Iunite 20: Aso 2
Galuega 23–28
Folasaga
Ina ua mavae lona puefaapagotaina i Ierusalema, sa aveina atu Paulo i Kaisareia, lea sa ia puipuia ai o ia lava mai tuuaiga pepelo i luma o taitai Roma. Sa ia toe faamatalaina lona liua ma molimau atu ia Iesu Keriso. A o malaga atu o ia i Roma o se pagota, sa afatia Paulo i se motu, lea sa tumau ai ona le afaina o ia ina ua uma ona u e se gata uogo ma sa faamaloloina le toatele o e sa mamai. Na iu ina aveina atu Paulo i Roma. A o i ai o ia iina sa faanofo vaavaaia o se pagota i se fale mo le lua tausaga ma sa ia aoao atu ma molimau atu e uiga ia Iesu Keriso.
Galuega 23–26
Sa sauaina Paulo, faafalepuipuiina, ma faamasinoina i luma o le Tupu o Akeripa
O a faamanuiaga na e maua i le mulimuli i poloaiga a le Atua ma aoaoga?
O le a se mea e ono taitai atu ai se tasi e liliu ese mai i le Atua ma le toe ola ai e tusa ma Ana poloaiga ma aoaoga?
Mafaufau pe mata o le a le taunuuga pe a liliu ese tagata ma faataumamao i latou lava mai i le Atua.
A o e suesue i le Galuega 23–26, vaavaai mo upumoni o le a fesoasoani ia te oe pe a e lagona ua e faataumamaoina oe lava mai i le Atua ma Ana faamanuiaga.
Manatua na puefaapagotaina ia Paulo i fafo o le malumalu i Ierusalema ma aumaia i luma o taitai Iutaia (tagai Galuega 21:30–33; 22:23–30). I le Galuega 23–25 ua tatou aoao ai e uiga i lana feiloaiga ma taitai Iutaia ma sa faafalepuipuia ia Paulo. Ao i ai Paulo i le falepuipui, sa afio ifo le Alii e faamafanafana ma faamautu atu ia te ia (tagai Galuega 23:11). Na auina atu e le kapeteni Roma sa puefaapagotaina ia Paulo i Kaisareia e taofia ai se au o Iutaia mai i le fasiotia o ia. O iina na tautino atu ai e Paulo lona taumamaina i luma o le kovana Roma o Filiki. E ui ina faatalitonuina i le taumamaina o Paulo, sa faaauau pea e Filiki ona faanofo vaavaaia o ia o se pagota i le fale mo tausaga e lua. Sa suitulaga ia Feso ia Filiki o le kovana Roma i Iutaia, ma o le Tupu o Herota Akeripa, o le sa pulea se eria e i matu i sisifo o le Sami o Kalilaia, sa talanoa atu ia Feso ma manao e faalogo i le moliaga o Paulo. Ona avatu ai lea o Paulo i luma o le Tupu o Akeripa.
Faitau le Galuega 26:4–11, ma vaavaai pe na faapefea e Paulo ona faamatala lona tagata i aso ua mavae i le Tupu o Akeripa.
Pei ona tusia i le Galuega 26:12–16, na toe tau atu ai foi e Paulo e uiga i lana faaaliga o le Faaola i le ala i Tamaseko.
Faitau le Galuega 26:16–18, ma vaavaai mo le misiona na tuu atu e le Faaola ia Paulo. O le upu tofi e pei ona faaaogaina i le fuaiupu 18 e faasino i le mauaina o le ulufale i le malo selesitila o le Atua.
Mafaufau e uiga i fesili nei: O le a sou manatu o le a se mea e fesoasoani e tatala ai mata faaleagaga o se tagata? O le a se mea e mafai ona fesoasoani e liliu ese ai mai le pogisa ma liliu agai atu i le malamalama ma poloaiga ma faamanuiaga a le Atua?
Faitau le Galuega 26:19–23, ma vaavaai mo mea na fai mai ai Paulo na ia aoao atu i Iutaia ma Nuuese e tatau ona latou faia ia maua ai faamanuiaga o loo taua i le fuaiupu 18.
E tusa ai ma le fuaiupu 20, o le a le mea sa aoao atu e Paulo i Iutaia ma Nuuese e fai?
O le upumoni e tasi e mafai ona tatou aoao mai i nei fuaiupu o le afai tatou te liliu atu i le Atua, e mafai ona tatou faatoilaloina le mana o Satani i o tatou olaga, maua le faamagaloga mo a tatou agasala, ma agavaa ai mo le malo selesitila. Fuafua e tusi le upumoni lenei i lau tusitusiga paia i autafa o le Galuega 26:18–20.
Ina ia fesoasoani i tagata o le vasega e tali lenei fesili, faitau le saunoaga lenei mai ia Elder Neil L. Andersen o le Korama a Aposetolo e Toasefululua:
“A tatou agasala, ua tatou liliu ese mai i le Atua. A tatou salamo, ua tatou toe liliu atu i le Atua.
“O le valaaulia e salamo e seasea lava o se leo o le aoaiga ae o se talosaga alofa e toe liliu ma ia ‘toe-foi’ atu i le Atua [tagai i le Helamana 7:17]. O le augani mai a se Tama agalelei ma Lona Alo Pele e Toatasi ia tatou sili atu nai lo le tagata o tatou i ai, ia aapa atu i se ituaiga olaga maualuga atu, ia sui, ma ia lagona le fiafia i le tausiga o poloaiga” (“Salamo … Ina Ia Mafai Ona Ou Faamalolo ia te Oe,” Ensign po o le Liahona, Nov. 2009, 40).
-
Tali le fesili lenei, i lau api talaaga mo le suesueina o tusitusiga paia: E faavae i mea ua e aoaoina mai ia Paulo ma Elder Andersen, o le a le mea e mafai ona tatou ausia pe a tatou salamo ma toe liliu agai atu i le Tama Faalelagi ma Iesu Keriso?
A o e suesue pea i le Galuega 26, vaavaai mo mea na taofia ai Feso ma le Tupu o Akeripa mai le salamo, liliu atu i le Atua, ma liua ia Iesu Keriso.
Faitau le Galuega 26:24–29, ma vaavaai pe na faapefea e Feso ma le Tupu o Akeripa ona tali atu i aoaoga a Paulo ma le molimau i le Faaola. I le siata o i lalo, tusi ai fasifuaitau e faamatala ai lo latou tali atu i aoaoga a Paulo:
|
Tali atu i aoaoga a Paulo | |
|---|---|
|
Feso |
Tupu o Akeripa |
Matau e lei talitonu ia Feso i aoaoga a Paulo. O leTupu o Akeripa na talitonu i upu a perofeta ae e lei tautino atoatoa atu e avea o se Kerisiano.
Paulo i luma o le Tupu o Akeripa
O le upumoni e tasi ua tatou aoao mai ia Feso ma le Tupu o Akerpa o le ina ia liua ia Iesu Keriso, e tatau ona tatou filifili e talitonu ma ia tautino atu atoatoa e ola i le talalelei.
Faitau le tala lea na saunoa i ai Peresitene Dieter F. Uchtdorf o le Au Peresitene Sili, ma vaavaai mo mea na ia aoao mai e uiga i le tautinoga:
“Sa tutu se au uso tama talavou e toalua i luga o se tamai pupū e iloa atu vaimanino o se vaituloto lanumoana. O se nofoaga lauiloa lea e fepuna ai, ma sa masani lava ona talanoa le au uso e uiga i le fepuna ai —o se mea na la vaai o faia e nisi.
E ui lava sa la mananao uma e fepuna, a e sa le’i manao se isi o i laua e puna muamua. E le maualuga tele le pupū, ae i tama talavou ia e toalua, na foliga mai na faateleina le maualalo i taimi uma sa la punonou ai agai i luma—ma na vave ona mou ese atu le lotototoa.
“Mulimuli ane, na tuu e le tasi o le au uso lona vae i le tausiusiuga o le pupū ma agai atu i luma ma le mautinoa. O le taimi lena na musumusu atu ai lona uso, “Pei e lelei ona ta faatali seia oo i le taumafanafana a sau.”
“Peitai, o le taimi foi lea ua toso atu ai e le malosi o le uso muamua o ia i luma. ‘Uso,’ o lana tali mai, ‘Ua ou tautino!’
“Sa palasi o ia i totonu o le vai ma ea vave a’e ma se alaga o le faamanuiaina. Sa vave ona sosoo atu ai ma le uso lona lua. Mulimuli ane, na la talie e uiga i upu mulimuli a le alii lea na muamua ao le’i puna i le vai: “Uso, ua ou tautino.” ‘Uso, Ua Ou Tautino.’
“O le tautino e tai pei lava o le puna i totonu o le vai. A lē o lou tautino po o lou lē tautino foi. A lē o lou minoi i luma po o lou tutu sasao ai lava. E leai se faalotolotolua. I le avea ai ma ni tagata o le Ekalesia, e tatau ona tatou fesili ifo ia i tatou lava, ‘Pe ou te puna i totonu pe na o le tutu i le taufaasiusiuga? Pe ou te laa i luma pe na o le sue o le malulu o le vai i ou tamatamai vae?’ …
“O i latou o e faatagā tautino atu e ono faamoemoe e maua na o ni nai faamanuiaga o le molimau, olioli, ma le filemu. E na ona faataga tatala mai foi i ai pupuni o le lagi ia i latou. …
“O nisi o tulaga, tatou te tutu uma ai i se tulaga e faia ai filifiliga lea e iloa atu ai le vai. O la’u tatalo ia tatou maua le faatuatua, agai i luma, faafetauia ma le lototele o tatou atugaluga ma masalosaloga, ma faapea ifo ia i tatou lava, ‘Ua ou tautino!’” (“Uso, Ua Ou Tautino,” Ensign, July 2011, 4–5).
E tusa ai ma Peresitene Uchtdorf, aisea e taua ai le matuai tautino atu atoatoa nai lo le na “ona pei e tautino atu” e ola i le talalelei?
-
-
Tusi na faapefea e lou tautino atu e ola i se poloaiga po se mataupu faavae o le talalelei ona fesoasoani e faamalosia ai lou liua ia Iesu Keriso.
-
Fai se lisi o poloaiga po o mataupu faavae o le talalelei ua e lagona ua e matuai tautino atoatoa atu e ola ai. Mafaufau i soo se mataupu faavae o le talalelei ua e lagona e “toetoe lava” ae lei “atoatoa” (Galuega 26:29) ona e tautino atu e ola ai. Tusi se sini o mea e mafai ona e faia e faateleina ai lou malamalama ma le tautino atu i ai i se tasi o nei mataupu faavae.
-
Tatalo mo se fesoasoani a o e taumafai ia matua liua moni ia Iesu Keriso e ala i le ola atili atoatoa ai i Lana talalelei.
I le Galuega 26:30–32 ua tatou faitau ai e faapea na iloa e Feso ma le Tupu o Akeripa e taumamaina ia Paulo ma semanu e faasaolotoina o ia, peitai ona sa talosaga Paulo e avatu lona faamasinoga ia Kaisara, o lea sa tatau ai ona la auina atu o ia i Roma.
Galuega 27–28
Ua aveina atu Paulo i Roma, lea na ia aoao atu ai ma molimau atu ia Iesu Keriso
Sa taua e Elder Neil L. Andersen o le Korama a Apsetolo e Toasefululua i luitau o le olaga ma tofotofoga e pei o “asioasio faaleagaga” (tagai “Asiosio Faaleagaga,” Ensign po o le Liahona, Me 2014, 18–21).
Mafaufau i faataitaiga o tofotofoga ma faigata e mafai ona faatusa i asiosio i le olaga o se tagata.
A o e suesueina le Galuega 27–28, vaavaai mo se mataupu faavae e mafai ona fesoasoani ia te oe e onosaia ai ma le faamaoni ia asiosio faaleagaga lua te fetaiai.
Galuega 27 o loo tau mai ai le aveina atu o Paulo i Roma e ui atu i le sami i le taimi o masina o le taumalulu. Sa toetoe ina faataumaoia le vaa i le taimi o le afa, ma sa afatia ia Paulo ma i latou uma sa i le vaa i le motu o Melita po o Melata (tagai Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” i le faaopoopoga o le Tusi Paia).
-
Mafaufau i tofotofoga na feagai ma Paulo ia o loo tusia i le Galuega 23–28: sa faafalepuipui sese o ia, sa afatia, u e se gata uogo, ma sa aveina i Roma, lea sa faanofo vaavaaia ai o se pagota i se fale.
Faitau le Galuega 28:30–31, ma vaavaai mo mea na mafai e Paulo ona fai i Roma e ui ina nofo vaavaaia o se pagota i se fale.
O le a le mea sa faia e Paulo sa faaalia ai sa tumau lona faamaoni i le Atua e ui i faigata sa ia oo i ai?
O le a se mea lelei na maua mai i faigata na feagai ma Paulo a o i ai i le sami, a o afatia, ma ao faafalepuipuia i Roma?
O se mataupu faavae e tasi e mafai ona tatou aoao mai i aafiaga o Paulo o le afai tatou te faamaoni, e mafai e le Atua ona fesoasoani e faaliliu o tatou tofotofoga i faamanuiaga mo i tatou lava ma isi.
-
-
O a ni nai faataitaiga o auala e mafai e le Atua ona fesoasoani ai i tagata e faaliliu ia faigata i faamanuiaga mo i latou lava ma isi?
-
O anafea na fesoasoani ai le Atua ia te oe po o se tasi e te iloa e faaliliu se tofotofoga i se faamanuiaga mo oe lava po o isi?
-
Fai se filifiliga e mulimuli i faataitaiga a Paulo ma ia tumau faamaoni pe a e feagai ma faigata ina ia mafai ai e le Atua ona fesoasoani e faaliliu na faigata po o tofotofoga i faamanuiaga mo oe lava ma isi.
-
Ua ou suesueina le Galuega 23–28 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: