Iunite 20: Aso 3
Roma 1–3
Folasaga
Na tusi e le Aposetolo o Paulo se tusi, i le Au Paia i Roma. I lea tusi sa ia folafola atu ai o le talalelei a Iesu Keriso o le mana o le Atua i le faaolataga. Sa ia faamatala faapea ona e agasala tagata uma, o lea e leai ai se tasi e mafai ona faaolaina i a latou lava galuega. E tatau ona faaolaina i latou i le alofa tunoa o le Atua ua mafai ona maua e ala i le Togiola a Iesu Keriso.
O le lisi lea e mafai ona fesoasoani ia te oe e malamalama ai i nisi o upu e faaaoga e Paulo i ana tusi:
Talalelei: “O le ata o le faaolataga a le Atua, ua mafai ona o le Togiola a Iesu Keriso. O le talalelei e aofia ai upumoni po o tulafono, feagaiga, ma sauniga e manaomia e le tagata e toe ulufale atu ai i le afioaga o le Atua” (Taiala i Tusitusiga Paia, “Talalelei,” scriptures.lds.org).
Faaolataga: “Ina ia faaolaina mai le oti faaletino ma le faaleagaga” (Taiala i Tusitusiga Paia,“Faaolataga,” scriptures.lds.org).
Tauamiotonuina: “Ina ia magalo mai se faasalaga ona o le agasala ma iloa ai ua le tausalaina. E tauamiotonuina se tagata i le alofa tunoa o le Faaola e ala i le faatuatua ia te Ia. E faaalia lea faatuatua i le salamo ma le usiusitai i tulafono ma sauniga o le talalelei. O le Togiola a Iesu Keriso ua mafai ai e tagata ona salamo ma tauamiotonuina pe magalo ai mai se faasalaga semanu latou te maua” (Taiala i Tusitusiga Paia, “Tauamiotonuina, Tauamiotonu,” scriptures.lds.org).
Faatuatua: “E pei ona tele ina faaaoga i tusitusiga paia, o le faatuatua o le talitonuga ma le faalagolago ia Iesu Keriso lea e tau atu ai se tagata ina usitai ia te Ia. O le faatuatua e tatau ona taulai atu ia Iesu Keriso ina ia mafai ai ona taitaiina atu se tagata i le faaolataga” (Taiala i Tusitusiga Paia, “Faatuatua,” scriptures.lds.org).
Faamalieina: Toefuataiina (toe faafoi pe fai ia sao); togiola (“E pei ona faaaoga i tusitusiga paia, o le togiola o le mafatia lea i le faasalaga o se aga o le agasala, ma aveesea ai aafiaga o le agasala mai le tagata agasala ua salamo ma mafai ai e ia ona toe faaleleia ma le Atua. O Iesu Keriso ua na o Ia e mafai ona faia se togiola atoatoa mo tagata uma” [Taiala i Tusitusiga Paia, “Atone, Atonement,” scriptures.lds.org].)
Alofa tunoa: “O le mana e mafai ai mai le Atua ua mafai ai e alii ma tamaitai ona maua o faamanuiaga i lenei olaga ma maua le ola e faavavau ma le faaeaga pe a uma ona latou faatinoina le faatuatua, salamo, ma ofoina atu a latou taumafaiga silisili e tausi ai poloaiga. O lea fesoasoani paia po o le malosi e tuuina mai e ala i le alofa mutimutivale ma le alofa o le Atua. E manaomia e tagata soifua uma le alofa tunoa paia ona o le Pau o Atamu faapea foi ia vaivaiga o le tagata” (Taiala i Tusitusiga Paia, “Alofatunoa,” scriptures.lds.org).
Galuega: “O faatinoga a le tagata, pe lelei pe leaga. O le a faamasinoina tagata taitoatasi i ana lava galuega” (Taiala i Tusitusiga Paia, “Galuega,” scriptures.lds.org).
Tulafono: “O poloaiga poo tulafono a le Atua ia e faavae ai faamanuiaga ma faasalaga uma i le lagi ma le lalolagi. O i latou o e usiusitai i tulafono a le Atua e maua ia faamanuiaga folafolaina. …
“O tulafono a Mose [po o ‘le tulafono,’ e pei ona sa faaaogaina e Paulo] o se tulafono sauniuni e aumaia ai alii ma tamaitai ia Keriso” (Taiala i Tusitusiga Paia, “Tulafono,” scriptures.lds.org).
Roma 1:1–17.
O le talalelei a Iesu Keriso o le mana lea o le Atua i le faaolataga
Sa faasoa mai e Elder Larry Echo Hawk o le Fitugafulu sona aafiaga a o talavou ina ua uma ona lesitala i le Faalapotopotoga a le Marini o le Iunaite Setete:
“Sa ou feiloai i lo’u faiaoga o toleniga, o se tagata tomai ma malosi ma tiaa mai taua, ina ua ia kikiina le faitotoa i le faleie tele ma ulufale mai a o leoleoā mai i upu e tumu i upu masoa.
“Ina ua uma lana faalauiloaga taufaafefe, sa ia amata mai le tasi itu o le faleie tele ona faafetaia’ia tagata taitoatasi i ni fesili. E aunoa ma se ‘alofaga, e maua faasolosolo ai lava e le faiaoga o toleniga se mea e faatauemu ai i tagata taitasi, i se gagana leotele ma le masoa. Na agai mai o ia i le laina, faatasi ai ma marini taitasi o tali leotetele atu lana tali e pei ona faatonuina ai: ‘Ioe’ po o le ‘Leai Faiaoga Satini.’ Sa le mafai ona ou iloa lelei atu lana mea sa fai, aua sa faatonuina i matou e tutu sasao ma pupula sao i luma o matou mata. Ina ua oo mai le faasologa ia te au sa mafai ona ou iloaina sa ia toso maia la’u ato tolauapi ma sasaa ese mea na i ai i totonu i luga o lo’u faamalū i o’u tua. Sa ia sagole a’u meatotino ona savali mai lea ina ia ma faafesagai. Sa ou saunia a’u lava mo lana osofaiga. Sa i lona lima lau Tusi a Mamona” (“Come unto Me, O Ye House of Israel,” Ensign po o le Liahona, Nov. 2012, 32).
-
Tali fesili nei i lau api talaaga mo le suesueina o tusitusiga paia:
-
O a ni ou lagona pe ana o e i ai i le tulaga o Elder Echo Hawk?
-
O le a sou manatu o le a le mea o le a faia e le faiaoga o toleniga?
-
Pe na i ai se taimi na e i ai i se tulaga e te popole ai o le a tauemuina ou talitonuga? Afai o lea, o a ia tulaga?
-
A o e suesueina le Roma 1, vaavaai mo upumoni ia e mafai ona fesoasoani ia te oe pe a e feagai ma tauemuga po o sauaga mo ou talitonuga ma tulaga faatonuina.
O le tusi a Roma o se tusi, na tusia e le Aposetolo o Paulo i le Au Paia i Roma ina ua lata i le faaiuga o ana malaga faafaifeautalai. Na ia tusia e sauniuni ai i latou mo lona taunuu atu, e faamanino ai ma puipuia ana aoaoga, ma siitia ai le lotogatasi i le va o tagata o le Ekalesia Iutaia ma Nuuese. Roma—o le laumua o le Malo o Roma—sa faatumulia i filosofia faalelalolagi ma atonu o se nofoaga faigata e talai atu ai le talalelei a Iesu Keriso.
I le Roma 1:1–14 tatou te faitau ai pe na faapefea ona amata e Paulo lana tusi e ala i le molimau atu ia Iesu Keriso ma tau atu ai lona faamoemoe ma le manao e asiasi atu i le Au Paia i Roma.
Faitau le Roma 1:15–17, ma vaavaai mo mea na aoao atu e Paulo ia le Au Paia i Roma e uiga i le talalelei a Iesu Keriso.
O loo aoao mai e nei fuaiupu le upumoni lenei: O le talalelei a Iesu Keriso o le mana lea o le Atua i le faaolataga o i latou uma o e faatinoina le faatuatua ia Iesu Keriso. Mafaufau e faailoga ia fasifuaitau o loo aoao mai ai lenei upumoni i le Roma 1:15–17.
Ua aoao mai e le talalelei ia i tatou le ala e mafai ai ona faasaoina i tatou mai le oti faaletino ma le faaleagaga ma foi atu i le mamalu o le Atua. E tatau ona faatino lo tatou faatuatua ia Iesu Keriso ina ia tatou maua ai o faamanuiaga o le faaolataga aua na Ia saunia le Togiola, lea e mafai ai ona maua le faaolataga.
“O la Paulo, o le faatuatua [ma le talitonu] ia Iesu Keriso ua le na o se ioega faalemafaufau faatasi ai ma le manatu faapea o Iesu o le Alo o le Atua, ae o le taliaina ma le loto atoa o Iesu Keriso ma le faalagolago ia te Ia o Le sa ofoina atu Ia lava i le Togiola mo a tatou agasala. O lenei faatuatuaga loloto e taitai atu ai i se olaga o le faamaoni, e faaalia i le salamo i agasala, papatisoina, ma le taumafai e ola e faapei ona aoao mai Iesu Keriso (tagai Galuega 16:30–33; Roma 6:1–11; 1 Korinito 6:9–11). ‘O le faatuatua ia Iesu Keriso … e faaalia i se olaga o le usiusitai i tulafono ma sauniga o le talalelei ma le auauna atu ia Keriso’ (Taiala i Tusitusiga Paia, “Faaolataga”; scriptures.lds.org)” (tusi lesona a le Tagata Aoga o le Feagaiga Fou [Church Educational System manual, 2014], 334).
O le mataupu faavae e tasi e mafai ona maua mai le Roma 1:16 o le a o maua e i tatou se molimau o le talalelei a Iesu Keriso e iai le mana e faaola ai i tatou taitoatasi, ona leai lea o se masiasi e faasoa atu i isi.
-
Faitau atili i le aafiaga o Elder Echo Hawk ma le satini o toleniga:
“Sa ou manatu o le a ia faataio mai ia te au; ae sa ia soso mai ma musumusu mai, ‘O oe o se Mamona?’
“E pei ona faatonuina ai, sa ou alaga atu, ‘Ioe, Faiaoga Satini.’
“Sa ou toe manatu foi i se isi mea e sili ona leaga. Ae, sa ia tu ma sii i luga lona lima o loo uu ai lau Tusi a Mamona ma i se leo matua lemu lava sa faapea mai, ‘E te talitonu i lenei tusi?’
“Sa ou toe alaga atu foi, ‘Ioe, Faiaoga Satini.’
“I le taimi lea sa ou mautinoa ai o le a ia faataio mai i ni upu faatiga e uiga i Mamona ma le Tusi a Mamona, ae sa na o lona tu iina ma le filemu. Ina ua mavae sina taimi sa ia savali atu i tua i lou moega ma tuu ma le faaeteete i lalo la’u Tusi a Mamona. Ona ia faaauau lea ona savali e pasi atu ia te au e lei tu ae faaauau (“Come Unto Me, O Ye House of Israel,” 32).
Mafaufau pe faapefea ona avea le tali a Elder Echo Hawk ma faataitaiga lelei o le mataupu faavae o loo aoao mai i le Roma 1:16.
Faitau le vaega o totoe o le saunoaga a Elder Echo Hawk: “Sa ou tuufesili pea pe aisea lava na faasaoina ai au e lena Fitafita Marini malosi i lena aso. Ae ou te faafetai lava ona sa mafai ona ou fai atu e aunoa ma le faatuai, ‘Ioe, o au o se tasi o Le Ekalesia a Iesu Keriso o le Au Paia o Aso e Gata Ai’ ma le ‘Ioe, ou te iloa e moni le Tusi a Mamona.’ O lenei molimau o se meaalofa taua na tuuina mai ia te au e ala mai i le Agaga Paia” (“Come Unto Me, O Ye House of Israel,” 32).
-
-
O anafea na e faaalia ai pe faaalia ai foi e se tasi e te iloa le lototoa ma le le ma e faasoa atu le talalelei a Iesu Keriso?
-
O le a sau molimau i le talalelei a Iesu Keriso?
-
O a ni auala o e faamalosia ai lau molimau i le talalelei? O a nisi mea e mafai ona e faia ia malosi atili ai lau molimau? Tusi se sini e mafai ona e galue ai i lenei vaiaso o le a fesoasoani ia te oe e faamalosia ai lau molimau.
-
Roma 1:18–3:23
Ua agasala tagata uma lava, ma ua le oo i le viiga mai le Atua
I ona po o Paulo, sa saili nisi o Kerisiano o Nuuese e tuusaunoa mai amio le mama po o le agasala e ala i le faamamafaina o le alofa mutimutivale o le Atua ma le amanaiaina Lana faamasinoga tonu aiai. E le gata i lea, o nisi o Kerisiano Iutaia sa talitonu pea e tatau ona tausia le tulafono a Mose mo le faaolataga. Sa saili le Aposetolo o Paulo e faasao nei talitonuga sese uma e lua.
Faitau le Roma 1:22–31, ma vaavaai mo agasala sa faia e Nuuese.
I le Roma 1:25, o le a sou manatu o le a le uiga o le tapuai ma auauna atu i “mea na faia, ua sili atu nai lo Le na Foafoaina”?
O fasifuaitau e pei o le “ua fesui le tu e tatau ma le tu e le tatau” i le Roma 1:26 ma le “ua tuua e i latou le tu e tatau i le fafine” i le Roma 1:27 e faasino i amioga faatauatane ma faatauafafine. Ina ia malamalama atili i le tulaga o le Ekalesia i amioga faatauafafine ma faatauatane, faitau faamatalaga nei:
“O amioga faatautane ma faatauafafine o se agasala matuia. Afai ua e iloa o loo e tauivi ma faatosinaga i le itupa e tasi pe ua tauanauina foi oe e auai i amioga e le talafeagai, saili se fautuaga mai ou matua ma le epikopo. O le a latou fesoasoani ia te oe” (Mo Le Malosi o le Autalavou [tamaitusi, 2011], 36).
“O gaoioiga faatauatane … e feteenai ma faamoemoega o feusuaiga faaletagata soifua (tagai Roma 1:24–32). E femilosai ai sootaga alofa ma taofia ai tagata mai le mauaina o faamanuiaga ia e mafai ona maua i le olaga faaleaiga ma sauniga faaola o le talalelei”Faamaoni i le Faatuatua: O se Tusitaiala o le Talalelei [2004], 30).
“Ua manino le tulaga faaleaoaoga faavae o le Ekalesia: O gaoioiga feusuai e na o le va o se tane ma se fafine ua faaipoipo e tupu ai. Peitai, e le tatau ona faaaogaina lena mea o se tauamiotonuina o le agaleaga. O Iesu Keriso,o le tatou te mulimuli ai, sa manino lava i Lana tausalaga o feusuaiga le mama, ae e lei agaleaga lava. O le mea sa naunau o Ia i ai, o le siitia lea o tagata, ae le o le tauvaleina. …
“E tuueseese e le Ekalesia ia le va o le tosina atu i le itupa e tasi ma amioga. E ui ina faapea atu o lagona ma le lilifa atu i le itupa e tasi e le o se agasala na ola mai ma se tagata, ae o le faia o amioga faatauatane ua feteenai lea ma le ‘aoaoga faavae, e faavae i tusitusiga paia … o le faaipoipoga i le va o se alii ma se tamaitai e taua tele i le fuafuaga a le Foafoa mo le taunuuga e faavavau o Lana fanau’ [‘First Presidency Statement on Same-Gender Marriage’](“Same-Sex Attraction,” topics.lds.org).
Aisea e taua ai mo i tatou le malamalama i aoaoga a perofeta ma aposetolo a le Alii e faatatau i amioga faatauafafine ma le faatauatane?
I le Roma 2:1–3:8 na aoao atu ai e Paulo e faapea o tagata uma lava o le a faamasinoina e tusa ai ma a latou galuega ma sa ia faaali atu ai o le amioletonu o Iutaia e mai lo latou ola i le tulafono a Mose i le vaaiga i fafo ae le o le loto.
Faitau leRoma 3:9–12, 23, ma vaavaai po o ai lea na fai mai Paulo ua aafia i le agasala.
Fuafua e maka i le fuaiupu 23 po o le a le aafiaga o i tatou ona o a tatou agasala.
O se upumoni o loo aoao mai e nei fuaiupu o le o tagata uma e tali atu mo i latou lava e agasala ma e manaomia le faamagaloga a le Atua. E fesoasoani faapefea lenei upumoni tatou te malamalama atili ai pe aisea tatou te manaomia ai Iesu Keriso?
Ao e suesueina pea le Roma 3, vaavaai mo upumoni na aoao mai e Paulo lea e aumaia ai le faamoemoe mai lo tatou tulaga agasala.
Roma 3:24–31
E mafai ona tauamiotonuina tagata ua e ala i le taliaina ma le faamaoni o le Togiola a Keriso
Ina ua uma ona faamatala faapea tatou te agasala uma lava ma o lea tatou te tutu atu ai ma le tausalaina i luma o le Atua aua e le mafai e Ia ona talia le agasala, i le Roma 3:24–31 na aoao atu e le Aposetolo o Paulo le ala e mafai ai ona faatoilalo lena tulaga e ala i le faatuatua i le Togiola a Iesu Keriso. Ina ia malamalama i nei fuaiupu, e manaomia lou malamalama i le uiga o upu nei: tauamiotonuina o lona uiga o le magalo mai le faasalaga o le agasala ma ua tau atu ai le le tausalaina, alofatunoa o le auala faalelagi lea o le fesoasoani po o le malosi e tuuina mai e ala i le alofa mutimutivale ma le alofa o le Atua, ma le faamalieina o lona uiga o le togiola.
Faitau le Roma 3:24–26, e sui ai faauigaga o loo tuu atu i luga. Atonu e te manao e maka i le Roma 3:24 pe faapefea ona tauamiotonuina i tatou, pe tau agavaaina i tatou i le afioaga o le Atua.
O le Faaliliuga a Iosefa Samita o le Roma 3:24 ua suia ai le upu fua i le na o le (tagai Faaliliuga a Iosefa Samita, Roma 3:24 [i le Roma 3:24, vaefaamatalaga a]). E ui e fesoasoani a tatou galuega lelei e faaalia ai lo tatou faatuatua ia Iesu Keriso, ae e le mafai ona tatou maua pe agavaa mo le faaolataga e ala i na galuega, aua e pei ona aoao mai e Paulo i le Roma 3:23, tatou te agasala uma lava, o le mea lea, e le maua ai le faaolataga. Ua na o le alofatunoa lava o le Atua—Lona malosi faalealgi ma le mana e mafaia—e faaolaina ai i tatou.
Matau i le Roma 3:25–26 o i latou o e talitonu ma faatuatua ia Iesu Keriso e tauamiotonuina i le alofatunoa o le Atua. Manatua o upu o le talitonuga ma le faatuatuao lona uiga o le taliaina ma le loto atoa o Iesu Keriso lea e taitai atu ai se tasi e avea ma tagata o Lana Ekalesia faatasi ma se naunau e tausi ana poloaiga ma usitai i sauniga o le talalelei. Mai nei fuaiupu ua mafai ona tatou aoao ai le mataupu faavae lenei: E ala i le taliaina faamaoni o le Togiola a Iesu Keriso, e mafai ai e tagata uma ona tauamiotonuina ma maua le faaolataga.
Mafaufau i lou manaomia o se Faaola, o Iesu Keriso, ina ia maua ai le faaolataga. Tusi ni nai auala e mafai ona e faaalia ai le taliaina faamaoni o le Togiola a le Faaola:
Fuafua e faasoa mai ou lagona ma le molimau ia Iesu Keriso ma Lana Togiola i se tasi e ono manuia ai mai le faalogo e uiga i le Faaola.
I le Roma 3:27–31sa toe faamamafa ai e Paulo e faapea o Iutaia ma Nuuese e tauamiotonuina e ala i le faatuatua ia Iesu Keriso. O le liliu atu ia Iesu Keriso e ala i le faatuatua, latou te faataunuu ai pe “faatuina le tulafono” a Mose (Roma 3:31), lea e faasino ia Keriso.
-
Ua ou suesueina Roma 1–3 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa i lou faiaoga: