Iunite 25, Aso 3: Filipi 1–3

Iunite 25: Aso 3

Filipi 1–3

Folasaga

Na uunaia e le Aposetolo o Paulo le Au Paia i Filipi ia galulue faatasi i le ola ai i le talalelei a Iesu Keriso. Sa ia fautuaina i latou ia mulimuli i le faataitaiga a le Faaola o le lotomaualalo ma le le manatu faapito, ma ia aoao atu sa galue le Atua ia i latou ia aumaia lo latou faaolataga. Na faamatala e Paulo ia osigataulaga sa ia faia e mulimuli ai ia Iesu Keriso.

Filipi 1

Ua faamatala e Paulo faamanuiaga e oo mai i le tetee

O a upu e mafai ona e faaaogaina e faatumu ai avanoa o le faamatalaga lenei mai ia Peresitene Polika Iaga?

“Soo se taimi lava e te kikia ai le ‘Faamamona’ o loo e kikiina ____________________; te le kikiina lava ____________________. O le Alii Silisiliese lava ia na faatulagaina” (Aoaoga a Peresitene o le Ekalesia: Polika Iaga [1997], 270).

(O le a e maua tali i se taimi mulimuli mai i le lesona.)

O a nisi o faataitaiga, a le mai le talafaasolopito pe mai o tatou aso, o tagata e faasaua, pe tetee, i le Ekalesia a le Faaola ma Ona soo?

Ao e suesue i le Filipi 1, vaavaai mo se upumoni e mafai ona fesoasoani e te malamalama ai i auala e mafai e le tetee ona aafia ai le galuega a le Alii.

Sue le Filipi i luga o le faafanua o loo avatu ai e faaalia ai malaga faafaifeautalai a le Aposetolo o Paulo.

Sa faatu e Paulo se paranesi o le Ekalesia i Filipi i le taimi o lana malaga lona lua faafaifeautalai (tagai Galuega 16). Sa ia tusia mulimuli ane lana tusi i Filipi ao faafalepuipuiina o ia, e masalo i Roma. I le Filipi 1:1–11, tatou te faitau ai, sa faaali atu e Paulo le agaga faafetai ma le alofa mo le Au Paia i Filipi.

Faitau le Filipi 1:12–14, ma vaavaai mo le mea na oo i ai le tetee lea sa oo ia Paulo i le taimi o ana taumafaiga faafaifeautalai.

E pei ona faamatalaina i nei fuaiupu, o le tetee na oo ia Paulo na taitai atu ai “ina tupu atili ai [alualu i luma] le talalelei” (Filipi 1:12). Sa iloa e tagata uma i le “maota,” po o nofoaga tutotonu o le militeli, sa faafalepuipuiina Paulo ona o le talai atu e uiga ia Iesu Keriso. O le faafalepuipuiina o Paulo sa musuia ai foi isi tagata o le Ekalesia ia totoa atili i le talaiga o le talalelei.

Mai le Filipi 1:12–14 ua tatou aoao ai, o le tetee tatou e oo i ai ona o le mulimuli ia Iesu Keriso e mafai ona faalautele ai Lana galuega.

I le saunoaga a Peresitene Iaga, faatumu avanoa i upu luga (o lona uiga i le anotusi lenei o le agai i luma) ma lalo.

Vaaifaalemafaufau e faapea, o oe o se tagata tusitala mo se itulau i le uepi [blog] po o se nusipepa. I lau api talaaga mo le suesueina o tusitusiga paia, tusi ni faaulutala mo ni tulaga moni se lua pe tolu sa faapea ona fesoasoani ai le tetee e faaalualu i luma le galuega a le Alii. O nei tala e mafai ona aumai mai tusitusiga paia pe mai olaga o tagata e te iloa. (O loo i lalo se tasi o faataitaiga mo se faaulutala: “O le tetee e faasaga i le galuega faafaifeautalai, ua faateleina ai le mananao o tagata e aoao i le savali o le talalelei mai faifeautalai i le lotoifale.”)

E pei ona tusia i le Filipi 1:15–26, na aoao mai Paulo, po o le a lava le mea e tupu ia te ia o le a viia ai le Faaola.

Faitau le Filipi 1:27–30, ma vaavaai mo le mea na uunaia e Paulo le Au Paia i Filipi e fai mo le talalelei. Ia matau o le upu amio i le fuaiupu 27 e faatatau i amioga.

O le Faaliliuga a Iosefa Samita, o le Filipi 1:28 e faitauina faapea, “Ma e leai se mea e taufaamatauina ai e o outou fili, o e teena le talalelei, lea e aumaia ai i o latou luga le faatafunaga; ae o outou o e talia le talalelei, faaolataga; ma e a le Atua” (i le Filipi 1:28, vaefaamatalaga a).

Ia matau i le Filipi 1:27–30 o le a le mea o le a oo i tagata o le Ekalesia e fai ai ma sui o le Faaola. Mafaufau i le ala atonu na faamanuiaina ai le Au Paia i Filipi e ala i le manatua o le tetee na latou oo i ai i le mulimuli ia Iesu Keriso, e mafai ona fesoasoani e faalautele ai Lana galuega.

Filipi 2

Ua aoao mai Paulo e uiga i le afio ifo o le Faaola ma faatonu le Au Paia e uiga i lo latou faaolataga

Faitau le Filipi 2:2–4, ma vaavaai mo le fautuaga a le Aposetolo o Paulo i le Au Paia i Filipi. I le fuaiupu 3 o le upu mitamita fua o lona uiga o le lotovii ae o le fuaitau “loto maualalo” e faatatau i le agamalu.

Faitau le Filipi 2:5–9, ma mafaufau e faailoga pe faailoa upu po o fuaiupu e faaalia ai le lotomaualalo ma le le manatu faapito o Iesu Keriso.

E mafai ona tatou aoaoina le mataupu faavae lenei mai aoaoga a Paulo i nei fuaiupu: Afai tatou te mulimuli i faataitaiga a Iesu Keriso o le lotomaualalo ma le le manatu faapito i isi, ona mafai lea ona faateleina lo tatou lotogatasi.

Tali fesili nei i lau api talaaga mo le suesueina o tusitusiga paia:
1. O a nisi o auala e mafai ona tatou mulimuli ai i faataitaiga a le Faaola o le lotomaualalo ma le le manatu faapito i o tatou aiga, aoga, ma uarota po o paranesi?
2. O le a se taimi na e vaaia i ni tagata o mafaufau muamua i manaoga o isi nai lo i latou lava? Na faapefea ona faateleina e nei taumafaiga le lotogatasi?

E pei ona tusia i le Filipi 2:9–11, na aoao mai Paulo, mulimuli ane “[o le a] tootuli o tulivae uma lava” ma “[o le a] tautau atu e laulaufaiva uma lava o Iesu Keriso o le Alii lava ia.” Faaalu sina taimi e vaaifaalemafaufau ai i lena taimi, ma mafaufau i le mea e te faamoemoe o le a faapei ai lenei aafiaga mo oe.

Faitau le Filipi 2:12–13, ma vaavaai mo le mea na fautuaina e Paulo ia Filipi e fai, e mafai ai e lo latou aafiaga o le ifo atu i luma o le Alii ona avea ma se mea e olioli ai. O le fuaitau “matau atoa ma le gatete” i le fuaiupu 12 e faatatau i le maofa faaaloalo ma le olioli (tagai Salamo 2:11; Taiala i Tusitusiga Paia, “Fear,” scriptures.lds.org).

Sa ave sese e nisi o tagata faatonuga a Paulo ina ia “galulue aiai ina ia faaolaina outou” (Filipi 2:12) e faapea, e faaolaina i tatou e ala i a tatou lava galuega. E na o le Togiola a Iesu Keriso e mafai ona faaolaina ai i tatou. Ae peitai, e ao ona tatou faamalieina mea e manaomia mo le faaolataga, lea ua tuuina mai e le Alii (tagai Mataupu Faavae o le Faatuatua 1:3–4). E pei ona tusia i le Filipi 2:13, na aoao mai Paulo, e fesoasoani le Atua ia i latou o e e taumafai e faamalie mea e manaomia mo le faaolataga e ala i le fesoasoani ia i latou ia “loto,” pe mananao, ma ia usitai “i lona finagalo alofa,” po o Ana poloaiga.

Mai le Filipi 2:12–13 ua tatou aoao ai, e fesoasoani le Atua ia tatou loto ma faia mea e manaomia mo lo tatou faaolataga, lea e mafai ona faia e ala i le Togiola a Iesu Keriso. Mafaufau e tusi pe faailoa le upumoni lenei i au tusitusiga paia.

E ala i le aafiaga a le Agaga Paia, e mafai ai e le Atua ona fesoasoani ia tatou sui ma faamama o tatou loto ina ia tatou mananao e usitai ia te Ia (tagai Mosaea 5:2). O le a se taimi na e lagonaina ai le suia e le Atua o lou loto ina ia e manao e usitai ia te Ia? O faapefea ona fesoasoani o Ia ina ia e tausia ma le faamaoni atili Ana poloaiga?

E pei ona tusia i le Filipi 2:14–30, sa faamanatu atu e Paulo i le Au Paia ia latou “faapei o mea e faamalamalama ai le lalolagi” (Filipi 2:15) ma tau atu ia i latou o le a ia auina mai avefeau ia iloa lo latou manuia.

Filipi 3

Ua faamatala e Paulo ia osigataulaga sa ia faia e mulimuli ai ia Iesu Keriso

O le a se mea faitino e faatusa i se mea e te faatauaina, lea o le a manatu foi le lalolagi o se mea e taua (e pei o se mea faitino e faatusa i le aiga, uo, aoga, meaai, tekinolosi, po o le tamaoaiga)?

O le a se mea o le a e loto e lafoai ai lenei meatotino taua?

Ao e suesue i le Filipi 3, vaavaai mo le mea na lafoai e Paulo ina ia mafai ona maua se taui o loo faapea foi ona avanoa mo i tatou.

E pei ona tusia i le Filipi 3:1–2, sa lapataiina e Paulo tagata o le Ekalesia i Filipi e uiga i faiaoga piopio (“uli”) o e na faapea mai e tatau i tagata liliu mai o le Ekalesia ona usitai i ni faiga faaIutaia faapitoa, e aofia ai le peritomeina (“i e ua katatomeina”). I le Filipi 3:3 sa ia aoao mai ai o i latou o e “auauna i le Atua ma le loto, ma mitamita ia Keriso Iesu” “o le au peritomeina,” po o tagata o le feagaiga a le Atua.

Faitau le Filipi 3:4–6, ma vaavaai mo le mea na fai mai Paulo e uiga i lona tofi faaIutaia.

Ia matau mea e lelei ai i le agafesootai ma faalelotu a tagata Iutaia lea sa i ai ia Paulo. Sa i ai sona tofi o e Isaraelu, o ia o se Faresaio, sa malosi o ia i le faaIutaia, ma sa ia usitai aiai i tulafono faalelotu faaIutaia.

Faitau le Filipi 3:7–11, ma mafaufau e faailoga pe tusi upu po o fuaitau o loo faaalia ai le ala na vaai ai Paulo i mea lelei ia sa ia maua i le siosiomaga FaaIutaia.

Sa “faaleaogaina [ma le lotomalie o Paulo] mea uma” (Filipi 3:8) ina ia mafai ona ia iloa Iesu Keriso; “ia maua foi ia te ia” (Filipi 3:9), po o le i ai i se sootaga faafeagaiga ma Ia; ia tauamiotonuina e ala i le faatuatua ia te Ia; puapuagatia mo Ia; ma ia avea o se vaega “o le toe tu mai o e amiotonu,” po o e amiolelei (Faaliliuga a Iosefa Samita, Filipi 3:11 [i le Filipi 3:11, vaefaamatalaga a]).

Faitau le Filipi 3:12–14, ma vaavaai mo le mea na iloa e Paulo e uiga i lona alualu i luma faaleagaga. Ia matau o le upu maua i le anotusi lenei o lona uiga o le maua mai.

Nai lo o le taulai atu i mea na ia tuua, sa fetaomi atu i luma Paulo ia maua ai “le taui na valaauina ai au mai luga e le Atua” (Filipi 3:14), o le ola e faavavau lea. Faauma le mataupu faavae lenei e faavae i le mea e mafai ona tatou aoao mai i le faataitaiga a Paulo: Afai tatou te ,ona mafai lea ona tatou iloa o Ia ma maua le ola e faavavau.

Sa faamatala e Peresitene Gordon B. Hinckley e uiga i le feiloai atu i se alii ofisa o le neivi o le sa sau mai se isi atunuu i le Iunaite Setete mo aoaoga faamasani maualuluga atu, ma o le na auai i le Ekalesia ao nofo ai [i le Iunaite Setete]. Mafaufau i le mea na loto lena alii talavou e lafoai ina ia mulimuli ia Iesu Keriso.

“Sa faailoa mai o ia ia te au i le taimi tonu lava na sauni ai e toe foi atu i lona atunuu moni. … Sa ou fai atu: ‘O ou tagata e le o ni Kerisiano. O le a le mea o le a tupu pe a e toe foi atu i le fale o se Kerisiano, ae maise lava, o se Kerisiano Mamona?’

“Sa melotagi o ia, ma tali mai, ‘O le a le fiafia lou aiga. Atonu latou te tuliesea au ma manatu faapea ua ou oti. Ae o lo’u lumanai ma la’u matata faalegaluega, atonu foi o le a tapunia avanoa uma mo au.’

“Sa ou fesili atu, ‘Ua e loto e totogi se na tau tele mo le talalelei?’

“O ona mata lanu uliuli, na susu i loimata, sa susulu mai ona foliga enaena aulelei ao ia tali mai ‘E moni, a ea?’

“O lona matamuli i le faia mai o le fesili, sa ou tali atu ai, ‘Ioe, e moni.’

“O lea na ia tali mai ai, ‘O le a la se isi mea e afaina ai?’” (“It’s True, Isn’t It?” Ensign, Iulai 1993, 2).

Tali fesili nei i lau api talaaga mo le suesueina o tusitusiga paia:
1. O le a se mea ua e (po o se tasi e te iloa) lafoaia ina ia mulimuli i le Faaola?
2. Aisea e aoga ai osigataulaga ua e faia [e avea] ma tau o le iloa o Iesu Keriso ma le alualu i luma agai atu i le ola e faavavau?

Mafaufau loloto po o i ai se mea e manaomia ona e lafoaia ina ia e mulimuli atoatoa ai ia Iesu Keriso. I se fasipepa e ese mai, tusi ai se sini ia lafoai lenei mea. Tuu le fasipepa i se mea e mafai ona e vaai soo i ai i le aluga o nai vaiaso o loo sosoo mai. Ona tusi lea Faamaeaina le galuega atofaina 4 i lau api talaaga mo le suesueina o tusitusiga paia:

I le Filipi 3:15–21 tatou te faitau ai i le lapataiga a Paulo e uiga i le faatamaiaga o loo faatalitali mai ia i latou o e taulai atu i na o tuinanau o le lalolagi. Na ia aoao mai foi o le a suia e Iesu Keriso o tatou tino faaletino le atoatoa i ni tino e le toe oti e pei o Ia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Filipi 1–3 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: