i toeaina o le Ekalesia.

Ina ia “fafaga le lafu a le Atua” (fuaiupu 2) o lona uiga ia tausia ma vaai tagata o le Ekalesia. Na aoao mai Peteru e tatau i taitai o le Ekalesia ona auauna atu ma le lotomalie ma le alofa nai lo o le musua pe ona o le manao i se taui. E tatau ona fai i latou ma faataitaiga i tagata o le ekalesia nai lo o ni “atua” (fuaiupu 3) ia i latou.

O se tasi o upumoni ua aoao mai e nei fuaiupu o le, ua i ai i taitai o le Ekalesia le tiutetauave e tausia ai ma vaai le lafu a le Atua i le alofa ma e ala i faataitaiga.

Faitau le 1 Peteru 5:4, ma vaavaai mo le ala na faatatau atu ai Peteru i le Faaola.

O a ni uiga faaalia ma ni uiga auaumama faaKeriso e mafai ona fesoasoani i taitai o le Ekalesia e vaai ma tausia ai tagata o le Ekalesia?

O le a se taimi na faamanuiaina ai oe e ala i le alofa po o le faataitaiga faaKeriso a se taitai o le Ekalesia?

A o e faaaloalo, faatuatuaina, ma mulimuli i taitai o le Ekalesia o e ua valaauina e le Alii, o le a latou fesoasoani e faatonutonu ma tausia oe faaleagaga.

I le 1 Peteru 5:5–14, ua aoaoina ai e Peteru le Au Paia ia faaaloalo i tagata matutua, ia lafo atu o latou popolega ia Iesu Keriso, ma ia tumau le mausali i a latou molimau, e ui lava i puapuaga. Sa faamautinoa atu e Peteru ia i latou, afai latou te faia o lea mea, o le a faaatoatoa ma faamalolosia i latou e le Atua.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 1 Peteru 3–5 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: