Iunite 20: Aso 1
Galuega 20–22
Folasaga
Sa folafola atu e Paulo le talalelei i Asia (ua faaigoa ia Take i le taimi nei), ma a o i ai o ia i Meleto, o se aai e lata i Efeso, sa ia lapatai atu o le a i ai se liliuese i le lumanai ma fautuaina ai taitai perisitua e aoao tagata o le Ekalesia. Ona ia malaga atu lea i Ierusalema, i le mea sa faasauaina ai o ia ma pue faapagotaina. A o tu o ia i le faasitepu o le olo i Anetonia (o se nofoaga sa nofo olo ai vaegaau a Roma), sa faamatala atu ai e Paulo lana tala o lona liuaina.
Galuega 20–21
Ua auauna atu Paulo i Asia ma malaga atu ai i Ierusalema, lea sa sasaina ai o ia ma puefaapagotaina.
Mafaufau i se taimi na e tuua ai lou aiga, uo, po o isi tagata e te alofa i ai mo ni aso, vaiaso, po o ni masina.
-
O a ituaiga o lagona sa e mauaina po o i latou foi sa outou mafuta ae e te lei tuua?
-
O a ni a outou tala a le tasi ma le isi ae tou te lei faamavae?
I le taimi o le malaga faafaifeautalai lona tolu a Paulo, sa ia faaalu se taimi i Maketonia, ma Asia (tagai Faafanua o le Lalolagi, nu. 13, “O Malaga Faafaifeautalai a le Aposetolo o Paulo,” i le faaopoopoga i le Tusi Paia). I lea malaga, sa uunaia ai o ia e toe foi i Ierusalema. A o malaga atu o ia, sa afe e folafola atu ma faatofa i tagata o le Ekalesia i le ala. O le po a o lumanai lona tuuvaa atu i Teroa, sa talanoa ai Paulo ma le Au Paia i le po atoa.
Faitau le Galuega 20:9–12, ma vaavaai mo mea na tutupu i se taulealea e igoa ia Eutiko ina ua moe o ia i le taimi o le lauga a Paulo. Fuafua e maka i lau tusi paia le mea na faia e Paulo e faaali atu ai lona alofa ma le popole mo Eutiko.
E tutusa faapefea mea na faia e Paulo ma mea na faia e le Faaola i le taimi o Lana galuega?
E avea o se vaega o le malaga lona tolu faafaifeautalai, sa faaalu ai Paulo pe tusa ma le tolu tausaga i Efeso e galue ai i tagata iina. I le Galuega 20:13–17 ua tatou aoao ai e faapea i lona ala atu i Ierusalema, sa tu ai Paulo i Meleto, i fafo teisi atu o Efeso, ma auina atu le upu i taitai o le Ekalesia i Efeso latou te feiloai.
Faitau Galuega 20:18–23, ma vaavaai mo mea na faamatala e Paulo e uiga i lana galuega faafaifeautalai.
Na ta’ua e Paulo e faapea sa ia “lei natia se mea aoga” (Galuega 20:20) mai ia i latou sa ia aoaoina. Matau i le Galuega 20:21 le auala na aoao atu ai e Paulo mea sa sili ona aoga—sa ia molimau atu e faapea e manaomia e tagata uma ona salamo ma ia faatuatua i le suafa o le Alii o Iesu Keriso.
E tusa ai ma le fuaiupu 22–23, sa naunau Paulo e fetaiai po o a lava mafatiaga o loo faatalitali mai ia te ia i Ierusalema. Sa sili ona iloagofie le tulaga matautia i Ierusalema, lea sa manatu ai taitai Iutaia o ia o se tagata faalata ona o ana taumafaiga e folafola atu le talalelei a Iesu Keriso. Peitai, o se tasi o mafuaaga na naunau ai Paulo e alu i Ierusalema ona sa taitaiina o ia e le Agaga o le Alii e alu.
Faitau le Galuega 20:24–27, ma vaavaai mo upu a Paulo e faapea ua ia saunia e faia o se auauna a le Alii. Fuafua e maka mea sa ia fai mai ai i le fuaiupu 24.
Mai le Galuega 20:24–27, ua tatou aoao ai e faapea o auauna moni a le Alii e faatinoina ma le faamaoni o latou tiute, ma latou te maua le olioli i le faia. Atonu e te manao e tusi le upumoni lenei i totonu o au tusitusiga paia po o lau api talaaga mo le suesueina o tusitusiga paia.
Mafaufau i le uiga ia te oe o le tuuina atu atoa o oe i le galuega a le Atua.
E mafai faapefea ona e faaaogaina lenei mataupu faavae i lou olaga?
-
Mafaufau i se taimi i lou olaga po o le olaga o se tasi e te iloaina na filifili ai pe filifili se tasi e te iloa e auauna atu i le Alii ma lou malosi atoa ma lou agaga atoa ma maua ai le olioli sili. Faamatala puupuu se aafiaga mai le lesona atonu na e aoaoina mai ai i lau api talaaga mo le suesueina o tusitusiga paia.
Sa asiasi Paulo i taitai o le Ekalesia i Efeso mo le toe taimi a o lei alu atu i Ierusalema. Pe ana fai sa e i ai i le tulaga o Paulo ma iloa o le a le toe vaai i nei taitai o le Ekalesia, o le a se fautuaga e te tuu atu ia tei latou a e e te lei alu ese?
Faitau le Galuega 20:28–31, ma vaavaai mo lapataiga a Paulo i nei taitai o le Ekalesia.
Sa faaaoga e Paulo luko o se upu valiata mo tagata le faamaoni o le Ekalesia ma tagata e faaseseina tagata faamaoni o le Ekalesia.
Sa faamanatu atu e Paulo i taitai o le Ekalesia “e sili le manuia o le na te foai nai lo le na te talia” (Galuega 20:35), ma, ina ua uma ona tatalo faatasi ma i latou, sa ia faatofa atu ma amata lana malaga i Ierusalema (tagai Galuega 20:36–38).
I le Galuega 21:1–10 ua tatou aoao aie faapea sa faaauau pea le malaga a Paulo e agai atu i Ierusalema ma malolo i itumalo eseese e mafuta ai ma tagata o le Ekalesia i le ala. Ina ua malolo o ia i le aai o Turo, sa i ai ni soo—na matua popole mo le saogalemu o Paulo—sa fautuaina o ia e aua nei alu i Ierusalema (tagai Galuega 21:4).
I Kaisareia, sa valoia ai e se perofeta e igoa ia Akapo, le mea o le a tupu ia Paulo i Ierusalema.
Faitau le Galuega 21:11,ma vaavaai mo mea na valoia e Akapo o le a tupu ia Paulo i Ierusalema. O le upu fusi e faasino i le fusipau.
Faitau le Galuega 21:12–14, ma vaavaai pe na faapefea ona tali atu Paulo ma ana soa i le valoaga.
O le a se mea e tulagaese ia te oe e uiga i le tali a Paulo?
E le o auauna uma a le Alii e poloaiina e taulagaina o latou ola. Peitai, o auauna moni a le Alii e loto e faia le finagalo o le Atua tusa lava po o le a le tau patino i le tagata lava ia.
-
-
O a ituaiga o taulaga atonu e talosagaina oe e fai o se auauna a le Alii?
-
O anafea na e loto ai e faia le finagalo o le Atua tusa po o le a lona tau ia te oe? Aisea o le a e loto ai e fai lena mea?
-
I le Galuega 21:17–40 ua tatou aoao ai e faapea na taunuu Paulo i Ierusalema ma avatu se lipoti o le galuega faafaifeautalai i taitai o le Ekalesia i le lotoifale. Na alu o ia i le malumalu, ma ina ua vaai se vaega o Iutaia na iloa o ia mai ana malaga faafaifeautalai, sa latou tau atu o Paulo o se aoao pepelo sa aoao faasagatau atu i le tulafono a Mose ma sa ia aumaia e le tusa ai ma le tulafono ia Nuuese i le malumalu. Ona o lenei tuuaiga, sa aveesea ai e ni tagata faatupu vevesi ia Paulo mai le malumalu ma amata ona latou sasaina o ia. Sa faalavefau ia fitafita Roma ma aveeseina o ia ina ia faamasinoina, ma sa fesili atu Paulo i fitafita pe mafai ona ia tautala atu i tagata.
Galuega 22
Ua faamatala atu e Paulo lona liuaina ma molimau atu ia Iesu Keriso.
O le liuaina o lona uiga ua suia. Mafaufau pe mafai faapefea ona liua le vai pe suia ina ia mafai ona faaaoga mo ni faamoemoega eseese. (Mo se faataitaiga, e mafai ona liua le vai i le aisa po o se ausa.) Mafaufau i ituaiga suiga e aumaia e le liuaina i le talalelei.
Faitau le Galuega 22:1–5, ma vaavaai pe na faapefea ona faamatala e Paulo o ia lava a o ia tautala atu i Iutaia mai le faasitepu o se maota tele i Ierusalema.
Faitau le Galuega 22:6–21, lea e faamatala ai e Paulo lana tala o lona liuaina. Ona faafesootai lea o fesili nei ma o latou tali sao e ala i le tusia ai o le mataitusi o le tali sao i le avanoa i autafa o le fesili. (A maea, siaki au tali ma tali o loo i le faaiuga o le lesona.)
|
O Le Liua o Paulo | |
|---|---|
|
|
Sa faalogo Paulo ma usitai i upu a Iesu Keriso ma amata ona suia. I le Kalatia 1:17–18 ua tatou aoao ai e faapea ina ua mavae lana faaaliga ofoofogia, sa faaalu e paulo le tolu tausaga i Arapi, lea na avea ma se taimi lelei o le tapenaga faaleagaga ma le tuputupu ae, a o lei toe foi atu i Tamaseko ona alu atu ai lea i Ierusalema e feiloai ma Peteru.
Mafaufau i le matautia o le suiga o le olaga o Paulo o se taunuuga o lona liua i le Faaola. O le liuaina o Paulo ua aoao mai ai i tatou a tatou usitai i afioga a Iesu Keriso, e mafai ona tatou matuai liua atoatoa.
Na faamatala e Sister Bonnie L. Oscarson, o le peresitene aoao o Tamaitai Talavou le fesootai o lo tatou usiusitai i afioga a Keriso ma le liua moni:
O le liua moni e sili atu nai lo le mauaina o se malamalama i mataupu faavae o le talalelei ma ua sili atu foi nai lo le mauaina o se molimau i na mataupu faavae. E mafai ona maua se molimau o le talalelei e aunoa ma le ola ai. O le liua moni o lona uiga ua tatou galulue i luga o mea ua tatou talitonu i ai ma faatagaina ai e fatuina ‘se suiga tele ia i tatou, po o o tatou loto’ [Mosaea 5:2]. …
“… E tupu le liua pe a tatou filiga i le faiga o a tatou tatalo, suesueina o a tatou tusitusiga paia, o i le lotu, ma ia agavaa e auai i le faatinoga o sauniga o le malumalu. E oo mai le liua a o tatou faatinoa ia mataupu faavae amiotonu na tatou aoaoina i totonu o tatou aiga ma le potuaoga. E oo mai le liua a o tatou ola i ni olaga mama ma paia ma fiafia i le mafutaga a le Agaga Paia. E oo mai le liua pe a tatou malamalama i le Togiola a Iesu Keriso, faailoa o Ia o lo tatou Faaola ma le Togiola, ma tuu atu i le Togiola ia aoga i o tatou olaga” (“Be Ye Converted,” Ensign po o le Liahona, Nov. 2013, 76–78).
-
Na fusifusia Paulo e tagata Roma
I le Galuega 22:22–30 ua tatou aoao ai e faapea ina ua uma ona faamatala atu e Paulo lana tala o lona liua, sa tautino atu e e na faalogologo ia te ia ua tatau ona fasiotia o ia. Sa avatu Paulo i luma o le taitai sili o le vaegaau a Roma i Ierusalema, o le na tonu ua tatau ona faatigainaina ia Paulo, pe sasaina, o se faiga e masani ona faaaoga e faamaasiasia ai ma maua mai ai faamatalaga mai tagata soitulafono. Peitai, ina ua iloa e taitai o Roma o Paulo o se tagatanuu o Roma, o lea sa tonu ai loa ia i latou ia le faatigainaina o ia ae avatu o ia i luma o se aufono faatonu o le pulega a Iutaia, le au Saneterini. E le tusa ai ma le tulafono a Roma ona fusifusiama faatigainaina se tagatanuu o Roma e lei “faasalaina” (Acts 22:25).
-
Ua ou suesueina le Galuega 20–22 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: