Ioane 18–19

Folasaga

Ina ua uma ona puefaapagotaina ma suesueina Iesu e taitai Iutaia, sa latou aveina atu o Ia ia Pilato e faamasino ai ma faasalaina. Sa ioe Pilato i le Faasatauroga o Iesu e ui ina sa faatalitonuina o ia i Lona taumamaina. A o i ai i luga o le satauro, sa faatonuina e Iesu le Aposetolo o Ioane e vaai faalelei Lona tina, o Maria. Ina ua maliu Iesu, sa tuuina Lona tino i se tuugamau.

Ioane 18:1–32

Ua puefaapagotaina Iesu ma suesue e taitai Iutaia o e na latou aveina atu o Ia ia Pilato.

O le a se taimi e sili ona faigata ia te oe e popole ai mo le soifua manuia o isi?

I lau api talaaga mo le suesueina o tusitusiga paia, tusi se laina mai luga i lalo i le ogatotonu o se lautusi e fai ai ni koluma se lua. Faaigoa le isi koluma Popolega o Iesu Keriso ma le isi koluma Popolega o Pilato. I le taimi o le puefaapagotaina, faamasinoga, ma le Faasatauroga, na filifili ai Iesu ma Pilato le kovana Roma e faataua pe faamuamua ni mea eseese. A o e suesueina le Ioane 18–19, vaavaai mo upumoni e mafai ona e aoaoina mai faataitaiga a Iesu ma Pilato ia e mafai ona fesoasoani e te iloa ai pe o a popolega e tatau ona faamuamua i lou olaga. Tusi upumoni e te mauaina i le lesona atoa lenei i koluma talafeagai i lau api talaaga mo le suesueina o tusitusiga paia.

Ua tatou faitau i le Ioane 18:1–3 ina ua uma ona mafatia Iesu i le Faatoaga o Ketesemane, sa taunuu ane Iuta le Sekara ma se vaega o taitai sa o mai e puefaapagota ia Iesu. Afai e te iloa ua oo atu se au faaaupegaina e puefaapagota oe ma iu ai ina fasiotia oe, mata o le a sau tali atu iai?

Faitau le Ioane 18:4–11 ma le Luka 22:50–51, ma vaavaai pe na faapefea ona tali atu Iesu ina ua taunuu atu lena vaega.

O upu latou i le Ioane 18:8 ma le latou i le Ioane 18:9 e faasino i Aposetolo sa i ai faatasi ma Iesu. E tusa ai ma nei fuaiupu, o le a le mea na popole ai Iesu Keriso?

A uma ona faitau le Ioane 18:4–11 ma le Luka 22:50–51, tusi i lau api talaaga mo le suesueina o tusitusiga paia i le koluma ua faaigoaina “Popolega o Iesu Keriso,” mea sa popole i ai le Faaola.

Ua tatou faitau i le Ioane 18:12–32 sa tuu atu lava e Iesu i tagata e puefaapagota o Ia. Sa latou ave o Ia ia Ana, o le faitaulaga sili talu ai, o le sa auina atu Iesu e suesueina e Kaiafa, o le toalua o le afafine o Ana (tagai Ioane 18:13). O Kaiafa o le faitaulaga sili na tofia i le taimi lea, ma sa taumafai o ia e fasiotia Iesu (tagai Ioane 18:14). Sa mulimuli atu Peteru ma se tasi soo ia Iesu ma matamata ia Kaiafa a o suesueina o Ia (tagai Ioane 18:15–16). Ina ua fesili ni tagata eseese se toatolu ia Peteru pe o ia o se tasi o soo o Iesu, sa faafiti Peteru i taimi taitasi na te le iloa o Ia (tagai Ioane 18:17, 25, 26–27). Ina ua uma ona suesueina e Kaiafa ia Iesu, sa ave e taitai Iutaia ia Iesu, i le taeao po ia Pilato, le sui konesula o Iutaia, e faamasinoina ai ma faasalaina (tagai Ioane 18:28–30). E na o Roma sa i ai le pule e faatino ai se faasalaga o le oti i Ierusalema (tagai Ioane 18:31).

Ioane 18:33–19:16

Ua faamasinoina Iesu i luma o Pilato

Faitau le Ioane 18:33–35, ma vaavaai mo mea na manao Pilato e iloa e uiga ia Iesu.

Na tuuaia e taitai Iutaia ia Iesu i le fai mai o ia o le tupu o tagata Iutaia aua afai e fai mai Iesu o se tupu, ua mafai ona tausalaina o ia i le fouvale ma le faatupu vevesi i le malo o Roma (tagai Ioane 19:12) ma o lea e mafai ai ona fasiotia.

Faitau le Ioane 18:36–37, ma vaavaai mo mea na faamatala atu e Iesu ia Pilato.

Faitau le Ioane 18:38, ma vaavaai mo le faaiuga a Pilato e uiga ia Iesu.

I le Ioane 18:39–19:5 ua tatou aoao ai sa ofo atu e Pilato e tatala Iesu e tusa ai ma le agaifanua a Iutaia e faasaoloto se pagota e toatasi i le taimi o le tausamiga o le Paseka (tagai Ioane 18:39). Na filifili faitaulaga sili ma taitai e tatala le faomea o Parapa nai lo [Iesu] (tagai Ioane 18:40) ma poloaiina ia faasatauroina Iesu (tagai Ioane 19:6). Sa sasaina e Pilato ia Iesu, sa tuu e fitafita Roma se pale tuitui i Lona ao ma tauemu atu ia te Ia (tagai Ioane 19:1–2), ona tuuina atu ai lea e Pilato o Iesu i luma o tagata.

Faitau le Ioane 19:4, 6, ma vaavaai mo mea na ta’u faafia atu e Pilato i Iutaia.

Mata o le a le mea atonu na talitonu Pilato o le mea sa’o lea e fai?

E tusa ai ma le Ioane 19:7, na ta’u atu e taitai Iutaia ia Pilato ua fai mai Iesu o Ia o le Alo o le Atua. Faitau le Ioane 19:8–11, ma vaavaai mo le tali a Pilato ina ua ia faalogo ua fai mai Iesu o Ia o le Alo o le Atua. Vaavaai foi mo mea na fetalai atu ai Iesu ia Pilato e uiga i le pule a Pilato o se kovana.

Pe ana e i ai i le tulaga o Pilato, mata o a ni ou lagona ina ua uma ona faalogo atu o faapea mai Iesu e leai sau pule ia te Ia “pe ana le tuuina mai [lena pule] mai luga” (Ioane 19:11)?

O le fetalaiga a Iesu i le Ioane 19:11 e uiga i taitai Iutaia ua “tele lona leaga” e ta’u mai ai afai e faamatuu atu Pilato i le talosaga a le motu o tagata ma faatonuina Iesu ia faasatauroina, o le a tausalaina ia Pilato i le agasala—e ui ina e le tusa ma le tulaga o i latou sa saili naunau ia fasiotia Iesu.

Faitau le Mataio 27:19, ma matau le mea na fautuaina Pilato e lana ava e fai. Ona faitau lea o le Ioane 19:12–15, ma vaavaai mo mea na taumafai Pilato e fai e tusa ai ma Iesu ma pe na faapefea ona tali atu Iutaia sa sailia e fasiotia Iesu.

Matau i le Ioane 19:12 pe na faapefea ona faamata’uina e taitai Iutaia ia Pilato ina ua latou iloa ua manao Pilato e tatala Iesu.

Ina ia tuu atu se uunaiga malosi ia Pilato, sa faamanatu atu e Iutaia ia Pilato afai na te tatalaina Iesu, o le a mafai ona faitaulia o ia ua le faamaoni ia Kaisara. Afai e logo atu e Iutaia lenei le faamaoni, e ono aveesea e Kaisara le tulaga o Pilato ma le pule o se konesula. O le taimi lea na tatau ai ia Pilato ona filifili pe o lona manuia po o le tatala o Iesu, lea ua ia iloa e taumamaina.

Faitau le Ioane 19:16, ma vaavaai mo le mea na filifili Pilato e fai.

O a mea o aoao ai i tatou e faatinoga a Pilato e uiga i ona muai popolega?

I lau api talaaga mo le suesueina o tusitusiga paia, i le koluma ua faailoga “Popolega o Pilato,” tusi ai mea na sili ona popole i ai Pilato.

Mai la tatou suesueina o popolega o Pilato o loo faaalia i le Ioane 18–19, ua tatou aoao ai o le faamuamua o a tatou lava mea e manuia ai i tatou nai lo le faia o le mea sa’o o le a taitai atu ai i tatou i le agasala. Tusi le mataupu faavae lea i lau api talaaga mo le suesueina o tusitusiga paia i le koluma ua faaigoa “Popolega o Pilato.”

Tali fesili nei, i lau api talaaga mo le suesueina o tusitusiga paia:
1. O a ni nai tulaga e ono faaosoosoina ai i tatou e faamuamua mea tatou te fiafia i ai nai lo le faia o le mea sa’o?
2. O a ni nai mea e mafai ona e faia e faatoilalo ai faaosoosoga e faamuamua mea e te fiafia ma manuia ai i lo le faia o le mea sa’o, tusa lava pe le o se mea e le manaomia tele?

Ioane 19:17–42

Ua faasatauroina Iesu, ma ua tuu Lona tino i se tuugamau

Ua tatou faitau i le Ioane 19:17–24 na amo e Iesu Lona satauro ma alu atu i Kolokota, lea sa faasatauroina ai o Ia i le ituaso e tolu (tagai Mareko 15:25; pe o le itula lona tolu talu ona oso ae le la). Faitau le Ioane 19:25–27, ma vaavaai po o ai sa lata ane i le satauro ina ua faasatauroina Iesu.

A o tautau o Ia i le satauro, o ai na popole i ai Iesu?

O le fasifuaitau “o le soo … ua alofaina e [Iesu]” (Ioane 19:26) e faasino i le Aposetolo o Ioane, ua faaigoa foi ia Ioane le Soo Pele. Ina ua fetalai Iesu ia Ioane, “Faauta i lou tina,” sa ia faatonuina Ioane e vaai faalelei Maria, Lona tina, ia faapei o le tina o Ioane lava ia. I lau api talaaga mo le suesueina o tusitusiga paia, i le koluma ua faaigoa “Popolega o Iesu Keriso,” tusi ai pe o ai e faaalia mai i fuaiupu nei o loo popole i ai Iesu.

E faavae i popolega sa faailoa mai i lau suesuega o le Ioane 18–19, e faapefea ona e faamatalaina le uiga o Iesu Keriso e faatusatusa i uiga o Pilato?

Mai lo tatou suesueina o uiga o le Faaola o loo faaalia i le Ioane 18–19, ua tatou aoao ai e mafai ona tatou mulimuli i le faataitaiga a le Faaola e ala i le filifili e fesoasoani i isi tusa lava pe o tatou manaomia e i tatou lava le fesoasoani. Tusi le mataupu faavae lea i lau api talaaga mo le suesueina o tusitusiga paia i le koluma ua faaigoa “Popolega o Iesu Keriso.”

Na aoao mai Elder David A. Bednar o le Korama a Aposetolo e Toasefululua e faapea: “O uiga e faaalia … i le mana e iloatino ai le mafatiaga o isi tagata pe a tatou mafatia foi i tatou lava; i le tomai e iloa ai le fia aai o isi a o la foi tatou te fia aai i tatou; ma i le mana e aapa atu ai ma avatu le mutimuti alofa mo mafatiaga faaleagaga o isi a o la tatou te i ai i le lotolotoi o o tatou lava mafatiaga faaleagaga. O le mea lea, o uiga o le tagata e faatino i le vaavaai ma aapa i fafo atu pe afai o le tali masani ma le le mafaufauina o le manatu faapito ma le liliu ifo ia te oe lava. Afai o lea malosiaga o le tulaga moni lea e manaomia o uiga lelei, o lona uiga la, o le Faaola o le lalolagi o le faataitaiga atoatoa lea o lena uiga faifai pea ma le agaalofa” (“O Uiga o Keriso” [Brigham Young University–Idaho Religion Symposium, Ianuari. 25, 2003], byui.edu/devotionalsandspeeches).

Tali fesili nei i lau api talaaga mo le suesueina o tusitusiga paia:
1. O anafea na e vaai ai i se tasi o mulimuli i le faataitaiga a le Faaola e ala i le filifili e fesoasoani i isi e ui o la foi sa manaomia e ia le fesoasoani?
2. O le a sou manatu e mafai faapefea ona tatou atinaeina lenei ituaiga o uiga faa-Keriso ma saili e fesoasoani i isi tusa pe o tatou manaomia foi e i tatou lava?
3. O le a se mea o le a e faia e mulimuli ai i le faataitaiga a le Faaola e ala i le filifili e fesoasoani i isi tusa lava pe o la foi e te manaomia e oe lava ia le fesoasoani?

Ua tatou aoao i le Ioane 19:28–42 ina ua maliu Iesu i le ituaso e iva (tagai Mareko 15:34), sa talosagaina e Iosefa le Arimataia ia Pilato mo le tino o Iesu. Ona saunia lea e Iosefa ma Nikotemo o le tino o le Faaola ma tuu i se tuugamau na ofoina atu e Iosefa.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Ioane 18–19 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: