Iunite 5: Aso 4

2 Nifae 3

Folasaga

I le 2 Nifae 3, na tuuina atu ai e Liae ni upu o fautuaga ma faamanuiaga i lona atalii uii o Iosefa. I le faia o lea mea, sa toe ta’ua ai e Liae le valoaga a Iosefa i Aikupito e uiga i le matafaioi o le tagatavaai filifilia o Iosefa Samita le Itiiti i le aumaiga o le Tusi a Mamona. I le lesona lenei o le a e maua ai le avanoa e maua ai se talisapaia sili atu o le Perofeta o Iosefa Samita ma se molimau malosi atu e uiga i lana matafaioi na tofia mai le lagi i le Toefuataiga o le talalelei.

2 Nifae 3:1–25

Na toe ta’ua e Liae le valoaga a Iosefa i Aikupito e uiga i le Perofeta o Iosefa Samita

Sa faaauau pea le fautuaga mulimuli a Liae i lona aiga e ala i le aoaoina o lona atalii o Iosefa e uiga i isi tamalii e toatolu na igoa foi ia Iosefa. Tusi se laina mai le mau o le 2 Nifae 3 i le Iosefa po o Iosefa ua e aoao i ai i lena fuaiupu.

Joseph Stick Figures

O le lesona lenei o le a taulai atu i le valoaga a Iosefa i Aikupito e uiga i le Perofeta o Iosefa Samita—na faia i le silia i le 3,000 tausaga a o le’i fanau mai Iosefa Samita!

1. Amata se lisi i lau api talaaga mo le suesueina o tusitusiga paia o mea na tutupu ma aoaoga e oo atu i lou mafaufau e uiga i le Perofeta o Iosefa Samita ma lana matafaioi i le Toefuataiga o le talalelei. O le a e faaopoopo atu i lenei lisi pe a e iloa nisi faamatalaga se tele i le aluga o lenei lesona, o lea ia tuu ai se avanoa e tusi ai nisi mea se tele.

Faiga o se Lisi

O lisi e mafai ona fesoasoani e te iloa ai mea ua e aoaoina mai tusitusiga paia ma perofeta ina ia mafai ona e manatuaina ma saunia ai e faasoa atu i isi mea ua e iloa. A fai se lisi, tuu i ai se ulutala manino ma ia lava ni faamatalaga ia aofia ai ina ia mafai ona e manatua ai le faamoemoega o le lisi pe a e toe foi atu i ai i se taimi mulimuli ane.

Faitau le 2 Nifae 3:6–8, ma faailoa ia upu ma fasifuaitau sa faaaoga e Iosefa o Aikupito e faamatala ai le Perofeta o Iosefa Samita ma le galuega o le a ia ausiaina. Faaopoopo soo se upu o nei upu ma fasifuaitau e te lagona e taua i lau lisi e uiga i le Perofeta i lau api talaaga mo le suesueina o tusitusiga paia. I nei fuaiupu na molimau ai Iosefa o Aikopito e faapea na faatuina e le Alii le Perofeta o Iosfa Samita e fesoasoani e faataunuu le Toefuataiga o le talalelei. A o faaauau ona e suesue i le 2 Nifae 3, vaavaai mo upumoni faaopoopo e uiga i le Perofeta o Iosefa Samita e mafai ona faamalosia ai lau molimau e uiga i lana misiona paia ma faaopoopo atu i lau lisi.

Ina ia fesoasoani ia e malamalama lelei i le valoaga a Iosefa o Aikupito, ia matau pe faafia ona ta’ua le upu tagatavaai i le 2 Nifae 3:6–7, 11, ma le 14. Atonu e te manao e tusi se faamanatu i autafa o se tasi o nei fuaiupu e faapea, o se tagatavaai o se tagata e mafai ona iloa mea ua tuanai, i le taimi nei, ma i le lumanai (tagai Mosaea 8:13–17).

Iosefa o Aikupito o loo tusia le faaaliga

I le 2 Nifae 3:7, fai mai Iosefa o Aikupito e faapea, na fetalai atu le Alii ia te ia o Iosefa Samita o le a “faia se galuega … lea o le a aoga tele” i e e tupuga mai ia te ia. Suesue le 2 Nifae 3:11–15, 19–21 ma vaavaai po o le a le galuega “aoga tele” lea o le a faataunuuina e le Alii e ala mai i le Perofeta o Iosefa. O tusi mea mea e fesoasoani i suesuega o loo mafai ona e maua (aotelega o mataupu, vaefaamatalaga, Taiala i Tusitusiga Paia ma mea faapena) e mafai ona fesoasoani e te malamalama ai i le tele o faamatalaga na ta’ua e Iosefa o Aikupito. A e maua faamatalaga fou e uiga i le matafaioi a le Perofeta o Iosefa Samita, faaopoopo i ai i le lisi i lau api talaaga mo le suesueina o tusitusiga paia.

A ta’ua i tusitusiga paia le “fua o sulugatiti [o se tagata],” o loo faatatau i e e tupuga mai i lena tagata. Sa valoia e Iosefa o Aikupito e faapea o le Perofeta o Iosefa Samita, o se tasi e tupuga mai ia te ia, o le a aumaia le Tusi a Mamona i aso e gata ai.

I le 2 Nifae 3:12, o le fasifuaitau “o le a tusi le fua o ou sulugatiti [tagata e tupuga mai ia Iosefa o Aikupito]” e faatatau i faamaumauga o tusitusiga paia ua tusitusia—o le Tusi a Mamona—sa faia e tagata na tupuga mai ia Iosefa (tagai 2 Nifae 3:4). Sa valoia e faapea o le Tusi a Mamona o le a “tutupu faatasi” ma le Tusi Paia, o se faamaumauga paia na tusia e “fua o le sulugatiti o Iuta.” Sue i le 2 Nifae 3:12 mo fasifuaitau o loo faamatala ai le aafiaga o le Tusi a Mamona ma le Tusi Paia i le lalolagi a o la tutupu faatasi.

Sa vavalo foi Iosefa o Aikupito e faapea o le Perofeta o Iosefa Samita o le a i ai sona sao taua i le fuafuaga a le Tama Faalelagi o le a “aumai ai o’u tagata i le olataga” (2 Nifae 3:15).

2. Tali fesili o loo i lalo i totonu o lau api talaaga mo le suesueina o tusitusiga paia, ina ia fesoasoani ai e faaauau le faateleina o lou talisapaia o le matafaioi o Iosefa Samita i le ata o le faaolataga a le Tama Faalelagi.

   1. O a nisi o faataitaiga o feagaiga, pule, po o sauniga na toefuatai mai e ala i le Perofeta o Iosefa Samita, e mafai ona fesoasoani e aumai ai tagata i le olataga?

   2. O le a se eseesega ua faia e nei faamanuiaga i lou olaga?

Vaavaai mo upu po o fasifuaitau o loo faamatala ai le Perofeta o Iosefa Samita i le 2 Nifae 3:24, ma faaopoopo i le lisi i lau api talaaga mo le suesueina o tusitusiga paia. A o e faitauina le upusii lenei mai ia Peresitene Gordon B. Hinckley, ia faaopoopo atu i lau lisi soo se aoaoga faaopoopo a le Porofeta o Iosefa Samita lea e faamaonia ai o ia lava “o se meafaigaluega i aao o le Atua”:

“Faataga mai au sei faaigoa atu nisi o le tele o aoaoga faavae ma faiga lea e tulaga ese ai i tatou mai isi uma ekalesia, ma o mea uma ia na oo mai ona o faaaliga i le Perofeta talavou [o Iosefa Samita]. …

“O le mea muamua o nei mea, e moni lava, o le faaalia mai o le Atua lava Ia ma Lona Alo Pele, le Alii toetu o Iesu Keriso. …

“O lenei malamalamaaga i le Atua, na natia mai le lalolagi mo le tele o tausaga, o le mea muamua lea ma le maoae ua faaali mai e le Atua i lana auauna filifilia. …

“O le Tusi a Mamona ua oo mai e ala i le meaalofa ma le mana o le Atua. …

Uso Iosefa

“O le isi [saofaga a le Perofeta o Iosefa Samita] o le perisitua toefuataiina. …

“O le isi faaaliga maoae ma mataina na tuuina mai i le Perofeta o le fuafuaga mo le olaga faavavau o le aiga. …

“O le le sala o tamaiti laiti o le isi lea faaaliga ua tuuina mai e le Atua e ala mai i le tufugaaao o le Perofeta o Iosefa …

“… O le aoaoga faavae o le faaolataga mo e ua maliliu e tulaga ese i le Ekalesia lenei. …

“Ua faaali mai le natura e faavavau o le tagata. …

“… Toe tasi lea e ao lava ona ou ta’ua. O le mataupu faavae lenei o faaaliga i onaponei. …

“… I se taimi puupuu o le 38 ma le afa tausaga o lona soifua, na oo mai ai e ala mai [i le Perofeta o Iosefa Samita] se anoanoai le mafaatusalia o le iloa, meaalofa, ma aoaoga faavae” (“O Mea Sili Ua Faaalia Mai e le Atua,” Ensign, Me 2005, 80–83).

Ina ua mavae le maliufasia o le Perofeta o Iosefa Samita, sa tusia ai e Peresitene Ioane Teila le mea ua avea ma Mataupu Faavae ma Feagaiga 135. Faitau le Mataupu Faavae ma Feagaiga 135:3, ma mafaufau loloto i mea ua e aoaoina i lenei lesona e uiga i le matafaioi a Iosefa Samita i le fuafuaga a le Tama Faalelagi mo le Toefuataiga o le talalelei.

3. Tusi se tali i se tasi o fesili o loo i lalo i totonu o lau api talaaga mo le suesueina o tusitusiga paia:

   1. O le a se mea ua e aoaoina pe ua e lagonaina i le asō a o e suesueina le 2 Nifae 3 ua faamalosia ai lau molimau i le Perofeta o Iosefa Samita?

   2. O le a se mea na faia, aoao mai, pe na toefuatai e Iosefa Samita ua e lagonaina e “aoga tele” (2 Nifae 3:7) ia te oe?

Ia saili ma le agaga tatalo ni auala e faasoa atu ai lau molimau i le Perofeta o Iosefa Samita i au uo ma lou aiga, e fesoasoani ia latou iloa ai le tele o mea aoga tele na toefuataiina mai e ala mai ia te ia.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 2 Nifae 3 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: