Galuega 1:9–26

Folasaga

Ina ua uma ona aoao Ona soo mo aso e 40, sa afio ai Iesu i le lagi. Ua soofaatasi ia Aposetolo ma isi i le tatalo ma le faatoga. E ala i musumusuga, na valaauina ai Matatia e faatumu le avanoa i le Korama a Aposetolo e Toasefululua ona o le faalataina ma le maliu o Iuta le Sekara.

Galuega 1:9–12

Ua afio ae le Faaola i le lagi

Faitau faamatalaga nei e uiga i le Afio Mai Faalua o Iesu Keriso, ma tusi pe Moni (M) pe Sese (S) ia faamatalaga taitasi i le avanoa ua saunia. Faaaoga mau o loo avatu i i e fesoasoani ia te oe e tali sao ai.

____ 1. O le a toe foi mai Iesu Keriso i le lalolagi i aso e gata ai. (Tagai Mose 7:60.)
____ 2. I Lona Afio Mai Faalua, o le a faaali mai ai Iesu Keriso i na o tagata amiotonu. (Tagai MF&F 101:23; Iosefa Samita—Mataio 1:26)
____ 3. Talu ai o le a suia foliga o Iesu Keriso pe a toe afio mai o Ia, o le toatele o tagata o le a latou le iloaina ua uma le Afio Mai Faalua. (Tagai i le MF&F 49:22–23.)

I le taimi o Lana galuega i le olaga nei, sa valoia ai e Iesu Keriso e faapea, i aso amuli o le a i ai tagata latou te faalauiloaina aoaoga pepelo e uiga i Lona Afio Mai Faalua (tagai Iosefa Samita—Mataio 1:22–25). E mafai ona tatou iloa pe sao pe sese se aoaoga patino e uiga i le Afio Mai Faalua o Iesu Keriso pe a tatou mulimuli i afioga a le Faaola ma upu a Ana perofeta. O le faia o lenei mea e mafai ai ona tatou taumamao mai i le faaseseina (tagai Iosefa Samita—Mataio 1:37).

A o e suesue i le Galuega 1:9–12, vaavaai mo upumoi e faatatau i le Afio Mai Faalua o Iesu Keriso.

Sa aoao e le Faaola Ana Aposetolo mo aso e 40 ina ua mavae Lona Toetu (tagai Galuega 1:3). Faitau le Galuega 1:9–12, ma vaavaai mo mea na tutupu ina ua uma ona aoaoina e le Faaola i latou.

Mafaufau e faapea sa e i ai iina e molimauina le afio ae o le Faaola i le lagi. Mata o a ni ou mafaufauga ma ni ou lagona?

I Isaraelu anamua, o nisi taimi e avea ai se ao o se faatusa vaaia o le afio ai, ma le mamalu o le Atua (tagai Esoto 40:34). O le ao o loo taua i le Galuega 1:9 o se ao o le mamalu (tagai Bible Dictionary, “Cloud”). O tagata e toalua o loo taua i le Galuega 1:10 o ni agelu.

Matau i le Galuega 1:11 mea na tau atu e agelu i Aposetolo. O se upumoni e tasi e mafai ona tatou aoao mai i le faamatalaga a agelu o le i Lona Afio Mai Faalua, o le a afio ifo le Faaola mai le lagi i le mamalu.

Matau i le Galuega 1:12 o le Afio Ae o le Faaola na tupu i luga o le Mauga o Olive. A toe afio mai le Faaola, o se tasi o Ona faailoaga mai o le taimi e afio ifo ai o Ia ma tu i luga o le Mauga o Olive (tagai Sakaria 14:4; MF&F 45:47–53; 133:19–20). O le a tupu lenei mea a o lei oo i le taimi tele e faaali mai ai i le lalolagi (tagai Isaia 40:5).

Manatunatu loloto i le fesili lenei: E mafai faapefea e le iloaina o le tulaga o le a toe foi mai ai le Faaola ona fesoasoani tatou te aloese ai mai le faaseseina a o tatou faatalitali atu i Lona Afio Mai Faalua?

Galuega 1:13–26

Ua filifilia Matatia e faatumu le avanoa i le Korama a Aposetolo e Toasefululua

Ina ua toe foi ia Aposetolo i Ierusalema mai le Mauga o Olive, sa latou faapotopoto ma nisi o tane ma fafine faatuatua, e aofia ai Maria, le tina o Iesu, e tatalo ma tapuai. Faitau le Galuega 1:13, ma faitau le aofai o Aposetolo o loo lisi atu.

Aisea sa na o le 11 ai Aposetolo i lena taimi?

I le Galuega 1:15–20 ua tatou aoao ai e faapea sa tu atu Peteru i luma o le au soo e 120 ma tautala atu e uiga i le oti o Iuta le Sekara. Ona o Iuta sa avea o se tasi o Aposetolo e Toasefululua, o lea sa faapotopoto ai Aposetolo e filifili se Aposetolo fou.

Mafaufau i auala eseese e filifili ai nisi o taitai nei: se kapeteni o se au, se taitai o le malo i le lotoifale, se tupu poo se masiofo, ma se peresitene o se kamupani. O a ni nai agavaa mo nei tulaga faaletaitai?

Mafaufau pe faapefea ona filifilia se Aposetolo a Iesu Keriso ma pe o a mea e agavaa ai se tasi e avea ma se Aposetolo.

Faitau le Galuega 1:21–26, ma vaavaai pe na faapefea ona filifilia se Aposetolo fou ina ua mavae le oti o Iuta le Sekara.

I le fuaiupu 26 o le fasifuaitau “ona fai ai lea o la la vili” e faasino i se auala faaanamua sa faia ai se faaiuga. Faatasi ai ma e faamaoni, o le a taitaia lava e le aao o le Atua le taunuuga (tagai Faataoto 16:33).

Na faamalamalama mai e Elder Bruce R. McConkie o le Korama a Aposetolo e Toasefululua: “Afai e fai la latou vili, o se taimi lea sa filifilia ai e le Alii le taunuuga. Peitai, atonu ‘na latou tuu atu la latou palota,’ peiseai o ‘palota lagolago’ e lagolago ai o ia ua filifilia e le Atua e galue i le tofi paia faaaposetolo”(Doctrinal New Testament Commentary, 3 vols. [1965–73], 2:32).

E tusa ai ma le Galuega 1:21–22, fai mai Peteru o le Aposetolo fou e filifilia mai i e ua iloa patino ia Iesu ma o ni molimau o Lana galuega mai le amataga e oo i Lona Toetu.

O le a le mea e tulaga ese mai ia te oe e uiga i le tatalo a Aposetolo o loo tusia i le Galuega 1:24–25?

O le upumoni e tasi e mafai ona tatou aoao mai i lenei tala o le E valaauina ia Aposetolo a Iesu Keriso e le Atua e ala i faaaliga. Fuafua e tusi le upumoi lea i lau tusipaia i autafa o le Galuega 1:24.

Tali le fesili lea i lau api talaaga mo le suesueina o tusitusiga paia: Aisea e te manatu ai e taua le valaauina o se Aposetolo e le Atua e ala i faaaliga nai lo le filifilia i se ala e pei o isi taitai i le lalolagi?

Mo se faataitaiga o le ala e filifilia ai se Aposetolo i aso nei e ala i faaaliga, faitau le tala lea mai i le soifuaga o Peresitene Heber J. Grant:

“Na maua e Peresitene [Heber J. Grant ia ni faaaliga o se Peresitene o le Ekalesia e taiala ai le Ekalesia atoa. O se tasi o ia faaaliga na oo mai ina ua faatoa uma ona vaetofia o se Peresitene o le Ekalesia, ina ua ia sailia le finagalo o le Alii i le tofiaina o se uso fou o le Korama a Aposetolo e Toasefululua. A o ia mafaufau loloto i lenei tiutetauave, sa liliu atu soo ona mafaufauga i lana uo i le olaga atoa o Richard W. Young, o se Au Paia o Aso e Gata ai e faamaoni ma o se taitai iloga. Sa talanoaina e Peresitene Grant lenei tulaga ma ona fesoasoani, lea na lagolagoina lana faaiuga. Ina ua iu ina ia lagonaina le mautinoa o lenei faatinoga, sa ia tusia le igoa o lana uo i se fasipepa ona alu lea ma ave i lana fonotaga faalevaiaso i le malumalu faatasi ma le Au Peresitene Sili ma le Korama a le Toasefululua. Peitai, ina ua oo i le taimi na te tuuina atu ai le igoa mo le faamaoniga a lana Usoga, sa le mafai ona ia faia. Nai lo le tuuina atu o le igoa o Richard W. Young, sa ia tuuina atu le igoa o Melvin J. Ballard, o se tagata na te lei iloa lelei. Na faamatala mulimuli ane e Peresitene Grant lona aafiaga i lenei mea:

“‘Na ou lagonaina le musumusuga a le Atua soifua o faatonutonuina a‘u i a‘u galuega. Mai lava i le aso na ou filifilia ai se tagata ou te matua le iloa e avea o se aposetolo, nai lo la‘u uo pele i lo‘u olaga atoa o loo soifua, ua ou iloa ai e pei ona ou iloa o loo ou ola, ua ia te au le aia tatau i le malamalama ma musumusuga ma le taitaiga a le Atua i le faatonutonuina o Lana galuega iinei i le lalolagi’” (Aoaoga a Peresitene o le Ekalesia: Heber J. Grant [2002], 181–82).

Mafaufau pe faapefea e le upumoni o loo aoao mai i le Galuega 1:24 lea e faapupula mai i le tala lea ona faamatala mai ai le valaauina o se Aposetolo i ona po nei.

E faapefea i le valaauga o se Aposetolo ona faaalia o loo faaauau pea e le Faaola ona taitai Lana Ekalesia? (Manatua le upumoni o loo aoao mai i le Galuega 1:2—E taitai e Iesu Keriso Lana Ekalesia e ala i le faaalia o Lona finagalo i Ana Aposetolo e ala i le Agaga Paia.)

Tali se fesili e tasi pe sili atu o loo i lalo, i lau api talaaga mo le suesueina o tusitusiga paia:
1. O anafea na e molimauina ai se Aposetolo fou o valaauina i le Korama a Aposetolo e Toasefululua, ma o a ou lagona a o e lagolagoina o ia i lenei valaauga?
2. O a ni aafiaga na fesoasoani ia te oe ua e iloa ai o Aposetolo soifua na valaauina e le Atua?
3. Aisea e taua ai le i ai o sau molimau o Aposetolo soifua na valaauina e le Atua?
4. Pe e te iloaina suafa o Aposetolo uma o e o loo galulue nei i le Ekalesia? Lisi uma igoa o Aposetolo e mafai ona e manatua. (Ina ia iloa po o le a le lelei o lou faaigoaina o Aposetolo o i ai nei, tagai i le itulau o loo i ai ata ma suafa o le Au Pulega Aoao i le lomiga aupito lata mai o le konafesi aoao i le Ensign po o le Liahona pe sue i le LDS.org.)
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Galuega 1:9-26 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: