Filemoni

Folasaga

I le tusi lenei na faafetaia ai e le Aposetolo o Paulo ia Filemoni mo lona faatuatua ma lona alofa i le Faaola ma uso a tagata o le Ekalesia. Sa ia fautuaina Filemoni ia toe talia mai lana pologa na sola ese o Onesemo, o se uso i le talalelei.

Filemoni

Ua fautuaina e Paulo ia Filemoni ia toe talia mai lana pologa na sola ese o Onesemo, o se uso i le talalelei.

I le avea ai ma tagata o le Ekalesia, e masani ona tatou fetaui ai i tagata fou. Vaai faalemafaufau faapea, ua auai atu se tagata fou i lau uarota po o le paranesi. I lau api talaaga mo le suesueina o tusitusiga paia, tusi e uiga i luitau faaleagafesootai e ono oo i se tasi pe a auai atu i le Ekalesia pe siitia atu i se uarota po o se paranesi fou. Afai na e auai i le Ekalesia pe siitia atu i se uarota po o se paranesi foi i ni tausaga e lei leva atu, faamatala soo se luitau faaleagafesootai na e oo i ai.

Mafaufau e uiga i fesili nei: E faapefea ona e faia tagata fou o lau uarota po o le paranesi? E faapefea ona e faia tagata o le Ekalesia o e ese lava a latou amioga faalia, ese mea e fiafia i ai, pe auai i ni vaega faaleagafesootai e ese mai ia te oe?

Ao e suesue i le tusi a le Aposetolo o Paulo ia Filemoni, vaavaai mo se upumoni e mafai ona taiala ai oe i au fegalegaleaiga ma uso a tagata o le Ekalesia.

I le taimi muamua na faafalepuipui ai o ia i Roma, ao taofia i totonu i lona lava fale, sa tusi atu ai Paulo ia Filemoni, o le atonu o se tagata Eleni liliu mai i le Ekalesia. E pei ona tusia i le Filemoni 1:1–3, na amata ai e Paulo lana tusi i le faafeiloai o Filemoni ma isi, e aofia ai le au lotu sa feiloai i le fale o Filemoni.

Faitau le Filemoni 1:4–7, ma vaavaai mo le mafuaaga na viia ai e Paulo ia Filemoni. I le anotusi lenei o le upu mafuta e faasino i le auai ma le faaaumeaina (tagai Filemoni 1:6, vaefaamatalaga a) ae o le fuaitau “galue lava” o lona uiga ia toaga po o le amata ona faaaoga (tagai Filemoni 1:6, vaefaamatalaga e).

Atonu e aoga le iloa ina ua faapea atu Paulo “[na] faamafanafanaina le Au Paia” (Filemoni 1:7), o le uiga o lana tala, sa faafiafiaina o latou loto e Filemoni.

O le faamoemoega autu o le tusi atu o Paulo ia Filemoni o le faailoa atu o se tulaga na aafia ai Filemoni ma lana auauna, po o le pologa na igoa ia Onesemo. Na sola ese Onesemo ma atonu sa ia gaoia se mea mai ia Filemoni (tagai Filemoni 1:18). O le faia o ni pologa sa lei manatulia o se mea leaga i le aganuu a Iutaia-Kerisiano i le Feagaiga Fou, ma sa lagolagoina e le tulafono a Roma. O faasalaga mo pologa e sosola ese na aofia ai le sasa faatigaina, faailoga le muaulu, pe fasioti foi. Ina ua sola ese Onesemo, sa faapea ona fetaui ai i le Aposetolo o Paulo.

Faitau le Filemoni 1:8–12, ma vaavaai mo le mea na augani pe na talosaga faamaoni atu ai Paulo ia Filemoni e fai. Ia manatua i le fuaiupu 8, o le upu poloai o lona uiga o le faatonu ae o le tatau o lona uiga o le fetaui po o le talafeagai.

Ana faapea e te i ai i le tulaga o Filemoni, o le a se manatu po o se lagona e te ono maua ina ua e maua le talosaga a Paulo?

Matau le fuaitau “o le na fanau e au, a e noanoatia au” (Filemoni 1:10). O se tasi uiga o le veape fanaua o le tuuina atu i se tasi le ola. Ao i ai Paulo i le falepuipui, sa fesoasoani o ia i a Onesemo ia amata se olaga fou o se soo o Iesu Keriso.

E pei ona tusia i le Filemoni 1:13–14, sa manao Paulo e tuu Onesemo ia te ia ina ia mafai ona fesoasoani Onesemo ia te ia, ae sa lei manao Paulo e faia e aunoa ma le maliega a Filemoni.

Faitau le Filemoni 1:15–16, ma vaavaai mo auala na faamalosiau ai Paulo ia Filemoni e manatu i le la sootaga ma le tagata fou liliu mai o Onesemo. Mafaufau e faailoga mea e te mauaina.

Aisea atonu na faigata ai ia Filemoni ona manatu ia Onesemo o se “uso pele” (Filemoni 1:16)?

O se upumoni e tasi e mafai ona tatou aoao mai le fuaiupu 16 o le o i tatou o uso ma tuafafine i le talalelei.

O i tatou uma o fanau a le Tama Faalelagi (tagai Eperu 12:9), o le mea lea o tagata uma o uso ma tuafafine. Ma le isi, e ala i sauniga o le papatisoga ma le faamauga, o le faaauau ona faaaoga le faatuatua ia Iesu Keriso, ma le tumau pea i le salamo, tatou te toefanauina ai faaleagaga. I ala lenei, e avea ai i tatou ma atalii ma afafine o Iesu Keriso (tagai Mosaea 5:7) ma, o lea, o ni uso ma tuafafine i Lona aiga o le feagaiga. E tusa lava po o a o tatou itupa, aganuu, matutua, mea e o mai ai, ma tulaga o agafesootai, tatou te tutusa i le malo o le Atua.

Ao e faitau i le saunoaga lenei a Peresitene Spencer W. Kimball, vaavaai mo auala e mafai ai e le upumoni e faapea, o i tatou o uso ma tuafafine i le talalelei ona aafia ai le ala tatou te faia ai le tasi ma le isi, aemaise lava o tagata fou o le Ekalesia:

“E faagaeetia lava au i taimi uma i le faitauina o le tusi puupuu a Paulo ia Filemoni; o loo aoao mai ai se mataupu faavae ma se agaga e faatatau i le usoga i le talalelei. …

“O se uunaiga ma se fiafiaga le vaaia o lenei lava agaga o loo faia i le Ekalesia aoao, i le vaaia o le Au Paia o talia ma fesoasoani ma lagolago ma tatalo mo i latou o e ulufale mai i aso uma i le malo o lo tatou Alii. Ia faaauau ona aapa atu i le tasi ma le isi—ma le isi anoano o le a ulufale mai i le Ekalesia. Faafeiloai i latou ma alolofa ma faaaumea i latou.

“O le mea e faanoanoa ai, sa i ai ni nai taimi sa lei faia ai e nisi o i tatou lena mea, o tala e uiga i nisi o e na teenaina i latou o e ua taliaina e le Alii e ala i le papatisoga. Afai sa ‘le ma ai [le Alii] e taua i latou o ona uso’ (Eperu 2:11), o le mea lea, … taitai o tatou uso ma tuafafine ma sii ae i latou i totonu o a tatou lio o le manatulia ma le alofa” (“Always a Convert Church: Some Lessons to Learn and Apply This Year,” Ensign, Sete. 1975, 4).

Tali fesili nei i lau api talaaga mo le suesueina o tusitusiga paia:
1. Aisea e te manatu e taua ai le malamalama, o i tatou o uso ma tuafafine i le talalelei?
2. O le a se taimi na e vaaia ai se tasi o faia isi o ni uso ma ni tuafafine i le talalelei? O a ni taunuuga lelei na maua mai i le agalelei ma le alofa faapena?
Tusi se tusi i se tagata i lau uarota po o le paranesi o le, atonu o loo manaomia le lagonaina o le alofaina ma le taliaina. Atonu e te faamalo atu i le tagata mo ana meaalofa ma saofaga, ma faailoa atu lou manatu o ia o se uso po o se tuafafine i le talalelei. A uma ona tusi le tusi, faamaumau sona aotelega i lau api talaaga mo le suesueina o tusitusiga paia.

Ina ia saunia e faailoa atu se upumoni faaopoopo na faaalia i le tusi a Paulo ia Filemoni, mafaufau i se taimi sa faatiga pe faia ai e se tasi se mea le lelei ia te oe.

Faitau le Filemoni 1:17, ma vaavaai mo le mea na fautuaina e Paulo ia Filemoni e fai mo Onesemo, le pologa a Filemoni lea sa sola ese.

Sa talosagaina e Paulo ia Filemoni e toe talia atu Onesemo i lona aiga e aunoa ma le faaoo o ni faasalaga matuia ia te ia, lea e masani ona maua e pologa e sosola. E pei ona faaalia i faatonuga a Paulo ia Filemoni, ua tatou aoao ai, o soo o Iesu Keriso e faasafua atu le alofa mutimutivale ma le faamagalo atu i isi.

Aisea e faigata ai i nisi o taimi ona faasafua atu le alofa mutimutivale ma le faamagalo atu i isi?

Ia manatua, o le faasafua atu o le alofa mutimutivale ma le faamagalo atu ia i latou o e na faia ni mea leaga ia i tatou, e le faapea, ua mafai ai ona latou aloese ma taunuuga o a latou amioga, pe faapea foi, e vave ona toe maua ai lo tatou talitonuina o i latou. Ae, o lona uiga ua tatou faaali atu le agaalofa i isi ma aveese atu soo se lagona o le inoino, ita, po o le tiga o loo ia i tatou. Pe a talafeagai ai, e mafai foi ona tatou faataga i latou o e na faia se mea leaga ia i tatou ia toe maua lo tatou talitonuina [o i latou].

Faitau le Filemoni 1:18–21, ma vaavaai mo le mea na ofo atu Paulo e fai, e sui ai Onesemo.

E pei lava ona faasalavei Paulo e sui mo Onesemo, o le a faasalavei foi Iesu Keriso e fai ma o tatou sui ma faatoga mo lo tatou faamoemoe i luma o le Tama Faalelagi (tagai MF&F 45:3–5). Ua totogi foi e Iesu Keriso le aitalafu faaleagaga ua tatou nofo aitalafu ai mo a tatou agasala.

E mafai faapefea ona fesoasoani le manatua o le mea na faia e Iesu Keriso mo i tatou, e faasafua atu ai le alofa mutimutivale ma le faamagalo atu i isi?

Tali se tasi pe sili atu o le seti o fesili nei i lau api talaaga mo le suesueina o tusitusiga paia (ia mautinoa e aua le tusia se mea e patino tele pe le faalauaiteleina):
1. O le a se taimi na e manaomia ai, e pei o Filemoni, le faasafua atu o le alofa mutimutivale ma le faamagalo atu i se isi tagata? Na faapefea ona e faasafua atu le alofa mutimutivale ma le faamagalo atu i lenei tagata? Na faapefea ona faamanuiaina oe i le faia o lena mea?
2. O le a se taimi sa e faamoemoe ai, e pei o Onesemo, ia maua le alofa mutimutivale ma le faamagaloga mai se isi tagata? Na faapefea ona e sailia le alofa mutimutivale ma le faamagaloga a lenei tagata? Na faapefea ona faamanuiaina oe mo le faia o lena mea?
3. O le a se taimi na avea ai oe ma se fautua, e faapei o Paulo, i le va o se tagata sa sailia le faamagaloga ma le tagata sa manaomia ona faasafua atu i ai le faamagalo atu ma le alofa mutimutivale? Na mafai faapefea ona e fesoasoani atu i le tagata sa faia le mea sese ia maua le faamagaloga ma le tagata na faamanualia ia faamagalo atu i le tagata na faia le mea sese?

Mafaufau i se mea e mafai ona e faia e faasafua atu ai le alofa mutimutivale ma le faamagalo atu i isi. Ao e saili e faaaofia, talia, ma tuuina atu le faamagaloga i isi, o le a fesoasoani le Alii ia te oe i au taumafaiga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Filemoni ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: