Iunite 4: Aso 3
Mataio 15
Folasaga
A o i ai o Ia i Kalilaia, sa faamalamalama atu e Iesu i le au tusiupu ma le au Faresaio le mafuaaga na le mulimuli ai Ona soo i uputuu o le faamamaina o i latou lava e ala i le fafano o o latou lima a o lei aai. Ona maliu atu lea o Ia i le talafatai o Meititirane, lea sa Ia faamalolo ai le tama teine a se fafine o Nuuese. Ona toe foi atu lea o Iesu i Kalilaia, lea na Ia faamalolo ai le toatele ma fafagaina faavavega le silia ma le 4,000 tagata.
Mataio 15:1–20
Na fesili le au Faresaio pe aisea na le fafano ai lima o soo o Iesu a o lei aai
Faitau tulaga nei, ma vaavaai mo mea e tutusa ai.
-
Ua fautuaina se tamaitai talavou e ana uo e ofu se ofu e le talafeagai i se siva a le aoga. E iloa e le tamaitai talavou e le tusa ai le ofu ma tulaga faatonuina a le Alii mo le tauagafau, tusa lava pe talia e lana aganuu ona ofu lavalava faapena.
-
O se alii talavou o se aiga o le Au Paia o Aso e Gata Ai e fiafia lava i taaloga. A oo ina faaali mai taaloga i le televise, ua fai ma masani a le aiga ona faataatia ese tatalo faaleaiga, suesueina o tusitusiga paia, afiafi faaleaiga, ma sauniga o le Aso Sa ina ia matamata ai i taaloga.
-
Ua tapenapena se alii ma se tamaitai talavou e faaipoipo. E nonofo i la’ua i se nofoaga e talia lautele ai fesootaiga feusuai a o lei faaipoipo. Ua ta’u atu e nisi tagata i le toalua lea o aga faaanamua na e ese i lo la faatalitali sei faaipoipo ona faatoa la faia lea o aga faafeusuai.
Atonu ua e matauina o tulaga taitasi o loo tuu mai ai se feeseeseaiga i le va o le usitai i poloaiga a le Atua ma le faia e tusa ai ma tu masani ma agaifanua. O tu masani ma agaifanua e aofia ai talitonuga ma faiga o se aganuu, nuu, aiga, po o se vaega o uo.
-
I lau api talaaga mo le suesueina o tusitusiga paia tusi ai se tu masani po o se agaifanua se tasi pe sili atu e ono taofia ai oe mai le usitaia o poloaiga a le Atua. A o e suesueina le Mataio 15, vaavaai mo upumoni e mafai ona fesoasoani ia te oe pe tatau ona e filifili e usiusitai i poloaiga a le Atua po le faia e tusa ma tu masani ma agaifanua.
Faitau le Mataio 15:1–2, ma vaavaai mo tu masani na fesili ai le au tusiupu ma le au Faresaio ia Iesu. O a tu masani e lei mulimuli ai soo o Iesu?
O le fafano o lima sa ta’ua e le au Faresaio ma le au tusiupu e faasino i se mulumuluga faasauniga ina ia taumamaina ai ae e le o faasino i le fufulu mo le tumama.
Faitau le Mataio 15:3, ma vaavaai mo le tali a Iesu i la latou fesili. Atonu e te manao e maka i lau tusi paia le mea na fetalai atu ai le Faaola i le au tusiupu ma le au Faresaio o loo latou faia e faatino ai a latou tu masani.
E pei ona tusia i le Mataio 15:4–6, na faailoa mai e Iesu se faataitaiga i le ala na solitulafono ai le au tusiupu ma le au Faresaio i se poloaiga a le Atua e ala i le faia o a latou tu masani. Sa latou aloese mai le faataunuuina o a latou matafaioi e tausi o latou matua matutua e ala i le ta’u atu o a latou tupe na faapolopolo e fai ma meaalofa i le Atua, po o le Kopano (tagai Mareko 7:10–12; Bible Dictionary, “Corban”). O le faia o lena mea, sa latou solia ai le poloaiga e ava i lou tama ma lou tina.
Faitau le Mataio 15:7–9, ma vaavaai mo mea na taitai e le au tusiupu ma le au Faresaio ia tagata e fai e ala i le faaaogaina o a latou tu masani e fai ma ’alofaga e le usitaia ai poloaiga a le Atua.
Mai fuaiupu nei ua tatou aoao ai le mataupu faavae lenei: Afai tatou te mananao e faalatalata atu i le Atua, e tatau ona tatou faamuamua Ana poloaiga i soo se tu masani po o uputuu ma a tatou agaifanua.
Toe faitau ia tulaga mai le amataga o le lesona lenei. Mo tulaga taitasi, mafaufau i fesili e lua nei:
-
O mea e mafai ona fai e tagata taitasi o lenei tulaga ona fai e usitai ai i poloaiga a le Atua?
-
E mafai faapefea e le faia o nei mea ona fesoasoani e faalatalata atili ai nei tagata i le Atua?
-
-
O le a le mea na manaomia ona e faia e faamuamua ai poloaiga a le Atua nai lo isi tu masani ma agaifanua ina ia e latalata atili atu ai ia te Ia?
-
Na faapefea ona fesoasoani lena mea ia te oe e te latalata atili atu ai i le Tama Faalelagi?
-
Manatu sa talitonu le au tusiupu ma le au Faresaio o le aai e aunoa ma le faatinoina o se sauniga mulumulu o lima o le a faaleagaina ai se tagata, pe le mama ai se tagata faaleagaga. Faitau le Mataio 15:10–11, ma vaavaai mo mea e faaleagaina moni ai i tatou, ia na aoao mai e le Faaola. Atonu e te manao e faailoga mea e te maua.
Na fetalai le Faaola, “O le mea e sau mai le gutu … o lea ua leaga ai le tagata” (Mataio 15:11). Ina ua uma ona ta’u atu i Ona soo e aua le popole i latou lava i le au Faresaio, o e sa tiga i Ana upu (tagaiMataio 15:12–16), sa Ia toe faamalamalama atu e uiga i le mea e faaleagaina moni ai i tatou.
Faitau le Mataio 15:17–20, ma vaavaai mo mea na fetalai mai le Faaola e faaleagaina ai i tatou.
I tusitusiga paia, e tele ina faatusa le loto i o tatou mafaufauga ma manaoga. O a mea na fetalai le Faaola e faaleagaina moni ai i tatou?
Faamaea le mataupu faavae lenei e faavae i aoaoga a le Faaola i le Mataio 15:19–20: Afai tatou te filifili e faaaoga mafaufauga ma manoga leaga, ona .
-
Mataio 15:21–28
Ua faamalolo e le Faaola le tama teine a se fafine o Nuuese
I le avanoa lea, lisi ai ni manaoga amiotonu se tasi pe sili atu:
A o e suesue pea i le Mataio 15, vaavaai mo mataupu faavae e mafai ona fesoasoani e te malamalama ai i mea e tatau ona e fai ia maua ai ou manaoga amiotonu.
Afai o maua i au tusitusiga paia, sue le Faafanua o le Tusi Paia nu. 11, “O Laufanua Paia i Taimi o le Feagaiga Fou.” Sue ia aai o Turo ma Saitonu i le faafanua. A o maliu atu Iesu mai Kalilaia i aai i le talafatai o Turo ma Saitonu, sa Ia feiloai ai i se fafine sa Kanana. E faapei o le toatele o isi tagata i lena itulagi, o le fafine lenei o se Nuuese—o lona uiga e le o ia o se tagata Iutaia. I le taimi lena, o le misiona a le Faaola o le folafola atu lea o le talalelei na o tagata Iutaia ae le o Nuuese (tagai Mataio 10:5–6).
Faitau le Mataio 15:21–27, ma vaavaai mo tali i fesili nei:
-
O a manaoga amiotonu na i ai i le fafine Kanana?
-
O le a le mea na fai e le fafine ma fai atu ai na faaalia ai lona faatuatua ia Iesu Keriso?
Matau le talafaatusa a le Faaola e faatusatusa ai Nuuese i uli na tofotofo ai le faatuatua o lenei fafine. Na faapefea e le tali a lenei fafine i lea talafaatusa ona faaali atili atu ai lona faatuatua ia Iesu Keriso?
Faitau le Mataio 15:28, ma vaavaai mo mea na faia e le Faaola mo lenei fafine.
Aisea na Ia faia ai?
Mai lenei tala ua tatou aoao ai e faapea a o tatou faatinoina lo tatou faatuatua ia Iesu Keriso, e mafai ona tatou maua faamanuiaga e tusa ai ma o tatou manaoga amiotonu.
Manatunatu loloto i le fesili lenei: E faaopoopo i le ole atu pea lava pea i le Tama Faalelagi e faamanuia i tatou e tusa ai ma o tatou manaoga amiotonu, o le a se isi mea e mafai ona tatou fai e faatino ai lo tatou faatuatua ia Iesu Keriso?
Faaali atu le saunoaga lenei mai ia Elder Dallin H. Oaks o le Korama a Aposetolo e Toasefululua:
“A ia i tatou le faatuatua i le Alii o Iesu Keriso, e tatau ona tatou faalagolago ia te ia. E tatau ona tatou faalagolago ia te ia ua tatou malilie e talia lona finaglao, ma le iloaina o loo ia silafia le mea e sili mo i tatou. …
“… O le faatuatua, tusa lava po o le a le malosi, e le mafai ona fua mai ai se taunuuga e ese mai le finagalo o ia e ona ia le mana. O le faatinoina o le faatuatua i le Alii o Iesu Keriso e mulimuli lava i le tulafono o le lagi, e tusa ai ma le agalelei ma le finagalo ma le poto, ma le taimi a le Alii. O le ala lena e le mafai ai ona tatou maua le faatuatua moni i le Alii e aunoa ma le faalagolago atoatoa i le finagalo o le Alii ma le taimi a le Alii” (“Faatuatua i le Alii o Iesu Keriso,” Ensign, Iulai 1994, 99–100).
E mafai faapefea i le faamalamalamaga a Elder Oaks o le uiga o le faaaoga o le faatuatua ia Iesu Keriso ona fesoasoani ia i tatou pe afai e le vave ona faamanuiaina i tatou e le Alii e tusa ma o tatou manaoga amiotonu?
-
Mataio 15:29–39
Ua fagaina e Iesu le silia ma le 4,000 e mulimuli atu, mai potoi areto e fitu ma ni nai ia
E pei ona tusia i le Mataio 15:29–39, na toe foi atu Iesu i Kalilaia. A o i ai o Ia iina, e toatele tagata na lolofi atu ia te Ia. O loo tusia i le mau faapea sa i ai le “toafagaafe o tane, a e lei faitaulia ai fafine ma tamaiti” (Mataio 15:38), e aofia ai ma e sa mafatia mai ma’i ma faaletonu eseese. Sa faamaloloina i latou e le Faaola, ma ina ua mavae aso e tolu sa mafuta ai tagata ma Ia, sa Ia faia se isi vavega e ala i le fafagaina o i latou uma i potoi areto e na o le fitu ma ni nai ia laiti.
-
Ua ou suesueina le Mataio 15 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: