I lana tusi lona lua ia Timoteo, na aoao atu ai le Aposetolo o Paulo o le matau e le mai le Atua, ma fautuaina ai Timoteo e aua le ma i lana molimau ia Iesu Keriso. Sa ia uunaia Timoteo ia tumau faamaoni i tofotofoga ma faatonuina o ia e aoao atu i le Au Paia e salamo. Sa faamalamalama mai e Paulo e faapea, e ui lava o le a i ai le liliuese ma le amioleaga i o tatou aso, faapea foi i aso amuli, ae e tatau ia Timoteo ona tumau faamaoni i le faatuatuaga na uma ona ia aoaoina. Na aoao atu foi Paulo e uiga i faamoemoega o tusitusiga paia. Sa ia faaiuina lana tusi i le uunaia o Timoteo ia faia ma le filiga lana galuega.
Ua fautuaina e Paulo ia Timoteo ia aua le ma i le talalelei
Mafaufau i se taimi na oo ai ia te oe le matau. O fea sa e i ai? O le a lau mea sa fai?
Ata
Peresitene Gordon B. Hinckley
Sa faamalamalama mai e Peresitene Gordon B. Hinckley le ala e mafai e le matau ona aafia ai i tatou: “O a i se tasi o i tatou e faapea mai na te lei lagonaina le matau? E leai se tasi ua ou iloa na sao atoa mai ai. Ioe, o nisi na oo i le matau e matuai sili atu lava nai lo isi. O nisi e mafai ona vave o ese mai ai, ae o isi o loo paulia ai ma tosoina atu ai i lalo ma iu lava ina tosotata atu ai i le toilalo. Tatou te mafatia i le matau i le faalumaina, o le matau i le toilalo, o le matau i le tuua toatasi, o le matau i le valea. O nisi e matatau i le taimi nei, o nisi o le lumanai. O nisi o loo tauave le avega o agasala ma o le a tuuina atu e toetoe lava o soo se mea e luluese ai i latou lava mai na avega, vagana ai le matau e sui o latou olaga. Ia tatou iloa o le matau e le sau mai le Atua, ae o lenei elemene aati ma faataumaoia e sau mai le fili o le upumoni ma le amiotonu. O le matau o le tetee [faafeagai] o le faatuatua. O ona aafiaga e aati, e oo lava ina lamatiaina” (“God Hath Not Given Us the Spirit of Fear,” Ensign, Oke. 1984, 2).
E mafai faapefea e le matau ona aafia ai o tatou gafatia e ola i le talalelei?
Ao e suesue i le 2 Timoteo 1, ma vaavaai mo se mataupu faavae e mafai ona fesoasoani ia te oe e faatoilalo ai le matau.
Ao faafalepuipuiina Paulo i Roma e lata i le faaiuga o lona olaga, sa ia tusia ai le tusi lona lua ia Timoteo. E pei ona tusia i le 2 Timoteo 1:1–5, sa faaalia ai e Paulo lona manao e vaai ia Timoteo ma toe taua le faatuatua faamaoni o Timoteo.
Faitau le 2 Timoteo 1:6–8, vaavaai mo le mea na faamanatu atu e Paulo ia Timoteo e fai e faatoilalo ai le matau.
O le “meaalofa a le Atua” e maua e ala i le faaee atu o lima (2 Timoteo 1:6) atonu e faatatau i le Agaga Paia. O le fuaitau “toe faamumu” i le fuaiupu 6 o lona uiga o le toe tutu pe toe faaola (tagai 2 Timoteo 1:6, vaefaamatalaga a). Na fautuaina e Paulo ia Timoteo e toe faamumu le meaalofa o le Agaga Paia, pe toe valaaulia le Agaga Paia ia faatasi ma ia.
E tusa ai ma le 2 Timoteo 1:7, o a faamanuiaga e mafai ona oo mai le i ai o le Agaga faatasi ma i tatou?
Sa faatatau atu Paulo i le matau i le lalolagi, lea e mafua ai le popolevale, le mautonu, ma le tetei ma e ese mai le mea o loo faatatau i ai tusitusiga paia “o le matau i le Alii” (Faataoto 9:10). O le matau i le Alii “o le lagona o le faaaloalo ma le maofa mo Ia ma ia usitai i Ana poloaiga” (Taiala i Tusitusiga Paia, “Fear,” scriptures.lds.org). O lo tatou matau, po o le faaaloalo, i le Alii e mafai ona faamalosia ai i tatou e faasaga i le matau i le lalolagi.
O se tasi o mataupu faavae e mafai ona tatou aoao mai le fautuaga a Paulo ia Timoteo o le ao tatou saili faamaoni ia maua le Agaga e faatasi ma i tatou, e mafai ona tatou faatoilaloina le matau ma le le ma i la tatou molimau ia Iesu Keriso.
Tali fesili nei i lau api talaaga mo le suesueina o tusitusiga paia:
O a ni auala e mafai ona e faaali atu ai e te le ma i lau molimau ia Iesu Keriso?
O le a se taimi sa fesoasoani ai le Agaga e te faatoilalo ai le matau i le lalolagi pe tuu atu ia te oe le lototele e tu mausali ai i lau molimau ia Iesu Keriso?
Mafaufau loloto i mea e mafai ona e faia e valaaulia ai le Agaga e faatasi ma oe, ina ia e faatoilaloina le matau i mea faalelalolagi ma le ma i lau molimau ia Iesu Keriso.
E pei ona tusia i le 2 Timoteo 1:9–18, na uunaia e Paulo ia Timoteo ia tumau faamaoni i le aoaoga faavae moni. Sa ia molimau atu e uiga i le mana faaola o Iesu Keriso, lea ua mafai ai le Toetutu, ola pea, ma le ola e faavavau.
Ua faatonuina e Paulo ia Timoteo ia tumau faamaoni i tofotofoga faigata
E pei ona tusia i le 2 Timoteo 2:1–9, na uunaia e Paulo ia Timoteo ia faalagolago i le talalelei ma ia tumau i tofotofoga faigata e pei o le a faia ai e se fitafita lelei. Sa faapea mai foi Paulo, e tele tofotofoga faigata sa oo i ai ona o le avea ma se soo o Keriso.
Faitau le 2 Timoteo 2:10–12, ma vaavaai mo le mea na fai mai Paulo o le mafuaaga sa ia onosaia ai na tofotofoga faigata. “O le tofia” (fuaiupu 10) e faatatau i tagata faamaoni o le Ekaleia (tagai MF&F 29:7), ma le upu tigaina i le fuaiupu 12 e faatatau i le onosaia ma le tumau pea (tagai 2 Timoteo 2:12, vaefaamatalaga a).
O se tasi o mataupu faavae e mafai ona tatou aoao mai nei fuaiupu o le, ao tatou onosaia tofotofoga faigata ma tumau faamaoni i le Alii, e mafai ona tatou fesoasoani ia i tatou lava ma isi ia maua le faaolataga e ala ia Iesu Keriso.
E faapefea ona tatou fesoasoani i isi ia maua le faaolataga e ala ia Iesu Keriso e ala i le tumau faamaoni i o latou tofotofoga?
I le 2 Timoteo 2:13–19 na fautuaina ai e Paulo ia Timoteo e faamanatu i le Au Paia e aloese mai finauga ma ia “o ese i le amio leaga” (fuaiupu 19). Mafaufau e faailoga le fuaiupu mulimuli i le 2 Timoteo 2:19.
Ata
ipu inu uaina, paelo
Ina ia fesoasoani ia Timoteo ia malamalama i le manaomia e le Au Paia ona salamo, sa faaaoga ai e Paulo ni ipu po o ni koneteina eseese, o se tala faafaatusa mo tagata o le aiga, po o le Ekalesia, a Iesu Keriso.
Faitau le 2 Timoteo 2:20, ma vaavaai mo ituaiga ipu o loo “i se fale tele.” O le fuaitau “o isi ua tauleleia, a o isi ua tauleagaina” ua fautua mai ai o nisi tagata o le Ekalesia sa agavaa ma tuuto atu i latou lava i faamoemoega mamalu, ae o isi sa lei faia.
Faitau le 2 Timoteo 2:21, ma vaavaai mo le mea e avea ai se tasi ma se “ipu [tauleleia] … e aoga mo le alii.” O le fuaitau “faamama ia te ia ai nei mea” e faatatau i le matuai mama lelei mai agasala (tagai 2 Timoteo 2:21).
O se tasi o mataupu faavae e mafai ona tatou aoao mai le tala faafaatusa a Paulo o le afai tatou te faamama i tatou lava mai agasala, e mafai ona tatou auauna lelei atu i le Alii.
O a ni mea e mafai ona tatou faia e faamama ai i tatou lava mai agasala?
Faitau le 2 Timoteo 2:22, ma vaavaai mo nisi o mea sa tusia e Paulo e mafai ona tatou faia e faamama ai i tatou lava mai agasala.
Sa tuuina mai e Elder Jeffrey R. Holland o le Korama a Aposetolo e Toasefululua se faataitaiga o le auala e faatatau ai lenei mataupu faavae i faifeautalai:
Ata
Elder Jeffrey R. Holland
“Ua vaseina foi e le Alii laina o le agavaa mo i latou ua valaauina e galulue faatasi ma Ia i lenei galuega. E leai se faifeautalai e le o mafai ona salamo mai ni agasala o feusuaiga po o gagana masoa po o le matamata i ata ponokalafi e faamoemoe e luiina isi ia salamo mai na mea! E le mafai ona e faia lena mea. O le a le faatasi le Agaga ma oe ma o le a apili na upu i lou faa’i a o e tautala atu ai. E le mafai ona outou malaga i ala na ta’ua e Liae o le ‘ala faasaina’ [1 Nifae 8:28] ma faamoemoe e taitai isi i le ‘ala lauitiiti ma le vaaapiapi’ [2 Nifae 31:18] e le—mafai ona faia faapena.
“Ae o loo i ai se tali i lenei luitau mo outou e pei foi ona i ai ni tali i luitau o lena tagata sailiili o le a outou o atu i ai. Pe o ai lava oe ma pe o le a se mea na e faia, e mafai ona faamagaloina oe. O outou uma … e mafai ona lafoaia soo se solitulafono atonu o outou tauivi ai. O le vavega o le faamagaloga; o le vavega o le Togiola a le Alii o Iesu Keriso. Ae e le mafai ona outou faia e aunoa ma se tautinoga malosi i le talalelei, ma e le mafai ona outou faia e aunoa ma le salamo i le mea e manaomia ai. Ua ou talosagaina outou … ia mataalia ma ia mama. Pe a manaomia ai, ua ou talosagaina outou ia e mataalia ma ia e mama” (“Ua Tauto Tatou Uma,” Ensign po o le Liahona, Nov. 2011, 45).
Mafaufau loloto pe aisea e taua ai le mama mai agasala pe a folafola atu le talalelei. Mafaufau i soo se agasala e manaomia ona e salamo ai ina ia mafai ona e auauna lelei atu i le Alii. Oa manatua o lou epikopo po o le peresitene o le paranesi e mafai ona avea o se punavai taua o le fesoasoani ao e taumafai ia mama ma atoatoa.
Pe na e popole ea ina nei le mafai e oe po o lau fanau i le lumanai ona tatalia mea leaga o le lalolagi i o tatou aso?
Na aoao e le Aposetolo o Paulo ia Timoteo i auala e faatoilalo ai mea faigata o le lalolagi. Faitau le 2 Timoteo 3:1–5, ma vaavaai mo nisi o mea faigata na fai mai Paulo o le a oo mai ma molimauina e Timoteo ma i tatou i o tatou olaga. Atonu e te manao e faaaoga vaefaamatalaga e fesoasoani e te malamalama ai i nisi o upu faigata.
Mafaufau i se taimi lata mai atonu sa e matauina ai nei ituaiga o amioga faigata.
I le 2 Timoteo 3:6–13 sa faaauau ai ona faamatala e Paulo ia nei mea faigata, ma sa ia valoia ai, o nei aso amuli o le a atili ai ona leaga.
Matau i le 2 Timoteo 3:7 sa taua ai e Paulo i latou o e ua “aoaoina e le aunoa, a e le au mafai ona oo ina iloa lelei o le upumoni.” O a nisi o filosifia po o manatu o loo taatele i aso nei ae ua le tusa ai ma upumoni ua faaalia mai e le Alii e ala i Ana perofeta?
Ina ua uma ona faamatala mai nei mea faigata, sa tuuina mai e Paulo le fautuaga ia Timoteo—ma i tatou—e uiga i le ala e faatoilalo ai nei faigata faaleagaga.
Faitau le 2 Timoteo 3:14–17, ma vaavaai mo le fautuaga a Paulo. (Ia manatua o le 2 Timoteo 3:15–17 o se fuaitau o le mau tauloto. Atonu e te manao e faailoga i se auala e iloagofie ai ina ia mafai ona e mauaina i le lumanai.)
Mafaufau i le faauigaga o le ia “tumau i mea ua aoaoina ai oe, ua mautinoa ia te oe” (2 Timoteo 3:14).
E mafai ona tatou aoaoina mataupu faavae nei e lua mai nei fuaiupu: Afai tatou te faaauau pea i upumoni ua tatou aoaoina mai punavai faatuatuaina ma i tusitusiga paia, e mafai ona tatou faatoilaloina faigata faaleagaga o aso amuli. Ao tatou suesue i tusitusiga paia, e mafai ona tatou aoao ai i aoaoga faavae ma maua mai faasaoga ma faatonuga o le a fesoasoani tatou te tuputupu ae ai agai atu i le atoatoa.
I lau api talaaga mo le suesueina o tusitusiga paia, tusi e uiga i se taimi na fesoasoani ai tusitusiga paia ia te oe i se auala se tasi pe sili atu o auala nei:
Ia malamalama i aoaoga faavae o le talalelei
E ala i le ofoina atu o le aoaiga po o le faasaoga e uiga i se mea i ou manatu, filifiliga, po o amioga, sa le sao
E ala i le tuuina atu o se tali i se tatalo po o le tuuina atu o faatonuga i auala e mafai ona e foia ai se faafitauli
Faaali sina taimi e tauloto ai le 2 Timoteo 3:16–17. Ona tusi lea i lau api talaaga mo le suesueina o tusitusiga paia: Ua ou taulotoina le 2 Timoteo 3:16–17. Mafaufau pe faapefea ona e suesueina au tusitusiga paia i lenei vaiaso i se auala e valaaulia ai folafolaga a nei fuaiupu i lou olaga.
Ua folafola mai e Paulo, ua ia tauina se taua lelei ma poloaiina Timoteo e faaauau pea ona talai atu
E foliga mai o le 2 Timoteo o le tusi mulimuli lea a le Aposetolo o Paulo na tusia ao lei maliu o ia. Faitau le 2 Timoteo 4:1–5, ma vaavaai mo mea e lua: (1) O le fautuaga a Paulo ia Timoteo ma le (2) valoaga a Paulo e uiga i le lumanai o le Ekalesia Kerisiano anamua. Faaaoga vaefaamatalaga e fesoasoani e te malamalama ai i mea e te faitauina. O le fuaitau “ia e faamalosi i ona aso e taugalemu ai, ma ona aso e le taugalemu ai” i le fuaiupu 2 o lona uiga ia faanatinati i le galuega a le Alii ma ia aoai pe faasao i latou e le o [natinati] (tagai Faaliliuga Iosefa SamitaFaaliliuga, 2 Timoteo 4:2 [i le 2 Timoteo 4:2, vaefaamatalaga e]).
Tusi mea e te maua i le siata lenei:
Fautuaga a Paulo ia Timoteo
Valoaga a Paulo e uiga i le Ekalesia Kerisiano anamua
Aisea e te manatu na uunaia ai e Paulo ia Timoteo ia faaauau pea i le talaiga ma le auauna atu i tagata, e ui lava sa ia iloaina e toatele o le a liliuese mai le upumoni?
Faitau le 2 Timoteo 4:6–8, ma vaavaai mo le mea na tusia e Paulo e uiga i ana lava taumafaiga e faasalalau atu le talalelei.
Ia matau le faatatauga faaafeleti a Paulo i le tauina o se taua lelei ma le faaiuina o le tausinioga, ua faamatala ai le ala sa ia faamaeaina ai ma le faamaoni lana misiona. E tusa ai ma le fuaiupu 8, o le a le mea na iloa e Paulo na faatalitali mai mo ia ina ua oti?
E mafai ona tatou aoaoina le mataupu faavae lenei mai nei fuaiupu: Afai tatou te tumau i le faamaoni i mea uma e finagalo mai ai le Alii ia i tatou, o le a tatou maua le pale o le amiotonu. O se “pale o le amiotonu” e aofia ai le avea faapei o le Tama Faalelagi.
I lau api talaaga mo le suesueina o tusitusiga paia, lisi ai nisi o mea e manaomia ua tuuina mai e le Alii i le autalavou o le Ekalesia, e fesoasoani ia latou avea atili ai e pei o lo latou Tama oi le Lagi. (Afai e te manaomia le fesoasoani, vaai i le tamaitusi Mo le Malosi o le Autalavou .) Ona tusi lea o tali i fesili nei:
Aisea e ono filifili ai le autalavou e lafoai le faamaoni i nisi mea nei e manaomia?
O ai o e iloa, e pei o Paulo, o se faataitaiga lelei o le tumau faamaoni e tusa lava pe faigata? O le a le mea na latou faia ua faaalia ai lenei mataupu faavae?
E pei ona tusia i le 2 Timoteo 4:9–22, na faaiuina e Paulo lana tusi i le faamalamalama mai e faapea, e ui lava na i ai taimi sa ia lagonaina ai le tuua toatasi i lana galuega, ae sa ia iloa sa faatasi le Alii ma ia ma faamalosia o ia.
Ia manatua ia tumau le faamaoni i mea ua manaomia mai e le Alii ia te oe. Atonu e te manao e tusi e uiga i soo se musumusuga po o ni uunaiga mai le Tama Faalelagi sa e maua i le taimi o lenei lesona. Mafaufau e faatu se sini e galue i au musumusuga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 2 Timoteo ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: