Iunite 30: Aso 1
2 Peteru
Folasaga
Sa uunaia e le Aposetolo o Peteru le Au Paia ia tuputupu a’e i lo latou malamalama ia Iesu Keriso i le saili ia avea faapei o Ia. Sa lapataia foi e Peteru o perofeta ma aoao pepelo e taitaieseina tagata. Sa ia valoiaina, o aso amuli, o le a tauemuina e amiotonu ona o le talitonu o le a toe foi mai Iesu Keriso. Sa uunaia e Peteru le Au Paia ia saunia ma le filiga mo le Afio Mai Faalua o le Faaola.
2 Peteru 1:1–11
Ua aoao mai e Peteru le ala e tofusia ai i le amio atua o Iesu Keriso
Mafaufau i ni uiga auaumama po o uiga e te faamemelo ai i se tagata o le aiga po o se uo. E te talitonu e mafai ona e atiina a’e na lava uiga auaumama po o uiga lelei? Afai o oe o se tamaitai talavou, mafaufau i le autu a Tamaitai Talavou, o loo faapea mai se vaega: “O i matou o afafine o lo matou Tama Faalelagi, e alofa ia i matou, ma matou te alolofa foi ia te Ia.” Mafaufau i tulaga faatauaina o lo i ai i lenei autu, aemaise lava le amio atua.
Pe o oe o se tamaitai talavou po o se alii talavou, o le a le uiga o le “amio atua” ia te oe?
Sa tusia e le Aposetolo o Peteru lenei tusi i tagata o le Ekalesia o e na i ai le faatuatua ia Iesu Keriso. E pei ona tusia i le 2 Peteru 1:1–4, sa ia aoaoina i latou, e mafai ona latou “tofusia …i le amio atua” (fuaiupu 4). O le fuaitau “amio atua” e faatatau i uiga auaumama o le Tama Faalelagi ma Iesu Keriso.
Faitau le 2 Peteru 1:5–7, ma vaavaai mo ni uiga auaumama o le amio atua o le Tama ma le Alo. I le siata o loo i lalo, lisi ai uiga auaumama e te tau i ai i le fuaitau. Ona, iloilo lea i se fua o le 1 e oo i le 10, pe o le a le tele o lou filiga e te lagona o loo e taumafai ai ia maua nei uiga auaumama paia (1 = E le o taumafai ia maua; 10 = Taumafai ma le filiga ia maua). O lena ua uma ona lisi atu le uiga auaumama muamua. O le upu le gaoia i le fuaiupu 6 o lona uiga o le loto pulea.
|
Uiga Auaumama Paia | |
|---|---|
|
Faatuatua |
1 2 3 4 5 6 7 8 9 10 |
|
1 2 3 4 5 6 7 8 9 10 | |
|
1 2 3 4 5 6 7 8 9 10 | |
|
1 2 3 4 5 6 7 8 9 10 | |
|
1 2 3 4 5 6 7 8 9 10 | |
|
1 2 3 4 5 6 7 8 9 10 | |
|
1 2 3 4 5 6 7 8 9 10 | |
|
1 2 3 4 5 6 7 8 9 10 | |
Faitau le 2 Peteru 1:8–11, ma vaavaai po o a faamanuiaga e mafai ona oo mai ia i latou o e e filiga i le atiina a’e o uiga auaumama paia o le Tama Faalelagi ma Iesu Keriso. O le fuaitau “ia faamauina lo outou valaauina ma lo outou filifilia” i le fuaiupu 10 o lona uiga, a o i ai i le olaga nei, e te maua ai le faamautinoaga po o folafolaga a le Atua ua e mauaina le ola e faavavau; o loo faatatau Peteru i lenei mea o “le upu o le valoaga e sili lona mausali” (2 Peteru 1:19).
“Na aoao mai Iosefa Samita, e faamauina le valaauina ma le filifilia o se tagata pe a uma ona faamaonia le faamaoni o se tagata i le Alii: “A faatuatua se tagata ia Keriso, salamo i ana agasala, ma ua papatisoina mo le faamagaloina o ana agasala ma maua le Agaga Paia, (e ala i le faaee atu o lima), o le Fesoasoani muamua lea, ona tuu atu lea o ia ia faaauau pea ona faamaualalo o ia lava i luma o le Atua, ia fiaai ma fiainu i le amiotonu, ma ola i afioga uma a le Atua, ma o le a le umi ae fetalai mai le Alii ia te ia, Atalii e, ia faaeaina oe. Pe a faamaonia lelei o ia e le Alii, ma iloa ai ua naunau le tagata e auauna ia te Ia e tusa lava po o a faigata uma, ona maua ai lea e le tagata le faamauina o lona valaauina ma le filifilia” (i le History of the Church, 3:380).
2 Peteru 1:12–21
Ua faasoa mai e Peteru lana molimau ia Iesu Keriso ma aoao mai e uiga i tusitusiga paia
Aisea e te manatu e faitio ai nisi o tagata e uiga i le matutua o nisi o perofeta ma aposetolo? E faapefea ona e tali atu i se tasi e faapea mai, ua toeaiina tele ia perofeta ma aposetolo e avea ai ma ni taitai mataalia? A o faaauau ona e suesue i le 2 Peteru 1, vaai mo se upumoni e uiga i perofeta ma aposetolo e sili atu le taua nai lo [tausaga] o lo latou matutua.
E pei ona tusia i le 2 Peteru 1:12–19, sa iloa e le Aposetolo o Peteru o le a le toe umi ae maliu o ia, o lea sa ia faasoa mai ai lana molimau vaaitino e uiga ia Iesu Keriso. I lana molimau sa ia ta’ua ai “le upu o le valoaga e sili lona mausali” (2 Peteru 1:19). O lenei “upu o le valoaga e sili lona mausali” o loo faamatalaina manino atili mai i le Mataupu Faavae ma Feagaiga 131:5 o le malamalama e mafai ona maua e se tagata i le olaga lenei e ala i faaaliga e faapea, “ua faamauina [o ia] mo le ola e faavavau.” E ta’ua foi lenei mea o le “[faia] ia faamauina lo outou valaauina ma lo outou filifilia” (2 Peteru 1:10), lea sa e suesue i ai i le vaega muamua o le 2 Peteru 1.
Faitau le 2 Peteru 1:20–21, ma vaavaai mo le mea na aoao mai e Peteru e uiga i le matafaioi o “tagata paia o le Atua,” po o perofeta. Ia matau o le Faaliliuga a Iosefa Samita o le, 2 Peteru 1:20 (i le 2 Peteru 1:20, vaefaamatalaga a) e faitauina faapea, “Ia muai iloa lenei mea, e leai se valoaga o tusitusiga paia e tuuina mai e uiga i se manao faalilolilo o tagata.”
E faavae i le mea na aoao mai e Peteru, ua mafai ai ona tatou iloa le upumoni lenei: E maua mai e perofeta ia tusitusiga paia e ala i le Agaga Paia. (Atonu e te manao e tusi le mea lenei i totonu o au tusitusiga paia.) O tusitusiga paia o “upu, tusia ma tautalagia” (Guide to the Scriptures, “Scriptures,” scriptures.lds.org; tagai foi i le MF&F 68:2–4).
O nisi o tusitusiga paia ua fai ma vaega o tusitusiga faavae [a le Ekalesia]. O tusitusiga faavae o se “tuufaatasiga lea o tusi paia ua lauiloa ma ua faia i le pule tatau. I le Ekalesia a Iesu Keriso o le Au Paia o Aso e Gata Ai, o tusi ua avea ma vaega o tusitusiga paia ua ta’ua o tusitusiga faavae ma e aofia ai le Feagaiga Tuai ma le Feagaiga Fou, o le Tusi a Mamona, o le Mataupu Faavae ma Feagaiga, ma le Penina Tau Tele” (Guide to the Scriptures “Canon,” scriptures.lds.org).
A o e faitau i le molimau lenei a Elder Dallin H. Oaks o le Korama a le Toasefululua, vaavaai mo lana molimau o loo faaauau ona maua e perofeta ia tusitusiga paia: “O le laina o le perisitua o se auala na fetalai mai ai le Atua i Lana fanau e ala i tusitusiga paia i taimi ua mavae. Ma o le laina foi lea o loo Ia fetalai mai ai i le taimi nei e ala i aoaoga ma fautuaga a perofeta ma aposetolo soifua ma isi taitai musuia” (“Two Lines of Communication,” Ensign po o le Liahona, Nov. 2010, 84).
Mafaufau i le taua o le iloa na faaaoga ma o loo faaaoga pea e le Atua ia perofeta e aumai ai tusitusiga paia i Lana fanau.
-
Tali fesili nei i lau api talaaga mo le suesueina o tusitusiga paia:
-
O a ni fuaitau o mau, a le mai i perofeta anamua pe mai i perofeta i aso nei, ua faia se aafiaga i lou olaga?
-
Na faapefea ona faamanuiaina oe e ala i na mau?
-
Toe manatunatu i le molimau a Elder Oaks ma vaavaai mo se avanoa i aso a sau e molimau atu ai i isi, pe a faatonu ai e le Agaga, e uiga i le moni o perofeta ma i le taua o le mauaina ma le suesueina o tusitusiga paia.
2 Peteru 2
Ua lapatai mai Peteru e uiga i le faaseseina e aoao pepelo
Aisea e ono filifili ai tagata e agasala e ui lava ua latou iloa o le mea o loo latou faia e sese?
I le 2 Peteru 2 tatou te faitau ai , na lapataia e le Aposetolo o Peteru le Au Paia e uiga i tagata o e sa saili e faasese i latou. A o e suesue i le 2 Peteru 2, vaavaai mo upumoni e mafai ona fesoasoani ia oe ia iloa ma aloese ai i taufaasese lea e taitai atu ai i le agasala.
Faitau le 2 Peteru 2:1–3, ma vaavaai mo le lapataiga a Peteru e uiga ia i latou o e o le a taumafai e faasese le Au Paia. O “vaevaega e fano ai” (2 Peteru 2:1) o aoaoga pepelo ma faataumaoi.
O se upumoni e tasi e mafai ona tatou aoao mai i nei fuaiupu o le, o faiaoga pepelo e saili e faasese i tatou.
Faitau le saunoaga lea a Elder M. Russell Ballard o le Korama a Aposetolo e Toasefululua, ma vaavaai po o a mea ua aoao mai e faiaoga pepelo i aso nei ina ia mafai ona faasese ai i tatou:
“O perofeta ma faiaoga pepelo o i latou ia ua faailoa mai e faapea o le Perofeta o Iosefa Samita o se taufaasese; latou te le talia le Uluai Faaaliga o se aafiaga e sao. Latou te folafola mai, o le Tusi a Mamona ma isi tusi faavae e le o ni tusitusiga paia anamua. Latou te taumafai foi e toe faamatalaina le natura o le aiga Atua, ma latou te teena na tuuina mai ma o loo faaauau pea ona tuuina mai faaaliga e le Atua i aso nei i Ana perofeta faauuina ma lagolagoina.
“O perofeta pepelo ma faiaoga pepelo o i latou ia o e taumafai ma le faasausili e faatupu ai ni faauigaga fou o tusitusiga paia ia faaalia ai o nei tusiga paia e le tatau ona taliaina o ni afioga a le Atua i Ana fanau, ae ia tau lava o ni tautalaga a ni alii e le’i musuiaina, ua faatapulaaina e o latou lava faailoga tagata ma faaauau faaleaganuu. O le mea lea, ua latou finauvale ai, ua manaomia se faauigaga fou o tusitusiga paia ma ua na o i latou lava ua agavaa e tuuina mai lena faauigaga.
“Atonu o le mea e sili ona faasalaina, o lo latou teenaina lea o le Toetu ma le Togiola a Keriso, ma finau mai faapea e leai se Atua e mafai ona faaolaina i tatou. Latou te teena le manaomia o se Faaola. I le faapuupuuga, o nei tagata taufaasese o loo taumafai e toe faaliliu ia aoaoga faavae o le Ekalesia ina ia fetaui i o latou lava manatu e fafauina, ma i le faagasologa ua latou teena ai Keriso ma Lana matafaioi faamesia.
“O perofeta ma faiaoga pepelo o i latou foi o loo taumafai e suia ia aoaoga faavae na tuuina mai e le Atua ma aoaoga faavae o tusitusiga paia lea e puipuia ai le paia o le faaipoipoga, o le natura paia o le aiga, ma aoaoga talafeagai o le mama faaletagata. Latou te fautuaina se toe faauigaga o le ola mama ina ia tauamiotonu ai le faitaaga, mulilua, ma mafutaga a itupa tutusa. O nisi ua aliali lava lo latou lagolagoina o faaipoipoga ua ta’ua o itupa-tutusa ” (“Beware of False Prophets and False Teachers,” Ensign, Nov. 1999, 63–64).
Mafaufau i ni taimi atonu sa e tau ai i ni aoaoga po o ni savali mai ni faiaoga pepelo. Aisea e taua ai le nofouta i savali ma aoaoga a faiaoga pepelo?
I le 2 Peteru 2:4–17 tatou te faitau ai i nisi o faataitaiga o mea na tutupu i tagata o e sa mulimuli i faiaoga pepelo i aso ua mavae, e aofia ia i latou o e sa mulimuli ia Satani i le muai olaga, o tagata sa ola i le vaitaimi o Noa, ma tagata o Sotoma ma Komoro. Na tuuina mai foi e Peteru ni faataitaiga o tagata taitoatasi o e sa le’i faatosinaina e faiaoga pepelo, e pei o Noa ma Lota. Ona faamatalaina lea e Peteru ia amioga leaga a faiaoga pepelo.
E faapefea ona maua e se tagata faifaiva ia ia?
O le auala a se faifaiva ia maua ai ia e tai pei o auala a se faiaoga pepelo. Faitau le 2 Peteru 2:18–19, ma vaavaai pe faapefea ona faatosina e faiaoga pepelo le Au Paia e mulimuli atu ia latou aoaoga.
E faapefea ona pei aoaoga a perofeta ma faiaoga pepelo o se matau po o se maunu fagota?
I le 2 Peteru 2:19 ua tatou iloa ai e folafola mai e faiaoga pepelo le saolotoga. I se isi faaupuga, ua latou aoao mai o le agasala, nai lo o le usiusitai i poloaiga, e taitai atu ai i le saolotoga sili atu.
E mafai ona tatou aoao mai i nei fuaiupu, e saili faiaoga pepelo e faasese i tatou ia talitonu o le agasala e oo atu ai i le saolotoga sili atu.
Toe faitau le fuaiupu 19 , ma vaavaai mo le mea e tupu i tagata o e e lofituina i aoaoga pepelo ma le agasala.
-
Faitau le 2 Peteru 2:20–22, ma vaavaai mo le mea na aoao mai Peteru e uiga ia i latou o e toe foi atu i le agasala ae na latou sosola ese mai ai.
-
-
Aisea e te manatu ai, o i latou o e ua “sosola ai mea leaga a le lalolagi ina ua iloa lelei o le Alii o le Faaola lea o Iesu Keriso” (2 Peteru 2:20) e mafai ona faaosoosoina e toe foi i o latou ala agasala?
-
O le a se fautuaga e te tuuina atu e fesoasoani ai i se tasi ia tumau i le faamaoni ia Iesu Keriso ma Lana talalelei, ae le o le toe foi i agasala sa faia muamua?
-
2 Peteru 3
Ua molimau mai Peteru i le Afio Mai Faalua o Iesu Keriso
A o faaiuina e le Aposetolo o Peteru lana tusi, atonu o se tasi o ana molimau tusitusiga mulimuli lava, sa ia faamanatu atu ai i le Au Paia e uiga i le Afio Mai Faalua o Iesu Keriso ma aoao i latou i auala e saunia ai mo lea tulaga. E pei ona tusia i le 2 Peteru 3:1–9, sa ia aoao mai, o aso e gata ai o le a tauemua ai nisi o tagata, ma ulagia i latou o e ua talitonu i le Afio Mai Faalua.
Faitau le 2 Peteru 3:10–14, ma vaavaai mo le mea na aoao mai e Peteru e uiga i le Afio Mai Faalua. O le upu amio lelei i le fuaiupu 11 e faatatau i le aga po o uiga (tagai 1 Timoteo 4:12, vaefaamatalaga i), ae o le “naunau atu” i le fuaiupu 12 o lona uiga ia manao faamaoni i se mea.
O le a le fautuaga na tuuina mai e Peteru i le Au Paia ia saunia ai i latou mo le Afio Mai Faalua?
O le fuaitau “ua le pona, ma le le mata’uleagaina” i le fuaiupu 14 o lona uiga o le mama mai agasala. O i latou o e ua mama mai agasala ua faalelei i le Atua, pe toefuataiina ia ogatasi ma tasi ma Ia, ma o le a maua i le filemu faatasi ma le Faaola pe a afio mai o Ia. Mai aoaoga a Peteru ua tatou iloa ai, e mafai ona tatou sauni mo le Afio Mai Faalua o le Faaola e ala i le ola i ni olaga mama ma vaavaai atu ma le naunautai mo Lona Afio Mai. Mafaufau e tusi pe faailoa le mataupu faavae lenei i au tusitusiga paia i talane o le 2 Peteru 3:11–14.
O a nisi o mea e mafai ona tatou faia ia ola ai i ni olaga mama a o tatou vaavaai atu ma le naunautai mo le Afio Mai Faalua?
I le 2 Peteru 3:15–18 tatou te faitau ai, sa faailoa mai e Peteru o nisi o aoaoga a Paulo e faigata ona malamalama i ai. Sa ia lapatai mai foi e uiga i le pau atu i le amioleaga. Sa ia valaaulia le Au Paia ia “tutupu i le alofa tunoa, ma le poto a lo tatou Alii” (2 Peteru 3:18).
-
Ua ou suesueina le 2 Peteru ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: