Luka 2

Folasaga

Na malaga Iosefa ma Maria i Peteleema, ma sa fanau mai ai Iesu iina. Sa usitai leoleo mamoe i le faatonuga a le agelu e o e sue Iesu faatoa fanau mai, ona latou tautau atu lea o le soifua mai o Iesu i isi. Sa faamanuia e Simeona ia Iesu i le malumalu, ma sa faasoa atu ai e Ana lana molimau faapea ua fanau mai le Faaola. “Ua tupu le poto ma le tino o Iesu, ua alofagia o Ia e le Atua atoa ma tagata” (Luka 2:52).

Luka 2:1–20

Fanau Iesu i Peteleema

O le a se mautu o lou malamalama i mea na tutupu e tusa ai ma le soifua mai o le Faaola? Suesue oe lava e ala i le faamaeaina o le suega puupuu lea. Tusi pe moni (M) pe sese (S) ia faamatalaga taitasi.

____ 1. Na o Maria ma Iosefa i Peteleema e totogi ia lafoga.
____ 2. Na malaga ia Maria ma Iosefa i le 27 maila (44 kilomita) mai Nasareta i Peteleema.
____ 3. O le tamameamea o Iesu sa faataoto i se moega vaovao ona sa tumu le fale e tali ai malo.
____ 4. Na mulimuli ia leoleo mamoe i se fetu i le moega vaovao lea sa taoto ai Iesu.
____ 5. E ese mai ia Maria ma Iosefa, o tagata muamua o i faamaumauga na vaai ia Iesu o leoleo mamoe.
____ 6. Na ta’u atu e le agelu i leoleo mamoe e aua nei ta’u atua i se tasi le mea sa latou vaai i ai.

A o e suesueina le Luka 2, vaavaai mo tali i fesili nei ia iloa ai pe na sa’o ona e taliina.

Faitau le Luka 2:1–5, ma vaavaai pe aisea na malaga ai Iosefa ma Maria i Peteleema.

Matau o le Luka 2:1, vaefaamatalaga e o loo faamanino mai ai e faapea na manao Kaisara e lesitala, pe faitau le aofai o tagata. Na faia lea mea mo faamoemoega tau lafoga.

Sue i Faafanua o le Tusi Paia, nu 11, “O Le Nuu Paia i Ona Po o le Feagaiga Fou,” e maua i le faaopoopoga o le Tusi Paia. Sue ia aai o Nasareta ma Peteleema i le faafanua.

Manatua o “Peteleema [e] tusa o le 85–90 maila (137–145 kilomita) i saute o Nasareta, o se ala sopo e le itiiti ifo ma le fa i le lima aso e savavali ai, atonu e umi atu pe a fua i le tulaga na i ai Maria” (Tusi lesona a le Tagata Aoga o le Feagaiga Fou [Church Educational System manual, 2014], 143).

Mafaufau pe o le a sou manatu i tulaga e aupito sili ona talafeagai mo le soifua mai o le Foafoa ma le Faaola o le lalolagi. Faitau le Luka 2:6–7, ma vaavaai mo tulaga o le soifua mai o Iesu.

Faitau le Luka 2:8–14, ma vaavaai pe na faapefea ona fofogaina mai le soifua mai o le Faaola.

Matau o le Luka 2:10 o loo faamatala mai ai lagona e mafai ona tatou maua ona ua soifua mai le Faaola. Fuafua e tusi le upumoni lea i au tusi paia: Talu ai ua soifua mai le Faaola i le lalolagi, ua mafai ai ona tatou maua le olioli tele.

A o faaauau pea ona e suesue i le Luka 2, vaavaai mo faataitaiga pe na faapefea ona aumaia le olioli i isi ona o le malamalama i le soifua mai o le Faaola.

Faitau le Luka 2:15–20, maka upu po o fasifuaitau e ta’u mai ai pe na faapefea ona tali atu leoleo mamoe i faatonuga a agelu.

Matau na vave ona tali atu leoleo mamoe i le savali a le agelu. O le a le mea na maua ai e leoleo mamoe se molimau, po o se tautinoga, o se taunuuga o le tali atu i lea savali?

Toe iloilo le Luka 2:17–20, ma vaavaai pe o le a le mea na faia e leoleo mamoe ina ua uma ona latou mauaina la latou molimau ia Iesu Keriso. O le a sou manatu aisea na faasoa atu ai e leoleo mamoe i isi le mea sa latou iloa ma faalogo i ai?

Faauma galuega atofaina nei i lau api talaaga mo le suesueina o tusitusiga paia:
1. E faavae i luga o mea ua e aoaoina mai faatinoga a leoleo mamoe, faamaea le mataupu faavae lea: A oo ina tatou maua la tatou molimau ia Iesu Keriso, ona tatou mananao lea e .
2. Mafaufau i se taimi na e lagonaina ai se manao e faasoa atu lau molimau ia Iesu Keriso ma Lana talalelei i isi. Tusi e uiga i le mafuaaga na e maua ai lena manao.

Luka 2:21–39

Ua tautino atu e Simeona ma Ana o Iesu o le Faaola o le lalolagi

I le Luka 2:21–24 tatou te faitau ai e faapea o le valu o aso talu ona fanau mai Iesu, sa tuuina atu ai e Maria ma Iosefa o Ia i le malumalu e tusa ai ma le tulafono faa-Iutaia (tagai Esoto 13:2). E toalua tagata sa i ai i le malumalu i lena aso na iloaina le tamameamea o Iesu o le Mesia.

Faitau le tala ia Simeona i le Luka 2:25–32. (Manatua o le fasifuaitau “sa faatalitali atu o ia i le faamafanafanaina o Isaraelu“ i le Luka 2:25 e faasino i le faatalitali atu mo le Mesia e afio mai.) Ona faitau lea o le tala ia Ana i le Luka 2:36–38. I tala uma ia e lua, vaavaai pe na faapefea e le malamalama i le soifua mai o le Faaola ona aumaia le olioli ia i la’ua nei.

Na faapefea la ona molimau atu Simeona ma Ana ia Iesu Keriso?

Ua tatou faitau i le Luka 2:34–35 e faapea na faamanuia foi e Simeona ia Maria ma Iosefa. O le Faaliliuga a Iosefa Samita ua faamanino ai le valoaga a Simeona ia Maria: “Ioe, e tu’ia i le pelu e ala mai ia te ia ia manu’a ai foi lou lava loto; ina ia faaalia mai ai mafaufauga o loto e toatele“ (Faaliliuga a Iosefa Samita, Luka 2:35).

I lau api talaaga mo le suesueina o tusitusiga paia, faamatala ai pe na faapefea ona e maua le olioli ona o le iloa o le soifua mai o le Faaola. Fuafua e faasoa atu lena molimau i se uo po o le taimi o le afiafi faaleaiga.

E tusa ai ma le Luka 2:39, ina ua uma ona tuuina atu Iesu i le malumalu, sa toe foi atu Maria ma Iosefa ma Iesu i lo latou aiga i Nasareta.

Luka 2:40–52

Na tuputupu ae Iesu “i le poto ma le tino ma ua alofagia e le Atua atoa ma tagata“

Tusi se mea e te manao e faaleleia atili e uiga ia te oe lava:

E mafai faapefea e le iloaina o le ituaiga o tagata sa i ai Iesu a pei o Ia o lou matua, ona fesoasoani ia te oe e avea ai ma tagata e te fia manao e avea ai?

E na o ni nai faamatalaga patino o i ai i tusitusiga paia e uiga i le talavou o Iesu, ae e mafai ona avea na faamatalaga o se faamanuiaga tele ma e taialaina ai i tatou a o tatou saili e faaleleia atili i tatou lava. Faitau le Luka 2:40, vaavaai pe na faapefea ona faamatala e Luka le soifuaga amata o Iesu. Matau o le tupuo lona uiga ua tupu ae pe ua faateleina.

O le isi, faitau le Luka 2:41–49, ma vaavaai pe o le a le mea na faia e Iesu ina ua 12 Ona tausaga.

Aisea na nofo ai Iesu i le malumalu? (Faitau le Luka 2:46, vaefaamatalaga i, ma vaavaai pe na faapefea ona faamanino mai e le Faaliliuga a Iosefa Samita le mea na fai e Iesu i le malumalu.)

le talavou o Iesu o loo aoao atu i le malumalu

Afai o maua, atonu e te manao e matamata le “Ua Aoao Atu Iesu Talavou i le Malumalu” (2:30) mai le Vitio o le Tusi Paia i le Soifuaga o Iesu Keriso, e maua i le LDS.org, e aai ai i se faaaliga o le mea na tupu ina ua maua e Iosefa ma Maria ia Iesu i le malumalu. Afai e le o maua le vitio, faitau le Luka 2:48–50, ma vaavaai po o le a le mea na ta’u atu e Iesu ia Maria ma Iosefa ina ua la mauaina o Ia.

2:25

O le a se mea o faaali mai i lenei tala e uiga i le malamalama o Iesu i Lona faasinomaga paia a o taulealea?

Sa faaalia mai e le Perofeta o Iosefa Samita le mea lea e uiga ia Iesu Keriso o se talavou: ’A o tamaitiiti lava sa ia te Ia le malamalama uma e tatau ai e mafai ai e Ia ona pulea ma faatautaia le malo o Isaraelu, ma sa mafai ona feutagai ma fomai aupito popoto ma maoae o le tulafono ma mataupu silisili, ma faia a latou teori ma faiga e foliga mai e valea pe a faatusatusa i le poto na ia te Ia; ae sa na o Ia o se tamaitiiti, sa le lava le malosi faaletino e oo lava i le puipuiga o Lona lava tagata, ma sa oo ia te ia le maalili, fia ’ai, ma le oti (i le Talafaasolopito o le Ekalesia, 6:608).

Faitau le Luka 2:51–52, ma vaavaai mo auala sa tuputupu ae ai Iesu (tagai foi Faaliliuga a Iosefa Samita, Mataio 3:24–26 [i le faaopoopoga i le Tusi Paia]).

Luka 2:52 o loo aoao mai ai i tatou e faapea “ua tupu le poto“ o Iesu. I le fuaiupu lena, ua tatou aoao ai foi i isi auala na tuputupu ae ai o Ia. Ia faateleina i le “tino“ o lona uiga ua tuputupu ae faaletino. O le fasifuaitau “ua alofagia e le Atua“ e faasino i le soifua manuia faaleagaga, ma le fasifuaitau “alofagia e … tagata“ e faasino i fesootaiga faaagafesootai. O lea, e fua i lo tatou suesueina o lenei fuaiupu e mafai ona tatou aoaoina le mataupu faavae lenei: E mafai ona tatou mulimuli i le faataitaiga a Iesu e ala i le mauaina o le poto ma le tuputupu ae faaletino, faaleagaga, ma faaagafesootai.

Manatunatu loloto i fesili nei:

Aisea e taua ai mo i tatou le atinae i vaega taitasi o nei eria e fa?
Pe ua faamanuiaina ea oe a o e taumafai e mulimuli i le faataitaiga a Iesu e atiinae o Ia lava i vaega nei?

Kopi le siata lenei i lau api talaaga mo le suesueina o tusitusiga paia. Ona tusi lea i lalo o vaega taitasi se sini mo lou lava atiinaega patino ma se fuafuaga pe faapefea ona e faatinoina lena sini i vaiaso a sau.

E mafai ona ou mulimuli i le faataitaiga a Iesu e ala i le faateleina …
Vaega:	Faaleatamai	Faaletino	Faaleagaga	Faaagafesootai
O la’u sini ma le fuafuaga e faamaea ai la’u sini:

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Luka-,2 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: