Iunite 31: Aso 2
Faaaliga 4–5
Folasaga
I se faaaliga vaaia, na vaai ai Ioane i ni tagata faamamaluina o loo tapuai i le Tama Faalelagi a o afio o Ia nofo i Lona nofoalii. Na ia vaaia foi se tusi o loo faamaufaailogaina i ni faamaufaailoga e fitu ma le Tamai Mamoe, po o Iesu Keriso, o le ua agavaa e tatala le tusi.
Faaaliga 4
Ua vaai Ioane i ni tagata faamamaluina o loo tapuai i le Tama Faalelagi
Vaaifaalemafaufau i le i ai i le malo selesitila. E faapefea ona e faaataina le malo selesitila? O le a sou manatu pe o le a faapei?
E pei ona faamaumauina i le Faaaliga 4–5, na vaai le Aposetolo o Ioane i se faaaliga vaaia o se vaega o le malo selesitila.
-
Faitau le Faaaliga 4:1–8. I lau api talaaga mo le suesueina o tusitusiga paia, tusi se ata faigofie o le mea na vaai i ai Ioane. Ia matau o le “a’u i le agaga” (fuaiupu 2) o lona uiga o le i ai i se tulaga faafaaaliga po o le vaai i se faaaliga vaaia e ala i le agaga.
I le Faaaliga 4:3 sa tusia e Ioane e faapea, o le vaai atu i le Tama Faalelagi sa “pei o le maa iasepi ma le salikea.” Na faamalamalama mai e Elder Bruce R. McConkie o le Korama a Aposetolo e Toasefululua:
“I le taumafai ai e faamaumau le malamalama o le tagata i le maoae, mamalu, ma le matagofie o le Silisili o Silisili Ese, ua faatusa ai e Ioane lona foliga mai i maa mauagata ma maa taatele. O le iasepi o loo taua e talitonuina e le au faasalalau o se taimane. …
“… E mafai faapefea ona maua e perofeta faaletino ona maua gagana e faailoa mai ai i le vaaiga a o latou uso i le tino le maoae ma le lemafaatusalia o le matagofie o lena lalolagi faavavau e malosi ma mamalu faaselesitila? Latou te talanoa mai e uiga i nuanua ma maa taua, o afi mumu faataamilomilo, o malala mumu o le afi ma uila e feemo mai ai; latou te tala mai i faititili ma leo, o le leo o vai e tele o loo tatafe, ma e uiga i vaaiga ofoofogia o le malosi ma le matagofie—o nei mea uma o se taumafaiga e tusi i ni upu faaletino na mea e na o le mana lava o le Agaga e mafai ona vaaia ma iloa ai. (Esek. 1 ma le 10; Isa. 6.) Ae ia viia le Alii ona sa latou faia na taumafaiga ina ia mafai e i latou e lei vaai ma faalogo i ai ona maua se malamalamaaga itiiti o mea o loo natia i tua o pupuni o le lagi” (Doctrinal New Testament Commentary, 3 vols. [1965–73], 3:464–66).
O faaaliga i ona po nei e fesoasoani ia te i tatou e malamalama atili ai e uiga i mea sa vaaia e Ioane. Mo se faataitaiga, na tuuina mai e le Alii le faaaliga o loo faamaumauina i le Mataupu Faavae ma Feagaiga 77 ina ua uma ona fesili atu le Perofeta o Iosefa Samita ia te Ia e faamatala mai nisi o faatusa ma mea e tutupu o loo faamaumauina i le Faaaliga 1–11.
-
|
O Mea na Vaaia e Ioane |
Mau Fesootai |
Faamatalaga Faaopoopo |
|---|---|---|
|
Nofoalii (Faaaliga 4:2–3) | ||
|
Toeaina e luasefulufa ma [o latou] pale (Faaaliga 4:4) | ||
|
Agaga e Toafitu o le Atua (Faaaliga 4:5) |
Faaliliuga a Iosefa Samita, Faaaliga 4:5 (i le Faaaliga 4:5, vaefaamatalaga a). | |
|
Sami tioata (Faaaliga 4:6) | ||
|
Meaola [manufeai] e fa (Faaaliga 4:6–7) | ||
|
O mata ma apaau o mea ola (Faaaliga 4:8) | ||
Faitau le Faaaliga 4:8–11, ma vaavaai po o le le tala ma mea na fai e i latou na faapotopoto faataamilo i le Tama Faalelagi.
O le a le mea e mafai ona faatusa i ai toeaina na lafo o latou pale i luma o le nofoalii o le Tama Faalelagi?
O se tasi o mataupu faavae tatou te aoaoina mai i nei fuaiupu o le, a tatou iloa le silisili ese o le Tama Faalelagi, tatou te mananao ai e tapuai ma viia o Ia.
Mafaufau po o le a le mea e mafai ona fesoasoani ia i tatou e iloa ai le silisili ese o le Tama Faalelagi.
I le po nei, ae lei faia lau tatalo, mafaufau i le fuafuaga tele o le fiafia ma pe o faapefea ona faamanuiaina oe e le Tama Faalelagi. Ao e tatalo, manatua e faafetai faapitoa atu ia te Ia mo mea uma lava ua Ia faaamanuiaina ai oe.
Faaaliga 5
Ua vaaia e Ioane se tusi ua faamaufaailogaina i faamaufaailoga e fitu ma le Tamai Mamoe, o le e agavaa e tatalaina
Faitau le Faaaliga 5:1–4, ma vaavaai po o le a se mea na vaaia e Ioane i aao o le Tama Faalelagi.
Ia matau o le tusi, po o tusitaai, lea sa vaaia e Ioane na faamaufaailogaina i faamaufaailoga e fitu. I aso anamua, o pepa faamatalaga taua na faamauina i kelei po o gao faapipii. E na o le e anaina le pepa faamatalaga ma i latou na faatagaina e le pule na mafai ona tatalaina faamaufaailoga ma faitau upu.
Faitau le Mataupu Faavae ma Feagaiga 77:6–7, ma vaavaai mo le faauigaina o le tusi ma faamaufaailoga.
O le 7,000-tausaga o le piriota o le “olaga faaletino” o le lalolagi (MF&F 77:6) e faatatau i le vaitaimi talu mai le Pau o Atamu ma Eva. E le o faatatau i le matua tonu o le lalolagi, e aofia ai periota o le foafoaga. O faamaufaailoga taitasi e faatusa i se periota o le 1,000 tausaga.
E tusa ai ma le Faaaliga 5:2, o a ni agavaa ma manaomia e se tagata ina ia mafai ona tatalaina le tusi?
Matau na tagi Ioane ina ua ia vaai atu e leai se tasi e mafai ona tatalaina le tusi. Atonu na manatu o ia, o “finagalo faaalia, mealilo, ma … galuega” a le Atua (Mataupu Faavae ma Feagaiga 77:6) e faatatau i le faaolataga o Lana fanau, o le a le faaalia mai pe faataunuuina. O le a se mea o le a tupu i fanau a le Tama Faalelagi pe afai o Lana fuafuaga mo le latou faaolataga o le a le faataunuuina.?
Faitau le Faaaliga 5:5–7, ma vaavaai pe aisea na tau atu ai ia Ioane e aua le tagi. Faitau foi le Faaliliuga a Iosefa Samita, Faaaliga 5:6 (i le Faaaliga 5:6, vaefaamatalaga e). I tusitusiga paia, o seu e tele lava ina faatusa i le mana po o le pule; o mata e masani ona faatusa i le malamalama ma le poto; ma le numera sefululua e mafai ona faatusa i se malo ma se faalapotopotoga paia, po o le perisitua.
O le faalagiga “Tamai Mamoe” (Faaaliga 5:6) e faasino i le matafaioi a Iesu Keriso o se taulaga foai lea sa tuuina mai e togiola mo le fanau a le Atua (tagai foi i le Isaia 53:7; 1 Korinito 5:7; 1 Peteru 1:18–19). O le fuaitau “o le Tamai Mamoe e peiseai na fasia” (Faaaliga 5:6) e faatatau i le Tamai Mamoe o loo faaali mai ai ni faailoga ua fasia. Sa faatatau atu Ioane le papatiso i le Faaola “o le Tamai Mamoe a le Atua” (Ioane 1:29, 36).
Faitau le Faaaliga 5:8–10, ma vaavaai pe na faapefea ona viia e tagata o loo siomia le nofoalii o le Tama Faalelagi le Tamai Mamoe.
E tusa ma le mea na vaai ma faalogo i ai Ioane e faatatau i le Tamai Mamoe, tatou te aoao mai ai e faapea, E nao Iesu Keriso lava e agavaa ma mafai ona faaolaina i tatou.
Aisea e te manatu ai e nao Iesu Keriso lava e agavaa ma mafai ona faaolaina i tatou?
E tusa ai ma le Faaaliga 5:10, o i latou e faaolaina e Iesu Keriso e avea ma tupu ma faitaulaga, e aofia ai ma tamaitai o ni masiofo ma ni faitaulaga tamaitai.
Faitau le Faaaliga 5:11–14, ma vaavaai pe faapefea ona faatasi atu isi i le tapuaiga ma viiviiga o Iesu Keriso ma le Tama Faalelagi.
O tagata faamamaluina ma foafoaga uma na iloaina le agalelei o le Tama Faalelagi ma Iesu Keriso, ma lagona le loto faafetai mo le matafaioi a le Tamai Mamoe i le fuafuaga a le Tama Faalelagi. O lea, na latou tapuai ma vivii ai i le Tama ma le Alo. E faapena foi, ao tatou iloa ma lagona le loto faafetai mo mea na faia e le Tama Faalelagi ma Iesu Keriso mo i tatou, tatou te mananao foi e tapuai ma vivii ia i Laua.
Sa aoao mai e Elder Bruce R. McConkie le mea lenei e uiga i le tapuaiga: ”O le tapuaiga moni ma le atoatoa e aofia ai le mulimuli i laasaga o le Alo o le Atua; e aofia ai le tausiga o poloaiga ma le usitaia o le finagalo o le Tama i le tulaga lea tatou te siisii atu ai mai lea alofa tunoa i lea alofa tunoa seia iu ina faamamaluina i tatou ia Keriso e faapei ona i ai o ia i lona Tama. E matuai sili atu nai lo le tatalo ma lauga ma pese. O le ola ai ma le faia ma le usiusitai. O le faaaoao i le soifuaga o le Faataitai sili [Iesu Keriso]” (“Pe Faapefea Ona Tapuai,” Ensign, Dec. 1971, 129, 130).
-
-
Lisi nisi o mafuaaga e te lagona ai le loto faafetai ma lou alofa i le Tama Faalelagi ma Iesu Keriso.
-
E faapefea ona aafia lou manao e tapuai ma vivii i le Tama Faalelagi ma Iesu Keriso i mea na e lisiina?
-
Mafaufau e uiga i le fesili lenei: O a nisi mea e te mafai ona e faia e tapuai atu ai i le Tama Faalelagi ma Iesu Keriso? Fai se fuafuaga, ma galue i uunaiga e te maua.
-
Ua ou suesueina le Faaaliga 4–5 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: