Iunite 6: Aso 4
Mataio 26:1–30
Folasaga
E lua aso a o lumanai le Paseka, sa taupulepule ai Iuta ma taitai Iutaia o e sa mananao e fasiotia Iesu. I le po o le Paseka, sa faatuina ai e Iesu le faamanatuga.
Mataio 26:1–16
Ua taupulepule Iuta ma taitai Iutaia o e na mananao e fasiotia Iesu
Pe ua e matamata i se tifaga pe faitau se tala na faalataina ai se tagata? Aisea na faalataina ai lena tagata? O le a sou lagona pe a faalata oe e se uo mamae? A o e faitau e uiga i toe itula o le soifuaga o Iesu Keriso, manatua na faalataina o Ia e se uo mamae.
Mo Isaraelu anamua, o le vaiaso o le Paseka o se tasi o vaiaso aupito taua o le tausaga. “O le Tausama′aga o le Paseka sa faatuina [i le taimi o Mose] e fesoasoani ai i le fanauga a Isaraelu e manatua le taimi na sopoloa ai le agelu o le faafanoga i o latou fale ma laveai i latou mai tagata Aikupito [tagai Esoto 12:21–28; 13:14–15].” O se vaega o le Paseka, sa fasi ai e tagata Isaraelu se tamai mamoe ma sausau lona toto i luga o pou o o latou faitotoa. “O tamai mamoe e le pona, lea na faaaoga le toto e fai ma faailoga o le laveaiina o Isaraelu anamua, o se faatusa o Iesu Keriso, o le Tamai Mamoe a le Atua, o Lana taulaga na togiola ai tagata uma” (Taiala i Tusitusiga Paia, “Paseka,” scriptures.lds.org).
Faitau le Mataio 26:1–2, ma vaavaai mo mea na fetalai Iesu Keriso o le a tutupu i le Paseka.
Sosoo ai, faitau le Mataio 26:3–5, ma vaavaai po o ai na fatuina se fuafuaga e fasiotia Iesu i le taimi lea.
Aisea na tonu ai i le au tusiupu ma faitaulaga sili e faatali sei uma le Paseka ona fasiotia lea o Iesu?
I le Mataio 26:6–13 ua tatou faitau ai a o i ai Iesu i Petania, sa alu atu se fafine ia te ia ma uu o Ia i le uu nato tautele e faailoa ai Lona maliu ma le falelauasiga ua lupe. O nisi o Ona soo e aofia ai ma Iuta, o se tasi o Aposetolo e Toasefululua ma le teutupe a le vaega, na faitio faapea sa tatau ona faatau atu le uu e fesoasoani ai i e matitiva. Peitai, sa lei matuai popole Iuta mo e matitiva ae o ia o se tagata gaoi sa manao i le tupe mo ia lava (tagai Ioane 12:4–6).
Faitau le Mataio 26:14–16, ma vaavaai mo mea na faia e Iuta ina ua uma ona aoai o ia e Iesu i lona faitio.
Matau pe fia na maua e Iuta i le faalataina o Iesu. E tusa ai ma le tulafono a Mose, o sekeli e tolusefulu o siliva o le a taui ai se e faaooina le oti i se pagota (tagai Esoto 21:32). … O le totogi o le tagata faalata ua atagia mai ai le manatu maualalo o Iuta ma le au faitaulaga sili i le Faaola” (Tusi lesona a le Tagata Aoga o le Feagaiga Fou [Church Educational System manual, 2014], 81). Na faataunuu ai foi se valoaga i le Feagaiga tuai i le faalataina o le Faaola (tagai Sakaria 11:12).
Mataio 26:17–25
Ua talisua Iesu ma Ona soo i le tausamiga o le Paseka
Mafaufau i le taimi mulimuli na e vaavaai ai i se faaata. O a nisi auala e mafai ai ona fesoasoani ia faaata ia i tatou?
Faitau le saunoaga lea a Peresitene Dieter F. Uchtdorf o le Au Peresitene Sili, ma vaavaai mo ma maka pe aisea e taua ai le vaai manino atu ia i tatou lava, e pei ona silasila mai ai le Atua ia i tatou:
“E leai ma se tasi o i tatou e fia tautino atu pe a tatou se ese mai le ala sa’o. E tele lava ina tatou taumafai e aloese mai le tagai totoa i o tatou loto ma faailoa o tatou lava vaivaiga, lē atoatoa, ma mea e fefefe ai. O lea, a tatou suesueina o tatou olaga, tatou te vaavaai lava i o tatou lava manatu faaletagata, o ‘alofaga, ma tala tatou te faamatala ia i tatou lava ina ia faamaonia ai o tatou manatu ma amioga lē agavaa.
“Ae o le mafai ona tatou vaai manino ia i tatou lava e taua lea i lo tatou tuputupu ae faaleagaga ma le tulaga manuia. Afai e tumau pea le natiaina o o tatou vaivaiga ma lē atoatoa, ona le mafai lea e le mana togiola a le Faaola ona faamaloloina na vaivaiga ma avea i latou ma malosiaga. …
“E mafai faapefea la ona tatou faasusulu atu le malamalama mama o le upumoni a le Atua i o tatou agaga ma iloa ai i tatou lava e pei ona Ia silafia i tatou?
“E mafai ona ou fautua atu, o tusitusiga paia ma lauga e tuuina atu i le konafesi aoao o se faaata aoga lea e mafai ona tatou tilotilo i ai mo le suesueina o i tatou lava” (“Le Alii e, O Au Ea?” Ensign po o le Liahona, Nov. 2014, 58).
Mafaufau pe mafai faapefea e tusitusiga paia ma lauga e aumai i le konafesi aoao ona pei o se faaata e fesoasoani tatou te vaai ai i mea tatou te manaomia ona faaleleia i o tatou olaga.
A o e suesue i le Mataio 26:17–25, vaavaai mo se mataupu faavae e mafai ona fesoasoani e te iloa ai ou vaivaiga ina ia mafai ai ona e galue e faatoilaloina.
I le Mataio 26:17–19 ua tatou faitau ai faapea na ta’u atu e Iesu i Ona soo e vaai se afeafe i Ierusalema mo le tausamiga o le Paseka.
Faitau le Mataio 26:20–21, ma vaavaai po o a mea na ta’u atu e Iesu i Ana Aposetolo i le taimi o le tausamiga o le Paseka.
Pe ana fai sa e i ai iina, mata o a ni ou mafaufauga ina ua uma ona fetalai atu Iesu i lenei mea?
Faitau le Mataio 26:22, ma vaavaai mo le fesili na fai atu e Aposetolo ia Iesu.
O le a le mea ua aoao atu ia te oe i le fesili, “Le Alii e, o au ea?” e uiga i le au Aposetolo faamaoni e toasefulutasi?
O le mataupu faavae e tasi e mafai ona tatou aoao mai lenei tala e faapea ina ua faalogo ia soo o Iesu Keriso i le fetalaiga a le Alii, sa latou suesue ifo i o latou lava olaga e vaai pe faapefea ona faatatau ia i latou.
Na saunoa Peresitene Uchtodorf i le mea lenei e uiga i lea tala:
“Sa lei fesiligia e le au soo le moni o le mea na fetalai ai [Iesu]. Pe sa latou fetilofai solo foi, ma tusitusilima i se tasi, ma fesili, “O ia ea?” …
Ou te mafaufau lava po o le a se mea e fai e i tatou taitoatasi pe afai e fai mai e le Faaola lena fesili. Pe o le a tatou autilotilo atu ea ia i latou i o tatou talaane ma faapea ifo i o tatou loto, atonu o loo fetalai o Ia e uiga ia Uso Ioane. Sa ou masalomia lava o ia,” po o le “Ua ou fiafia lava o loo faatasi mai Uso Brown. E moomia ona ia faafofoga i le savali lenei”? Pe o le a tatou pei ea o na soo anamua, o le a tatou mafaufau ifo ia i tatou lava ma fesili i lena fesili matuitui: “O au ea?” (“Le Alii e, o Au ea?” 56).
Pe na tofotofoina ea oe e aua nei amanaia afioga a le Alii ma manatu faapea e mo se isi tagata? Faitau le saunoaga lea, ma vaavaai mo mea na valaaulia i tatou e Peresitene Uchtdorf e faia pe a tatou lagonaina upu a le Alii:
I nei upu faigofie, “Le Alii e, o au ea?” o loo taoto ai le amataga o le poto ma le ala i le liuaina faaletagata lava ia ma le suiga tumau. …
“E tatau ona tatou tuu ese lo tatou faamaualuga, aveese lo tatou faasausili, ae ia lotomaualalo ma fesili atu, ‘Le Alii e, o Au Ea?’
“Ma afai o le tali a le Alii o le “Ioe, lo’u atalii e, o loo i ai mea e tatau ona e faaleleia, o mea e mafai ona ou fesoasoani atu ai ia te oe e faatoilalo,” ou te tatalo o le a tatou taliaina lenei tali, iloaina ma le lotomaualalo a tatou agasala ma vaivaiga, ma suia o tatou ala e ala i le avea ma ni tane lelei atu, o ni tamā lelei atu, ma ni atalii lelei atu (“Le alii e, O Au Ea?” 56, 58).
-
I lau api talaaga mo le suesueina o tusitusiga paia, tusi e uiga i se taimi na faamanuiaina ai oe e ala i le pule o le Perisitua Mekisateko. Ona tusi ai lea o se sini patino e tusa ai ma mea o le a e faia e suesue atili atu i lou lava olaga i soo se taimi e te faalogo ai i afioga a le Alii.
Faitau le Mataio 26:23–25, ma vaavaai mo le tali a le Faaola i le fesili na fai atu e le au Aposetolo. O le taimi lava na faailoa atu ai e Iesu o Iuta o ia lea o le a faalataina o ia, sa tuua ai loa e Iuta (tagai Ioane 13:30).
Mataio 26:26–30
Ua faatuina e Iesu Keriso le faamanatuga i le taimi o le Paseka
Ina ua uma ona talisua le Faaola i le Paseka faatasi ma Ana Aposetolo, sa Ia faatuina le sauniga o le faamanatuga.
Mafaufau i au tali i fesili nei: Ina ua e ai ma inu talu ai i le faamanatuga, o a au mea sa fai? O a ou mafaufauga? O le a se mea na e lagonaina?
Faitau le Mataio 26:26–29, ma vaavaai po o le a le mea na fai e le Alii i le areto ma mea sa i le ipu.
E ala i nei fuaiupu ua tatou aoao ai faapea o faatusa o le faamanatuga ua avea ma sui o le tino ma le toto o Iesu Keriso, lea na ositaulagaina mo i tatou.
O le Faaliliuga a Iosefa Samita ua aumaia ai se malamalamaaga faaopoopo i le Mataio 26:26–28 Faitau le Faaliliuga a Iosefa Samita, Mataio 26:22, 24–25 [i le faaopoopoga o le Tusi Paia].)
Vaavaai mo suiga musuia na faia. E faapefea ona fesoasoani tatou te malamalama ai i se faamoemoega taua o le faamanatuga?
E ala i nei suiga musuia ua tatou aoao ai faapea na faatuina e Iesu Keriso le faamanatuga mo i tatou e manatua ai o Ia ma Lana Togiola mo a tatou agasala.
Afai e mafai, matamata le vitio o le “Ia Manatua Pea o Ia” e malamalama atili ai i le faamoemoega ma le taua o le faamanatuga. I le vitio lea, o loo faamalamalama mai ai e Elder Jeffrey R. Holland o le Korama a Aposetolo e Toasefululua faapea, o le faamoemoega o le faamanatuga o le manatuaina lea o Iesu Keriso ma Lana taulaga togiola. O loo maua lenei vitio i le LDS.org.
-
-
Na aafia faapefea ou lagona ma aafiaga i lou taumafai e manatua le Faaola ma Lana Togiola a o e ’ai ma inu i le faamanatuga?
-
O a ni nai mea e mafai ona faalavelaveina ai i tatou i le taimi o le faatinoina o le faamanatuga?
-
E mafai faapefea i le taumamao mai nei faalavefau i le taimi o le sauniga faamanatuga ona fesoasoani tatou te maua ai se aafiaga sili atu faaleagaga?
-
O a ni nai mea e mafai ona e faia e fesoasoani ai e te taulai atu i le Faaola ma le taua o lenei sauniga i le taimi o le sauniga faamanatuga ma manatua ai o Ia i le vaiaso atoa?
-
E tusa ai ma le Mataio 26:27–28, o le a le mea ua mafai ona tatou maua mai le faamaligiina o le toto o Keriso a o tatou aai ma feinu i le faamanatuga?
Na o le ai o le areto ma inu i le vai i le taimi o le faamanatuga e le otometi ai ona tatou agavaa e maua se aveesea, po o se faamagaloga o a tatou agasala. E tatau ona tatou faatino lo tatou faatuatua ia Iesu Keriso, salamo, ma aai ma feinu i le faamanatuga ma le faamoemoega tonu o le loto e ala i le manatua pea o Ia ma taumafai e tausi i Ana poloaiga. O le aai ma feinu ma le agavaa i le faamanatuga, tatou te faafou ai a tatou feagaiga o le papatisoga.
Mafaufau e tusi le mataupu faavae lenei i avanoa o i autafa o au mau: Pe a tatou salamo ma aai ma feinu i le faamanatuga ma le faamoemoega tonu, e mafai ona tatou maua se faamagaloga o a tatou agasala.
-
Toe faitau le Mataio 26:29, ma vaavaai pe o anafea na fetalai ai le Faaola o le a Ia toe taumafa ai i le faamanatuga.
“E pei ona tusia i le Mataio 26:29, sa ta’u atu e le Faaola i Ona soo o le a le toe inu lava o Ia i le fua o le vine seia oo i le aso e inu ai e Ia faatasi ma i latou i le malo o Lona Tama. O lea, ua le gata ona avea le faamanatuga ma faatusa i le Togiola a le Faaola, ae ua faasino atu ai foi ma le faamoamoe i le taimi o le a toe foi mai ai o Ia i le lalolagi i le mamalu (tagai 1 Korinito 11:26).
“I aso e gata ai, sa faailoa mai ai e le Alii i le Perofeta o Iosefa Samita ia auiliiliga o se taimi o i luma o le a Ia taumafa ai i le fua o le vine i le lalolagi. E pei ona tusia i le Mataupu Faavae ma Feagaiga 27, sa faailoa mai e le Alii o la Ia toe taumafa faatasi ma ona soo i le faamanatuga i le lalolagi, e aofia ai le toatele o perofeta anamua, e pei o Moronae, Elia, Ioane le Papatiso, Elia, Aperaamo, Isaako, Iakopo, Iosefa o le sa faatauina atu i Aikupito, Peteru, Iakopo, ma Ioane, “faapea foi Mikaeli, po o Atamu, le tama o tagata uma” tagai MF&F 27:4–14). O soo o le Alii e aofia ai ’i latou uma o e ua tuuina mai e le Tama ia te A’u mai le lalolagi’ (MF&F 27:14). O lona uiga, afai tatou te tutumau faamaoni ma faatuatua i feagaiga sa tatou osia ma tumau e oo i le iuga, o le a tatou i ai faatasi ma i latou o e taumamafa faatasi ma le Faaola i faatusa o le faamanatuga i se taimi o i luma.
-
Ua ou suesueina le Mataio 26:1–30 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: