Iunite 11: Aso 4
Luka 17
Folasaga
Na aoao atu e Iesu Ona so’o e uiga i le manaomia ona faamagalo atu i isi. Mulimuli ane, sa aioi atu le au Aposetolo ia Iesu ia faateleina lo latou faatuatua. I le tali atu i ai, na aoao atu ai i latou e le Faaola i le faataoto i le auauna le aoga. Mulimuli ane, sa faamalolo e Iesu ia lepela e 10, ae sa na o le toatasi o i latou na toe foi ane e faafetai atu ia te Ia. Na faafetaia’i le Faaola e le au Faresaio, ma sa Ia aoao atu e uiga i le oo mai o le malo o le Atua.
Luka 17:1–10
Na aioi atu le au Aposetolo ia Iesu ia faateleina lo latou faatuatua
-
Mafaufau i tulaga e ono manaomia ai oe e faatino lou faatuatua, e pei o le sailia o se faamanuiaga faaleperisitua, totogi ole sefuluai, pe tuu atu se tautalaga po o se lesona i le lotu. Tusi lau lisi i lau api talaaga mo le suesueina o tusitusiga paia. Ona tali lea o fesili nei: Pe na i ai se taimi na e manao ai ia atili tele lou faatuatua? Afai o lea, o a ni ou aafiaga na i ai pe na oulua feagai na fesoasoani e amatalia ai lena manao?
A o e suesueina le Luka 17, vaavaai mo mataupu faavae e mafai ona fesoasoani e faateleina ai lou faatuatua.
I le Luka 17:1–2 na aoao atu ai e le Faaola Ona so’o e faapea o se tasi e faaosoosoina isi ia agasala o le a faamasinoina ai.
Faitau le Luka 17:3–4, ma vaavaai mo se poloaiga na tuuina atu e le Faaola i Ona so’o e faapea e ono moomia ai le faatuatua. Mafaufau e faailoga lena poloaiga i au tusitusiga paia.
Aisea e ono faigata ai ona faamagalo se tasi ua sese soo ia te oe?
Faitau le Luka 17:5, ma vaavaai mo mea na mananao ai Aposetolo mai le Faaola ina ua uma ona Ia aoao atu i latou e uiga i le faamagalo atu.
E mafai faapefea e le sailia o le faatuatua sili atu i le Alii ona fesoasoani ia i latou e usitai i le poloaiga e faamagalo atu i isi?
E pei ona tusia i le Luka 17:6, na tali atu le Faaola i le aioiga a le au Aposetolo mo se faatuatua faateleina e ala i le molimau atu e faapea o le faatuatua e pei o se fatu itiiti o le sinapi e mafai ona fua mai ai vavega. Ina ia fesoasoani ia latou iloa le ala e faateleina ai lo latou faatuatua, na tuu atu ai e Iesu se faataoto e faamatala ai le sootaga o se matai ma se auauna.
Faitau le Luka 17:7–10, ma vaavaai mo mea sa faamoemoeina e le matai mai lana auauna. Faaaoga vaefaamatalaga e fesoasoani e te malamalama ai i nisi o upu faigata i le faataoto.
I ona po faatusi paia, e saunia ai e se matai mea uma e faaaoga i le olaga o lana auauna a o faataunuuina ma le faamaoni e le auauna ona tiute ua faamoemoeina ai. Ona o lea mea, sa le manaomia ai ona tuu atu e le matai se faafetai faapitoa i lana auauna pe lagonaina foi se nofoaitalafu ia te ia mo le faatinoina o ona tiute.
Mafaufau i auala e faapei ai le Tama Faalelagi o le matai i le faataoto lea.
E mafai ona e makaina i le Luka 17:10 le fasifuaitau “fai o mea uma ua poloaiina ai.“
-
Fuafua e maka i le Luka 17:10 le mea na fetalai atu ai Iesu e tatau i auauna ona fai atu ai pe a uma ona faia o mea e poloaiina ai i latou.
Ina ia faailoa atu o i tatou o auauna le aoga o lona uiga ua tatou iloa po o le a lava le lelei o lo tatou tausia o poloaiga, tatou te nofo aitalafu pea lava i le Atua. Ua Ia matuai faamanuiaina ma le agalelei i tatou ua le mafai ai lava ona tatou toe totogiina o Ia—tusa lava foi pe tatou te usiusitai ma ola amiotonu (tagai Mosaea 2:20–26).
-
Na aoao mai e Peresitene Heber J. Grant e uiga i le taua o le faia o o tatou tiute i le auauna atu i le Atua: “E leai se tulaga lamatia o soo se alii po o se tamaitai e maumau lona faatuatua i lenei Ekalesia pe afai e lotomaualalo o ia ma loto tatalo ma usiusitai i le tiute. Ou te lei iloaina lava se tagata faapea ua maumau lona faatuatua. O le faia o lo tatou tiute e faateleina ai le faatuatua seia oo ina avea o se malamalama atoatoa (Aoaoga a Peresitene o le Ekalesia: Heber J. Grant [2002], 28).
Mafaufau i se taimi na e tausia ai poloaiga pe faatinoina ma le usiusitai lou tiute i le Atua ma taunuu ai i le faateleina o le faatuatua.
Luka 17:11–19
Ua faamama e Iesu ia lepela
E faavae i mea ua e iloa e uiga i le lepela, faamaea le faamatalaga lea: I ona po faatusi paia, atonu o le a faigata pe a maua i le lepela ona .
O le lepela o se faama’i e mafai ona oo ai ina ese foliga ma oti ai. O lepela na tuuesea maia i tagata uma ina ia puipuia ai le soifua maloloina o isi, ma sa manaomia ai ona taufono “Le mama!“ ina ia lapataia ai soo se tasi e latalata atu ia i latou (tagai Bible Dictionary, “Lepela”).
Faitau le Luka 17:11–12, ma vaavaai po o ai na fetaiai ma Iesu a o Ia tu i se nuu i lona agai atu i Ierusalema.
Ana fai o oe o se tasi o na lepela, mata o a ni ou lagona ina ua e vaai ia Iesu?
Faitau le Luka 17: 13–14, vaavaai mo mea na fai atu ai lepela i le Faaola ma Lana tali atu ia i latou.
O le tulafono a Mose e manaomia ai e lepela ona faaali atu i latou lava i ositaulaga pe a uma ona faamamaina ina ia mafai ai ona toe faataga i nuu (tagai Levitiko 14). Fuafua e maka i au tusi paia le mea na tupu ina ua o atu lepela e faaali atu i latou lava i le ositaulaga.
Mai le Luka 17:14 e mafai ona tatou aoao ai e faapea tatou te maua faamanuiaga a le Alii pe a tatou faia mea Na te faatonuina ai i tatou e fai.
Mafaufau pe faapei—pe faapefea ona suia lou olaga—i le avea ma se tasi o lepela na faamamaina. O le a sou manatu o le a le mea semanu e te faia i le taimi lava e te iloa ai ua faamamaina oe mai le lepela?
Faitau le Luka 17:15–19, vaavaai pe na faapefea ona ese le tali atu a le toatasi o lepela nai lo isi.
O se upumoni e tasi e mafai ona tatou aoao mai i le lepela o le sa toe foi e avatu le faafetai o le e taua le faaali atu o le lotofaafetai mo faamauiaga tatou te maua.
Aisea e taua ai le faaali atu o lo tatou loto faafetai i le Atua mo faamanuiaga tatou te maua?
E faapefea ona pei i tatou i nisi taimi o lepela e toaiva?
A o e faitauina le saunoaga lea a Peresitene Thomas S. Monson, maka le mea na ia aoao mai o le a tupu pe a tatou faaali atu le loto faafetai i lo tatou Tama i le Lagi: “Ou uso e, ma tuafafine, pe tatou te manatua ea e faafetai atu mo faamanuiaga tatou te maua? O le tuuina atu o le faafetai ma le loto atoa, e le gata e fesoasoani ai ia tatou iloa o tatou faamanuiaga, ae e tatala ai faitotoa o le lagi ma fesoasoani mai ia tatou lagonaina le alofa o le Atua” (“O le Meaalofa Faalelagi o le Loto faafetai,” Ensign po o le Liahona, Nov. 2010, 87).
E mafai ona e makaina i le Luka 17:19mea na fetalai ai le Faaola na tupu i le lepela na faafetai atu.
O a ni auala e mafai ai ona fesoasoani e faaatoatoa ai i tatou ona o le avatu o le faafetai i le Alii mo o tatou faamanuiaga?
-
Luka 17:20–37
Ua aoao mai Iesu e faatatau i le oo mai o le malo o le Atua
Na aoao atu Iesu e uiga i Lona Afio Mai Faalua i le Luka17:20–37. Sa e suesueina nisi o anotusi o lenei fuaitau ina ua e suesueina le Mataio 24 ma le Iosefa Samita—Mataio.
-
Ua ou suesueina le Luka 17 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: