Roma 8–11

Folasaga

Na aoao atu le Aposetolo o Paulo e uiga i faamanuiaga e maua mai le toefanauina faaleagaga ma ua gauai atu i le finagalo o le Tama Faalelagi. Na ia aoao atu e uiga i le teenaina e Isaraelu o le feagaiga na osia e le Atua ma Aperaamo ma ana fanau. Na aoao atu e Paulo o le nuu filifilia o le Atua na tele ina fuafuaina e ala i lo latou faamaoni i feagaiga nai lo le gafa, ma sa ia aoao atu e uiga i le aveina atu o le talalelei i Nuuese.

Roma 8

Ua faamatala e Paulo ia faamanuiaga o le toefanauina faaleagaga

E te iloaina se tasi na mauaina mai se mea e tele sona tau pe taua mai se isi tagata? Mo se faataitaiga, o nisi taimi e tuu atu ai e se matua po o se matua o matua se mea e tele sona tau i a latou fanau po o fanau a fanau.

Afai e mafai ona e maua mai ni oa a se tasi, o oa a ai e te filifilia, ma aisea o le a e manao ai i ai?

Mafaufau i faamanuiaga o le a e mauaina pe afai e te maua uma mea o i ai i lo tatou Tama Faalelagi. Ao e suesueina le Roma 8:1–18, vaavaai mo mea e tatau ona tatou faia ina ia avea ai ma suli mo mea uma o i ai i lo tatou Tama Faalelagi.

Faitau le Roma 8:1, 5–7, 13, ma vaavaai mo mea na aoao atu e le Aposetolo o Paulo e uiga i le savavali “i la le tino,” po o le faamatuu atu i le manao natura i le agasala, ma le mulimuli “i le Agaga.”

I nei fuaiupu o loo aoao atu ai Paulo e uiga i uiga faafeagai e lua: o le “loto i la le tino” ma le “loto i la le agaga” (Roma 8:6). O le loto i la le tino o le popole ea i mea faafiafia faaletino,o naunauga, ma tuinanau o le tino faaletino. O le a sou manatu i le uiga o le loto i la le agaga?

O le fuaitau “amio ai i la le tino” (Roma 8:13) o lona uiga aloese poo le aveese o vaivaiga o se tasi, faaosoosoga, ma agasala e fesootai ma o tatou tino faaletino (tagai Roma 8:13, vaefaamatalaga e; Mosaea 3:19). Mai le fuaiupu lenei ua tatou aoao ai afai tatou te mulimuli i le tosinaga a le Agaga, e mafai ona tatou faatoilaloina le faananau atu i le agasala.

Faitau le Roma 8:14–17, ma vaavaai pe na faapefea ona faasino atu Paulo ia i latou o e mulimuli i le Agaga. O le upu atalii i le fuaiupu 14 o lona uiga o fanau e aofia ai ma afafine (tagai MF&F 25:1).

Ua tautala mai tusi paia ia i tatou o “fanau a le Atua” Roma 8:16 i le silia ma le tasi se uiga. Muamua, o tagata soifua uma o se atalii/afafine faapelepele agaga a lo tatou Tama oi le Lagi. Lona lua, ua toe fanauina i tatou o ni fanau a le Atua e ala i se sootaga faalefeagaiga ma Iesu Keriso ina ua tatou salamo, ma papatisoina, ma talia le Agaga Paia.

O le vaetamaina o se mea taatele i le lalolagi o Roma, ma o se manatu faavae e masani ai le aufaitau a Paulo. O se tagata e vaetamaina faaletulafono se tasi e faaee atu i luga o lena tagata aia tatau uma ma avanoa e maua e se tamaitiiti moni na fanaua. O le mea lea, ina ua tatou talia “le Agaga o tamafai” (Roma 8:15) e ala i le ulu atu i le feagaiga o le talalelei, tatou te avea ai ma fanau a le Atua ma “suli faatasi ma Keriso” (Roma 8:17).

I le Tusi a Mamona, sa aoao mai ai foi e le Tupu o Peniamina le ala e mafai ai ona avea i tatou ma “fanau a Keriso” (tagai Mosaea 5:5–10).

Na aoao mai e Peresitene Iosefa Filitia Samita e faapea o Iesu Keriso “ua avea ma o tatou Tama … aua ua ia ofoina mai ia i tatou le ola, e ala i le togiola lea sa ia faia mo i tatou.” Sa ia faamatala, “E avea i tatou ma fanau, atalii ma afafine o Iesu Keriso, e ala mai ia tatou feagaiga o le usiusitai ia te ia” (Doctrines of Salvation, comp. Bruce R. McConkie, 3 vol. [1954–56], 1:29).

Toe faitau le Roma 8:17 O se suli-faatasi o se tasi ua mauaina se tofi tutusa ma isi suli.

Afai ua avea i tatou ma fanau a le Atua. aisea e le otometi ai lo tatou mauaina o se tofi tutusa ma Iesu Keriso? Aisea e tatau ai ona avea ma atalii ma afafine o Iesu Keriso?

Sa faamalamalama mai e Elder Dallin H. Oaks o le Korama a Aposetolo e Toasefululua: “O i tatou uma o suli o o tatou matua faalelagi. ‘O i tatou o fanau a le Atua,’ na aoao mai e le Aposetolo o Paulo, ‘afai foi o fanau i tatou, o suli foi; o suli lava o le Atua, o suli faatasi ma Keriso’ (Roma 8:16–17). O lona uiga, e pei ona ta’u mai i le Feagaiga Fou, o i tatou o “suli … i le ola e faavavau” (Tito 3:7) ma afai tatou te o mai i le Tama, o le a tatou ‘maua mea uma’ (Faaaliga 21:7)—o mea uma ua ia te Ia—o se manatu faavae e faigata ona malamalama i ai o tatou mafaufau faaletagata. Peitai, o le mea sili e mafai ona tatou malamalama o le ausiaina o lenei taunuuga faaiu i le faavavau e na o le pau le mea e mafai ai, pe afai lea tatou te mulimuli i lo tatou Faaola, o Iesu Keriso, o le na aoao mai “e le alu atu lava se tasi i le Tama, pe a le ui mai ia te au” (Ioane 14:6)” (“O Soo o Keriso,” Ensign,Me 2013, 98)

E faavae i lo tatou lava agavaa, e leai se mea tatou te maua aua tatou te agasala uma lava ma tatou le oo i le viiga o le Atua (tagai Roma 3:23). Peitai, pe a vaetamaina i tatou e Iesu Keriso, e faatoilaloina o tatou le atoatoa e ala i Lona soifua atoatoa ma le Togiola. O lea, e ala i a tatou feagaiga ma le usiusitai ia Iesu Keriso, e avea ai i tatou ma suli-faatasi ma tatou “tiga faatasi ai ma [Iesu Keriso]” (Roma 8:17). E le faapea o le a tatou tigaina i mea na faia e le Faaola o se vaega o Lana taulaga togiola. Ae, tatou te tiga faatasi ma Ia e ala i le mulimuli ia te Ia ma ositaulagaina mea faalelalolagi, usitai i poloaiga, ma onosai ma le faamaoni i mea faafeagai.

Mai le Roma 8:14–18 ua tatou aoao ai afai o i tatou o ni fanau faamaoni o le feagaiga a le Atua, e mafai ona avea i tatou ma suli-faatasi ma Iesu Keriso i mea uma o i ai i le Tama Faalelagi.

Tusi se siata e tolu koluma i lau api talaaga mo le suesueina o tusitusiga paia, ia faaigoa le tasi koluma O Mea e Manaomia, o le koluma i le ogatotonu Faafeagai, ma le koluma lona tolu o le Tofi Ona fai lea o mea ia:
1. I le koluma “O Mea e Manaomia” lisi ai ni poloaiga patino se fa pe lima po o tulaga faatonuina e tatau ona tatou ola ai ia mafai ai ona avea o ni fanau faamaoni o le feagaiga a le Atua.
2. I le koluma “Faafeagai” lisi ai ni nai faataitaiga o mea faafeagai tatou te ono oo i ai a o tatou taumafai e ola o ni fanau faamaoni o le feagaiga a le Atua.
3. I le koluma o le “Tofi”, lisi ai ni faamanuiaga e mafai ona tatou maua mai le Tama Faalelagi pe a tatou taumafai e ola o ni fanau faamaoni o le feagaiga.

I le vaavaai atu i mea sa e lisiina i lau api talaaga mo le suesueina o tusitusiga paia, faatusatusa faamanuiaga o le suli-faatasi ma Keriso ma mea e manaomia e tatau ona e faafetaiaia ma le faafeagai atonu e te oo i ai. O le a sau tala i se tasi e fesili atu pe aoga le faamaoni i poloaiga a le Alii?

Faitau le Roma 8:18, ma vaavaai po o le a le tala a Paulo e uiga i mea tatou te ositaulagaina e faatusatusa i mea tatou te maua mai le Tama Faalelagi o se tofi.

Roma 8:19–30 o loo tusia ai faapea na aoao atu Paulo e fesoasoani le Agaga ia i tatou i o tatou vaivaiga ma o Iesu Keriso na tofia i le muai olaga e avea ma Faaola o le fanau a le Atua. (I leRoma 8:29–30 o le upu tofia anamua o lona uiga na muai faauuina, pe valaauina. O le a e suesue atili e uiga i aoaoga a le Aposetolo o Paulo i le muai faauuina i le Efeso.)

Faitau le Roma 8:28, 31–39, ma vaavaai mo upumoni na aoao atu e Paulo e uiga i le alofa o le Atua e tusa ai ma mea faafeagai, luitau, ma puapuaga o le olaga nei. Atonu e te manao e faailoga ia upu po o fasifuaitau e taua ia te oe.

O le Faaliliuga a Iosefa Samita o le Roma 8:31 e faitauina, “Afai ua au ma i tatou le Atua, o ai se e mafai ona faasagatau mai [ma faatoilaloina] i tatou?” (Faaliliuga a Iosefa Samita, Roma 8:31 [i le Roma 8:31, vaefaamatalaga a]).

O nisi o upumoni e mafai ona tatou faailoaina i nei fuaiupu e aofia ai mea nei: Afai tatou te alolofa i le Atua, ona galulue faatasi lea o mea uma mo lo tatou lelei. E ala ia Iesu Keriso tatou te mafai ai ona faatoilalo o luitau uma ma puapuaga o le olaga nei. E leai se mea e mafai ona tuueseina mai i tatou mai le alofa o le Atua, lea e faaalia i le Togiola a Iesu Keriso.

Faamaea se tasi pe sili atu o gaoioiga nei i lau api talaaga mo le suesueina o tusitusiga paia:
1. Mafaufau i luitau ma puapuaga ua e oo i ai, ona tusi lea o ni faamatalaga se lua mai le Roma 8:28, 31–39, e sili ona taua ia te oe ma faamatala pe aisea.
2. Faamatala pe na faapefea ona e iloa le alofa o le Atua i taimi o ou luitau.
3. Tusi nai auala e mafai ona e faaalia ai lou alofa mo le Atua. Faatu se sini e te galue ai i mea na e tusia, ma faatuatua o mea uma o le a galulue mo lou lelei.

Roma 9–11

Ua aoao mai Paulo e uiga i le teenaina o le feagaiga a le Atua ma e uiga i le aveina atu o le talalelei i Nuuese

E pei ona tusia i le Roma 9–11, sa faaaoga e le Aposetolo o Paulo ia faaupuga Isaraelu ma le tagata Isaraelu nai lo Iutaia. I ona po o le Feagaiga Tuai, sa filifilia ai e le Atua e na tupuga mai ia Iakopo, po o Isaraelu, e avea ma vaega o Lana feagaiga ma Aperaamo (tagai Roma 9:4–5). O lenei feagaiga e aofia ai faamanuiaga o le laueleele, pule o le perisitua, ma le tiutetauave o le faamanuiaina o tagata i le lalolagi atoa i le talalelei, lea e mafai ai ona maua le ola e faavavau.

Faitau le Roma 9:6, 8, ma vaavaai pe o a mea na aoao atu e Paulo e uiga i tagata o le aiga o Isaraelu.

O le a sou manatu o le a le uiga o le tala a Paulo “o tagata mai ia Isaraelu, e le o Isaraelu i latou uma” (Roma 9:6)?

E lei malamalama nisi Iutaia e le o tagata uma e fananau mai i le aiga o Isaraelu na agavaa e avea o se vaega o le feagaiga a le Atua ma Isaraelu. Sa sese ona latou faatuatuaina faapea o lo latou gafa e otometi ai ona latou maua o faamanuiaga o le feagaiga.

Faitau le Roma 10:8–13, ma vaavaai pe mafai faapefea e soo se tasi, Isaraelu po o le le Isaraelu, ona avea o se vaega o le nuu o le feagaiga a le Atua.

I nei fuaiupu, o le upu Eleni ua faaliliuina o le tautino atu o lona uiga o se faailoaga lautele atu o le taliaina, po o le feagaiga, ma le upu Eleni ua faaliliuina o le talitonu o lona uiga o se tautinoga faatuatuaina. O lenei faatuatuaga loloto i le Faaola e taitai atu ai tagata i le faailoa lautele atu o lo latou taliaina o Ia i auala na Ia tofia. O nei auala e aofia ai le usitai i poloaiga a le Atua, salamo, ma le mauaina o sauniga faaola o le talalelei, ia e aofia ai le papatisoga ma le meaalofa o le Agaga Paia.

E tusa ai ma aoaoga a Paulo, afai tatou te taliaina ma usitai ia Iesu Keriso ma Lana talalelei, e mafai ona tatou maua faamanuiaga o feagaiga a le Atua ma faasaoina ai.

Sa faaaoga e nisi tagata le Roma 10:9, 13 e fai mai ai faapea na pau lava le mea tatou te moomia e fai ina ia faaolaina ai o le tautau gutu atu lea o lo tatou talitonuga ia Iesu Keriso. I lau api talaaga mo le suesueina o tusitusiga paia, tusi pe mafai faapefea e upumoni na talanoaina i lenei lesona ona fesoasoani ia te oe e tali atu ai i lenei mau sese.

I le vaega o totoe o le Roma 10–11, ua tatou faitau ai faapea na aoao atu e Paulo o e faalogo i le afioga a le Atua e taua i le atinaeina o le faatuatua ia Iesu Keriso. Sa ia toe faamatala atili e uiga i le teenaina e Isaraelu o le talalelei a Iesu Keriso ma sa faaaoga ai se talafaatusa o le faapipiiina o lala mai se olive vao i se olive lelei e faatusa i le vaetamaina mai o Nuuese i le aiga o Isaraelu (tagai Iakopo 5). Na ia aoao atu foi o le talalelei o le a toe ofoina atu i Iutaia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina Roma 8–11 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: