Iunite 22: Aso 3

1 Korinito 11

Folasaga

Sa talanoaina e le Aposetolo o Paulo feeseeseaiga i le Au Paia i Korinito e faatatau i agaifanua faalelotu. Sa ia faamamafaina o alii ma tamaitai e i ai matafaioi e faavavau ma le paia ma e taua ile tasi ma le isi i le fuafuaga a le Alii. Sa ia aoao atu foi i tagata o le Ekalesia e uiga i tapenaga e tatau ai mo le faamanatuga.

1 Korinito 11:1–16

Ua talanoaina e Paulo feeseeseaiga e uiga i agaifanua faalelotu

Faitau faamatalaga nei o loo atagia mai ai lagona o nisi tagata e uiga i le faaipoipoga:

• “O le faamanuiaina i lau matata faalegaluega e matua taua tele ia te au. Ou te le fia manao e vaeluaina lau gauai i le va o au sini faalematata faalegaluega ma le faaipoipoga.”

• “Ou te le manao e tautino atu i se sootaga e umi se taimi. Ou te popole i le faia o se faaiuga o le a ou toe salamo ai mulimuli.”

• “O le faaipoipoga o le a saisaitia ai au. O le a le mafai ona ou faia o soo se mea ou te manao ai.”

• “Ou te iloa o le faaipoipoga o le faaiuga aupito taua lea o le a ou faia ma ua ou sagisagi fiafia e fai.”

1. I lau api talaaga mo le suesueina o tusitusiga paia, tusi ai pe o a ou lagona e uiga i le faaipoipoga.

I le 1 Korinito 11 tatou te faitau ai atili i mea na tusia e le Aposetolo o Paulo e tali ai popolega o tagata o le Ekalesia i Korinito. Faitau le 1 Korinito 11:3, ma vaavaai mo mea na aoao atu e Paulo e uiga i tiutetauave o se tane.

O le fasituaitu “o le ulu o le fafine o le tane” o lona uiga o le tane e i ai le tiutetauave paia o le pulefaamalumalu i le aiga. O le pulefaamalumaluo lona uiga o le taitaia ma le amiotonu ma taiala isi i mataupu faaleagaga ma le faaletino.

Matau le fuaiupu 3pe o ai e tatau ona pulefaamalumalu ma taiala le tane a o ia pulefaamalumalu i lona aiga. Aisea e taua ai mo se tane ma se tama ona vaai atu ia Keriso o lona taitai ma le taiala?

A o tatou malamalama i le ala e pulefaamalumalu ai le Tama Faalelagi i Lona malo, e mafai ona tatou iloa o Ia o se Atua e maopoopo lelei ma e le o le fenumiai (tagai MF&F 132:8).

Pei ona tusia i le 1 Korinito 11:4–16, sa talanoaina e Paulo ia fesili a le Au Paia i Korinito e uiga i agaifanua mo tane ma fafine pe a latou tatalo ma vavalo atu i le taimi o a latou sauniga tapuai. O nei agaifanua e aofia ai le faiga o le ufiufi o ulu o fafine.

O nisi taimi e malamalama sese ai le aufaitau o le Feagaiga Fou i aoaoga a Paulo e faapea o le matafaioi a le tane e sili ona taua nai lo le matafaioi a le fafine. Na faamanino mai e Elder M. Russell Ballard o le Korama a Aposetolo e Toasefululua lenei manatu sese:

“E tutusa alii ma tamaitai i fofoga o le Atua ma i le silafaga o le Ekalesia, ae e le faapea ua tutusa ona tasi ai lea. O tiutetauave ma meaalofa paia a alii ma tamaitai e eseese i lo latou natura ae le o lo latou taua po o uunaiga. O le aoaoga faavae a le tatou Ekalesia ua tutusa ai tamaitai i alii e ui e eseese. E le manatu le Atua e lelei atu pe taua atu le tasi itupa i le isi. …

“O alii ma tamaitai e eseese meaalofa, eseese malosiaga, ma eseese vaaiga po o manatu ma lagona. O se tasi lena o mafuaaga autu tatou te manaomia ai e le tasi le isi” (“Men and Women in the Work of the Lord,” New Era, Apr. 2014, 4).

Faitau le 1 Korinito 11:11, ma vaavaai pe o a mea na aoao mai e Paulo e uiga i le sootaga i le va o le tane ma le ava. O le fasifuaitau “i le Alii” e faasino i le fuafuaga a le Alii e fesoasoani ai ia tatou avea e faapei o Ia ma maua le ola e faavavau.

Mai le 1 Korinito 11:11 tatou te aoao ai i le upumoni lea: I le fuafuaga a le Alii, e le mafai e tane ma fafine ona maua le ola e faavavau e aunoa ma le isi (tagai foi MF&F 131:1–4).

O le faaipoipoga i le va o le alii ma le tamaitai o se vaega o le fuafuaga a le Atua. Mafaufau e uiga i fesili nei: E faapefea e le avea o se tama po o se tina amiotonu ona faalautele le fuafuaga a le Atua? E faapefea e lena mea ona saunia atili ai i tatou e avea faapei o le Tama Faalelagi?

Mafaufau pe faapefea ona galue le seleulu. O le a le lelei o le galuega a le seleulu pe afai e tuueseese ia lau ma sa e taumafai e oti se pepa po o se ie i le lau e tasi? E mafai faapefea ona pei se seleulu o se tane ma le ava o taumafai ia maua le ola e faavavau?

Faitau le saunoaga lea a Elder David A. Bednar o le Korama a Aposetolo e Toasefululua, ma vaavaai pe faapefea ona mamanuina se tane ma se ava ia galulue faatasi ia maua le ola e faavavau: “O le mamanu paia, ua fuafuaina alii ma tamaitai ina ia agai atu faatasi i luma i le faaatoatoaga ma se atoaga o le olioli. Ona o o laua natura ma mana tulaga ese, o lea e tofu aumaia ai e tane ma fafine i se sootaga o le faaipoipoga ia vaaiga ma aafiaga iloga. E eseese sao o le tane ma le fafine, ae e tutusa lava [o laua sao] ina ia tasi ma se faatasiga e leai se isi lava auala e mafai ai. E faamaea ma faaatoatoa e le tane le fafine ma o le fafine foi e faamaeaina ma faaatoatoa le tane a o latou aoao mai ma fefaamalosiai ma faamanuia e le tasi le isi” (“O Le Faaipoipoga o le Ute o Lana Fuafuaga e Faavavau” Ensign, Iuni 2006, 83–84).

2. I lau api talaaga mo le suesueina o tusitusigapaia, tusi ai e uiga i ni nai uiga eseese ma tiutetauave o tane ma fafine e felagolagoai ai e le tasi le isi i se aiga.

I le “O Le Aiga:: O Se Folafolaga i le Lalolagi,” Ua folafola mai e le Au Peresitene Sili ma le Korama a Aposetolo e Toasefululua: “I le fuafuaga paia, e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa. O manaoga faapitoa, oti, po o isi tulaga e ono tatau ai ona fetuunai e tagata”(Ensign, Nov. 2010, 129).

3. Mafaufau e uiga i uiga faaalia eseese e uiga i le faaipoipoga o loo atagia mai i faamatalaga na e faitauina i le amataga o le lesona. Ona tali lea o fesili nei i lau api talaaga mo le suesueina o tusitusiga paia: A uma ona suesue le1 Korinito 11:1–16, e faapefea ona e tali i se tasi e lei malamalama i le taua o le faaipoipoga i le fuafuaga a le Atua?

1 Korinito 11:17–34

Ua aoao atu e Paulo le Au Paia i Korinito e aua nei manatu mama i le faamanatuga

O le a le mea e oo mai i le mafaufau pe a e faitauina fasifuaitau nei?

• “O se aafiaga faaleagaga moni lava.”

• “O se faafouga mo le agaga.”

• “O le mea taua o lau aso Sapati.”

Mafaufau i lou aafiaga e sili ona lata mai i le ai ma le inu i le faamanatuga, ma mafaufau pe faamatala e nei fuaitau pe leai lou aafiaga.

Ao e suesueina le 1 Korinito 11:17–34, vaavaai mo upumoni e mafai ona fesoasoani ia te oe ia avea ai le ai ma le inu i le faamanatuga o se aafiaga e sili ona faaleagaga ma anoa.

I ona po o Paulo, sa tausia e tagata o le Ekalesia se faiga e pei o le Talisuaga Mulimuli. Latou te faapotopoto i lea taimi ma lea taimi e aai faatasi i se talisuaga ona aai ai lea ma feinu i le faamanatuga. Na tausalaina e Paulo ia faapotopotoga ona sa faaliliu e le Au Paia o ni talisuaga masani nai lo le tausisia o le paia lea e tatau ona o faatasi ma le aai ma le feinu i le faamanatuga. O le Faaliliuga a Iosefa Samita ua faamanino ai le faamatalaga a Paulo e uiga i le faamoemoega o lo latou potopoto faatasi: “Pe a outou potopoto faatasi i se mea e tasi, pe le ina ia aai ai i le tausamiga a le Alii?” (Faaliliuga a Iosefa Samita, 1 Korinito 11:20 [i le 1 Korinito 11:20, vaefaamatalaga a]).

E ui o nei potopotoga sa faamoemoe e faateleina ai le faaaumea ma le lotogatasi, ae na tele ina avea ma mea e fefinauai ai. Pei ona tusia i le 1 Korinito 11:17–22, sa tausalaina e Paulo le fefinauai sa i ai i le Au Paia i Korinito i le taimi o na talisuaga.

Faitau le 1 Korinito 11:23–26, ma vaavaai mo mea na fautuaina e Paulo ia tagata o le Ekalesia e manatua e uiga i le faamanatuga. I le gagana Peretania o le upu faailoa atu i le fuaiupu 26 e tutusa lava ma le upufaaalia ai ma e tutusa lava le faaleoga. Ae o le upu Eleni ua faaliliu mai ai o lona uiga o le folafola atu, faasilasila, po o le tautino atu ai (tagai 1 Korinito 11:26, vaefaamatalaga b).

Faitau le 1 Korinito 11:27–30, ma vaavaai mo le lapataiga na tuu atu e Paulo i le Au Paia i Korinito e uiga i le faamanatuga.

Mai nei fuaiupu ua tatou aoao ai e faapea o i latou o e aai ma feinu ma le le tatau i le faamanatuga e aumaia le tausalaga ma le faamalaiaga ia i latou lava.

O lenei upumoni ua faamautu mai i le Tusi a Mamona, lea sa lapatai mai ai Iesu Keriso o i latou o e aai ma feinu ma le faaletatau i le faamanatuga, e aai ma feinu i latou i le faasalaga o o latou agaga (tagai 3 Nifae 18:29). E le gata i lea, sa tau atu e le Faaola i taitai perisitua e le tatau ona latou faatagaina i latou oe le agavaa ona aai ma feinu i le faamanatuga (tagai 3 Nifae 18:29). Afai e i ai sau fesili e uiga i lou agavaa e ai ma inu i le faamanatuga, e tatau ona e talanoa i lou epikopo po o lou peresitene o le paranesi.

I le 1 Korinito 11:29, o le upu Eleni ua faaliliuina o le “faasala” e mafai foi ona faapea o le “tausalaga” (tagai 1 Korinito 11:29, vaefaamatalaga b). Tausalaga o lona uiga “ua faamasinoina e tausalaina e le Atua” (Taiala i Tusitusiga Paia, “Tausalaina, Faasalaga,” scriptures.lds.org). Tausalagae faasino i “le tulaga o le taofia le alualu i luma o le tagata ma faafitia ai lona oo atu i le afioga o le Atua ma Lona mamalu. O le faasalaga e esese tikeri e i ai. O i latou uma e le mauaina le atoaga o le faaeaga selesitila o le a faatuaoi i se isi itu i lo latou alualu i luma ma avanoa, ma o le a faasalaina i latou e tusa ai” (Taiala i Tusitusiga Paia, “Faasalaga,” scriptures.lds.org).

Manatua “e le manaomia ona e atoatoa ina ia e ai ai ma inu i le faamanatuga, ae e tatau ona i ai sou agaga o le lotomaualalo ma le salamo i lou loto” (Faamaoni i le Faatuatua: O se Tusitaiala o le Talalelei [2004], 148). Afai tatou te aai ma feinu i le faamanatuga ma se loto e le salamo ma leai se manao e manatua ma mulimuli i le Faaola, ua tatou aai ma feinu i le faamanatuga ma le le tatau.

Mafaufau pe aisea e aumaia ai le faasalaga io tatou agaga ona o le aai ma feinu i le faamanatuga ma le le tatau.

Toe faitau le 1 Korinito 11:28, ma vaavaai mo mea na fautua atu Paulo i tagata o le Ekalesia e fai a o aai ma feinu i le faamanatuga. Mafaufau e faailoga mea ua e mauaina.

Mai lenei fuaiupu ua tatou aoao ai e faapea e tatau ona tatou suesue ifo i o tatou olaga a o tatou aai ma feinu i le faamanatuga.

O a ni auala e te manatu e tatau ona tatou suesue ifo ai i o tatou olaga?

O le faamoemoega o le suesueina o o tatou olaga e le gata ina fuafua ai pe o tatou agavaa e aai ma feinu i le faamanatuga ae e fuafua ai foi pe o le a le lelei o tatou taumafai ai e tausi a tatou feagaiga ma le Atua ma pe mafai faapefea ona tatou saili e salamo ma faaleleia atili.

Faitau saunoaga nei, ma fuafua ni auala e mafai ona e suesueina ai lou olaga a o e ai ma inu i le faamanatuga.

I le faamatalaina o sona aafiaga a o taumafa i le faamanatuga, sa saunoa ai Peresitene Howard W. Hunter: “Sa ou fai ifo ia te au lava le fesili: ‘Pe o ou tuuina le Atua i luga atu o isi mea uma ma tausi Ana poloaiga?’ Ona ou manatunatu loloto ai lea ma ou iloa ai lo’u tulaga. Ina ia osia se feagaiga ma le Alii ina ia tausia pea Ana poloaiga o se matafaioi taua tele, ma ina ia faafou lena feagaiga e ala i le taumamafa i le faamanatuga e faapena foi lona taua. O taimi paia o le mafaufau a o tufaina le faamanatuga e tele sona taua. O taimi ia o le suesue ifo o le tagata ia te ia lava, mafaufau loloto i ona lava mafaufauga, o le iloatino a e le tagata lava ia—o se taimi e toe manatunatu ai ma faia se faaiuga” (“Mafaufauga e Uiga i le Faamanatuga,” Ensign, May 1977, 25).

O Tad R. Callister, o le peresitene aoao o le Aoga Sa, ao avea o ia o se uso o Fitugafulu, na aoao mai o le faamanatuga o se taimi o le toe manatunatu ma le iloiloga a le tagata lava ia: “O le faamanatuga o … se taimi o le manatunatu loloto ma se suesue ifo o le tagata lava ia. … O le faamanatuga o se taimi e le gata ina tatou manatua ai le Faaola, ae tatou te faafetauia ai o tatou olaga i le Faaaoao Silisili [o Iesu Keriso]. O se taimi e faataatia ese ai le faaseseina o oe lava; o se taimi o le mea moni aiai. O alofaga uma lava, o foliga taufaasese uma e tatau ona toulu i le ala, e faataga ai o tatou agaga, e pei ona i ai moni, e fesootai atu i le agaga i le Agaga o lo tatou Tama. I le taimi lea e avea ai i tatou ma o tatou lava faamasino, e mafaufau ai pe o le a tonu lava le uiga o o tatou olaga ma pe o le a tonu foi le mea e tatau ona i ai” (The Infinite Atonement [2000], 291).

O se tasi ala e faaaoga ai lenei mataupu faavae o le suesue ifo i o tatou olaga a o tatou aai ma feinu i le faamanatuga. Mo se faataitaiga, e mafai ona e fesili, “E mafai faapefea ona avea au o se soo ua sili atu o Iesu Keriso?” “O faapefea ona pei lo’u olaga o le Faaola? O faapefea ona ou le pei ai?” “O le a le vaivaiga o loo ou tauivi ai nei o loo taofia ai au mai le tuputupu ae faaleagaga?” “O le a se mea e mafai ona tatou faia i lenei vaiaso tatou te lelei teisi ai?”

Faaaoga ia Aoaoga Faavae ma Mataupu Faavae

E tupu le faaaogaina pe a e mafaufau, tautala, ma ola e tusa ma aoaoga faavae ma mataupu faavae ua e aoaoina mai au suesuega o tusitusiga paia. A o e faaaogaina aoaoga faavae ma mataupu faavae i lou olaga, o le a faamanuiaina oe. Mo se faataitaiga,a o e faaaogaina mea o loo e aoaoina i le 1 Korinito 11 e uiga i le faamanatuga, o le a e maua se malamalama e loloto atu ma se molimau i lenei sauniga.

4. I lau api talaaga mo le suesueina o tusitusiga paia, lisi ai ni nai fesili e mafai ona e fesili ifo ai ia te oe lava a o lei faia le faamanatuga ma i le taimi o le faamanatuga.

5. Tusi i lau api talaaga mo le suesueina o tusitusiga paia se fuafuaga e faatatau i mea o le a e faia saunia atili ai mo le isi avanoa e te ai ai ma inu i le faamanatuga.

Ao e suesue ifo i lou olaga a o lei faia le faamanatuga ma i le taimi o le faamanatuga, e mafai ona fesoasoani le Alii ia te oe ia iloa pe mafai faapefea ona faataunuuina atili au feagaiga ma agavaa ai mo le mauaina o faamanuiaga ua Ia finagalo e tuu atu ia te oe. Tautino e mulimuli i soo se uunaiga e te maua.

I le 1 Korinito 11:33–34ua tatou faitau ai i faatonuga faaopoopo a Paulo i le Au Paia i Korinito e tusa ai ma le tausamiga sa latou faia pe a latou potopoto faatasi e aai ma feinu i le faamanatuga. Na ia tau atu i le Au Paia e mafaufau le tasi i le isi ma aloese mai le fefinauai.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 1 Korinito 11 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lou faiaoga: