Mataio 5

Folasaga

}Mataio 5–7 o loo tusia ai se lauga a le Faaola na tuuina atu i le amataga o Lana galuega. Ua lauiloa o le Lauga i luga o le Mauga. O lenei lesona ua aofia ai le Mataio 5, lea o loo i ai mataupu faavae na aoao mai e le Faaola ia e tau atu i le fiafia. Na Ia poloaiina foi Ona soo e faia se faataitaiga amiotonu ma aoao atu le tulafono maualuga.

Mataio 5:1–12

Sa amata e Iesu Keriso Lana Lauga i luga o le Mauga e ala i le aoao atu o le Faaamuia.

Faamata e faapefea ona e tali atu i fesili nei: Pe o e fiafia? Aisea e ioe pe leai ai?

Matau le saunoaga a Peresitene Dieter F. Uchtdorf o le Au Peresitene Sili e uiga i le fiafia:

“E tele lava taimi tatou te maua ai ni lagona sese e faapea o loo i ai se mea e i tala atu o lo tatou gafatia lea o le a aumai ai ia i tatou le fiafia: o se tulaga faaleaiga lelei atu, se tulaga tau tupe lelei atu, po o le iuga o se tofotofoga faigata.

“… O tulaga i fafo atu e le afaina tele pe fuafuaina ai lo tatou fiafia.

“O i tatou e taua. O i tatou e fuafuaina lo tatou fiafia” (“Of Regrets and Resolutions,” Ensign po o le Liahona, Nov. 2012, 23).

A o e suesueina le Mataio 5, vaavaai mo mataupu faavae ia e mafai ona fesoasoani e te malamalama ai i le mea o le a aumaia ai le fiafia moni.

Faitau faavave le Mataio 5:3–11, ma vaavaai mo upu o loo ta’u faafia mai i le amataga o fuaiupu taitasi. (Atonu e te manao e maka le faauigaga mo le upu amuia o loo maua i le Mataio 5:3, vaefaamatalaga a.)

Talu ai o le upu amuia e faaliliu mai le upu Latina o le beatus,o lona uiga o le manuia po o le fiafia, o lea ua ta’u masani ai lava nei fuaiupu o Faaamuia.

I Lana asiasiga ia sa Nifae, sa tuu atu ai e Iesu Keriso se lauga e talitutusa ma le Lauga i luga o le mauga o loo maua i le Mataio 5 E avea o se faatomuaga i Lana lauga ia sa Nifae, sa faamatala atu ai e le Faaola o le ala e o mai ai ia te Ia e ala lea i le papatisoga ma le mauaina o le Agaga Paia (tagai 3 Nifae 12:1–2). O Faaamuia o loo maua i le Mataio 5:1–12 ma le 3 Nifae 12:1–12 ua aumaia ai se ala mo i tatou e iloa ai pe faapefea ona o mai ia te Ia.

Faitau le 3 Nifae 12:3–6, ma vaavaai pe faapefea i le savali a le Alii i na fuaiupu ona maua mai ai se malamalama sili atu i fuaitau o mau i le Mataio 5:3–6.

Filifili se tasi o Faaamuia i leMataio 5:3–12. I lau api talaaga mo le suesueina o tusitusiga paia, tusi ai se lauga puupuu e uiga i lena faaamuia. (Atonu e te manao e faaaofia ai ia malamalamaaga mai le 3 Nifae 12.) Faaaofia ai le faamatalaga lea e fai ma se vaaega o lau lauga:
1. Faailoa mai le faamanuiaga ua folafola mai mo i tatou mo le ola ai i lena faaamuia.
2. Fautuaina ni ala patino e mafai ona tatou ola ai e tusa ma lenei faaamuia.
3. Faamatala o le ala e ola e tusa ai ma lenei faaamuia e mafai ona tatou maua ai le fiafia. Atonu foi e te manao e faasoa atu se aafiaga e faapupula ai le ala na aumaia ai ia te oe e lena faaamuia le fiafia.

Atonu na e matauina o loo aoao mai e Faaamuia taitasi ia uiga faaleatua o Iesu Keriso. O le ola ai i na aoaoga e mafai ai ona tatou avea atili ai e faapei o Ia. Mai le Mataio 5 ua tatou aoao ai faapea a o tatou atinae uiga faaleatua e pei o Keriso, o le a tatou maua le fiafia faateleina.

Filifili se uiga faaleatua mai se tasi o Faaamuia, ma fai se sini o le a fesoasoani ia te oe e atinae ai lena uiga faaleatua.

Mataio 5:13–16

Ua faatonuina e Iesu Keriso Ona soo e faia se faataitaiga amiotonu

Mafaufau i se tasi e te iloa, e pei o se tagata o le aiga po o se uo, e mafai ona faamanuiaina i le faalatalata atili atu i le Tama Faalelagi. A o e suesueina pea le Mataio 5, vaavaai mo mataupu faavae e mafai ona taialaina ai oe a o e taumafai e fesoasoani i lea tagata.

Lisi mai aoga uma e mafai ona e mafaufau i ai o le masima:

Faaopoopo i lau lisi pe a uma ona faitau le saunoaga a Elder Carlos E. Asay o le Fitugafulu e uiga i le masima:

“E taua le [masima] i le soifua maloloina; e tatau ona i ai le masima i sela o le tino ina ia ola ma galue ai. E i ai elemene tineima’i, pe faaumatia ai siama. O se mua’ipuipuiga. O se ’auga i le tele o meaai ma meagaosi. Ma ua fuafuaina e sili atu ma le sefulufa afe aoga o le masima. …

“… O le [masima] e i ai le tofolelei, … e mama, e atoatoa, e le mafaaleagaina, ma e aoga tele. I lea tulaga, o le masima e faasaoina ai, faamanogi ai, e faamalolo ai, ma faia isi galuega aoga” (“Masima o le Lalolagi: Tofolelei o Tagata ma Faaola o Tagata ,” Ensign, Me 1980, 42).

Faitau le Mataio 5:13, ma vaavaai po o ai na faatusa e le Faaola i le masima.

Mafaufau pe mafai faapefea e soo o Iesu Keriso ona faatino ia lava uiga o le masima lelei.

E tusa ai ma le fuaiupu 13, o le a le mea e tupu pe a magalo le masima?

O le upu magalo e faasino e le gata i le tofolelei o le masima ae o ona uiga taua auau mama lea e avea ai o se faamalologa ma se muaipuipuiga.

O le a sou manatu o le a se mea e mafua ai ona magalo le masima?

E magalo le masima pe a faafefiloi ma isi elemene (e pei o se palapala) ma faaleagaina ai.

Afai o le masima e faatusa iai soo o Iesu Keriso, o le a se mea e mafai ona faatusa i ai le palapala ma isi mea e faaleagaina ai?

Mai aoaoga a le Faaola, ua tatou aoao ai o le o le faaleagaina e agasala a le lalolagi e mafai ona taofia ai i tatou mai le avea o se faamanuiaga i isi. Atonu e te manao e tusi lenei mataupu faavae i autafa o le Mataio 5:13.

Na tuuina mai foi e Elder Asay se fautuaga e fesoasoani ia i tatou i le faaleagaina e agasala a le lalolagi: “O le a ou tuuina atu nei taiala faigofie … o ni auala e tausisia ai le tofolelei o se tagata: Afai e le mama, aua le mafaufau i ai; afai e le moni, aua le tautala ai; afai e le lelei, aua le faia” (“Masima o le Lalolagi,” 42–43).

Mafaufau po o le a le mea e mafai ona e faia e aloese ai mai le faaleagaina e agasala a le lalolagi. Manatua o le faatuatua ia Iesu Keriso ma le salamo, e mafai ai ona faamamaina oe mai soo se agasala atonu na e faia.

Faitau le Mataio 5:14–16, ma matau le ala na faatusatusa ai e le Faaola Ona soo i se lamepa. (Mataio 5:14–16 o se fuaitau o mau tauloto. Atonu e te manao e faailoga i se auala e iloagofie ai ina ia fesoasoani i lou sueina i le lumanai.)

Mau Tauloto—Mataio 5:14–16

I lau api talaaga mo le suesueina o tusitusiga paia, tusi ai se lamepa faigofie ma tali i fesili nei:
1. O le a le uiga o le faasusulu atu lou malamalama?
2. Aisea e te manatu ai e taua le mulimuli i poloaiga a le Alii i le Mataio 5:14–16 e faia se faataitaiga amiotonu?

E tusa ai ma nei fuaiupu, ua tatou aoao ai o a tatou faataitaiga amiotonu e mafai ona fesoasoani e faamalolosia ai isi e faalatalata atili i le Tama Faalelagi. Mafaufau e tusi le mataupu faavae lenei i totonu o au tusitusiga paia.

Tali le fesili lenei, i lau api talaaga mo le suesueina o tusitusiga paia: O anafea na faatu ai e se tasi se faataitaiga amiotonu na fesoasoani e te latalata atili atu ai i le Tama Faalelagi?

Mafaufau po o le a le mea e mafai ona e fai e avea ai o se faataitaiga sili atu i lou aiga ma uo.

Mataio 5:17–48

Ua aoao mai e Iesu Keriso ma Ona soo le ala e atoatoa ai e faapei o le Tama Faalelalgi

Mataio 5:17–20 o loo tusia ai faapea na aoao atu e Iesu Keriso e lei sau o Ia e faaumatia, pe alofia, ia upumoni e faavavau i le tulafono a Mose. Ae, na afio mai o Ia e toefuatai mai le atoaga o le talalelei lea na leiloa ona o le amioleaga ma le liliuese, e faasa’o ia aoaoga pepelo, ma faataunuu ia valoaga na faia e perofeta o le Feagaiga Tuai.

O le Mataio 5:21–48, na fetalai ai le Faaola e uiga i tulafono ma uputuu eseese na amatalia e Iutaia ma faaopoopo i lalo o le tulafono a Mose. A o Ia faamatalaina le uigamoni o le tulafono, sa Ia aoao atu ai se ala maualuga atu o le ola. E tatau i tagata o le malo o le Atua ona ola ai i lenei tulafono maualuga. Ina ia fesoasoani e faailoa mea na aoao atu e Iesu Keriso i Ona soo e uiga i le tulafono maualuga, faamaea le gaioiga faafesootai lea:

Ola na o le mataitusi o le tulafono.	O le ala e tatau ona ola ai soo o Iesu Keriso
“Aua e te fasioti tagata” (tagai Mataio 5:21–26). “Aua e te mulilua” (tagai Mataio 5:27–30). Pau lava le mea ia i ai se “tusi alei” o le teteaga e talia lena e faate’a ai lau ava (tagai Mataio 5:31–32). Tau lava ina tausia tautoga na faia i le suafa o le Alii (tagai Mataio 5:33–37). “O le mata i le mata, o le nifo foi i le nifo” (tagai Mataio 5:38–42). Tau lava ina e alofa i lou tuaoi (tagai Mataio 5:43–47).	E te le tau faia ni tautoga; ua lava lava lau upu. Alofa i e ita mai ia te oe. Aua nei faate’aina lau ava vagana ai ua mulilua. Aua e te ita. Liliu atu i ai le isi alafau. Aua e te mulilua i lou loto e ala i le taliaina o mafaufauga faatuinanau.

Ola na o le mataitusi o le tulafono.

O le ala e tatau ona ola ai soo o Iesu Keriso

“Aua e te fasioti tagata” (tagai Mataio 5:21–26).
“Aua e te mulilua” (tagai Mataio 5:27–30).
Pau lava le mea ia i ai se “tusi alei” o le teteaga e talia lena e faate’a ai lau ava (tagai Mataio 5:31–32).
Tau lava ina tausia tautoga na faia i le suafa o le Alii (tagai Mataio 5:33–37).
“O le mata i le mata, o le nifo foi i le nifo” (tagai Mataio 5:38–42).
Tau lava ina e alofa i lou tuaoi (tagai Mataio 5:43–47).

E te le tau faia ni tautoga; ua lava lava lau upu.
Alofa i e ita mai ia te oe.
Aua nei faate’aina lau ava vagana ai ua mulilua.
Aua e te ita.
Liliu atu i ai le isi alafau.
Aua e te mulilua i lou loto e ala i le taliaina o mafaufauga faatuinanau.

Toe iloilo ia upumoni sa e aoaoina i lenei lesona. I nisi laina o lau api talaaga mo le suesueina o tusitusiga paia, tusi ai upu Amata, Taofi, ma le Faaauau. Toe iloilo lou olaga, ma filifili se mea e tasi e mafai ona amata ona e faia, se mea e tasi e mafai ona e taofi le faia, ma se mea se tasi e mafai ona faaauau pea ona e faia e faaaoga ai mea na e aoaoina i lenei lesona. I autafa o le upu talafeagai i lau api talaaga mo le suesueina o tusitusiga paia, tusi ai mea sa e filifilia e amata ma le mea na e filifili e faaauau. Tuu se maka faasa’o i autafa o le upu Taofi e ta’u mai ai ua e filifilia se mea e mafai ona e taofi le faia.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataio 5 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: