Iunite 9: Aso 2
Luka 1
Folasaga
Na faaali atu le agelu o Kaperielu ia Sakaria ma ta’u atu i ai o Sakaria ma lana ava, o Elisapeta, o le a maua se atalii, o le o le a la faaigoaina ia Ioane. Ono masina mulimuli ane, na toe faaali atu ai foi le agelu lava lea ia Maria e ta’u atu i ai o le a avea o ia ma tina o le Alo o le Atua. Sa asiasi atu Maria ia Elisapeta, ma sa la olioli ai i le afio mai o le Faaola. Tolu masina mulimuli ane, na fanaua ai e Elisapeta ia Ioane, o le o le a lauiloa o Ioane le Papatiso.
Luka 1:1–4
Ua faamatala e Luka ia mafuaaga o le tusia o lana Evagelia
Pe mafai ona e iloa mea o loo faaali mai i ata taitasi? I lalo o ata taitasi, tusi ai se faamatalaga i le mea na tupu.
Keriso i le Malumalu, saunia e Heinrich Hofmann, faaaloaloga a le C. Harrison Conroy Co., Inc.
O nei mea ua faatusa i ni mea sa tutupu ma aoaoga i le galuega a le Faaola i le olaga nei, lea na tusia e Luka ae e le o le Evagelia a Mataio, Mareko, ma Ioane.
Na amata e Luka lana Evagelia i le talanoa atu i se tagata e igoa ia Teofilo (tagai Luka 1:3) ma sa faamatala mai ai ana mafuaaga na tusia ai. Teofilo o lona uiga o le “uo a le Atua” (Bible Dictionary, “Theophilus”).
Faitau le Luka 1:1–4, ma vaavaai mo mafuaaga na tusia ai e Luka lenei Evagelia.
E fua i le Luka 1:4, o le a se mea e mafai ona fai mo oe e le suesueina o le Evagelia a Luka?
A o e suesueina le Evagelia a Luka, e mafai ona e “silafia le faamaoni“ (Luka 1:4) o upumoni sa aoaoina ai oe e uiga ia Iesu Keriso.
Luka 1:5–25
Ua ta’u atu e le agelu o Kaperielu le fanau mai o Ioane ia Sakaria, ma ua to Elisapeta
O le a le umi e te manatu e mafai ona e taofia ai lau manava? Seti se mea fuataimi e faitau ai le 10 i le 30 sekone, ma amata pe a amata ona e taofiina lau manava, pe e mafai foi ona e tilotilo i le vae sekone o se uati. Afai e mafai, taofi lau manava seia ii mai le fuataimi pe uma ai foi le taimi lea na manaomia.
O le a se mea na e mafaufau i ai i nai sekone ua mavae a o lei ii mai le fuataimi ma ua maea le taimi? E tutusa faapefea le taofia o lau manava ma le naunau na lagonaina a o faatalitali i le faataunuuina o afioga a le Atua?
Mafaufau loloto i se faamanuiaga po o se tali mai le Atua o loo e faatalitali pe faamoemoe i ai. A o e suesueina le Luka 1, vaavaai mo upumoni e mafai ona fesoasoani ia te oe pe a o e faatalitali mo le faataunuuina o afioga a le Atua i lou olaga.
Faitau le Luka 1:5–7, ma vaavaai mo faamanuiaga na faatalitali i ai Sakaria ma Elisapeta i le tele o la la’ua olaga.
O a ni mea ua tatou iloa e uiga i a Sakaria ma Elisapeta i nei fuaiupu?
O Sakaria ma Elisapeta e tupuga mai uma ia Arona, ia na filifilia mai ai ositaulaga ma faitaulaga sili uma o Isaraelu. O lona uiga o Ioane o se suli tuofe o le Perisitua Arona ma lana taitaiga. Na saunoa le Perofeta o Iosefa Samita, “O Sakaria o se ositaulaga a le Atua, ma e taitai i le Malumalu, o Ioane o se ositaulaga e mulimuli i lona tama, ma o loo umia ki o le Perisitua Arona“ (i le Talafaasolopito o le Ekalesia, 5:257).
Luka 1:8–10 o loo tusia ai o Sakaria na tofia e faamumuina mea manogi i le malumalu o Ierusalema. O se faamamaluga lea e na o le faatasi ona oo mai i le olaga o se ositaulaga.
Faitau le Luka 1:11–13, ma vaavaai mo le mea na tupu a o i ai Sakaria i le malumalu.
Matau i le fuaiupu 13 na fai mai ai le agelu, “Ua faafofogaina lau tatalo.“ E foliga mai e tele ni tausaga sa tatalo ai Sakaria ma Elisapeta ina ia maua se la tama. Atonu e te manao e faailoga le fasifuaitau lenei i au tusitusiga paia.
Mata o a ni lagona o Sakaria ina ua ia faalogo faapea o le a maua so la atalii ma Elisapeta e uiga lava ina “ua matutua uma lava i la’ua“ (Luka 1:7)?
Luka 1:14–17 o loo tusia ai na ta’u atu e le agelu o Kaperielu ia Sakaria o le a maua e i la’ua “le fiafia ma le olioli“ (Luka 1:14) ma o le a saunia e lo la atalii tagata e toatele mo le Alii.
Faitau le Luka 1:18–20, ma vaavaai pe na faapefea ona tali atu Sakaria i le savali a Kaperielu. Na aoao mai e le Perofeta o Iosefa Samita e faapea o Kaperielu o Noa ma “o loo tu e pito ia Atamu i le pule o le perisitua“ (Aoaoga a Peresitene o le Ekalesia: Iosefa Samita [2007], 104).
Matau po o le a le mea na tupu ia Sakaria ona sa le talitonu i upu a le agelu. Mafaufau e maka i le fuaiupu-,20 mea na ta’u atu e le agelu e uiga i upu—le savali—na ia ta’u atu ia Sakaria.
O se upumoni e tasi ua tatou aoao mai le agelu o Kaperielu o le o afioga a le Alii e fetalai mai ai e ala mai i Ana auauna o le a faataunuuina i lo latou taimi. “I lo latou taimi“ o lona uiga e tusa ai ma le taimi a le Alii.
-
Tali fesili nei i lau api talaaga mo le suesueina o tusitusiga paia:
-
E mafai faapefea e le iloaina o le a faataunuu ia afioga a le Alii i Lana taimi ona aafia ai le ala tatou te tali atu ai i folafolaga a le Alii?
-
E mafai faapefea e lenei upumoni ona fesoasoani i se tasi o loo moomoo i se folafolaga paia ia faataunuuina?
-
I le Luka 1:21–24 ua tatou aoao ai faapea ina ua tuua e Sakaria le malumalu, sa le mafai ona tautala o ia. Mulimuli ane sa to Elisapeta, e pei ona sa folafola mai e le agelu.
Faitau upu a Elisapeta i le Luka 1:25, ma mafaufau pe o a ni lagona o Elisapeta a o sauniuni mo le mauaina o se tama. O lana tala ua faapea ona faia e le Alii “ua aveeese [lona] luma i tagata“ e faatatau i le maasiasi sa feagai ma ia ona o se fafine e le fanau. I le taimi lea i le aganuu a ia tagata, e maualuga tele le fanauina o se tamaitiiti, ma o le le mafai ona fanauinao se tamaitiiti e aumaia ai le le faaaloalogia ma se lagona o le maasiasi.
Luka 1:26–38
Ua faasilasila mai e le agelu o Kaperielu le fanau mai o Iesu ia Maria
I le Luka 1:26–27 ua tatou aoao ai e faapea i le ono o masina o le ma’ito o Elisapeta, sa auina atu ai le agelu o Kaperielu ia Maria, o se taupou i Nasareta.
Faitau le Luka 1:28–33, ma vaavaai mo fasifuaitau atonu na fesoasoani ia Maria e malamalama ai i le taua o le matafaioi na tuuina atu e le Atua ia te ia. Mafaufau e faailoga mea e te mauaina. Iesu o “le upu Eleni o le igoa o Iosua po o Jeshua, ‘O le Atua o le fesoasoani’ po o le ‘faaola’” (Bible Dictionary, “Jesus”).
Manatua o le faalaniga “Alo o le Silisiliese“ (Luka 1:32) e faasino i le aoaoga faavae faapea o Iesu Keriso o le Alo o le Atua le Tama.
Faitau le Luka 1:34, ma vaavaai mo le fesili a Maria. O lana faamatalaga “Ou te leiloa se tane,“ o lona uiga o ia o se taupou.
Faitau le Luka 1:35–37, ma vaavaai mo le tali a le agelu i le fesili a Maria.
Tatou te le iloa, i talaatu o tala o i tusi paia, pe na faapefea ona tupu le vavega o le faaautagataina o Iesu; ua na ona ta’u mai lava ia i tatou o se mea faavavega ma o le tama o le a fanau mai o le Alo o le Atua.
Matau i le Luka 1:37 o le upumoni na ta’ua e le agelu lea e fesoasoani e faamatala ai lenei mea ofoofogia. (Atonu e te manao e faailoga lenei vaega i au tusitusiga paia.)
Mafaufau loloto i ni nai tulaga e ono faigata ai pe le mafai ai foi ona usitaia ni poloaiga patino. Lisi mai ni faataitaiga se fa i le avanoa ua tuuina atu:
-
Faitau le Luka 1:38, ma vaavaai pe na faapefea ona tali atu Maria i le agelu.
O le a se faamaoniga o e vaaia i lenei fuaiupu faapea na talitonu Maria i upu a le agelu?
Mafaufau pe na ese faapefea le taliaina e Maria o upu a le agelu ma le tali a Sakaria i le faasilasilaga a le agelu i le malumalu. Mafaufau pe mafai faapefea ona e mulimuli i faataitaiga a Maria ma Elisapeta e ala i le talitonu i lou lava olaga, e leai se mea e poloai mai ai le Alii ia te oe o le a le mafai ona o Lana fesoasoani mai.
Luka 1:39–56
Ua asiasi atu Maria ia Elisapeta, ma ua la molimau atu i le Faaola
Ua faataunuu e Elisapeta ma Maria ni matafaioi taua sa fesoasoani e suia ai le lalolagi. Faitau le Luka 1:41–45, ma vaavaai mo le molimau a Elisapeta a o “faatumuina o ia i le Agaga Paia“ (Luka 1:41).
Ona o le molimau a Elisapeta na maua mai i le Agaga Paia, o le a se mea ua uma ona ia malamalama ai e uiga ia Maria?
Faitau le Luka 1:46–49, ma vaavaai pe na faapefea ona vivii atu Maria i le Alii.
Matau i le fuaiupu 49 na fai mai Maria ua faia e le Alii o “mea silisili“ mo ia. Toe faitau le Luka 1:34, 38, 45–46, ma vaavaai mo mea na faia e Maria na mafai ai e le Alii ona faia o “mea silisili“ mo ia.
E faapei foi o Sakaria, Elisapeta, ma Maria ona tofu ma a latou lava matafaioi e faia i le fuafuaga paia, o tatou foi ua i ai ni matafaioi taua ua tuuina mai e le Alii. Ua tatou aoao mai lenei tala e faapeaafai tatou te taumafai ma le faamaoni e faataunuu ia matafaioi ua aumaia e le Alii mo i tatou, e mafai e Ia ona faia o mea silisili i o tatou olaga.
-
Na molimau mai Peresitene Ezra Taft Benson i faamanuiaga o le liliu atu o o tatou olaga i le Atua ma taumafai faamaoni e mulimuli i Lona finagalo: “O alii ma tamaitai o e ua faaliliu atu o latou ola i le Atua o le a latou iloa ai e mafai ona ia faia le anoanoai o mea aoga i o latou olaga nai lo le mea latou te mafaia. O le a Ia faalolotoina lo latou olioli, faalautele la latou vaaiga, faamataala o latou mafaufau, faamalolosia o latou musele, sii a’e o latou agaga, faatele o latou faamanuiaga, faateleina o latou avanoa, faamafanafana o latou agaga, faatulai uo, ma liligi mai le filemu. Po o ai lava e maumau lona ola i le galuega a le Atua ole a maua le ola e faavavau“ (“Iesu Keriso—Meaalofa ma Faamoemoega,” Ensign, Dec. 1988, 4).
Luka 1:57–80
Ua fanau mai Ioane le Papatiso
Luka 1:57–80 o loo faamatala mai ai ina ua uma ona fanauina e Elisapeta lana tama, sa faamautu e Sakaria i le tusiaina faapea o le tama e tatau ona faaigoa ia Ioane. O le igoa Ioane o lona uiga o “Ieova o le alofa tunoa.“ I le taimi lena, sa faafuasei ai ona mafai ona toe tautala o ia, ma sa ia vavalo atu e uiga i misiona a Iesu Keriso ma Ioane. Ao tatou faataunuuina ma le faamaoni a tatou matafaioi na tuuina mai i le lagi e pei ona sa faia ai e Sakaria, Elisapeta, ma Maria, e mafai foi e le Alii ona faia o mea silisili mo i tatou ma e ala mai ia i tatou. Mafaufau pe mafai faapefea ona e faataunuuina au lava matafaioi i le fuafuaga a le Alii.
-
Ua ou suesueina le Luka 1 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: