Filipi 4

Folasaga

Na faatonuina e le Aposetolo o Paulo le Au Paia i Filipi ina ia agaga tatalo ma ia saili atu i soo se mea e amiotonu. Sa ia folafola mai foi lona talitonu i le malosi o Iesu Keriso e gafatia ai [mea uma]. Na faaiuina e Paulo lana tusi i se isi faailoaga o le faafetai i le Au Paia i Filipi mo le lagolagosua sa tuuina atu ia te ia i taimi na manaomia ai.

Filipi 4:1–14

Ua aoao e Paulo le Au Paia i Filipi ia agaga faafetai ma ia saili atu i soo se mea e amiotonu

I o tatou olaga o le a tatou oo ai i luitau po o tulaga tatou te oo ai i le popole. Mo se faataitaiga:

“Ou te popole i le pasi o se suega o loo loma.”
“Ou te popole i se tagata o le aiga o loo mai.”
“Ou te popole i le tu atu mo ou talitonuga.”
“Ou te popole pe mata e mafai ona avea au ma se faifeautalai faamanuiaina.”

O a nisi o popolega po o atugaluga o loo feagai ma oe i le taimi lenei o lou olaga?

Ao e suesue i le Filipi 4, vaavaai mo se upumoni e mafai ona fesoasoani ia i tatou pe a tatou feagai ma ni tulaga tatou te ono oo ai i le popole.

I le Filipi 4:1–5 tatou te faitau ai i le ala na fautuaina ai e Paulo le Au Paia ia tutu mausali i le faamaoni i le Alii, ia olioli i le Alii, ma ia iloa lo latou amio pulea, po o le agamalu (tagai Filipi 4:5, vaefaamatalaga a), e tagata uma lava.

Faitau le fasifuaitau muamua o le Filipi 4:6, ma vaavaai mo le fautuaga a Paulo i le Au Paia.

O le fasifuaitau “aua nei popole i se mea e tasi” i le fuaiupu e 6 o lona uiga e aua le soona popole i se mea (tagai Filipi 4:6, vaefaamatalaga a).

Faitau le vaega o totoe o le Filipi 4:6, ma vaavaai i le mea na fautuaina e Paulo le Au Paia e fai nai lo o le popole. (O le faatoga o se talosaga faamaualalo, faatauanau.)

Faitau le Filipi 4:7, ma vaavaai mo le faamanuiaga na folafola atu e Paulo ona o le tatalo faamaualalo ma faamaoni ma le agaga faafetai. Ia manatua o le upu leoleoina i le fuaiupu lenei o lona uiga o le puipuia (tagai Filipi 4:7, vaefaamatalaga i).

O le mataupu e tasi e mafai ona tatou aoao mai nei fuaiupu o le, i le avea ai ma soo faamaoni o Iesu Keriso, afai tatou te tatalo ma faatoga ma le faafetai, ona tatou maua lea o le filemu o le Atua. O le mulimuli i le fautuaga poto a Paulo e ave atu mea uma i le Atua i le tatalo ma faatoga ma le faafetai, e mafai ona fesoasoani e faatumau ai le paleni lelei i le olaga, nai lo o le soona popolevale po o le popole i faamatalaga uma e le manaomia ma ona taunuuga.

Ua aoao mai Elder Richard G. Scott o le Korama a Aposetolo e Toasefululua i auala e mafai ona fesoasoani ai le filifili e ola i lenei mataupu faavae ia i tatou: Talu ai Na te faamamaluina lou faitalia, o le a le faamalosia ai lava oe e le Tama o i le Lagi e te tatalo atu ia te Ia. Ae a e faaaogaina lena faitalia ma faaaofia o Ia i vaega uma o lou olaga i aso taitasi, o le a amata ona tumu lou loto i le filemu, filemu faafiafiaina. O lena filemu o le a e taulai atu ai i au tauiviga mai se vaaiga e faavavau. O le a fesoasoani ia te oe e pulea ai na luitau mai se vaaiga e faavavau” (“Ia Avea le Faaaogaina o le Faatuatua ma Mea E te Faamuamuaina,” Ensign po o le Liahona, Nov. 2014, 93).

Maitau i le Filipi 4:6lea na fautua mai ai Paulo e tatau ona ofoina atu a tatou tatalo ma talosaga ma le faafetai. Tali fesili nei, i lau api talaaga mo le suesueina o tusitusiga paia:
1. E te manatu e mafai faapefea e le faailoa atu o le agaga faafetai ona aumaia ia i tatou le filemu o le Atua?
2. E tusa ai ma le saunoaga a Elder Scott, e mafai faapefea e le filemu o le Atua ona fesoasoani ia i tatou i luitau tatou te oo i ai?

Mafaufau i popolega po o atugaluga sa e mafaufau i ai i le amataga o le lesona lenei. Filifili e faaaoga le mataupu faavae na aoao mai e Paulo e ala i le tatalo ma faatoga ma le faafetai ae le o le popole. Ao e matauina popolega o isi o siomia oe, mafaufau e faasoa atu upu a Paulo ma le mataupu faavae lenei ia i latou.

Mo le 30 sekone e sosoo ai, taulai atu ou mafaufauga i le Faaola ma le mea na Ia faia mo oe.

O le a se aafiaga o le taulai atu i lenei mea ia te oe?

Faitau le Filipi 4:8–9, ma vaavaai mo le mea na apoapoai atu Paulo i le Au Paia i Filipi e mafaufau i ai ma fai. Mafaufau e faailoga pe matau ituaiga o mea taitasi na faatonuina e Paulo le Au Paia e taulai atu i ai o latou mafaufauga. O le fasifuaitau “manatunatu” i le fuaiupu 8 o lona uiga ia mafaufau totoa ma fai pea lava pea.

I le fuaiupu 9, o le a le mea na fautuaina e Paulo tagata o le Ekalesia e fai? O a faamanuiaga sa ia folafola atu i le Au Paia pe afai latou te taulai atu i le amiotonu ma mulimuli i ana aoaoga ma faataitaiga?

O le mataupu faavae e tasi e mafai ona aoao mai faatonuga a Paulo o le, afai e taulai atu e le Au Paia faamaoni o latou manatu i soo se mea e amiotonu, ma afai latou te mulimuli i aposetolo ma perofeta, o le a faatasi le Atua o le filemu ma i latou.

I lau api talaaga mo le suesueina o tusitusiga paia, tusi ai pe mafai faapefea e le taulai atu o o tatou manatu i mea amiotonu ona aafia ai o tatou manaoga ma amioga.

Faitau le Mataupu Faavae o le Faatuatua 1:13 (i le Penina Tau Tele), ma vaavaai pe faapefea ona tutusa ma le Filipi 4:8.

Ina ua taua e le Perofeta o Iosefa Samita lenei “apoapoaiga a Paulo” mai le Filipi 4:8 i le mataupu faavae o le faatuatua e sefulutolu, sa ia suia ai le “manatunatu i ia lava mea” i le mea e sili atu o le “saili i ia mea uma.” Mafaufau pe aisea e taua ai ona tatou saili i mea uma ua moni, faamaoni, tonu, mama, matagofie, logoleleia, ma amio lelei, ma mea e viia.

Faitau le fautuaga i se tasi o autu nei mai le tamaitusi Mo le Malosi o le Autalavou : “Tafaoga Faamasani,” “Ofu ma Foliga Vaaia,” “Aoga,” “Faafiafiaga ma Ala o Faasalalauga,” “Uo,” “Gagana,” po o le “Musika ma Siva.” I lau api talaaga mo le suesueina o tusitusiga paia, tusi le igoa o le autu ua e filifilia. Ona tusi lea o au tali i fesili nei:
1. Pe faapefea ona tatou faaaogaina le aoaoga a Paulo o loo i le Filipi 4:8–9 e taiala ai a tatou filifiliga e uiga i lenei autu?
2. Ao tatou taumafai e mulimuli i le aoaoga a Paulo, o a ni luitau tatou te ono fetaiai e uiga i lenei autu?
3. Aisea e aoga ai taumafaiga ia “ia te outou … o le Atua e ona le manuia” (Filipi 4:9) o le sailia o mea amiotonu ma mulimuli i aposetolo ma perofeta?

E mafai faapefea ona e faaleleia au taumafaiga e taulai atu ou mafaufauga i mea amiotonu? Mafaufau i faamanuiaga ua oo mai ia te oe, ao e mulimuli i aoaoga a aposetolo ma perofeta. Faaauau ona ola i lenei mataupu faavae ina ia faaauau ona tuuina mai e le Alii Lana mafutaga ma le manuia i lou olaga.

E pei ona tusia i le Filipi 4:10, sa faafetai ai Paulo i le Au Paia i Filipi mo le lagolago ma le tausiga na latou ofoina atu ia te ia i le taimi o ona tofotofoga. Faitau le Filipi 4:11–12, ma vaavaai mo le mea na tau atu e Paulo i le Au Paia sa ia aoaoina.

O le a le mea na iloa e Paulo ona fai i tulaga uma?

Faitau le Filipi 4:13–14, ma vaavaai mo le faapogai o le malosi o Paulo. (Filipi 4:13 o se fasifuaitau o se mau tauloto.) Atonu e te manao e faailoga i se auala e iloagofie ai ina ia mafai ona e mauaina i le lumanai.)

O le faamatalaga a Paulo i le fuaiupu 13 e faatatau i lona gafatia, e ala i le malosi na tuuina mai e Iesu Keriso, e faia ai mea uma sa lelei i le, pe manaomia e le Atua, e aofia ai le lotomalie i soo se tulaga. E pei o Paulo, e mafai ona tatou faia mea uma e ala ia Iesu Keriso, o le na tuuina mai ia i tatou le malosi.

O a ni mea e mafai ona tatou faia e maua ai le malosi lea e tuuina mai e Iesu Keriso?

Na aoao mai Peresitene Dieter F. Uchtdorf o le Au Peresitene Sili e uiga i mea e mafai ona tatou faia e ala i le malosi o le alofa tunoa o le Atua: “O le isi elemene o le alofatunoa o le Atua o le tatalaina lea o pupuni o le lagi, lea e liligi mai ai e le Atua faamanuiaga o le mana ma le malosi, tatou te mafaia ai ona ausia mea ia e le mafai ona oo i ai lo tatou lava malosi. O le alofatunoa ofoofogia o le Atua lea e mafai ai e Lana fanau ona faatoilaloina le faaosoosoga matautia ma taufaapōpō a lē taufaasese, lafoai ese agasala, ma “ia faaatoatoaina ia Keriso’ [Moronae 10:32]” (“O Le Meaalofa o le Alofatunoa,” Ensign or Liahona, Me 2015, 108).

O nisi o auala e mafai ona tatou maua ai lenei malosiaga e aofia ai le faateleina o le fetuutuunai, naunautai malosi, lototele, onosai, faapalepale, ma le naunautai ma le malosi.

I lau api talaaga mo le suesueina o tusitusiga paia, tusi e uiga i se aafiaga na tuu atu ai e lou faatuatua ia Iesu Keriso le malosi e te faia ai se mea lelei.

Mau Tauloto—Filipi 4:13

O le taulotoina o le Filipi 4:13 o le a fesoasoani ai i lenei upumoni ia oo atu i lou mafaufau ao tauivi oe po o i latou e siomia oe ia maua le malosi e faatoilalo ai mea faigata ma ola amiotonu. Faitau soo i le Filipi 4:13 e fesoasoani e te taulotoina ai. Tauloto atu i se tagata o le aiga po o se uo, ma valaaulia lena tagata e faasoa mai se aafiaga i se taimi na tuuina atu ai e le faatuatua ia Iesu Keriso le malosi e faia ai se mea lelei. Ona fai lea o mea nei i totonu o lau api talaaga mo le suesueina o tusitusiga paia.

Filipi 4:15–23

Ua faaiu e Paulo lana tusi i le Filipi i se faailoaina atu o le faafetai

I le Filipi 4:15–23 tatou te faitau ai, sa toe faafetai atu le Aposetolo o Paulo i le Au Paia i Filipi mo le lagolagoina o ia i taimi sa ia puapuagatia ai. O meaalofa a le Au Paia sa o ni taulaga lelei i le Atua, ma sa folafola atu e Paulo o le a faataunuuina e le Atua o latou foi manaoga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Filipi 4 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: