O se vaega o le taupulepulega e fasiotia Iesu Keriso, sa aumaia ai o Ia e taitai Iutaia ia Ponotio Pilato, le kovana Roma. Na tuuina atu e Pilato ia Iesu ina ia faatigaina ma faasatauroina. Na gauai atu Iesu i puapuaga ma le oti e faataunuu ai le finagalo o Lona Tama.
Ua tuuina atu Iesu ia Pilato ma ua faasalaina ia faasatauroina.
Pe ana mafai ona e molimau vaaitino i se tulaga faatusi paia na tupu, o le fea o le a e filifilia? Aisea?
I lenei lesona o le a e suesue ai i se tasi mea aupito sili ona taua i le talafaasolopito o le lalolagi. Ao e suesue, mafaufau faapea o oe o se molimau na vaai tino i le mea na tupu.
I le Mataio e 26 tatou te faitau ai faapea na puefaapagotaina Iesu ma faamasinoina ma le amioletonu ma faasalaina e taitai o Iutaia. I lalo o le tulafono a Roma, e leai se malosi o Iutaia e fasiotia ai se tagata. O le mea lea, sa saili ai ia taitai o Iutaia e sue se solitulafono i lalo o le tulafono a Roma e ono faasalaina ai Iesu i le oti.
I le Mataio 27:1–10ua tatou aoao ai faapea na tuuina atu e taitai Iutaia ia Iesu ia Ponotio Pilato, le kovana Roma o Iutaia. Ina ua vaai atu Iuta i lenei mea, sa ia salamo i lana filifiliga e faalata Iesu, ma sa saili ai e toe faafoi atu le tupe sa ia maua mai taitai Iutaia, ona ia faamutaina ai lea o lona lava ola. Ua faamanino mai e le Faaliliuga a Iosefa Samita faapea na “sisiina [e Iuta] ia lava i se laau. Ma sa pau ifo loa o ia i lalo, ma masaa mai i fafo ona totoga, ma sa oti ai o ia” (Faaliliuga a Iosefa Samita, Mataio 27:6 [i le Mataio 27:5, vaefaamatalaga a]).
Talu ai o tupe siliva o “le tau o le toto” (Mataio 27:6) ma e sa ona tuu i le mea e teu ai oloa, o lea sa faaaoga ai e taitai Iutaia le tupe e faatau ai le fanua o le fai ipu o mea, lea e tatanu ai tagata ese (po o tagata fai mai). Sa ta’ua e Mataio lea mea o se faataunuuina o se valoaga (tagai Sakaria 11:12–13).
Talu ai le uunaiga mai ia Iutaia ma le fefe ina nei le mafai ona taofiofia ia tagata, o lea na tuu atu ai e Pilato ia Iesu ina ia faasatauroina (tagai Mataio 27:11–26). (O le a e maua se avanoa e suesue ai auiliili i nei mea na tutupu i le lesona mo le Ioane 18–19.)
Ua faatigainaina Iesu, ua tauemuina, ma ua faasatauroina
Ata
sasa e tuu i ai uamea maamaai
A o lei auina atu Iesu ina ia faasatauroina, sa tuu atu e Pilato o Ia ia faatigainaina (tagai Mataio 27:26). Ina ia faatigainaina o lona uiga ia sasa faafia i se sasa sa i ai mea maamaai e pei o maa maamaai po o fasi ponaivi sa fili faatasi ma fuatimaea. O lea ituaiga o faasalaga sa masani ona faasaosao mo i latou o ni auauna, a o tagata o le toto tamalii po o tagata saoloto o Roma sa sasaina i uamea. E tele tagata e le ola pe a sasaina ona o le matuia o manu’a e oo i tino.
Faitau le Mataio 27:27–32, ma vaavaai mo mea na faia e fitafita Roma ia Iesu.
I sou manatu aisea na sue ai e fitafita se isi tagata e amoina le satauro o Iesu?
Manatu faapea sa i ai i le tulaga o Simona le Kurene. Mata o a ni ou mafaufauga po o ni ou lagona pe ana fai sa e i ai i le motu o tagata ma sa fai faamalosi atu ia te oe e amo le satauro o Iesu? Tusi lau tali i lau api talaaga mo le suesueina o tusitusiga paia.
Mataio 27:33 o loo tusi ai faapea na aveina atu Iesu i se “nofoaga e igoa o Kolokota, o lona uiga, o se mea e i ai ulupoo.”
Ata
Elder James E. Talmage
Na aoao mai Elder James E. Talmage o le Korama a Aposetolo e Toasefululua le mea lenei e uiga i le nofoaga lava lea: “O le igoa atonu na faaaoga ma le manatu i foliga vaaia, a o tatou talanoa i le tumutumu o se mauga; pe, afai o le mea tonu lea o se nofoaga masani o le fasiotiga, atonu na faaigoa faapea o se faailoga o le oti, faapei ona tatou ta’ua se ulupoo o se ulu o se tagata oti” (Iesu le Keriso, 3rd ed. [1916], 667).
Mataio 27:34–45 o loo tusia ai faapea na musu Iesu e talia se meainu e masani ona ofo atu ia i latou o e sa faasatauro e faagase ai le tiga. O isi sa matamata i le Faasatauroga, na saili e tauemu atu ma faaosooso Iesu.
Faitau le Mataio 27:46, ma vaavaai mo mea na fetalai ai Iesu a o i ai i luga o le satauro. Atonu e te manao e faailoga mea e te maua.
Ina ia malamalama atili i le mea na tupu i le taimi lea, faitau le saunoga lea a Elder Jeffrey R. Holland, o le Korama a Aposetolo e Toasefululua:
Ata
Elder Jeffrey R. Holland
“O le taimi lenei, ou te tautala ma le matua faaeteete lava, ma le migao, e uiga i se mea atonu o le taimi aupito sili lea ona faigata i lenei malaga fai toatasi i le Togiola. Ou te talanoa e uiga i na toe taimi atonu ai na sauniuni faalemafaufau i ai ma le faaletino Iesu, ae atonu foi e lei saunia atoatoa i ai o Ia i le faalelagona ma le faaleagaga—lena toe mafatiaga i se lagona o le matua atuatuvale lava ona ua tuua o ia e le Atua ina ua ia alaga ai i le toe taimi o le tuuatoatasi, ’Le Atua e, Le Atua e, se a le mea ua e tuulafoai mai ai au?’ [Mataio 27:46; ua faaopoopo le faamamafa]. …
“Faatasi ai ma le talitonuga maumaututu uma o lou agaga ou te molimau atu ai … ma e lei tuulafoaina e se Tama e atoatoa Lona Atalii i lena ituaso. Ioe o lou lava talitonuga patino, i le galuega atoa i le olaga nei a Keriso, atonu e lei sili atu ona latalata le Tama i Lona Atalii nai lo nei toe taimi e le maonosaia o mafatiaga. E ui o lea, … sa aveesea ai e le Tama mai ia Iesu mo sina taimi puupuu, le mafanafana o Lona Agaga, le lagolago o lona iai patino iina” (“Sa Leai Se Tasi na I Ai Faatasi ma Ia,” Ensign po o le Liahona, Me 2009, 87–88).
E te manatu aisea na aveese mai ai e le Tama Faalelagi Lona Agaga mai ia Iesu i lea taimi?
Faitau le vaega o totoe o le saunoaga a Elder Holland, ma maka mea sa ia saunoa ai o loo faamalamalama ai le mafuaaga na lagonaina ai e Iesu Keriso le alu ese o le Agaga: “Sa manaomia, ioe sa totonugalemu i ai le taua o le Togiola, e faapea o lenei Atalii atoatoa o le e le i i ai se upu leaga mai lona fofoga, e lei faia foi se sese, e lei pai foi i se mea le mama sa tatau ona iloa pe faapefea lagona o tagata— i tatou, i tatou uma— lava pe a tatou faia ia ituaiga agasala. Aua o Lana Togiola e le iu ma e faavavau, sa tatau ona Ia iloa pe faapei le oti faaletino ma le faaleagaga, ia iloa pe faapei le aveesea o le Agaga o le Atua, ma tuua toatasi ai le tagata, ma le atuatuvale ma ua leai se faamoemoe ” (“Sa leai se tasi na i ai faaatasi ma ia,” 88).
Mai le Mataio 27:46 ma le saunoaga a Elder Holland, ua mafai ai ona tatou aoao faapea o se vaega o le Togiola, na lagona ai e Iesu Keriso le aluese o le Agaga o le Tama Faaelagi.
A tatou agasala tatou te lagonaina le oti faaleagaga—le aluese o le Agaga o le Tama Faalelagi. Talu ai na oo Iesu Keriso i le oti faaleagaga i luga o le satauro, ua mafai ona Ia fesoasoani ia i tatou pe a tuueseeseina i tatou ma le Agaga o le Tama Faalelagi ona o a tatou filifiliga leaga. E mafai foi ona Ia fesoasoani ia i tatou pe a tatou lagonaina le tuuatoatasi.
Faitau le Mataio 27:50. Ua ta’ua i le Faaliliuga a Iosefa Samita: “Ina ua toe tagi leotele Iesu, ma faapea atu, Tama, ua mae’a, ia faia lou finagalo, ona maliu ai lea” (Faaliliuga a Iosefa Samita, Mataio 27:54 [i le Mataio 27:50, vaefaamatalaga a]).
E tusa ai ma le Faaliliuga a Iosefa Samita, na mafatia Iesu Keriso ina ia faataunuu ai le finagalo o le Tama Faalelagi.
A o e suesueina le Mataio 26 i lesona talu ai, sa e aoao ai e uiga i mafatiaga o le Faaola i Ketesemane, ma Lona naunau e gauai atu Lona finagalo i le finagalo o le Tama. Atonu e te manao e tusi le Mataio 26:39 o se mau fefaasinoai i au tusi paia i autafa o le Mataio 27:50 e fesoasoani e te manatua ai na faia e Iesu le mea na Ia folafola mai e fai.
Faitau le Mataio 27:51, ma vaavaai mo le mea na tupu i le malumalu ina ua maliu Iesu.
Ata
ata o le malumalu
I ona po o Iesu, o le malumalu sa i ai potu e lua—o le nofoaga paia ma le Paia o Paia. O nei potu e lua sa vaeluaina i se ie puipui, po o se pupuni. “O le Paia o Paia o le potu aupito paia lea i le malumalu anamua; o le faatusa o le afioaga o le Atua. E ta’i tasi i le tausaga, i le Aso o le Togiola, e ui atu ai le faitaulaga sili i le veli o le malumalu ma ulufale atu i le Paia o Paia, lea na te sausauina ai le toto mo se taulaga mo le agasala e togiola ai agasala a le faapotopotoga uma a Isaraelu (tagai Levitiko 16). Ina ua “saeluaina” le ie puipui o le malumalu (masae lua) i le taimi o le maliu o Iesu Keriso (Mataio 27:51), o se faatusa maoae faapea o le Faaola, le Faitaulaga Sili, sa pasi atu i le veli o le oti ma e le o toe mamao ona ulufale atu lea i le afioaga o le Atua [o le Tama]” (Tusi lesona a le Tagata Aoga o le Feagaiga Fou [Church Educational System manual, 2014], 94).
Ata
Elder Bruce R. McConkie
Na aoao mai e Elder Bruce R. McConkie o le Korama a Aposetolo e Toasefululua le mea lea e uiga i le saeluaina o le ie puipui o le malumalu: “Ua faasatauroina nei Keriso; ua faataunuuina le tulafono; ua uma le tisipenisione faa-Mose; ua oo mai le atoaga o le talalelei ma lona malamalama uma ma le mana; ma o lea— ina ia faatino ai i se ala o le a iloa ai e Iutaia uma, ua aveeseina mai le malo mai ia i latou ae tuuina atu i isi—ua saeluaina ai e le Atua le ie puipui o le malumalu ’mai lava i le tumutumu seia oo i lalo.’ Ua matala nei le Paia o Paia i tagata uma, ma o tagata uma foi, e ala i le toto togiola o le Tamai Mamoe, ua mafai nei ona ulu atu i le mea aupito maualuga ma le aupito paia o nofoaga uma, i lena malo lea e maua ai le ola e faavavau. … O sauniga sa faatino e ala i le veli o le malumalu anamua o se faatusa o mea sa tatau ona faia e Keriso, lea ua uma ona ia faia, ua mafai nei e tagata uma ona filifili ia agavaa e ulu atu i le veli i le afioaga o le Alii ina ia maua ai le faaeaga atoa” (Faamatalaga o Mataupu Faavae o le Feagaiga Fou, 1:830; faaopoopo le faatusilima).
Mai le saeluaina o le ie puipui o le malumalu i le maliu o Keriso, ua mafai ai ona tatou aoao faapea ona o le Togiola a Iesu Keriso, ua mafai ai e i tatou uma ona ulu atu i le afioaga o le Atua pe afai tatou te salamo ma tausi a tatou feagaiga.
Tali fesili nei i lau api talaaga mo le suesueina o tusitusiga paia:
Ua mafai faapefea e le Togiola a Iesu Keriso ona tatou toe foi atu ai i le afioaga o le Atua?
O le a le mea e tatau ona tatou faia ina ia agavaa ai e nonofo faatasi ma le Tama Faalelagi e faavavau?
Mataio 27:52–66 o loo aumaia ai nisi faamatalaga e uiga i le mea na tupu ina ua mavae le maliu o Iesu. Matau na tusia e Mataio faapea “ina uamavae le toetu o [Iesu]” (Mataio 27:53; faaopoopo le faatusilima) faapea e toatele tagata amiotonu sa maliliu ma sa toetutu mai ma faaali atu i le toatele o tagata i Ierusalema (tagai foi MF&F 133:54–56).
Ina ua maliu Iesu, sa “faanoi atu [Iosefa le Arimataia] o se soo mauoa, mo le tino o Iesu” (Mataio 27:58; tagai foi Ioane 19:39). Sa aui le tino o le Faaola i se ie mama ma tuu i se tuugamau e anaina e Iosefa le Arimataia, ma sa pupuni le gutu i se maa tele. Ona o le tauanau atu o nisi o faitaulaga sili ma le au Faresaio, o lea na faatonuina ai e Pilato ia tuu ni leoleo e leoleo le tuugamau, ma sa faamauina le maa. E tusa ai ma le Mataio 27:63–64, aisea na mananao ai le au faitaulaga sili ma le au Faresaio e faia lenei mea?
Ua toetu Iesu Keriso ma ua faaali atu i le toatele
E tusa ai ma le Mataio 28:1–5, i le vaveao o le uluai aso o le vaiaso, po o le Aso Sa, sa o atu ai Maria le Makatala ma se tasi fafine e igoa foi ia Maria i le tuugamau. O le Faaliliuga a Iosefa Samita, o le Mataio 28:2 o loo ta’u mai ai na latou vaaia ni agelu se toalua (tagai Mataio 28:2, vaefaamatalaga a).
Ina ua mavae le Toetu o Iesu Keriso, sa tausia e tagata o le Ekalesia ma faapaia le uluai aso o le vaiaso e avea o le aso Sapati, ma iu ai ina le toe faaauauina le tausiga o le aso fitu o le Sapati. O le suiga mai le tausiga o le aso mulimuli o le vaiaso i le aso muamua o le vaiaso, e le tutusa le taua ma le manatu faavae ma le mataupu faavae o le Sapati.
Faitau le Mataio 28:6–7, ma vaavaai mo mea na ta’u atu e agelu i fafine.
I le Mataio 28:8–10, 16–18, ua tatou faitau ai faapea na o atu fafine ma ta’u atu i soo le mea sa latou vaai ma faalogo i ai. I luga o le ala, sa faaali atu Iesu ia i la’ua, ona “fetagofi atu lea [o fafine] i ona vae, ma ifo mai ia te ia” (Mataio 28:9). Mulimuli ane, ina ua usitai le au soo i le tala a fafine ma malaga atu i Kalilaia, sa faaali atu foi le Faaola ia i latou. Ina ia aoao e uiga i isi taimi na faaali atu ai Iesu a o lei oo i Lona Afio Ae, tagai i le Ogatusa o Evagelia.
Faitau le Mataio 28:19–20, ma vaavaai mo mea na poloaiina e le Faaola Ana Aposetolo e fai. (Mataio 28:19–20 o se mau tauloto. (Atonu e te manao e faailoga i se ala e iloagofie ai.)
O se tasi mataupu faavae e mafai ona tatou aoao mai le poloaiga a le Faaola i Ana Aposetolo o le a o tatou maua se molimau ia Iesu Keriso, ua ia i tatou se tiutetauave e molimau atu i isi e uiga ia te Ia.
Faauma galuega atofaina nei i lau api talaaga mo le suesueina o tusitusiga paia:
Lisi ia le itiiti ifo i le tolu ni auala e mafai ona tatou molimau atu ai i isi e uiga ia Iesu Keriso. Ona filifili lea o se tasi o ala i lau lisi, ma tusi se sini e tusa ai pe faapefea ona e saili e molimau atu ia Iesu Keriso i isi.
Tali fesili nei: Mafaufau i le mea na fetalai ai le Faaola i le Mataio 28:19–20, o le a se mea e mafai ona e fai e saunia ai e faamisiona?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mataio 27-l28 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: