Sura ya 40
Maono katika Hekalu la Kirtland
Aprili 1836
Wiki moja baada ya Hekalu la Kirtland kuwekwa wakfu, Watakatifu walifanya mkutano mwingine huko. Mitume walibariki sakramenti, na Joseph Smith na washauri wake walipitisha sakramenti kwa Watakatifu.
Mafundisho na Maagano 110, kichwa cha habari cha sehemu
Kisha Joseph Smith na Oliver Cowdery waliingia mahali pa peke yao katika hekalu, ambapo walipiga magoti na kuomba. Baada ya maombi yao, walipata ono la kustaajabisha. Walimwona Bwana Yesu Kristo. Macho yake yalikuwa angavu, kama moto. Nywele zake zilikuwa nyeupe kama theluji, na uso Wake uling’ara kuliko jua.
Mafundisho na Maagano 110, kichwa cha habari cha sehemu
Yesu aliwaambia Joseph na Oliver mambo mengi ya kupendeza. Aliwaambia wawe na furaha kwa sababu dhambi zao zilikuwa zimesamehewa. Alikuwa amefurahishwa na hekalu na alisema Watakatifu waliolijenga wanapaswa kuwa na furaha. Alilikubali hekalu kama nyumba Yake takatifu. Yesu alisema angekuja hekaluni mara nyingi. Lakini kama watu hawataliweka hekalu kuwa takatifu, Yeye asingekuja.
Kisha Joseph na Oliver walimwona Musa hekaluni. Musa alikuwa nabii aliyeishi hapo kale. Alirudi duniani ili kurejesha nguvu maalum za ukuhani kwa Joseph na Oliver. Nguvu hii ingewasaidia wana wa Israeli kukusanyika katika Kanisa kutoka sehemu zote za dunia. Nguvu hii pia inampa nabii mamlaka ya kutuma wamisionari kuhubiri Injili ulimwenguni kote.
Kisha, Joseph na Oliver walimwona Elia. Elia aliwarejeshea nguvu maalum ya ukuhani ambayo ilikuwa imetolewa kwa Ibrahimu. Ibrahimu pia alikuwa nabii aliyeishi hapo kale. Kwa nguvu hii, Watakatifu wangeweza kuwa na baraka hizo maalum ambazo Mungu alimwahidi Ibrahimu.
Kisha Joseph na Oliver walimwona Eliya, nabii mwingine aliyeishi hapo kale. Eliya alirejesha kwao nguvu maalum ya ukuhani ili kuzisaidia familia za wenye haki. Nguvu hii huziwezesha familia kuunganishwa pamoja hekaluni ili waweze kuishi pamoja milele.