Ioane 10

Folasaga

Na aoao mai Iesu o Ia o le Leoleo Mamoe Lelei ma o le a Ia ofoina atu Lona soifua mo Ana mamoe. Na tuuaia e nisi tagata ia Iesu i le upuvale aua sa Ia folafola mai o Ia o le Alo o le Atua.

Ioane 10:1–24

Ua aoao mai e Iesu o Ia o le Leoleo Mamoe Lelei ma o le a ofoina atu Lona soifua mo Lona nuu

Afai e faapone ou mata ma fai atu ia te oe e faailoa mai ia tagata o lou aiga po o ni uo vavalalata e ala i le pa’i atu i o latou foliga, mata e mafai ona e faia? Afai e faapone mata o lou tina, pe e te manatu e mafai ona ia faailoa mai ana fanau uma i le na ona pa’i atu i o latou foliga?

Sa i ai se leoleo mamoe i Sasae Tutotonu na fesiligia pe o le a le lelei o lona iloa o ana mamoe. Sa ia tali atu, “Afai e te tuuina se ie i o’u mata, ma aumai ia te au soo se mamoe ma tau lava ina ou tuu atu o’u lima i ona foliga, e mafai ona ou ta’u atua i se minute pe o sa’u mamoe pe leai” (sii mai i le G. M. Mackie, Bible Manners and Customs [n.d.], 35).

Afai o oe o se leoleo mamoe, o le a sou manatu o le a le mea o le a e iloa ai mamoe o lau lafu e pei o lena leoleo mamoe?

Faitau le Ioane 10:14, ma mafaufau pe aisea ua faaigoa ai e Iesu o Ia lava o le Leoleo Mamoe Lelei. Tusi le faamatalaga lea i lau api talaaga mo le suesueina o tusitusiga paia: O Iesu Keriso o le Leoleo Mamoe Lelei. A o e suesue i le Ioane 10, vaavaai mo upumoni o loo aoao mai ai pe faapefea ona avea le Faaola ma o tatou Leoleo Mamoe Lelei. Tusi upumoni nei i lalo o le faamatalaga lea i lau api talaaga.

O i latou o e sa faalogologo i aoaoga a Iesu sa tusia i le Ioane 10 sa iloa e uiga i mamoe, leoleo mamoe, ma lafu mamoe. I ona po o le Faaola, sa taitai e leoleo mamoe a latou lafu i meaai, vai, ma malutaga i le ao. O le po, e tele leoleo mamoe latou te faapotopoto a latou lafu taitasi i se pa mamoe masani. O se pa mamoe o se ana lea po o se siomaga e siosiomia e pa maa e i ai mea matuitui maamaai e tuu i le pito i luga e puipuia ai mai le ulu atu o meaola feai ma le au gaoi.

Faitau le Ioane 10:1–5, ma vaavaai po o a mea e faia e se leoleo mamoe lelei. Tusi mea e te maua i lalo o le faamatalaga “O Iesu Keriso o le Leoleo Mamoe Lelei” i lau api talaaga mo le suesueina o tusitusiga paia.

O le Ioane 10:3 o loo faamatala mai ai le ala e ulufale atu ai leoleo mamoe taitasi i le faitotoa ma valaau ana mamoe i igoa. E na o mamoe lava o lana lafu o le a mulimuli ia te ia mai le pa mamoe, a o isi mamoe e nonofo ai lava.

Aisea e mulimuli ai mamoe na o lo latou leoleo mamoe?

Matau i le fuaiupu 1 ma le 5 pe o le a le igoa sa faaigoa ai e le Faaola i latou o e sa taumafai e ulu atu i le pa mamoe i isi auala ae le o le faitotoa

E mafai ona fesoasoani le matau sa i ai Faresaio i le vaega o tagata ia sa fetalai ai Iesu (tagai Ioane 9:40). E faapefea ona pei le toatele o le au Faresaio o le au gaoi, faomea, ma tagata ese?

I le Ioane 10:6 ua tatou aoao ai e lei malamalama le au Faresaio i mea sa aoao atu e Iesu. Faitau le Ioane 10:7–10, ma vaavaai pe na amata faapefea e le Faaola ona faamatala faafaatusa le pa mamoe.

Matau o le Faaliliuga a Iosefa Samita e faamanino ai mea na fetalai ai Iesu ifuaiupu 7 ma le 8:

“E moni, e moni, ou te fai atu ia te outou, o au nei o le faitotoa o mamoe.

“O i latou uma e na muamua ia te au, o e lei molimau ia te au o gaoi i latou ma faomea; a e lei faalogo mamoe ia te i latou” (Faaliliuga Iosefa Samita, Ioane 10:7–8 [tagai Ioae 10:8, vaefaamatalaga a]).

O le a sou manatu o le a le uiga o le fetalaiga a le Faaola ina ua Ia fetalai “O au nei o le faitotoa” i fuaiupu 7 ma le 9?

“O leoleo mamoe i Isaraelu e tutu i le faitotoa o le pa mamoe ma siaki mamoe taitasi a o ulufale atu, ma togafiti ni manua pe a manaomia. A uma ona faapotopoto ia mamoe i totonu mo le po, ona taoto ifo lea o le leoleo mamoe e moe i le faitotoa, e poloka ai le ala ina ia le mafai e fili po o le au gaoi ona faatamaia ia mamoe” (Tusi Lesona a le Tagata Aoga o le Feagaiga Fou [Church Educational System manual, 2014], 231–32).

E tutusa faapefea taga a nei leoleo mamoe ma mea e faia e le Faaola mo i tatou?

E faapefea ona aumaia e le Faaola le “ola atili” (Ioane 10:10) ia i latou o e mulimuli ia te Ia?

Faitau le Ioane 10:11–15, ma vaavaai pe o a isi mea na fetalai ai le Faaola e fai e leoleo mamoe lelei, (O se auauna o se tasi lea o lona lava faamoemoe autu e faigaluega ai o le totogi.) Tusi i lalo mea e te maua e uiga i le leoleo mamoe lelei i lalo o le faamatalaga “O Iesu Keriso o le Leoleo Mamoe Lelei” i lau api talaaga mo le suesueina o tusitusiga paia.

Matau i le Ioane 10:11, 13, 15 mea e naunau leoleo mamoe lelei e fai ae le faia e le auauna.

O le Ioane 10:11–15 o loo aoao mai ai i le avea ai o se Leoleo Mamoe Lelei, e silafia e Iesu Keriso i tatou taitoatasi ma sa ofoina mai Lona lava soifua mo i tatou. Tusi le mataupu faavae i lalo o le “O Iesu Keriso o le Leoleo Mamoe Lelei” i lau api talaaga mo le suesueina o tusitusiga paia.

Tomanatu i le tala a le leoleo mamoe i Sasae Tutotonu i le lelei o lona iloa o ana mamoe taitasi, ma tali i fesili nei i se itulau fou o lau api talaaga mo le suesueina o tusitusiga paia:
1. O le a sou manatu o le a le lelei ole silafia o oe e le Faaola? Aisea e te manatu e taua ai le malamalama i lenei mea?
2. E ono aafia faapefea le ala e te ola ai i aso taitasi i le malamalama e silafia oe e le Faaola ma sa naunau e ofo mai Lona soifua mo oe?

Ina ua uma ona aoao mai o le a Ia ofoina atu Lona soifua mo i tatou, sa ta’u mai e le Faaola se isi mea o le a Ia faia. Faitau le Ioane 10:16, ma vaavaai po o le a le isi mea na fetalai mai ai le Faaola o le a Ia faia mo Ana mamoe (o lona uiga o Lona nuu).

I le Ioane 10:16 sa aoao atu ai e le Faaola ia Iutaia i Ierusalema o le a Ia asiasi atu i fanau a le Tama Faalelagi i isi nuu, ma aoao atu ia i latou Lana talalelei, ma aumaia i latou i Lana lafu (Lana Ekalesia). O loo aumaia e le Tusi a Mamona nisi faamatalaga e uiga i le fuaiupu lenei. Faitau le 3 Nifae 15:14–24, ma fuafua e tusi le mau lea i au tusi paia i auafa o le Ioane 10:16, pe maka le Ioane 10:16, vaefaamatalaga a. Fuafua foi e tusi le mau fefaasinoai Ioane 10:16 i autafa o le 3 Nifae 15:14–24.

Tali le fesili lenei, i lau api talaaga mo le suesueina o tusitusiga paia: E fesoasoani faapefea nei fuaiupu i le Tusi a Mamona tatou te malamalama atili ai i le Ioane 10:16?

Faitau le Ioane 10:17–18, ma vaavaai mo se aoaoga faavae e uiga i le Faaola.

Faauma le fasifuaitau lea e faailoa mai ai le aoaoga faavae lenei: I le avea ai ma Alo totino moni o le Atua, ua ia Iesu Keriso le mana e . Mafaufau e faailoga upu o loo aoao mai ai lenei aoaoga faavae i fuaiupu nei.

Mai Lona tina, o Maria, o se tina faaletino, na maua mai ai e Iesu le tino faitino, e aofia ai ma le gafatia e oti ai. Mai ia Elohima, Lona Tama paia, na Ia maua mai ai le tino ola pea ma le mana e soifua ai e faavavau. O lea la, sa Ia maua mai ai gafatia e oti ai ma toetu mai ai. Sa tatau ai lenei mea mo Iesu ina ia mafai ai ona faatinoina le Togiola.

I le Ioane 10:19–24 tatou te aoao ai e faapea ina ua uma ona aoao atu e le Faaola o nei mea, sa fevaevaeai tagata i o latou manatu pe o ai Iesu. Sa latou o atu ia Iesu i le malumalu ma tauanau atu ia e Ia ina ia folafola atu Lona faasinomaga moni o le Keriso, pe o le Mesia.

Ioane 10:25–42

Ua folafola atu e Iesu o Ia o le Alo o le Atua

Mafaufau i nisi o tagata e te fesootai i ai i aso uma, ma taumafai e manatua pe faape’i o latou leo. Aisea e ono faigofie ai ia te oe ona iloa nisi leo nai lo isi?

Faitau le Ioane 10:25–27, ma vaavaai pe na faapefea ona tali atu le Faaola i le talosaga a tagata e ta’u atu ia i latou pe o Ia o le Keriso. Atonu e te manao e maka mea e mafai ona ta’u mai ai pe o se tasi o se mamoe a le Faaola.

E pei ona tusia i le Ioane 10:28–30, na fetalai Iesu e uiga i Lona Tama ma molimau mai, “O a’u nei ma le Tama e tasi lava i ma’ua” (Ioane 10:30).

Na tuuina mai e Peresitene Iosefa F. Samita le faamalamalamaaga lenei e uiga i lo La’ua tasi: “O Iesu ma lona Tama … e tasi i le silafia, i le upumoni, i le poto, i le malamalama, ma i le faamoemoega; e faapei lava ona sa apoapoaia ai e le Alii lava ia ona soo ina ia tasi ma ia, ma ia ia te ia, ina ia i ai o ia i totonu ia te i latou. O le itu lea ua ou malamalama ai i lenei gagana, ae le pei ona faaliliuina e nisi tagata, faapea o Keriso ma lona Tama o le tagata e tasi. Ou te tautino atu ia te outou e le o se tagata e toatasi, ae o i la’ua o ni tagata e toalua, e eseese ma e valavala, ma e maioio pei lava o soo se tama ma se atalii” (Aoaoga a Peresitene o le Ekalesia: Iosefa F. Samita [1998], 357).

Faitau le Ioane 10:28–30, ma vaavaai mo faamanuiaga o le a tuuina mai ia i latou o e faalogo i le siufofoga o le Faaola ma mulimuli ai.

Ua aoao mai e nei fuaiupu e faapea afai tatou te iloa le siufofoga o le Leoleo Mamoe Lelei ma mulimuli ia te Ia, o le a Ia taitai i tatou i le ola e faavavau. Tusi le mataupu faavae lea i lau api talaaga mo le suesueina o tusitusiga paia i lalo o le “O Iesu Keriso o le Leoleo Mamoe Lelei.” Atonu foi e te manao e tusi pe faamau i au tusitusiga paia i autafa o le Ioane 10:27–28.

Faitau le fuaitau lea, ma vaavaai pe faapefea ona fesoasoani e te malamalama ai i lenei mataupu faavae: Enosa 1:4–8; Mataupu Faavae ma Feagaiga 1:38; 8:2–3; 18:34–36.

Mafaufau i fesili taitasi nei:

O le a sau mea na fai ua atili ai ona e masani i le siufofoga o le Faaola?
O le a se mea e mafai ona e faia ina ia e iloa atili ai le siufofoga o le Faaola?
O le a se mea na uunaia ai oe e faia i lou olaga e mulimuliatili ai i le Faaola?

I se isi fasipepa, tusi ai (1) se sini e faalogologo ma le faaeeete atili mo le siufofoga o le Faaola ma auala patino o le a e faia ai, po o (2) se sini e mulimuli atili ai i Lona siufofoga ma pe faapefea ona e fuafua e faia. Tuu lau sini i se mea o le a e vaai ai i ai ma faamanatu atu ai e te galue ai.

O le Ioane 10:31–42 o loo tusia ai ina ua uma ona tautino mai e le Faaola le sootaga i le va o Ia ma Lona Tama, sa saili le au Faresaio e fetogia o Ia ona o le upuvale. Peitai, na tali atu le Faaola i a latou tuuaiga ma sii atu mai le Salamo 82:6, e faitauina faapea, “O a’u na ou faapea ane, O atua outou; o fanau foi outou uma a le Silisiliese” (tagai Ioane 10:34). Ona fesili atu lea o le Faaola pe aisea o le a latou tuuaia ai o Ia i le upuvale ona sa Ia fetalai atu o Ia o le Alo o le Atua, a ua fai mai tusitusiga paia o i tatou o fanau a le Atua ma e mafai ona avea i tatou lava ma atua. Na Ia apoapoai atu ia te i latou ia talitonu ia te Ia ma Ana galuega, ia o loo molimau atu ai e uiga ia te Ia ma le Tama na auina mai o Ia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Ioane 10 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: