Iunite 32: Aso 2
Faaaliga 14–16
Folasaga
I se faaaliga, na vaai ai Ioane i se agelu ua sau i le lalolagi e toefuatai mai le talalelei a Iesu Keriso i aso e gata ai. Na ia faalogoina foi se siufofoga mai le lagi o faamatala mai faamanuiaga e olioli ai i latou o e oti a o faamaoni i le Alii. Sa vaai Ioane i le faapotopotoina o e amiotonu ma le faapotopotoina o e amioleaga i aso e gata ai, ma faamasinoga a le Atua o loo liligi mai i luga o e amioleaga.
Faaaliga 14
Sa vaai Ioane i le toefuataiina o le talalelei ma le faapotopotoina o e amiotonu ma e amioleaga
Sa manatunatu nisi o tagata pe faamata e mafai ona lagona le filemu i se lalolagi ua faatumulia i amioleaga, faalavelave, ma vevesi. Mafaufau e uiga i se upu atonu e te fai atu ai i nei tagata.
A o e suesue i le Faaaliga 14–16, vaai mo upumoni e mafai ona aumaia ia te oe le filemu, e ui ina o e nofo i se lalolagi e tumu i le amioleaga, faalavelave, ma vevesi.
I le Faaaliga 14:1–13 tatou te faitau ai na vaai Ioane i se faaaliga o aso e gata ai, po o tatou aso. I lana faaaliga na ia vaai ai i mala o le a oo mai i luga o e amioleaga. Na ia vaaia foi le mea o le a aumaia le filemu i e amiotonu i o tatou aso.
Faitau le Faaaliga 14:1–5, ma vaavaai po o ai na vaai i ai Ioane o tutu ma le Faaola “i le mauga o Siona” (Faaaliga 14:1), po o Siona.
Atonu e te manatua le aoao ai o le 144,000 na taua i le fuaiupu 1 o faitaulaga sili o ituaiga e sefululua o Isaraelu mai atunuu uma ma ua faauuina e aumaia tagata “i le ekalesia a le Ulumatua” (MF&F 77:11; tagai i le Faaaliga 7:4–8). O le fuaitau “e lei leaga i fafine” (Faaaliga 14:4) o lona uiga o le a latou nofomama, po o le ola mama. I le Faaaliga 14:5 o le fuaitau “e le iloa foi se pepelo i o latou gutu” o lona uiga, o le a latou amiosao ma faamaoni, ae o le fuaitau “e le pona” o lona uiga o le a latou mama mai agasala.
-
Tali le fesili lenei i lau api talaaga mo le suesueina o tusitusiga paia: Aisea e te manatu ai o le amiosao, faamaoni, ma le mama mai agasala o le a fesoasoani i faitaulaga sili e 144,000 e avatu le talalelei i isi?
I le taimi o le faaaliga a Ioane e uiga i aso e gata ai, sa ia vaai ai i isi agelu e toatolu. Faitau le Faaaliga 14:6, ma vaavaai po o le a le mea sa i ai i le agelu muamua.
Ina ua uma ona ia sii maia leFaaaliga 14:6, sa folafola mai Peresitene Gordon B. Hinckley e faapea: “O lena agelu ua sau. O lona igoa o Moronae” (“Tumau i le Ala—Taofimau i le Faatuatua,” Ensign, Nov. 1995, 70).
Na faaali muamua le agleu o Moronae ia Iosefa Samita ma tau atu ia te ia o loo i ai se galuega taua a le Atua mo ia e fai (tagai Talafaasolopito--Iosefa Samita 1:29–35). E tusa ma le Talafaasolopito—Iosefa Samita 1:34, i lalo o le taitaiga a le Atua, o le a le mea na tau atu e Moronae ia Iosefa Samita na fesoasoani e toefuatai mai ai le talalelei tumau faavavau i le lalolagi ?
O le iloaina o le matafaioi a Moronae i le Toefuataiga e mafai ona fesoasoani e te malamalama ai i le pogai e tuu ai lona faatagata i luga o le tele o a tatou malumalu.
O le agelu na faamatalaina i le Faaaliga 14:6 e mafai foi ona faatusa i se tuufaatasiga o le tele o au avefeau faalelagi, e aofia ai Moronae, lea na fesoasoani e toefuatai mai le talalelei a Iesu Keriso i aso e gata ai (tagai i le Bruce R. McConkie, Doctrinal New Testament Commentary, 3 vols. [1965–73], 3:529–31; tagai foi i le MF&F 13; 110:11–16; 128:20–21).
Faitau le Faaaliga 14:7, ma vaavaai po o le a le mea na fai mai ai le agelu. O le fuaitau “ua oo mai le ituaso o lana faamasinoga” e faatatau i le taimi o le a faamasino ai e le Faaola tagata uma o le lalolagi. O Lana faamasinoga o le a faia i le Afio Mai Faalua ma i le Faamasinoga Mulimuli.
Mai le faaaliga a Ioane e uiga i le agelu, ua tatou aoao ai, o se tasi o mafuaaga na toefuatai mai ai e le Atua le talalelei a Iesu Keriso, ina ia saunia ai tagata o nonofo i le lalolagi mo le Afio Mai Faalua o Iesu Keriso.
O a ni auala e saunia ai e le talalelei a Iesu Keriso tagata mo Lona Afio Mai Faalua?
O a ni auala ua aumaia ai e le talalelei toefuataiina a Iesu Keriso ia te oe le filemu a o e ola ai i se lalolagi amioleaga ma gaogaosa?
Faitau le Faaaliga 14:8–11, ma vaavaai po o a mea na fai mai ai le agelu lona tolu ma le lona fa.
Sa aoaoina Ioane o Papelonia, po o le amioleaga, o le a i ai i atunuu uma. O se tasi o uiga o le fuaitau “ua pau Papelonia” (Faaaliga 14:8) o le, o le a oo mai le aso o le a uma ai le amioleaga o le lalolagi.
Mafaufau pe mafai faapefea e lou iloa o le a uma le amioleaga o le lalolagi ona aumaia le filemu ia te oe.
Sa faamalamalama mai e le Perofeta o Iosefa Samita mea o le a oo i e amioleaga pe a latou oti.
“O le tiga matautia o agaga ua o ese atu i le lalolagi o agaga, le mea latou te o atu i ai pe a mavae le oti, o le iloa lea ua latou le maua le mamalu ua fiafia ai isi ae sa ono mafai ona o latou fiafia ai foi, ma o i latou lava e tuua’ia” (Aoaoga a Persitene o le Ekalesia: Iosefa Samita [2007], 231).
“O le tagata o ia o lona lava faapologa ma lona faasalaga. E pei o le faamatalaga, E tatau ona latou o atu i le lepa e mu ai le afi ma le teio [tagai Faaaliga 21:8] O le tiga o le le fiafia i le mafaufau o le tagata, e manino e pei o se lepa ua mu i le afi ma le teio” (Aoaoga: Iosefa Samita, 231).
I le maea ai o le iloaina o le mea o le a oo i e amioleaga pe a oti, sa faalogoina e Ioane se leo mai le lagi o loo faamatala mai le mea o le a oo i e amiotonu pe a latou oti.
Faitau le Faaaliga 14:12–13, ma vaavaai mo le mea o le a oo i e amiotonu pe a latou oti.
O le “[tatou] malolo ai mai galuega” (fuaiupu 13) pe a tatou oti, o lona uiga o le a le toe fai ma ni avega ia faalavelave, popolega, ma le faanoanoa (tagai Alema 40:12).
O se tasi o mataupu faavae e mafai ona tatou aoaoina mai le Faaaliga 14:12–13 o le, afai tatou te ola amiotonu, o le a faapea ona faamanuiaina i tatou mo a tatou galuega ma malolo mai ia tatou galuega pe a tatou oti. Atonu e te manao e tusi pe faamau lenei mataupu faavae i au tusitusiga paia i autafa o le Faaaliga 14:12–13.
-
Tatou te faitau i le Faaaliga 14:14–20 e faapea, i lana faaaliga sa vaai ai Ioane i ni seleselega se lua. Na ia vaaia, i le taimi o le seleselega muamua o le a faapotopoto ai e amiotonu mai e amioleaga (tagai Faaaliga 14:14–16) ma i le taimi o le seleselega lona lua o le a faapotopoto ai e amioleaga ma faaumatia mulimuli ane ai (tagai Faaaliga 14:17–20).
Faaaliga 15–16
Sa vaai Ioane i e amiotonu i le malo o selesitila ma mala e fitu i aso e gata ai
O le Faaaliga 15:2–4 o loo i ai le faamatalaga faaopoopo a le Aposetolo o Ioane i le tulaga o le a i ai mo i latou o e faatoilaloina Satani ma faaolaina i le malo selesitila. O le vaega o totoe o le Faaaliga 15–16 o loo i ai lona faamatalaina o mala e fitu o le a faatigaina ai e amioleaga i aso mulimuli. O nei mala o le a muamua mai i le Afio Mai Faalua o le Alii.
I le faaaliga a Ioane, o mala taitasi na faailoa mai e se agelu e liligiina mi fafo o se “fagu laitiiti,” po o se ipu faaofuofu e “tumu i le toasa o le Atua” (Faaaliga 15:7). Faitau ia fuaitau nei mai le Faaaliga 16, ma vaavaai mo mala e fitu. Tusi se faamatalaga puupuu e uiga i mala taitasi i autafa o lona numera fesootai i le siata lenei:
|
| |
|
| |
|
| |
|
| |
|
| |
|
| |
|
|
Faitau le Faaaliga 16:15, ma vaavaai mo mea e mafai ona tatou faia e saunia ai mo le Afio Mai Faalua o Iesu Keriso.
O le fuaitau “ma tausi i ona ofu, ina nei savali o ia e le lavalava” (Faaaliga 16:15) e faatatau i le saunia faaleagaga. O i latou o e “[tausia o latou] ofu” ma ua saunia faaleagaga o le a iu ina oofu i ofu talaloa o le amiotonu e tuuina atu ia i latou uma o e agavaa e mafuta ma le Atua i le malo selesitila (tagai Faaaliga 3:3–5; 7:13–17).
Atonu e te manao e tusi pe faailoga le upumoni lenei i totonu o au tusitusiga paia i autafa o le Faaaliga 16:15: Afai tatou te mataala ma saunia faaleagaga, o le a tatou saunia mo le Afio Mai Faalua o Iesu Keriso.
E taua le manatua, e alofa le Alii i Lona nuu ma o le a leoleo ia i latou i aso amuli, e oo lava i le totonugalemu o le faaumatiaga matautia ma se taua tele. E tatau ona tatou mataala ma saunia faaleagaga ina ia mafai ona tatou maua le puipuiga ma faamanuiaga a le Alii. Afai e te fiailoa atili e uiga i le Amateko o loo taua i le Faaaliga 16:16, tagai i le tusiga i le Bible Dictionary po o le Taiala i Tusitusiga Paia “Amateko.”
-
Ua ou suesueina le Faaaliga 14–16 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu ma lou faiaoga: