Ina ua uma ona nofo ai i Petania, sa toe foi Iesu i le malumalu. Sa Ia fetuuina se laau o le mati i Lana malaga. Na o mai taitai Iutaia ia te Ia i le malumalu ma fesiligia Lana pule. Sa aoaia e Iesu i latou ma aoao atu ni faataoto e faapupula ai ia taunuuga o le teenaina po o le taliaina o Ia ma Lana talalelei.
Ua fetuuina e Iesu se laau o le mati ma aoaia ia taitai o Iutaia.
O nisi taimi, o meaai, o ituaiga o faafiafiaga, o oloa, e oo lava i olaga o tagata e le tutusa le lelei e pei ona foliga mai ai.
I lau api talaaga mo le suesueina o tusitusiga paia, tusi ai e uiga i se taimi na e iloa ai e i ai se mea e le o lelei e pei ona sa foliga mai ai.
Mataio 21 o loo i ai se tala o se taimi na fetaiai ai Iesu ma se mea sa lei lelei e pei ona sa foliga mai ai. A o faaauau ona e suesueina lenei mataupu, vaavaai mo upumoni e mafai ona taialaina ai oe e ola amiotonu atili.
Ina ua mavae le malaga faatupu a Iesu i Ierusalema ma faamamaina le malumalu, sa nofo o Ia i Petania, o se nuu laitiiti e lata i Ierusalema. Faitau le Mataio 21:18–22, ma vaavaai mo mea na faia e Iesu i le aso na sosoo ai a o toe malaga atu o Ia mai Petania i le malumalu i Ierusalema.
Ata
lala o le mati ma ona lau
O lau i luga o se mati e masani ona ta’u mai ai e fua le laau. I le tautotogo (ina ua silafia e le Faaola le laau o le mati e leai ni fua), o laau o mati e masani ona vave fua. A leai, o lona uiga e le fua lava i lena tausaga. O le laau o loo faamatala i lenei tala sa foliga mai o se laau e fua, ae e lei i ai se fua.
O se tasi mafuaaga atonu na fetuu ai e le Faaola le laau o le mati o le aoao atu ai lea o Ona soo e uiga i le talapepelo ma le piopio o taitai faalelotu o Iutaia. O le toatele o na taitai ua latou faafoliga o loo mulimuli i le Atua, ae latou te le o fuaina mai ni fua moni, po o galuega o le amiotonu. O i latou o ni tagata pepelo.
“O le upu tagata pepelo e faaliliu mai se upu Eleni o lona uiga o se “tagata faatino” ma e faasino i se tasi e faafoliga, e faatelea se vaega, pe fesuisuiai ana aga taufaasese. Na tausalaina e le Alii [i latou o e taufaasese i ]o latou foliga vaaia i le [tausiga o poloaiga] a o latou loto e faamaualuluga ma e le faamaoni” (Tusi lesona a le Tagata Aoga o le Feagaiga Fou [Church Educational System manual, 2014], 68).
I le Mataio 21:23–27 ua tatou faitau ai i nisi o nei taitai Iutaia sa o atu i le Faaola i le malumalu ma fesiligia le pule na Ia faia ai Lana malaga faatupu i Ierusalema ma faamama le malumalu. Sa tali atu le Faaola e ala i le fesili atu i ai, pe o le papatisoga (po o le galuega) a Ioane le Papatiso na tofi mai e le Atua po o le tagata. E lei tali atu nei taitai i le fesili a le Faaola ona o le fefefe i le tausalaina o i latou lava po o le faatausuai i tagata o e sa taliaina Ioane o se perofeta. Na fetalai le Faaola o le a Ia le taliina a latou fesili pe afai latou te le taliina Lana fesili, ona Ia faamatala atu lea o ni faataoto se tolu lea e faapupula ai ia aga a taitai piopio o Isaraelu.
O le faataoto muamua e faamatala ai ala eseese na tali atu ai atalii e toalua i lo la tama. Faitau le Mataio 21:28–30, ma vaavaai po o le fea atalii e pei o le laau o le mati ma taitai Iutaia.
Faitau le Mataio 21:31–32, ma vaavaai mo mea na aoao atu e le Faaola i taitai Iutaia e ala i lea faataoto. (E mafai ona fesoasoani le iloa faapea o telona o le au ao lafoga ma o fafine talitane o fafine e faatau atu o latou tino mo tupe. E vaai maualalo taitai Iutaia i nei ituaiga o tagata, ma manatu o i latou o tagata agasala.)
E tutusa faapefea ia le au telona ma fafine talitane o e sa talitonu ia Ioane le Papatiso ma le atalii muamua o loo i le faataoto?
Mai lenei faataoto ua tatou aoao ai faapea ina ia ulufale atu i le malo o le Atua, e tatau ona tatou usiusitai i lo tatou Tama Faalelagi ma salamo i a tatou agasala nai lo le na o le ta’u pe faafoliga foi ua tatou usitai ia te Ia.
Faitau le tulaga lea, ona tali lea o fesili e lua i lau api talaaga mo le suesueina o tusitusiga paia:
Ua ta’u atu e se alii talavou i ona matua o loo i ai o ia i gaoioiga a le Ekalesia, ae o le mea moni o la e alu i le fale o sana uo. A i ai o ia faatasi ma taitai o le Ekalesia ma faiaoga, e tautala ma aga e pei o loo ia tausia poloaiga a le Tama Faalelagi, ae o fafo atu o na faatulagaga na te solia ma le iloa le tele o poloaiga.
Ua faitatala se tamaitai talavou ma ana uo e uiga i ni teineiti o lana aoga ae e faafoliga o ia o se uo i nei teineiti pe a latou faatasi. E alu o ia i le lotu e le aunoa ma ai ma inu i le faamanatuga ae o taimi o sauniga, e tele ina ia auina atu i ana uo ni feau feaveai e i ai faitioga ia i latou o loo siosiomia ai o ia.
O le a sau tala e ono fai atu i nei talavou e fesoasoani ia suia ai a latou amio?
E le gata i faataitaiga i nei tulaga, a o a nisi auala e ono faaosoosoina ai i tatou e faafoliga o loo usitai i le Tama Faalelagi ae le o usitai moni ia te Ia?
A o faaauau pea ona e suesue i le Mataio 21, vaavaai mo mea e mafai ona e faia e aloese ai mai le pei o le laau o le mati e leai ni fua.
Ua aoao mai e Iesu ia faataoto i le faifaatoaga amioleaga ma le faaipoipoga a le atalii o le tupu
Ata
fuifuivine i le vine
Faitau le Mataio 21:33–41, ma faamaea le siata lea i mea e te manatu e faatatau i ai faatusa mulimuli e tolu. Atonu e fesoasoani tele le iloa o faifaatoaga o i latou ia o le au tausifanua ma leoleo e nafa ma le vaaiga o le tovine ia fua mai. (A mae’a, siaki tali ma tali o loo i le faaiuga o le lesona.)
I lau api talaaga mo le suesueina o tusitusiga paia, aotele ai ou mafaufauga i mea sa faapupula mai e Iesu e ala i lea faataoto.
Na saunoa Elder Bruce R. McConkie o le Korama a Aposetolo e Toasefululua i mea nei e uiga i le faataoto a le Faaola e uiga i le faifaatoaga amioleaga:
Ata
Elder Bruce R. McConkie
“O fegalegaleaiga a le [Atua] ma tagata mai le foafoaga o Atamu seia oo i le Afio Mai Faalua o le Atalii o le Tagata ua aotele i le Faataoto i le Aufaifaatoaga Amioleaga.
“O le Atua lava ia o le alii o le aiga; o lana tovine o le lalolagi ma ona tagata o i ai; ma o le au faifaatoaga na tofia e galulue i le tovine o le au taitai faaleagaga o tagata. O i latou ua fetogia i maa, sasa, ma sauaina, ma fasiotia o perofeta ma tagatavaai na auina mai e galulue mo tagata; ma o le Atalii ma le Suli, ua fasiotia ma tuliesea mai le tovine i fautuaga a le aufaifaatoaga amioleaga, o Iesu lava” (Faamatalaga o Mataupu Faavae o le Feagaiga Fou, 3 vols. [1965–73], 1:593–94).
E ala i lenei faataoto, sa faapupula mai ai e Iesu Keriso ua tele tausaga na teena ai e nisi o taitai o Isaraelu ia perofeta a le Atua ma sa Ia silafia ua faamoemoe ia taitai o Iutaia i le taimi nei e fasiotia o Ia.
Faitau le Mataio 21:43, vaavaai po o ai o le a tuu i ai le malo o le Atua (o lona uiga o le Ekalesia a Iesu Keriso o le Au Paia o Aso e Gata Ai ma faamanuiaga o le talalelei) ina ua teena e taitai Iutaia.
O le Faaliliuga a Iosefa Samita o le Mataio 21:53 (i le faaopoopoga i le Tusi Paia) ua faailoa mai ai “o Nuuese” o le nuu lea o le a tuu atu i ai le malo o le Atua. “O nisi taimi [o le upu Nuuese] e faasino i tagata e le o ni o le gafa o Isaraelu, o nisi taimi o tagata e le o ni le gafa o Iutaia, ma o nisi foi taimi o malo e aunoa ma le talalelei, tusa lava pe o i ai se toto Isaraelu i tagata” (Taiala i Tusitusiga Paia, “Nuuese,” scriptures.lds.org). O le siita’i atu o le malo i Nuuese na amata ina ua faatoa avatu le talalelei i Nuuese e le au Aposetolo ina ua mavae le Toetu o le Faaola. Ua faaauau ai lava i aso e gata ai i le Toefuataiga o le talalelei e ala i le Perofeta o Iosefa Samita, o le sa soifua i se nuu ese.
I le avea ai ma tagata o le Ekalesia a Keriso, ua tatou i ai faatasi ma i latou lea na tuu atu i ai le malo o le Atua. O lea, e tusa ai ma aoaoga a le Faaola i le Mataio 21:43, o ni tagata o le Ekalesia a Iesu Keriiso, ua ia i tatou le tiutetauave e fua mai ai fua o le amiotonu.
I lau api talaaga mo le suesueina o tusitusiga paia, tusi se ata o se laau o le mati e fua. Faaigoa fua taitasi i upu e faamatala ai mea amiotonu e tatau ona tatou fai o ni tagata o le Ekalesia a Iesu Keriso. Mafaufau pe aisea e taua ai mo i tatou ona aumaia nei ituaiga o fua. Ona tusi lea e uiga i se taimi na e vaai ai i se tagata o le Ekalesia o aumaia nei fua o le amiotonu i se ala faamaoni.
Mataio 21:45–46 o loo faamatala ai le feita o faitaulaga sili ma le au Faresaio ina ua latou iloa o faifaatoaga amioleaga i le faataoto na faatusa ia i latou. Peitai, sa latou lei faaoolima i le Faaola aua sa latou fefefe i le mea e faia e tagata pe a latou faia.
I le Mataio 22:1–10, ua tatou faitau ai na faamatala e Iesu Keriso se faataoto sa Ia faatusaina ai faamanuiaga o le talalelei i se tausamaaga o le faaipoipoga sa faia e se tupu mo lona atalii. O tagata na muamua valaaulia i le tausamaaga (o e na faatusa i le toatele o tagata Iutaia, e aofia ai taitai sa mumusu e o mai. O i latou sa sosoo ai ona valaaulia (na faatusa i Nuuese) na filifili e o mai ma olioli ai i le tausamaaga.
Faitau le Mataio 22:11–14, ma vaavaai mo le mea na tupu i le tausamaaga o le faaipoipoga.
Aisea na tuliese ai lenei tagata mai le tausamaaga?
Na faataunuu e le tupu se agaifanua anamua i le tuuina atu lea i lana au valaaulia o ni laei mama talafeagai e laei ai i le faaipoipoga. Peitai, na filifili lea tagata e le ofuina le ofu na avatu i ai e le tupu. I tusitusiga paia, o ofu mama ma ofutalaloa e tele ina faatusa i le amiotonu ma le mama a’ia’i o i latou ua faamamaina e le Togiola a Iesu Keriso (tagai 3 Nifae 27:19).
O le Faaliliuga a Iosefa Samita o le Mataio 22:14 ua faaopoopo ai faapea e le o tagata uma i le tausamaaga o le a ofuina le ofu o le tausamaaga (tagai Mataio 22:14, vaefaamatalaga e). I se isi faaupuga, e le o tagata uma ua iloa le Faaola ma talia le valaaulia e avea o se vaega o le malo o le a saunia ma agavaa e nofo ai e faavavau faatasi ma Ia ma le Tama Faalelagi. O lenei faataoto e mafai ona fesootai i tagata e lei auai i le Ekalesia—o le malo o le Atua i le lalolagi—ma o tagata ua auai i le Ekalesia e lei saunia lelei i latou lava mo le ola e faavavau ai ma le Atua.
Mafaufau pe o a mea o e faia nei e talia ai le valaaulia a le Tama Faalelagi ia maua faamanuiaga uma o le talalelei. O le faaaoga o mea na e aoaoina i lenei lesona e mafai ona fesoasoani e saunia ai oe e maua nei faamanuiaga uma.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mataio 21:17–22:14 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: