Iunite 15: Aso 4

Ioane 14–15

Folasaga

Ina ua uma le tausamiga o le Paseka, sa aoao atu e Iesu Ana Aposetolo i le ala e toe foi atu ai i le Tama Faalelagi ma le ala e faaali atu ai lo latou alolofa mo Ia. Ona folafola atu lea e Iesu i Ana Aposetolo o le a Ia auina mai ia i latou le isi Fesoasoani. Na Ia aoao atu o Ia o le Vine Moni ma o Ona soo o lala. Sa poloaiina foi e le Faaola Ona soo ia fealofani ma lapataia i latou i sauaga o le a latou oo i ai ona o la latou mafutaga ma Ia.

Ioane 14:1–14

Ua aoao e le Faaola Ana Aposetolo i le ala e toe foi atu ai i le Tama Faalelagi

Manatu faapea ua fesili atu se uo, “Na ta’u mai ia te au e tele auala i le lagi ma e faasino mai e lotu ia i tatou auala eseese i le malo o le Atua. Pe e te talitonu e moni lena mea?” I le avanoa o loo avatu, tusi ai pe faapefea ona e tali atu i lea fesili, ma faamatala pe aisea e te talitonu ai pe aisea foi e te le talitonu ai e moni lea faamatalaga.

Faitau le Ioane 14:1–6, ma vaavaai mo aoaoga a le Faaola e uiga i le ala e toe foi atu ai i le malo o le Tama Faalelagi. O le (Ioane 14:6 o se fasifuaitau o se mau tauloto.) Atonu e te manao e faailoga i se auala e iloagofie ai ina ia mafai ona e mauaina i le lumanai.)

Mai le Ioane 14:6 tatou te aoao ai faapeae na o le Togiola a Iesu Keriso ma le mulimuli i Ona ala e mafai ai ona tatou ulu atu i le malo o le Tama Faalelagi.

1. Tali fesili nei i lau api talaaga mo le suesueina o tusitusiga paia:

   1. E faapefea ona avea na o le Faaola ma ala e toe foi atu ai i le Tama Faalelagi?

   2. O a auala ua avea ai Iesu Keriso ma Upumoni?

   3. O a auala ua avea ai Iesu ma Ola?

O ala a le Faaola e aofia ai le atinaeina o le faatuatua ia te Ia ma le Tama Faalelagi; salamo; mauaina o sauniga o le faaolataga, e pei o le papatisoga ma sauniga o le malumalu; ma le tumau e oo i le iuga i le faatuatua ma le usiusitai.

Faitau le Ioane 14:7–14, ma vaavaai mo mea na ta’u atu e Iesu i Ona soo e uiga i Lana sootaga ma Lona Tama. Fuafua e maka le fasifuaitau “o le ua vaai mai ia te au ua vaai o ia i le Tama” i le fuaipu 9.

Na aoao mai Elder Jeffrey R. Holland o le Korama a Aposetolo e Toasefululua e faapea, na auina mai e le Tama Lona Alo e fesoasoani ia tatou iloa, alolofa, ma usiusitai i lo tatou Tama o i le Lagi:

“O mea uma na afio mai Iesu e ta’u mai ma fai, aemaise lava i Lana taulaga ma le puapuaga o le togiola, sa Ia faaali mai ia i tatou po o ai le Atua lo tatou Tama Faavavau ae pe faapei foi o ia, le atoatoa o Lona gauai mai i Lana fanau i soo se augatupulaga ma soo se atunuu. Sa taumafai Iesu e ala i upu ma galuega e faaali ma faamanino mai ia i tatou le natura moni o Lona Tama, lo tatou Tama o i le Lagi.

“Na Ia faia lenei mea na o se vaega i le taimi lena ae o lenei ua moomia e i tatou uma ona iloa atoatoa le Atua ina ia mafai ai ona loloto atu le alofa ia te Ia ma atoatoa ona usiusitai ia te Ia. …

“I le mavae ai o augatupulaga o perofeta o taumafai e aoao mai le aiga o le tagata, le finagalo ma le ala a le Tama, e masani e itiiti se faamanuiaina, o le Atua i Lana taumafaiga laualuga ia tatou iloa o Ia, na auina mai i le lalolagi Lona Atalii atoatoa e Toatasi na Fanaua, na foafoaina i Lona lava faatusa, e soifua ma auauna faatasi ma tagata i faigata o le olaga. …

“… Na afio mai Iesu … e faaleleia atili le vaaiga a le tagata i le Atua ma augani atu ia i latou ina ia alolofa i lo latou Tama Faalelagi e faapei ona Ia faia i aso uma ma o le a alofa pea lava ia i latou. O le fuafuaga a le Atua, o le mana o le Atua, o le paia o le Atua, ioe, e oo lava i le toasa ma le faamasinoga a le Atua o nisi taimi e malamalama ai. Ae o le alofa o le Atua, le loloto maoae o Lona faamaoni i Ana fanau, sa latou lei iloaina atoatoa—vagana ai ina ua afio mai Keriso.

“O le fafagaina la o e sa fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Le e “alofa tunoa ma alofa mutimutivale, e telegese lona toasa, e onosai ma tumu i le agalelei’ [Lauga i le Faatuatua (1985), 42]. I Lona soifuaga aemaise lava i Lona maliu, sa tautino mai ai e Keriso, ’O le mutimuti alofa lea o le Atua ua ou faaali atu ia te outou, faapea foi lo’u lava alofa’” (“O le Silisiliese o le Atua,” Ensign po o le Liahona, Nov. 2003, 70–72).

Mau Tauloto—Ioane 14:6

2. O le taulotoina o le mau i le Ioane 14:6 e mafai ona fesoasoani e te taliina ai fesili e pei o le fesili mai le amataga o le lesona lenei. Tauloto le fuaitau lea i le faifai soo leotele. Ona tauloto atu lea i se tagata o le aiga po o se uo. A uma, tusi ua ou taulotoina le Ioane 14:6i lau api talaaga mo le suesueina o tusitusiga paia, ma fai i le tagata na e taulotoina i ai e saini i lau api talaaga.

Ioane 14:15–31

Ua aoao atu e Iesu i Ana Aposetolo le ala e faaalia ai lo latou alolofa mo Ia

Mafaufau i se tasi e te alofa i ai. E faapefea ona faaalia lou alofa i lea tagata?

Faitau le Ioane 14:15, ma vaavaai mo mea na ta’u atu e Iesu i Ana Aposetolo e fai e faaalia ai lo latou alolofa ia te Ia. O le (Ioane 14:15 o se fasifuaitau o se mau tauloto. Atonu e te manao e faailoga i se auala e iloagofie ai ina ia mafai ona e mauaina i le lumanai.)

E faavae i mea a aoao atu e Iesu i Ana Aposetolo, faamaea le upumoni lea: Tatou te faaalia lo tatou alolofa mo Iesu Keriso i le .

Mafaufau e faapefea i le tausiga o poloaiga taitasi ona faaalia lou alofa mo Iesu Keriso: tausia o le aso Sapati ia paia, ava i lou tama ma lou tina, totogi o le sefuluai, ma le alofa i lou tuaoi.

Faaaoga se tolu pe fa minute ma mafaufau loloto pe o le a le lelei o e faaali atu ai lou alofa mo le Faaola e ala i le tausia o Ana poloaiga.

Faitau le Ioane 14:16–17, 26, ma vaavaai mo le folafolaga a le Faaola i Ana Aposetolo.

O le fasifuaitau “le tasi Fesoasoani” i le fuaiupu 16 e faasino i le Agaga Paia. Ona o le Faaola sa avea o se Fesoasoai i Ana Aposetolo i le taimi o Lana galuega i le olaga nei, o lea sa Ia faaigoa ai le Agaga Paia o le tasi Fesoasoani. Mo se mafuaaga, o le Agaga Paia sa lei galue atoatoa i le taimi o le galuega a Iesu i le olaga nei, e ui o Ia sa galue atoatoa a o lei amataina le galuega faaletino a le Faaola ma i le taimi o Lana galuega i le olaga nei (tagai Bible Dictionary, “Agaga Paia”).

Na faamalamalama mai e Elder Bruce R. McConkie o le Korama a Aposetolo e Toasefululua, le matafaioi a le Agaga Paia i a tatou taumafaiga e talai atu le talalelei:

“O le umi lava sa i ai Iesu faatasi ma i latou, sa avea ai o ia ma o latou Fesoasoani; sa ia fetalaia atu le filemu i o latou agaga; o i latou o e sa mafatia i avega ma le faanoaoa ma mafatiaga ma tauiviga o le lalolagi, na o mai ia te ia ma maua ai le malologa mo o latou agaga. Sa Ia faamafanafanaina le fafine ua oti lana tane ma o se tama i e ua matua oti. O ana upu e siitia ai agaga o e talitonu i ni mea maualuluga fou o le taugalemu ma le filemu. O lea la ua tuua e ia, ae o le a ia auina mai se isi Fesoasoani—o le Agaga Paia—e tumau ma e faamaoni e faavavau.

“Mo tagata uma vagana ai ni nai tagata o e sa faalogo i lona siufofoga i le olaga nei, o le Agaga Paia o le uluai Fesoasoani. O lenei uso o le Aigaatua e saunoa maia le filemu i agaga o e amiotonu i tupulaga uma. O le Agaga Paia ’o le meaalofa a le Atua ia i latou ua o e saili ma le filiga ia te ia, e pei o taimi anamua faapea foi i le taimi o le a faaali mai ai o ia lava i le fanauga a tagata’(1 Ni. 10:17), ma e faapea foi i taimi o le a oo mai. O Ia o le Agaga o le upumoni—e faapei foi o Keriso—ae e le mafai e le lalolagi ona talia le Agaga Paia aua e le nofo le Agaga i tapeneko eleelea” (O Le Mesia Soifua: Mai Peteleema i Kalevario, 4 vols. [1979–81], 4:74–75).

E tusa ai ma le Ioane 14:16–17, 26, o a mea e tolu e mafai e le Agaga Paia ona faia mo i tatou? Tali le fesili lea i le faamaeaina o le upumoni lea: E mafai e le Agaga Paia .

3. Tali se fesili e tasi pe sili atu o loo i lalo, i lau api talaaga mo le suesueina o tusitusiga paia:

   1. O le a se taimi na e lagonaina ai le Agaga Paia o faamafanafanaina oe?

   2. O le a se taimi na e lagonaina ai le Agaga Paia o aoaoina oe?

   3. O anafea na fesoasoani ai le Agaga Paia ia te oe e manatua se mea?

Faitau le Ioane 14:18–23, ma vaavaai mo le folafolaga a le Faaola ia i latou o e faaali atu lo latou alolofa ia te Ia e ala i le tausia o Ana poloaiga.

Mai nei fuaiupu ua tatou aoao ai faapea, afai tatou te tausia poloaiga, o le a mafuta le Tama Faalelagi ma Iesu Keriso faatasi ma i tatou.

Faitau le Mataupu Faavae ma Feagaiga 130:3, ma vaavaai po o le a le uiga o le ia faatasi i tatou ma le Tama Faalelagi ma Iesu Keriso.

Faitau le Ioane 14:27, ma vaavaai mo upu a le Faaola o le faamalosiauina o Ana Aposetolo.

Mafaufau i eseesega o le filemu ua ofo mai e le Faaola ma le filemu e ofo mai e le lalolagi.

Na faamatala e Elder McConkie le filemu ua ofo mai e le Faaola: “[O se] filemu i totonu e afua mai i le talitonuga maumaututu i le paia o le malo o le Alii i le lalolagi; o se filemu e tauaveina se faamautinoaga o se lalolagi e sili atu o le a oo mai; o se filemu e mau i loto o tagata e ui latou te i ai i le lotolotoi o taua ma faigata” (Faamatalaga o Aoaoga Faavae o le Feagaiga Fou, 3 vols. [1965–73], 1:742).

I le Ioane 14:28–30 ua tatou aoao ai na ta’u atu e Iesu i Ana Aposetolo e tatau ona latou fiafia aua e le o toe mamao ona Ia tuua lea o i latou e toe foi atu i le Tama Faalelagi. Pei ona faamanino mai i le Faaliliuga a Iosefa Saita, sa ta’u atu foi e Iesu ia te i latou faapea, o Satani e leai sana pule ia te Ia aua sa Ia faatoilaloina le lalolagi, ae e mafai lava e Satani ona faatosina i latou aua e lei maea la latou galuega i le lalolagi (tagai Faaliliuga a Iosefa Samita, Ioane 14:30 [i le Ioane 14:30, vaefaamatalaga a]).

Faitau le Ioane 14:31, ma vaavaai pe na faapefea ona faaali mai e le Faaola Lona alofa mo Lona Tama. Atonu e te manao e faailoga mea e te maua.

Mau Tauloto—Ioane 14:15

4. Vaai pe o le a le umi e te taulotoina ai le Ioane 14:15. Fai leotele. Ona tusi tauloto lea i lau api talaaga mo le suesueina o tusitusiga paia.

Toe faitau le Ioane 14:31, ma vaavaai mo le faataitaiga a Iesu Keriso na faatuina mo i tatou i le mataupu faavae na Ia aoao mai i le Ioane 14:15. Matau le fuaiupu “Tutu ia i luga, ina tatou o ese ia” (Ioane 14:31). E foliga mai na faatatau le Faaola i le tuua o le afeafe aupito a luga lea na faia ai le Talisuaga Mulimuli ona faataunuuina lea o Lona tiute i le Atua i Ketesemane ma i luga i Kolokota. O le poloaiga e aupito sili ona faigata mai le Tama i le Alo, o le puapuagatia lea o Iesu ma maliu mo i tatou (tagai 3 Nifae 27:13–14). Mafaufau i poloaiga a le Alii ma tulaga faatonuina e faigata ona e usitaia. Mafaufau pe faapefea e le usitaia i nei poloaiga ona faaalia lou alofa mo le Faaola. I lau lava api talaaga patino, tusi ai se sini ia e usiusitai i ni auala e te manatunatu loloto i ai.

Ioane 15:1–11

Ua faamatala e Iesu o Ia o le Vine Moni

Vaai faalemafaufau ua e toe tepa i tua i lou olaga i le 60 tausaga mai le taimi nei. Lio pe o le fea o nei upu o le a e manao e faamatala tonu ai lou olaga: faamanuiaina, le fiafia, olioli, tauaogaina, e le fua, fotu mai, e fua, faateleina, e le manuia.

Sa faaaoga e Iesu se upu valiata o se vine e fesoasoani ai ia malamalama ona soo i le ala e maua ai se olaga e fotu mai, e fua, ma faateleina.

Faitau le Ioane 15:1–5, ma vaavaai pe o a elemene eseese e faatusa i ai lenei upu valiata.

Mai nei fuaiupu ua tatou aoao ai o le vine e faatusa ia Iesu Keriso, a o lala e faatusa i soo o Iesu Keriso. O fua e mafai ona faatusa i galuega amiotonu ma faatinoga e tatau ona fua mai i soo o Iesu Keriso. Tusi uiga nei i igoa o i le ata. O le galue vine, e pei ona fetalai ai le Faaola i le Ioane 15:1, o le Tama Faalelagi. O se galue vine o se tasi e tausia se tovine.

Fuafua e maka ia taimi taitasi o upu tumau po o le mau i le Ioane 15:4–5. O le upu tumau e pei ona faaaogaina i nei fuaiupu o lona uiga o le tumau mausali ma ua pipii mautu ia Iesu Keriso ma Lana Ekalesia

I le Ioane 15:5 tatou te aoao ai afai tatou te tumau i le Faaola, o le a tatou fua maia galuega amiotonu.

I le Ioane 15:6–8 ua tatou aoao ai sa aoao mai le Faaola o i latou o e le tumau ia te Ia, e pei o se lala ua vavae ese mai—e mamae ma mate. O tagata e tumau ia Iesu Keriso e fua mai ai galuega amiotou ia e viia ai le Atua.

O le a se mea e mafai ona tatou faia ina ia tumau ai, pe fesootai mausali ai i le Faaola?

Faitau le Ioane 15:9–11, ma vaavaai mo mea na aoao atu e Iesu i Ona soo e fai ma pe o a faamanuiaga o le a latou mauaina. Mafaufau e faailoga mea e te mauaina.

E alolofa le Tama ma le Alo ia i tatou i se alofa atoatoa ma e faavavau, ma o le tausia o a La’ua poloaiga e mafai ai ona tatou maua se atoaga o faamanuiaga ua La naunau alofa e tuuina mai ia i tatou (tagai 1 Nifae 17:35; MF&F 95:12; 130:20–21).

Mai le Ioane 15:10–11 ua tatou aoao ai afai tatou te tausia poloaiga, o le a tatou tumau i le alofa o le Faaola, ma maua le atoaga o le olioli.

5. Tali fesili nei i lau api talaaga mo le suesueina o tusitusiga paia:

   1. Aisea e te manatu ai o le tumau i le Faaola e mafai ai e i tatou ona maua le atoaga o le olioli?

   2. Aisea e te manatu ai o i latou o e tumau i le Faaola o le a fua mai ai galuega o le amiotonu?

Mafaufau i ni auala e mafai ai ona tumau mausali lou fesootai i le Faaola ma maua ai le olioli sili atu.

Ioane 14:12–17

Ua poloaiina e Iesu Ona soo ia fealofani

Na saunoa Peresitene Russell M. Nelson o le Korama a Aposetolo e Toasefululua, “O le faamaoniga sili lava o lo tatou alolofa ia Iesu o lo tatou faataitai lea ia te Ia” (“O Le Misiona ma le Auauaga a Iesu Keriso,” Liahona, Ape. 2013, 38).

Alofagia o le alofa sili ma le faaaloalo, ma le faataitai o lona uiga o le faaaoao pe kopi.

Faitau le }Ioane 15:12, ma vaavaai mo le ala na poloai mai le Faaola tatou te faataitai ai ia te Ia. Atonu e te manao e faailoga mea e te maua.

Faitau le Ioane 15:13–17, ma vaavaai mo le auala na alofa mai ai le Faaola mo i tatou. I le fuaiupu 13, fuafua e maka le mea na fetalai le Faaola o le faaaliga aupito silisili o le alofa.

Vase le mea na fautuaina mai e Elder ClaudioR. M. Costa o le Au Peresitene o Fitugafulu tatou te fai ina ia ofo atu ai o tatou lava ola mo i latou tatou te alolofa i ai: “E mafai ona tatou ofoina atu o tatou ola mo i latou o e tatou te alolofa i ai e le faapea o le a tatou feoti mo i latou ae ia ola mo i latou—ia faaavanoa i ai lo tatou taimi; ia i ai pea i o latou olaga; tautuaina i latou; ia faaaloalo, agaalofa, ma faaali atu le alofa moni mo i latou o o tatou aiga ma tagata uma—e pei ona aoao mai e le Faaola” (“Aua le Faatalia mo Taeao le Mea e Mafai ona E Faia i le Aso,” Ensign po o le Liahona, Nov. 2007, 74).

Mafaufau i se tasi na ofoina atu lona ola i se tasi o nei auala mo oe.

Ioane 15:18–27

Ua lapatai atu Iesu i Ona soo e uiga i sauaga o le a latou oo i ai ona o lo latou molimau atu ia te Ia

Ina ua uma ona aoao atu e le Faaola Ona soo e uiga i le tumau ia te Ia ma faaali atu le alofa o le tasi i le isi, sa Ia aoao atu i latou i le mea o le a tupu ia i latou ona o la latou mafutaga ma Ia. I le Ioane 15:18–25 tatou te aoao ai faapea o le lalolagi, po o i latou o e agasala, o le a inoino i Aposetolo. Na fetalai Iesu Keriso e faapea, o i latou o e inoino ia te Ia, ua inoino foi i le Tama ma o le a faamasinoina i latou ona o a latou filifiliga.

E ui i le inoino ma sauaga o isi i Ona soo, ae sa saunia lava e Iesu Keriso ia auala mo le lalolagi e maua ai se molimau ia te Ia. Faitau le Ioane 15:26–27, ma vaavaai mo molimau o e o le a molimau atu ia Iesu Keriso i le lalolagi.

6. Tusi le mea lenei i le pito i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Ioane 14–15 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: