Iunite 6: Aso 2
Iosefa Samita—Mataio; Mataio 24
Folasaga
Na valoia e Iesu Keriso le faatafunaga o Ierusalema ma le malumalu. Sa Ia faaalia foi faailoga o Lona Afio Mai Faalua ma faatonuina ai e amiotonu ia mataitu ma sauniuni mo lena aso.
Iosefa Samita—Mataio 1:1–20
Ua valoia e Iesu le faatafunaga o Ierusalema ma le malumalu
-
I lau api talaaga mo le suesueina o tusitusiga paia, tusi ai se tasi pe sili atu ni au fesili e faatatau i le Afio Mai Faalua o Iesu Keriso. A o e suesueina le Iosefa Samita—Mataio i le aso, vaavaai mo tali i fesili sa e tusia.
Iosefa Samita—Mataio o le Faaliliuga a Iosefa Samita, Mataio 23:39–24:56. O loo maua i le Penina Tau Tele e mulimuli mai le tusi a Aperaamo.
Faitau le Iosefa Samita—Mataio 1:4, ma vaavaai mo fesili e lua na fai atu e le au soo ia Iesu. Atonu e te manao e faailoga nei fesili i au tusitusiga paia.
I le Iosefa Samita—Mataio 1:5–20 na tali atu ai le Faaola i le fesili muamua—pe o afea e faaumatia ai Ierusalema ma le malumalu. Ifuaiupu 21–37 na Ia tali atu ai i le fesili lona lua—e uiga i le faailoga o Lona Afio Mai Faalua ma le faatafunaga o e amioleaga.
Faitau le Iosefa Samita—Mataio 1:5–12, ma vaavaai mo faailoga e faatatau i le faatafunaga o Ierusalema.
E ui sa fetalai Iesu faapea o le a mafatia Ona soo i lea taimi, ae sa Ia faia se folafolaga taua faapea afai tatou te tumau mausali ma e le faatoilaloina, ona faaolaina lea o i tatou. Atonu e te manao e maka le upumoni lea fuaiupu 11.
O le tumau mausali ua ta’u mai ai le le faatoilaloina e faaosoosoga ma mea leaga. I tusitusiga paia, o le upu tutumau o nisi taimi e vaavaalua ma le upu le masiiese (mo se faataitaiga, tagai Mosaea 5:15).
Sa faamatala mai e le au peresitene aoao o Tamaitai Talavou le uiga o le fasifuaitau “tutumau ma le le masiiese”: O le a le uiga o le tutumau ma le le masiiese? Ina ia tutumau o le mausali lea ma e le mafai ona toe suia, tumau i le talitonuga ma le naunautaiga, ma ia lotonuu ma faamaoni. E faapena foi, o le le masiiese o le le faamatuu atu lea ma e le mafai ona gaoioi pe toe liliu. O le tutumau ma le le masiiese i le talalelei a Iesu Keriso o le tautino atu lea e mulimuli ia te Ia, ma tumu ai pea lava i galuega lelei“ (“Tutumau ma le Le Masiiese,” New Era, Jan. 2008, 8).
Na tuuina mai e Elder David A. Bednar o le Korama a Aposetolo e Toasefululua le malamalmaaga lenei: Maka ia uiga na ia tuu atu “o se tagata ua tumau ma le le masiiese.” (Atonu e te manao e tusi ia upu sa ia faaaoga i le laina o lau tusi paia i autafa o le upu tutumau i le Iosefa Samita—Mataio 1:11.)
“O le upu ’tutumau’ ua faaaoga e fautuaina ai le tumau i le tulaga, malo ma mautu, e le maluelue ma ua mausali (Oxford English Dictionary Online, 2nd ed. [1989], “Tutumau”). … O se tagata ua tumau ma le le masiiese ua malo, mautu, mausali, ma matua tumau lava ua le mafai ona toe liliu mai se faamoemoega muamua po o se misiona” (“Tutumau ma le Le Masiiese, E Tumau Pea i Galuega Lelei,” New Era, Ian. 2008, 2).
O le upufaaolaina i le Iosefa Samita—Mataio 1:11 e le faapea o le a tatou le oo i faigata uma o le olaga.
Faitau le saunoaga lea a le Perofeta o Iosefa Samita, ma maka le uiga o le faaolaina: “O se manatu sese le faapea o le a sao le Au Paia i faamasinoga uma, a o e amioleaga o le a mafatia; aua e tatau ona mafatia tagata uma, ma ’o e amiotonu toeitiiti le sao ai’ [tagai MF&F 63:34]; … e toatele le au paia o le a afaina i ma’i, o mala, ma isi mea., ona o vaivaiga o le tino, ae e faasaoina i le Malo o le Atua” (Aoaoga a Peresitene o le Ekalesia: Iosefa Samita [2007], 253).
I le Iosefa Samita—Mataio 1:13–20 ua tatou aoao ai sa lapataia e Iesu Ona soo ina ia sauniuni e sosola i mauga ma aua nei toe foi mai i o latou aiga aua o le a osofaia Ierusalema ma faaumatia. Sa Ia valoia o puapuaga o na aso o le mea aupito matautia lea o le a vaai i ai Isaraelu.
I le 70 T.A., pe tusa ma le 40 tausaga talu ona fetalai Iesu i ia upu, sa osofaia ai e Roma ia Ierusalema ma fasiotia ai le silia ma le miliona tagata Iutaia, ma le toeitiiti atoa le 100,000 tagata Iutaia na ave faatagataotauaina. Sa faaleagaina le malumalu, ma e leai se maa sa tietie i luga o se isi maa—e faapei ona sa valoia e le Faaola (tagai Iosefa Samita—Mataio 1:3). Peitai, o i latou sa faalogo ma usitai i lapataiga a Iesu na sosola saogalemu i Pela, o se taulaga pe tusa ma le 50 maila i matu sasae o Ierusalema (tagai Bible Dictionary, “Pela”).
E faapefea e le aafiaga o Iutaia ona faapupula mai ai le taua o le tutumau ma le le masiiese i le usitai i upu a le Faaola?
Mafaufau pe faapefea e le usitai ma mulimuli i le perofeta soifua i o tatou aso ona taua e pei foi ona gauai atu o tagata Iutaia i le lapataiga a Iesu?
Iosefa Samita—Mataio 1:21–37
Ua valoia e Iesu ia faailoga o Lona Afio Mai Faalua
Faitau le Iosefa Samita—Mataio 1:21–23, ma vaavaai pe aisea na faaalia ai e le Alii ia faailoga o Lona Afio Mai Faalua.
Matau na lapataia mai e le Faaola “Keriso pepelo“ ma ”perofeta pepelo“ (Iosefa Samita—Mataio 1:22). O nei faaupuga e faasino i soo se tagata—i totonu ma fafo o le Ekalesia—o e ua fai mai e tautala mo le Alii e aunoa ma le pule pe o e o faalauiloa ia aoaoga e feteenai ma upu a perofeta soifua. O le fasifuaitau ”o e ua filifilia e tusa ai ma le feagaiga“ i le fuaiupu 22 e faasino i tagata o le Ekalesia a Iesu Keriso.
E tusa ai ma Keriso pepelo ma perofeta pepelo, ua tatou faitau faapea “a oo ina mafai o le a latou faaseeina ai lava e ua filifilia” (Iosefa Samita—Mataio 1:22).
Na tuuina mai e Elder Bruce R. McConkie o le Korama a Aposetolo e Toasefululua le lapataiga lea e faatatau i Keriso pepelo ma perofeta pepelo: “O nei Keriso pepelo o faiga faalelotu pepelo ia a le lalolagi, ma perofeta pepelo o faiaoga ma i latou e faalauiloa atu na faiga. E matuai maoae ma atamai a latou mataupu, e tele ma ofoofogia a latou galuega … e toetoe ai lava ina faaseseina e ua filifilia” (Faamatalaga o Mataupu Faavae o le Feagaiga Fou, 3 vols. [1965–73], 1:647).
O ni mea e mafai ona tatou faia e aloese ai mai le faaseseina, e oo lava i nisi o tagata o le Ekalesia?
Na tuuina mai e Peresitene Iosefa F. Samita le lapataiga lenei i tagata o le Ekalesia:
“’E leai se mea e mafai ona tatou talia e talitonuina e sa’o, ae o lena mea lea e sau sa’o mai le ala ua tofia, faalapotopotoga faatulagaina o le perisitua, o le ala lea sa atofa e le Atua e faailoa mai ai Lona mafaufau ma le finagalo i le lalolagi.
“… Ma o le taimi lava e vaai ai tagata i se isi lava punavai, o le taimi foi lea latou te faamatuu atu ai i latou lava i faatosinaga faataumaoi a Satani, ma ofo atu ai i latou lava e avea ma pagota a le tiapolo; ua latou le maua le faatulagaga moni ia e sapi ai i faamanuiga o le Perisitua; ua latou laa ese atu i siui [i tuaoi] o le malo o le Atua, ma ua i ai i nofoaga matautia. Soo se taimi e te vaai ai i se tagata ua tulai mai ma faapea sa ia maua se faaaliga tuusao mai le Alii i le Ekalesia, e ese mai le faatulagaga ma le ala o le perisitua, e mafai ona e tuuina o ia i lalo o se tagata taufaasese’ (Mataupu Faavae o le Talalelei, 5th ed. [1939], 42
Faitau le Iosefa Samita—Mataio 1:24–26, ma vaavaai po o le a le fetalaiga a le Faaola pe faapefea ona Ia afio mai i Lona Afio Mai Faalua.
Faitau le Iosefa Samita—Mataio 1:27–31, ma vaavaai mo faailoga o le a tomua mai i le Afio Mai Faalua.
Lisi ia faailoga:
Matau e le o faailoga uma e leaga. E tusa ai ma fuaiupu 27 ma le 31, a o lei oo mai le Afio Mai Faalua o Iesu Keriso, o le a faapotopoto le au filifilia a le Alii ma o le a folafola atu le talalelei i le lalolagi uma.
-
Sa lapatai mai le Faaola faapea i aso e gata ai ”o Keriso pepelo ma perofeta pepelo“ o le a saili e“faasese le au filifilia” (Iosefa Samita—Mataio 1:22). Faitau le Iosefa Samita—Mataio 1:37, ma vaavaai pe mafai faapefea ona tatou aloese mai le faaseseina.
I au tusi paia i autafa o le Iosefa Samita—Mataio 1:37, atonu e te manao e tusi ai le mataupu faavae lea: Afai tatou te teuina le upu a le Alii, ona le faaseseina lea o i tatou.
Faitau le tala lenei mai ia Elder M. Russell Ballard o le Korama a Aposetolo e Toasefululua: Maka vaega o le tala o loo faapupula mai ai le mataupu faavae o loo aoao mai i le Iosefa Samita—Mataio 1:37.
“O se tasi o a’u faifeautalai lelei, sa ma galulue a o ou peresitene i le misiona i Toronto [Kanata] na sau e vaai a’u i ni nai tausaga mulimuli ane. Sa ou fesili ia te ia, ’Lau susuga, pe mafai faapefea ona ou fesoasoani atu ia te oe?’
“’Peresitene,’ na ia fai mai ai, ’Ou te manatu ua le toe i ai sa’u molimau.’
“Sa ou le talitonu i ai. Sa ou fesili atu pe mafai faapefea lena mea.
“’Mo le uluai taimi ua ou faitauina ai ni tusi e faasagatau i Mamona,’ na ia fai mai ai. ’E i ai ni a’u fesili, ma e leai se tasi e taliina mo au. Ua ou fenumiai, ma ou te manatu ua leiloa la’u molimau’” (“O Afea e Oo Mai Ai Nei Mea?” Ensign, Tes. 1996, 60).
Pe ua e oo i se mea faapea, pe o se isi foi e te iloa, e pei o lea faifeautalai? O le a se fautuaga e te avatu i se tasi i lenei tulaga? Aisea?
Sa faaauau le saunoaga a Elder Ballard:
“Sa ou fesili atu ia te ia po o a ana fesili, ma sa ia ta’uina mai ia te au. O ni faafitauli masani e faasagatau i le Ekalesia, ae sa ou manao mo sina taimi e ao mai ai ni mea ina ia mafai ai ona ou tuuina atu ni tali anoa. O lea sa faatulaga ai se taimi i le 10 aso mulimuli ane, ma o le taimi lea sa ou ta’u atu ai ia te ia o le a ou taliina ai ana fesili taitasi. Ina ua amata ona ia savali ese atu, sa ou taofia o ia.
“’Lau susuga, e tele au fesili na tuu mai ia te au i le aso,’ sa ou fai atu ai. ’Ia e tasi la’u fesili mo oe.’
“’O le a Peresitene?’
“’O le a le umi e te lei toe faitauina ai le Tusi a Mamona? Sa ou fesili ai.
“Sa sui lana pupula. Sa tilotilo ifo o ia i le fola mo sina taimi. Ona ia tilotilo mai lea ia te au. ’Ua leva tele, Peresitene,’ sa ia ta’u sao mai ai.
“’Ua lelei,’ na ou fai atu ai. ’Ua uma ona e tuuina mai ia te au la’u galuega e fai. Ua fetaui lelei foi lou tuuina atu o lau galuega. Ou te manao ia e folafola mai ia te au o le a e faitauina le Tusi a Mamona ia le itiiti ifo i le tasi le itula i aso uma amata atu nei seia oo i le isi a ta feiloaiga.’ Sa malie o ia o le a ia faia lena mea
“Sefulu aso mulimuli ane, sa ia toe foi mai ai i lo’u ofisa, a ua ou saunia foi. Sa ou aumaia a’u pepa e amata ai ona tali ana fesili, peitai sa ia taofia au.
“’Peresitene,’ sa ia fai mai, ’o le a le manaomia lena mea.’ Ona ia faamalamalama mai lea: ’Ou te iloa e moni le Tusi a Mamona. Ou te iloa o Iosefa Samita o se perofeta a le Atua.’
“’Ia, lelei tele,’ sa ou fai atu ai. ’Ae o le a avatu pea tali o au fesili. Sa ou galue mo se taimi umi i lenei mea, o lea la tau lava o lou saofai mai iina ma faalogo.
“Ma o lea sa ou taliina uma ai ana fesili ona fesili atu lea, ’Lau susuga, o le a se mea ua e aoaoina mai lenei mea?’
Ma sa ia faimai, ’Ia tatou tuu atu taimi tutusa i le Alii“(“O Afea e Oo Mai Ai Nei Mea?” 60).
-
O le teuina faaoloa taua o upu a le Alii e fesoasoani ai tatou te aloese mai le faaseseina, ma ua lapataia i tatou e faaaliga i ona po nei e “tutu … i nofoaga paia, ma aua le masi’i ese, seia oo mai le aso o le Alii”(MF&F 87:8). E le gata i le suesueina o tusitusiga paia e fesoasoani ai ia tatou teu faaoloa taua ia upu a le Alii, e mafai ona tatou taliaina upu a le Atua e ala i le tutu i totonu, pe auai foi, i nofoaga paia e pei o malumalu ma falesa ma le galulue ina ia avea o tatou fale ma nofoaga paia. Mafaufau pe mafai faapefea e nei nofoaga ona fesoasoani ia te oe e aoao ia aoaoga faavae moni ma aloese mai le faaseseina.
Iosefa Samita—Mataio 1:38–55
Ua faatonuina e Iesu Ona soo e uiga i le saunia mo Lona Afio Mai Faalua.
Na faaiu e le Faaola lea aoaoga e ala i le faatonuina o Ona soo i le ala e teu faaoloa ai Lana upu ma saunia ai mo Lona Afio Mai Faalua.
I pusa o loo avatu i le siata lea, tusi ai ni ata faigofie e faapupula mai ai ia faataitaiga sa faaaoga e le Faaola e aoao mai ai e uiga i le saunia mo Lona Afio Mai Faalua. Ona tusi lea i lalo o ata taitasi, se upumoni sa e faailoa mai e uiga i le saunia mo le Afio Mai Faalua.
Mai nei faataitaiga ua tatou aoao ai faapea e na o le Tama Faalelagi lava ua silafia le taimi o le Afio Faalua Mai o le Faaola, ma afai tatou te mataitu mo faailoga ma usiusitai i poloaiga a le Alii, ona tatou saunia lea mo le Afio Mai Faalua o le Faaola.
Toe iloilo ia upumoni sa faailoa mai i le Iosefa Samita—Mataio, ma mafaufau pe fesoasoani faapefea nei upumoni e tali ai fesili na e tusia i le amataga o le lesona.
O se tasi o ala sili e saunia ai mo le Afio Mai Faalua o Iesu Keriso o le mulimuli lea i Ana perofeta ma aposetolo i ona po nei. Mafaufau i le saunoaga lenei mai ia Elder Dallin H. Oaks o le Korama a Aposetolo e Toasefululua:
“E faapefea pe afai o taeao le aso e afio mai ai o Ia? Afai sa tatou iloa o taeao le aso tatou te faafetaia’i ai i le Alii—e ala i lo tatou oti faafuasei, po o Lona toetu faafuase’i mai foi—o le a sa tatou mea e fai i le aso? O a ni mea o le a tatou ta’uta’u atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?
“Afai e tatau ona tatou faia na mea, aisea e le faia ai nei? (“Sauniuniga mo le Afio Mai Faalua,” Ensign po o le Liahona, Me 2004, 9).
-
-
Ua ou suesueina le Iosefa Samita—Mataio; Mataio 24 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa i lou faiaoga: