Iunite 12: Aso 4

Ioane 1

Folasaga

O le Aposetolo o Ioane, ua iloa foi o Ioane le Soo Pele, sa tusia aoaoga faavae taua e fesootai ma le matafaioi a Iesu Keriso i le muai olaga. Na molimau mai foi Ioane le Papatiso ia Iesu Keriso ma papatisoina o Ia. Na valaaulia e Iesu Keriso ia isi e aoao e uiga ia te Ia.

Ioane 1:1–18; Faaliliuga a Iosefa Samita 1:1–19

Ua tautino atu e Ioane o Iesu Keriso o le Alo o le Atua

I le lesona lenei o le a amata ai lau suesuega i le tusi a Ioane. Sa tusia e le Aposetolo o Ioane le mea na ia manao i isi e iloa e uiga ia Iesu Keriso. O Ioane o se molimautino i le tele o tala sa ia tusia e uiga i ai. O le tele o anomea i le Evagelia a Ioane e le o maua i Evagelia a Mataio, Mareko, ma Luka, ia na tusia e fesoasoani ai i Iutaia ma Nuuese ia talitonu o Iesu o le Mesia ma le Faaola o tagata uma. Na tusi atu Ioane ia i latou ua malamalama i tusitusiga paia ma talitonu o Iesu o le Keriso, o le Mesia na folafolaina mai.

1. Vaai faalemafaufau e faapea, o loo e talanoa i se tasi e itiiti sona iloa ia Iesu Keriso ma sa fesili atu ia te oe po o le a se mea ua e iloa e uiga ia te Ia. I lau api talaaga mo le suesueina o tusitusiga paia, lisi ai ni mea se tolu o le a e aoao atu i lena tagata e uiga ia Iesu Keriso.

A o e suesueina le Ioane 1, vaavaai mo upumoni e uiga i le Faaola ia e mafai ona fesoasoani e faamalosia ai lou faatuatua ma lau molimau ia Iesu Keriso.

Faitau le Faaliliuga a Iosefa Samita, Ioane 1:1–2 (i le faaopoopoga i le Tusi Paia), ma vaavaai mo upumoni na aoao mai e Ioane e uiga ia Iesu Keriso. (A o e suesue i lenei lesona, o le a e faitau i le Faaliliuga a Iosefa Samita, Ioane 1:1–34. O upu faatusilima o upu ia na faaopoopo pe suia e le Perofeta o Iosefa Samita.)

O le upumoni e tasi e mafai ona tatou faailoa mai nei fuaiupu o leO Iesu Keriso sa i ai ma le Atua i le amataga. Faaopoopo le upumoni lenei i le lisi sa e tusia i lau api talaaga mo le suesueina o tusitusiga paia.

O le fasifuaitau “i le amataga“ e faasino i le muai olaga. A ta’ua i tusitusiga paia faapea sa i ai faatasi Iesu Keriso ma le Atua ”i le amataga” o loo aoao mai ai i tatou faapea o Iesu o le Ulumatua na Fanau e le Tama i le agaga MF&F 93:21), Sa “pei [o Ia] o le Atua” i agaga sa faapotopoto“ ao lei i ai le lalolagi” (tagai Aperaamo 3:22–24), ma sa filifilia o Ia e le Tama mai le amataga (tagai Mose 4:2).

Faitau le Faaliliuga a Iosefa Samita, Ioane 1:3, ma vaavaai mo se upumoni faaopoopo na aoao mai e Ioane e uiga ia Iesu Keriso. Atonu e te manao e faailoga mea ua e mauaina.

Mai lenei fuaitau ua tatou aoao ai faapea, na faia mea uma e Iesu Keriso. Faaopoopo lea i le lisi o upumoni e uiga ia Iesu Keriso na e tusia i lau api talaaga mo le suesueina o tusitusiga paia.

Sa faia e Iesu Keriso le lagi ma le lalolagi ma “lalolagi e le mafaitaulia” i lalo o le taitaiga a le Tama (Mose 1:33).

Peitai, na tusia e Elder Bruce R.McConkie o le Korama a Aposetolo e Toasefululua e faapea, na faapolopolo e le Tama Faalelagi ni “foafoaga aupito taua se lua” ia te Ia Lava: “Muamua, o ia o le Tama o agaga uma, e aofia ai ma Keriso. … Lona lua, o ia o le Foafoa o [tino] faaletino [o Atamu ma Eva]” (O Se Molimau Fou mo Mataupu Faavae o le Faatuatua [1985], 63; tagai foi Mose 2:27)

“O Le Aiga: O Se Folafolaga i le Lalolagi“ o loo saga faamanino mai ai e faapea ”o tagata soifua uma—tane ma le fafine—na foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga“ (Ensign po o le Liahona, Nov. 2010, 129).

Faitau le Faaliliuga a Iosefa Samita, Ioane 1:4–5, ma vaavaai pe na faapefea ona faamatala e Ioane ia Iesu ma Lana talalelei.

O le a sou manatu o le a le uiga e faapea, o Iesu Keriso ma le talalelei o malamalama ia e ”susulu atu i le lalolagi, ae le o iloa e le lalolagi“?

Na sosoo ai ma le aoao mai e le Aposetolo o Ioane e uiga ia Ioane le Papatiso. Faitau le Faaliliuga a Iosefa Samita, Ioane 1:6–10, ma vaavaai pe o le a le isi upumoni na molimau mai ai Ioane.

Faaopoopo le upumoni lea i le lisi i lau api talaaga mo le suesueina o tusitusiga paia: O Iesu Keriso o le Malamalama o le Lalolagi. Mafaufau pe faapefea ona avea Iesu Keriso ma malamalama o le lalolagi. Tagai Mataupu Faavae ma Feagaiga 88:5–13 mo se malamalamaaga faaopoopo.

Faaliliuga a Iosefa Samita, Ioane 1:11–18o loo i ai, faatasi ai ma isi aoaoga, o le molimau a Ioane le Papatiso e faapea o i latou uma o e talitonu ia Iesu Keriso o le a maua le tino ola pea ma le ola e faavavau. Matau i fuaiupu 14 ma le 16 na faatatau Ioane ia Iesu Keriso o le “Upu.” O se faalaniga lea o Iesu Keriso o loo maua i le tele o vaega i tusitusiga paia (tagai foi Ioane 1:1; 1 Ioane 1:1; Faaaliga 19:13; MF&F 93:8; Mose 1:32).

Talu ai tatou te faaaogaina upu e avatu ai pe faailoa atu ai se mea i isi, o a auala ua avea ai le “Upu” o se faalaniga talafeagai o Iesu Keriso?

Mafaufau i ni mafuaaga nei ua avea ai o se faalaniga talafeagai: O Ia o le faailoaga o le Tama i le lalolagi; Na te tautino atu upu a le Tama; o Ia o le avefeau o le faaolataga (tagai MF&F 93:8); o Ia o le faataitaiga atoatoa o le ala e ola ai i le upu a le Atua; Na te tuu maia upu o le ola e faavavau; ma o Ana upu e aumaia ai le ola.

Faatusatusa le Ioane 1:18 ma le Faaliliuga a Iosefa Samita, Ioane 1:19. A aunoa ma le Faaliliuga a Iosefa Samita, o nisi o le aufaitau Ioane 1:18 e mafai ona le malamalama ma talitonu e leai se tagata i le lalolagi ua vaai i le Atua le Tama. E faapefea e le Faaliliuga a Iosefa Samita o le Ioane 1:19 ona faamanino ai le Ioane 1:18 e pei ona masani ai ona maua i le Feagaiga Fou?

2. Toe mafaufau i le gaoioiga i le amataga o le lesona lenei lea na fai atu ai e mafaufau faapea o loo e aoaoina se tagata e itiiti sona iloa e uiga ia Iesu Keriso. I lau api talaaga mo le suesueina o tusitusiga paia, tusi ai pe aisea e te manatua ai e taua i se tasi ona iloa isi aoaoga faavae e uiga ia Iesu Keriso ia na e faailoa mai mai le Faaliliuga a Iosefa Samita, Ioane 1:1–19?

Ioane 1:19–34; Faaliliuga a Iosefa Samita, Ioane 1:20–34

Ua molimau atu Ioane le Papatiso ia Iesu Keriso ma papatisoina o Ia

I le Faaliliuga a Iosefa Samita, Ioane 1:20--28 (i le faaopoopoga i le Tusi Paia), sa auina atu e Iutaia faitaulaga ia Ioane le Papatiso e fesili pe o ia o le Mesia. Sa faamalamalama atu e Ioane lana matafaioi o le molimau atu lea i le Mesia, o le o le a papatiso atu i le afi ma le Agaga Paia. O le aso na sosoo ai, na vaai ai Ioane le Papatiso ia Iesu, o le na ia papatisoina talu ai.

Faitau upu a Ioane le Papatiso i le Faaliliuga a Iosefa Samita, Ioane 1:29–33, ma vaavaai mo mea na manao ai Ioane le Papatiso i isi e iloa e uiga ia Iesu Keriso.

Faasino i upumoni na e lisiina i lau api talaaga mo le suesueina o tusitusiga paia e uiga ia Iesu Keriso. O a isi upumoni po o faamalamalamaga e uiga ia Iesu Keriso e mafai ona e faaopoopo mai le Faaliliuga a Iosefa Samita, Ioane 1:29–33? (Lisi mea e te mauaina i lalo ifo o isi upumoni na e lisia i lau api talaaga mo le suesueina o tusitusiga paia.)

Matau na faatatau atu Ioane ia Iesu “o le Tamai Mamoe a le Atua.” Pei lava ona faasaoina e le toto o tamai mamoe o le Paseka ia Isaraleu mai le oti ma laveaiina mai le nofopologa i Aikupito, o le faalaniga “Tamai Mamoe a le Atua” e faatusa faapea o le a faamaligiina e Iesu Lona toto e faasaoina ai Lona nuu ma laveaiina ai i latou mai le agasala.

Ioane 1:35–51

Ua valaaulia e Iesu Ona soo e aoao atili e uiga ia te Ia

Manatu faapea o loo auai se talavou i le sauniga molimau ma ua faalogo ai i ni uo o tuu atu a latou molimau faapea ua latou iloa o Iesu Keriso o lo latou Faaola. Ua taumanatunatu lea talavou pe na faapefea ona “iloa” e na uo na mea. Mafaufau pe o le a faapefea ona e tali atu i sea ituaiga o fesili.

A o e suesueina le Ioane 1:35–51, matau lelei pe o a mea o aoao mai e nei fuaiupu e uiga i mea e mafai ona e faia ia maua ai pe faamalosia ai lau lava molimau ia Iesu Keriso o lou Faaola.

Faitau le Ioane 1:35–37, ma vaavaai po o a mea na ta’u atu e Ioane le Papatiso i ona soo e toalua i le aso na uma ai ona papatiso Iesu.

O le isi, faitau le Ioane 1:38–39, ma vaavaai po o a mea na ta’u atu e Iesu i soo e toalua ma pe na faapefea ona la tali atu.

O le a le valaaulia na tuu atu e Iesu i soo e toalua?

Faitau le Ioane 1:40–42. A o e faitau, maka po o le a le mea na aoaoina e se tasi o ia alii ina ua uma ona taliaina le valaaulia a le Faaola e “o mai ma vaai.”

I le Faaliliuga a Iosefa Samita, Ioane 1:42 ua tatou aoao ai faapea, na fetalai Iesu o Peteru o le a faaigoa ia “Kefa”, o lona faauigaga, o se tagata vaai, po o se maa“ (i le Ioane 1:42, vaefaamatalaga a), e ta’u mai ai o Peteru o le a avea ma perofeta, tagatavaai, ma se talifaaaliga.

Faitau le Ioane 1:43–46, ma vaavaai pe o le a le mea na valaaulia e le Faaola le isi alii, o Filipo, e fai.

Maka ia upu i le fuaiupu 45 o loo ta’u mai ai na maua e Filipo se molimau ia Iesu Keriso ina ua uma ona talia le valaaulia a le Faaola e mulimuli atu ia te Ia. O le a le valaaulia na tuu atu e Filipo ia Natanielu?

Sailiili i le Ioane 1:47–51, ma vaavaai pe o le a le mea na tupu ina ua talia e Natanielu le valaaulia e aoao ia Iesu.

E faavae i luga o mea ua e aoaoina mai nei tala, faamaea le mataupu faavae lenei: A o tatou taliaina le valaaulia e aoao ma mulimuli ia Iesu Keriso, o le a tatou maua .

Faitau le saunoaga lea a Elder Jeffrey R. Holland o le Korama a Aposetolo e Toasefululua, ma vaavaai pe aisea e taua ai lo tatou taliaina o le valaaulia e aoao ma mulimuli i le Alii: “E foliga mai o le ute o la tatou malaga i le tino nei ma tali i fesili e aupito sili ona taua i le olaga e auga i nei elemene pupuu tele i vaaiga amata o le galuega a le Faaola i le olaga nei. O le tasi elemene o le fesili e tuuina mai i tagata uma o i lenei lalolagi: ’Se a launa e saili? O le a le mea e te manao ai?’ O le lona lua o Lana tali i la tatou tali,po o le a lava lea tali. Pe o ai lava i tatou ma pe o le a lava foi tatou te tali atu ai, o Lana tali e tutusa lava i taimi uma: ’’Sau,’ ua Ia fetalai mai ai ma le alofa. ’Sau, ma mulimuli mai ia te au.’ Pe o fea lava e te alu i ai, sau muamua ma matamata i mea ou te faia, matamata i le mea ma pe faapefea ona ou faaaluina lo’u taimi. Aoao ia te au, savali faatasi ma au, ta talanoa, talitonu mai. Faalogologo mai a o ou tatalo. O le taunuuga o le a e maua tali o au lava tatalo. O le a aumaia e le Atua le malologa i o outou agaga. Sau Mulimuli Mai Ia Te Au” (“Ua Fagaina e Ia E Sa Fia Aai i Mea Lelei,” Ensign, Nov. 1997, 65).

E tusa ai ma le faaiuga o le saunoaga a Elder Holland, o a mea e lua o le a tatou maua pe a tatou taliaina le valaaulia a le Faaola “ina sau ia ina matamata”?

3. Tali le fesili lenei, i lau api talaaga mo le suesueina o tusitusiga paia: O a ni auala ua faateleina ai lau molimau ia Iesu Keriso a o e aoao ma mulimuli ia te Ia?

Mafaufau i au lava taumafaiga e aoao ia Iesu Keriso ma mulimuli ia te Ia. Mafaufau pe o le a le mea e mafai ona e faia ia talia atili atoatoa ai le valaaulia e o mai ma mulimuli mai ia e Ia ina ia faateleina ai lou faatuatua ma le molimau.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Ioane 1 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: