Sa faamasinoina le Faaola i luma o Ponotio Pilato ma Herota Anetipa. E leai se tasi o ia alii na maua se mea e ta’usalaina ai le Faaola i solitulafono na molia ai o Ia e Iutaia, ae ui o lea, na tuuina atu o Ia e Pilato ina ia faasatauroina. Sa faamagalo e Iesu ia fitafita Roma o e sa faasatauroina o Ia ma sa fetalai atu i le faamautinoaina o le ola pe a mavae le oti i se faomea o le sa faasatauroina foi. Ina ua mavae le maliu o Iesu sa tuu Lona tino i le tuugamau o Iosefa le Arimataia. I le aso lona tolu ina ua mavae le maliu o Iesu, sa faasilasila mai e agelu i le tuugamu Lona toetu i se vaega o fafine. Na faaali mulimuli ane Iesu i Ana Aposetolo ma isi, sa faaali atu ia i latou Lona tino toetu, ma poloaiina i latou e talai atu le salamo ma ia avea o ni molimau ia te Ia.
Ua faamasinoina le Faaola i luma o Pilato ma Herota ma ua faasatauroina i le va o tagata faomea
Mafaufau i se taimi na soona fai ai oe e se isi. Na faapefea ona e tali atu i lena tulaga?
A o e suesueina le Luka 23, vaavaai mo se upumoni o le a fesoasoani e te malamalama ai pe faapefea ona tatou tali atu pe a soona fai i tatou e isi.
Manatua ina ua uma ona mafatia Iesu i Ketesemane, sa puefaapagotaina o Ia e faitaulaga sili ma faasalaina o Ia i le oti. Ona latou tuu atu lea o Ia ia Ponotio Pilato, o se taitai Roma i le itu o Iutaia, ma uunaia o ia e fasiotia Iesu. Sa le mafai e Pilato ona maua se mea e sese ai Iesu. Sa ia auina atu Iesu ina ia faamasinoina e Herota Anetipa, o le sa poloaiina ia fasiotia Ioane le Papatiso ma o le foi sa pulea le itu o Kalilaia ma Perea i lalo o le pule a Roma. Sa le mafai e Herota ona maua se mea e sese ai Iesu, o lea na faatonuina ai e Pilato ia tagata o le a ia faasalaina Iesu ma tatalaina atu o Ia. Sa alalaga tagata ia Pilato e tatala atu Parapa, o se tagata fasioti tagata, ae faatauanau atu ia faasatauroina Iesu. Sa tatala e Pilato ia Parapa ma tuuina atu Iesu ia faasatauroina (tagai Luka 23:1–25).
Faitau le Luka 23:32–34 ma le Faaliliuga a Iosefa Samita, Luka 23:35 (i le Luka 23:34, vaefaamatalaga c), ma vaavaai mo mea na tatalo ai le Faaola a o faasatauroina o Ia. Atonu e te manao e faailoga Lana tatalo i au tusi paia.
Tali fesili nei i lau api talaaga mo le suesueina o tusitusiga paia:
Aisea ua matua ofoofogia ai le tatalo a le Faaola i lena taimi?
O le a le mataupu faavae e mafai ona tatou aoao mai i le faataitaiga a le Faaola i le ala e tatau ona tatou tali atu ai pe a soona fai i tatou e isi? (Tali le fesili lea i le faamaeaina o le mataupu faavae lea: E mafai ona tatou mulimuli i le faataitaiga a Iesu Keriso i le filifili e .)
O le faamagalo atu o isi e le faapea ua tatou faasaolotoina se tasi mai le tali atu mo mea sa ia faia. E le faapea foi tatou te tuu i tatou lava i tulaga e mafai ai e tagata ona soona fai pea lava i tatou. Ae, o le faamagalo atu o lona uiga o le faia ma le alofa i latou o e sa soona faia i tatou ma aua nei i ai se ita po o se le fiafia ia i latou (tagai Taiala i Tusitusiga Paia, “Faamagalo,” scriptures.lds.org).
Mafaufau pe o i ai se isi e manaomia ona e faamagaloina atu. E i ai taimi e matuai faigata ai lava ona faamagalo atu i se isi tagata. Faitau le saunoaga lea a Peresitene Gordon B. Hinckley, ma vaavaai mo mea e mafai ona e faia pe afai o e tauivi e faamagalo atu i se tasi:
Ata
Peresitene Gordon B. Hinckley
“Ou te aioi atu ia te outou ia ole atu i le Alii mo le malosi e faamagalo atu ai. … Atonu o le a le faigofie, ma atonu foi o le a le vave ona oo mai. Ae afai tou te sailia ma le loto faamaoni ma atinaeina, o le a oo mai. … O le a oo mai i lou loto se filemu semanu e le maua. O lena filemu o le filemu o Ia o le sa fetalai:
“Aua, afai tou te faamagalo atu i tagata i a latou agasala, o le a faamagaloina foi outou e lo outou Tamā faalelagi:
“’Ae afai tou te le faamagalo atu i tagata i a latou agasala o le a le faamagaloina foi e lo outou Tamā a outou agasala’(Mataio. 6:14–15)” (“E Mo Oe E Manaomia ona Faamagalo Atu,” Ensign, Nov 1991, 5).
Faauma galuega atofaina nei i lau api talaaga mo le suesueina o tusitusiga paia:
Tali le fesili lea: O le a sou manatu, e mafai faapefea ona fesoasoani ia te oe le tatalo mo le malosi, e faamagalo ai se tasi o le sa soona faia oe?
Tusi e uiga i se taimi na e (po o se tasi e te iloa) faamagalo atu ai se isi tagata. Manatua aua le faasoa maia se mea e patino tele.
Saili e mulimuli i le faataitaiga a Iesu Keriso ma faamagalo i latou o e sa soona faia oe. Tatalo mo le malosi ma le tomai e faia ai. (Manatua e tausalaina e le Alii amio faasaua i soo se ituaiga—faaletino, faalefeusuai, upu, pe faalelagona. O le faasaua po o le soona faia i soo se ituaiga, e le tusa ai ma aoaoga a Iesu Keriso. O tagata e afaina fua i le sauaina, e tatau ona mautinoa e le o tuuaia i latou ona o amioga faataumaoi a isi. E le tatau ona latou lagona le tausalaina. O tagata e afaina fua i le sauaina, e tatau ona sailia vave se fesoasoani, e masani lava e mai lo latou epikopo po o le peresitene o le paranesi.)
Ata
O Le Faasatauroga
I le Luka 23:35–38, ua tatou aoao ai faapea o taitai Iutaia ma fitafita Roma sa faatauemu i le Faaola ina o tautau o Ia i luga o le satauro. Faitau le Luka 23:39–43, ma vaavaai pe na faapefea e faomea e toalua sa tautau i itu o le Faaola ona faia o Ia. Atonu e te manao e faailoga ia upu po o fasifuaitau o loo tulaga ese ia te oe.
Faitau le faamatalaga lea, ma vaavaai po o le a le uiga ina ua ta’u atu e le Faaola i se tasi o faomea o le a faatasi ma Ia i parataiso:
“I tusitusiga paia o le upu parataiso o loo faaaoga i ni ala eseese. Muamua, e ta’u mai ai se nofoaga o le filemu ma le fiafia i le lalolagi o agaga pe a mavae le oti, ua faapolopolo mo i latou o e ua papatisoina ma sa tumau faamaoni (tagai Alema 40:12; Moronae 10:34). …
“O le faaaogaina lona lua o le upu parataiso o loo maua i le tala a Luka i le Faasatauroga o le Faaola. … Na faamalamalama e le Perofeta o Iosefa Samita e faapea … na fetalai moni lava le Alii faapea o le a faatasi le faomea ma Ia i le lalolagi o agaga“ (Faamaoni i le Faatuatua: Mau Faasino o le Talalelei [2004], 111; tagai foi Tala Faasolopito o le Ekalesia, 5:424–25).
Mai upu a le Faaola i le faomea o loo tusia i le Luka 23:43, ua tatou aoao ai e faapea o agaga o tagata uma e ulu atu i le lalolagi o agaga i le taimi o lo latou oti.
I le Mataupu Faavae ma Feagaiga 138 ina ua maliu le Faaola, sa ulu atu Lona agaga i le lalolagi o agaga. Peitai, e lei asiasi atu o Ia i e amioleaga, o e sa iai i se vaega o le lalolagi o agaga e ta’ua o le falepuipui o agaga. Faitau le Mataupu Faavae ma Feagaiga 138:29–32, ma vaavaai po o a mea na fai e Iesu i le lalolagi o agaga ma pe o le a tonu se mea na tupu i le faomea ina ua maliu o ia ma alu atu i le lalolagi o agaga. Atonu e te manao e tusi le mau fefaasinoai o le MF&F 138:29–32 i autafa o le Luka 23:43 i au tusitusiga paia.
E ui o le a folafola atu le talalelei i lenei faomea, ae e le faapea o le a otometi ai ona ia maua le faaeaga i le malo o le Atua. O le faomea (ma isi o e maliliu e aunoa ma se malamalama i le talalelei) e manomia ona latou salamo ma talia ia sauniga o le malumalu e faatino mo ia (tagai Mataupu Faavae ma Feagaiga 138:58–59).
Luka 23:44–56 o loo faamatala mai ai e na maliu le Faaola i luga o le satauro. Ona aui lea o lona tino i le ie ma faataoto ai i se tuugamau. O anomea e faatatau i le maliu o le Faaola i luga o le satauro sa aofia ai i le lesona mo le Mataio 27.
Ua faasilasila mai e agelu ua toetu Iesu Keriso, ma ua faaali atu Iesu i Ona soo
Manatu faapea o oe o se faifeautalai, ua ua oulua fetaiai ma se tasi ua fai mai, “E toatele tagata ua ou iloa e le talitonu i se olaga pe a mavae le oti. Fai mai nisi e talitonu ia Iesu Keriso ae e le talitonu na toetu o Ia ma se tino faaletino. Ua latou fai mai o loo soifua o ia ua na o se agaga. O le a se mea o e talitonu i ai e uiga i le Toetu o Iesu Keriso?“
E faapefea ona e tali atu i lenei fesili?
Faitau le Luka 24:1–4, ma vaavaai po o le a le mea na maua atu e fafine ina ua taunuu i le tuugamau lea na tuu ai le tino o Iesu.
Faitau le Luka 24:5–8, ma vaavaai mo mea na ta’u atu e agelu i fafine. Atonu e te manao e faailoga mea ua e maua.
I le Luka 24:9–10 ua tatou aoao ai e faapea na tuua e fafine le tuugamau ma ta’u atu i so’o mea na latou vaai ma faalogo i ai.
Faitau le Luka 24:11, ma vaavaai mo le tali atu a Aposetolo i upu a fafine.
Aotele pe na faapefea ona tali atu Aposetolo i upu a fafine:
Ina ua uma ona faalogo atu i le lipoti a fafine, sa tamoe Peteru i le tuugamau ma maua ai ie lino, ae ua leai se tino o Iesu (tagai Luka 24:12).
I le Luka 24:13–32 ua tatou aoao ai e faapea na faaali atu le Faaola toetu i so’o e toalua i le ala i Emau. E lei iloa e so’o e toalua ia Iesu a o latou savavali ma Ia ma aoao atu i la’ua e faaaoga ai ia tusitusiga paia aua “ua punitia o laua mata“ (Luka 24:16). E lei manao le Faaola la te iloa vave o Ia.
Faitau le Luka 24:32, ma vaavaai pe na aafia faapefea ia so’o e toalua i aoaoga a le Faaola mai tusitusiga paia. Mafaufau e faailoga mea ua e mauaina.
Sa vave ona foi so’o e toalua i Ierusalema ma faamatala atu (tagai Luka 24:33–35). A o latou talanoa, sa faaali atu le Faaola.
Faitau le Luka 24:36–39, ma vaavaai mo faamaoniga faapea na toetu moni lava Iesu ma e i ai sona tino o aano ma ivi. (Luka 24:36–39 o se fuaitau o mau tauloto. Atonu e te manao e faailoga i se auala e iloagofie ai ina ia mafai ona e mauaina gofie.)
Ata
O Iesu o loo Faaali Atu Ona Manua
O le a sou manatu o le a sou lagona pe ana e i ai ina ua faaali atu le Keriso toetu i Ona so’o?
Faitau le Luka 24:40–43, ma vaavaai po o a isi mea na faia e Iesu na faaalia ai e i ai Lona tino mao’i (po o le faaletino) toetu.
Mai nei fuaiupu ua tatou aoao ai e faapea o Iesu Keriso o se tamalii toetu e i ai se tino o aano ma ivi. O tino toetu uma e i ai aano ma ponaivi mamalu.
A o e faitauina le faamatalaga lea, vase pe aisea e taua ai le malamalama ma talitonu i lenei aoaoga faavae:
“E ala i le Togiola a Iesu Keriso, o le a toetutu ai tagata uma—e laveaiina mai le oti faaletino (tagai 1 Korinito 15:22). O le toetu o le toetuufaatasia lea o le agaga ma le tino i se tulaga atoatoa, e ola pea, e le toe oo i ai faama’i po o le oti (tagai Alema 11:42–45). …
“O se malamalama ma le molimau i le toetu e mafai ona e maua ai le faamoemoe ma le vaaiga a o e feagai ma luitau, tofotofoga, ma olioliga o le olaga. E mafai ona e maua le mafanafana i le mautinoa o loo soifua le Faaola ma e ala i Lana Togiola, ’ua ia motusia ai noataga o le oti, o le a le manumalo le tuugamau, ma o le a tofatumoanaina le tiga o le oti i le faamoemoe o le mamalu’ (Alema 22:14)” (Faamaoni i le Faatuatua, 139–40).
Ua aoao mai e le ata o le faaolataga o le Pau o Atamu ma Eva ua aumaia ai le oti faaletino ma le faaleagaga. Semanu e le mafai ona tatou toe foi atu ma nonofo faatasi ma le Tama Faalelagi vagana ua i ai se Togiola e saunia e faatoilalo ai le agasala ma le oti. O le Togiola ma le Toetu o Iesu Keriso ua mafai ai ona tatou faatoilaloina aafiaga o le Pau.
I lau api talaaga mo le suesueina o tusitusiga paia, faamatala mai pe aisea e taua ai le malamalama ma talitonu i le aoaoga faavae o le Toetu o Iesu ma pe aisea e taua ai ia te oe.
Toe faitau le tulaga lea e avea ai oe o se faifeautalai ma sa e fetaiai ma se tasi na fesili atu ia te oe e uiga i le Toetu o Keriso. O le faaaogaina o mea ua tatou aoaoina mai le Luka 24:36–39, tusi se tali i le fesili a le tagata lea i lau api talaaga mo le suesueina o tusitusiga paia.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Luka 23–24 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: