Sa vaai le Aposetolo o Ioane i se faaaliga vaaia i le Tamai Mamoe a le Atua o loo tatalaina ia faamaufaailoga muamua e ono o le tusi na faamaufaailogaina. I le faamaufaailoga lona ono, lea e faatusa i le tisipenisione lenei o aso e gata ai, sa vaaia e Ioane auauna a le Atua o e na “ta foi o latou ofu, ma ua faasinasinaina o latou ofu i le toto o le Tamai Mamoe” (Faaaliga 7:14).
Sa vaaia e Ioane le Tamai Mamoe a le Atua o loo tatalaina faamaufaailoga muamua e ono o le tusi na faamaufaailogaina
O a nisi o popolega po o atugaluga atonu o loo ia te oe po o tagata e te iloa e uiga i le ola i aso e gata ai?
Ata
Perofeta o Iosefa Samita
Na aoao mai le Perofeta o Iosefa Samita e uiga i lagona o perofeta anamua e uiga i o tatou aso: “O le fausia o Siona o se faamoemoega lea na mafua ai le fiafia o le nuu o le Atua i augatupulaga uma; o se autu lea na soifua ai ma se fiafia maoae ia perofeta, faitaulaga ma tupu; sa latou tulimatai mai ma le naunautaiga fiafia i vaitaimi o loo tatou ola ai; ma faatasi ai ma le faaosofia i faanaunauga faalelagi ma le fiafia, na latou pepese ma tusitusi ma vavalo ai e uiga i lenei vaitaimi”Aoaoga a Peresetene o le Ekalesia: Iosefa Samita[2007], 186).
Aisea e te manatu na oo ai lagona faapenei i perofeta anamua e uiga i o tatou aso?
O le Aposetolo o Ioane, na igoa foi o Ioane le Talifaaaliga, o se tasi lea o perofeta sa iloa mea e tutupu i aso e gata ai ma vavalo e uiga i o tatou aso ma le olioli naunautai. A o e suesue i le Faaaliga 6–7 vaavaai mo upumoni e mafai ona faamafanafanaina ai oe ma i latou e te iloa e uiga i mea e tutupu i aso e gata ai.
Manatua, o loo tusia i le Faaaliga 5:1–5 e faapea, na vaai Ioane i se tusi e fitu ona faamaufaailoga e fitu lea e na o le Tamai Mamoe lava a le Atua na agavaa e tatalaina. I lana faaaliga, sa vaai ai Ioane i vaaiga faafaatusa o nisi o mea maoae e tutupu e faatatau i periota e 1,000 tausaga taitasi na faatusaina e faamaufaailoga e fitu.
I lau api talaaga mo le suesueina o tusitusiga paia, tusi ai se ata faigofie e faaali ai mea e tutupu o faamaufaailoga muamua e lima, o loo maua i mau o taua i lalo. A o e faitau i faamaufaailoga taitasi, mafaufau po o a uiga o nisi o nei faailoga.
E ui lava e lei faaali mai e le Alii uiga o nisi o faailoga o loo maua i tusitusiga paia, [ae] ua Ia faaali mai uiga o le tele o ia faailoga e ala i Ana perofeta. A o e suesue i tusitusiga paia ma i ai au fesili, e mafai ona e vaavaai i faamatalaga faaperofeta e iloa ai po o le a se tala mai a taitai o le Ekalesia e uiga i ni fuaitau faapitoa. O faamatalaga i le siata o loo avatu faatasi ai e mafai ona fesoasoani ia te oe e te malamalama i nisi o faailoga o loo maua i le Faaaliga 6:1–11 e faatatau i le tatalaina o faamaufaailoga muamua e lima.
Faamaufaailoga muamua
(E tusa o le 4000 i le 3000 T.L.M)
Solofanua sinasina = Manumalo
Aufana = Taua
Palealii = Tagata e Faatoilaloa
Na fautuaina mai e Elder Bruce R. McConkie o le Korama a Aposetolo e Toasefululua e faapea, o leFaaaliga 6:1–2 o loo faamatala mai ai aso o Enoka ma o le o loo tietie [i le solofanua] o Enoka (tagai Doctrinal New Testament Commentary, 3 vols. [1966–73], 3:476–78).
Faamaufaailoga lona lua
(E tusa o le 3000 i le 2000 T.L.M)
Solofanua mumu = Totomasa’a
Pelu = Taua ma le faaumatiaga
Sa fautuaina mai e Elder McConkie e faapea, o le Faaaliga 6:3–4 o loo faamatala mai ai aso o Noa, ina ua lofia le lalolagi i le amioleaga. O le o loo tietie i le solofanua mumu e mafai ona faapea o le tiapolo lava ia pe, atonu, “o se tagata ua faatusa i ai le tele o fitafita fasioti tagata” (tagai Doctrinal New Testament Commentary, 3:478–79).
Faamaufaailoga lona tolu
(E tusa o le 2000 i le 1000 T.L.M)
Solofanua uliuli = Oge
Fua faatautau = Maualuga o le tau mo meaai
Sa fautuaina mai e Elder McConkie e faapea, o le Faaaliga 6:5–6 o loo faamatala mai aso o Aperaamo, lea na maliliu ai le toatele i le fiaaai (tagai Doctrinal New Testament Commentary, 3:479–80). E mafai e se tagata ona faatau mai na o meaai e lava e ola ai i se totogi o le aso atoa, e faailoa mai ai le maualuluga o tau o le oge.
Faamaufaailoga lona fa
(E tusa o le 1000 T.L.M i le soifua mai o Keriso)
Solofanua efuefu = Oti
Oti ma seoli = Faaumatiaga o e amioleaga ma le latou ulufale atu i le falepuipui o Agaga (tagai Isaia 5:14)
Sa fautuaina mai e Elder McConkie e faapea, o le Faaaliga 6:7–8 e faatatau i le taimi o “na malo ma atunuu tetele o a latou taua ma vaega taufaasese sa faatiga ma solia [Isaraelu]” (tagai Doctrinal New Testament Commentary, 3:481). O nei atunuu e aofia ai Papelonia, Peresia, Aikupito, Asuria, Eleni, ma Roma.
Faamaufaailoga lona lima
(Pe tusa o le soifua mai o Keriso T.A. 1000)
Fata faitaulaga = Taulaga
Agaga = Au Maturo, Kerisiano na fasiotia ona o o latou talitonuga
Sa fautuaina mai e Elder McConkie e faapea, o le Faaaliga 6:9–11 e faatatau i le toatele o Kerisiano anamua, e aofia ai le tele o uluai Aposetolo, o e na maliliu o ni maturo (tagai Doctrinal New Testament Commentary, 3:482–83). Ona sa tuuina atu e nei Au Paia o latou soifua “mo le upu a le Atua, ma mo le molimau na latou umia” (Faaaliga 6:9), na tuuina atu ia i latou “ofu sisina” (Faaaliga 6:11), e faatusa i le mama (tagai Faaaliga 7:13–14; 3 Nifae 27:19).
O le faamaufaailoga lona ono e faatusa i o tatou taimi ma mea e tutupu, aemaise lava i fevesiaiga, e tau atu i le Meleniuma, lea o le a nofotupu ai lava Iesu Keriso i le lalolagi (tagai Bruce R. McConkie, Doctrinal New Testament Commentary, 3:485–86).
Faitau le Faaaliga 6:12–17, ma vaavaai mo mea e tutupu na muai vaaia e Ioane i o tatou aso e tau atu i le Afio Mai Faalua o le Alii. Ia faitau foi le Faaliliuga a Iosefa Samita, Faaaliga 6:14 (i le Faaaliga 6:14, vaefaamatalaga a).
Matau o le Faaaliga 6:16 o loo faamatala mai ai le naunautai o nisi o tagata e taumafai e sosola ese mai le toasa o le Atua. Ona tuuina mai lea e Ioane o le fesili, “O ai foi se na te mafaia ona tu atu?” (Faaaliga 6:17). O le Faaaliga 7 e fesoasoani tatou te malamalama ai po o ai o le a mafai ona tu atu, pe onosaia, faalavelave o le faamaufaailoga lona ono.
Sa vaai Ioane i auauna a le Atua o e na tata o latou ofu i le toto o le Tamai Mamoe
Faitau le Faaaliga 7:1–4, ma vaavaai po o a nisi mea na vaaia e Ioane i le faamaufaailoga lona ono. Faitau foi le Mataupu Faavae ma Feagaiga 77:8–11, lea o loo faamalamalama mai ai e le Alii le uiga o nei fuaiupu.
Ata
Elder Bruce R. McConkie
Sa faamalamalama mai e Elder Bruce R. McConkie e faapea, o le upu Elaia, e pei ona maua i le Mataupu Faavae ma Feagaiga 77:9, o se “igoa ma se faalagiga mo i latou o o latou misiona o le tuuina atu o ki ma mana i tamalii o lenei tisipenisione mulimuli” (Mormon Doctrine, 2nd ed. [1966] 221).
O nisi o tamalii na o mai e tuuina mai ki ma mana o Atamu; Moronae; Ioane le Papatiso; Peteru, Iakopo, ma Ioane; Mose; ma Elia.
O le faamaufaailoga po o le faailoga o “auauna a lo tatou Atua i o latou muaulu” (Faaaliga 7:3) o se faatusatusaga o le latou tuuto, auaunaga, ma le anaina e le Atua.
Ata
Perofeta o Iosefa Samita
Sa aoao mai le Perofeta o Iosefa Samita e faapea, o le faamaufaailogaina o le au faamaoni i o latou muaulu “o se faailoga o le faamaufaailogaina o faamanuiaga i luga o o latou ulu, o lona uiga o le feagaiga tumau faavavau, o lea e mautinoa ai o latou valaauga ma tofi” (i le History of the Church, 5:530).
O le numera 144,000 o loo taua i le Faaaliga 7:4 “o se numera o sui mai ituaiga e sefululua o Isaraelu o le a faauuina e fesoasoani i isi mo le latou malaga mo le faaeaga. … E le o le aofaiga atoa o tagata o e o le a faaeaina, e pei ona talitonu ai isi” (New Testament Student Manual [Church Educational System Manual, 2014], 544).
E pei ona tusia le Faaaliga 9, na toe taua foi e Ioane ia nei auauna amiotonu. Faitau le Faaaliga 9:3–4, ma vaavaai mo le mea o le a tupu ia i latou o e e lei faamauina o ni auauna a le Atua.
Faitau le Faaaliga 7:9–10, ma vaavaai po o ai na vaai i ai Ioane. Matau po o a mea na ofuina e nei tagata.
E pei ona faamaumauina i le Faaaliga 7:11–12, sa vaai Ioane i nei tagata, faatasi ai ma toeaina e 24 ma manu feai e fa na taua i le Faaaliga 4, na siomia le nofoalii o le Atua ma tapuai ia te Ia.
Faitau le Faaaliga 7: 13-17 , ma vaavaai mo tali i fesili nei: Atonu e te manao e maka pe faailoga mea ua e maua.
O le a le mea na onosaia e nei tagata?
Na faapefea ona sisina o latou ofu?
O a faamanuiaga o le a latou maua?
Matau o ofu o tagata na “faasinasinaina … i le toto o le Tamai Mamoe” (Faaaliga 7:14), ua faatusa i tagata ua faamamaina e ala i le Togiola a Iesu Keriso. O faamanuiaga i fuaiupu 16–17 e faamatala ai le olioli, filemu, ma le tuuto o i latou o e mautofi i le mamalu faaselesitila (tagai foi MF&F 138:12–15).
E mafai ona tatou aoao mai i nei fuaiupu, afai tatou te onosaia faigata ma le faamaoni ma mama e ala i le Togiola a Iesu Keriso, o le a tatou olioli i le mamalu selesitila faatasi ma le Atua.
Mafaufau pe o le a faapei ma po o a ni ou lagona i le mafai ona tu ma le mama i le afioaga o le Atua. E faapefea ona faatusatusa nei lagona i lagona o tagata o loo faamatalaina i le Faaaliga 6:16?
Tali fesili nei i lau api talaaga mo le suesueina o tusitusiga paia:
O a ni mea e ao ona tatou faia ina ia mafai ona faamama i tatou e le Faaola e ala i Lana Togiola?
E faapefea e le manatuaina o faamanuiaga o le mamalu selesitila ona fesoasoani ia te oe i au taumafaiga ia onosaia faigata ma ia mama?
Toe iloilo le lisi o atugaluga sa e tusia i le amataga o le lesona. Mafaufau pe mafai faapefea ona fesoasoani le mataupu faavae na faailoa mai i le Faaaliga 7 pe a e lagona le popole e uiga i le ola i aso amuli.
Atonu e te manao e faaalu ni nai minute e mafaufau loloto ai ma tatalo i lou loto pe faapefea ona e faaaogaina nei mataupu faavae i lou olaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Faaaliga 6–7 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: