Sura ya 48
Joseph Smith Anamwomba Rais Msaada
Machi–Novemba 1839
Joseph Smith aliandika barua kwa Watakatifu wakati alipokuwa katika jela ya Liberty. Aliwaambia waandike mambo mabaya ambayo magenge ya watu wenye fujo walikuwa wamewafanyia. Alisema walipaswa kutuma kile walichoandika kwa viongozi wa nchi.
Joseph aliwaambia Watakatifu kuandika majina ya watu ambao waliwashambulia. Alisema walipaswa kueleza jinsi makazi yao na mashamba yao yalivyoharibiwa.
Baada ya Joseph na marafiki zake kuwa katika jela ya Liberty kwa zaidi ya miezi minne, baadhi ya walinzi waliwapeleka mji mwingine kwa ajili ya kesi. Joseph na marafiki zake walinunua farasi wawili kutoka kwa walinzi. Waliwapa walinzi baadhi ya nguo ili kulipia farasi mmoja na kuahidi kulipia farasi mwingine baadaye.
Usiku mmoja baadhi ya walinzi walilewa na kwenda kulala. Mlinzi mwingine aliwasaidia Joseph na marafiki zake kutoroka.
Joseph na marafiki zake walifanya zamu kupanda farasi hao. Baada ya siku 10 walifika Quincy, Illinois, ambapo walikuta familia zao.
Joseph na marafiki zake walikuwa na furaha kuwa pamoja na familia zao tena.
Watakatifu walitaka kupata mahali katika Illinois ili kujenga mji wao wenyewe. Walinunua ardhi loevu na yenye matope karibu na Mto Mississippi. Joseph na Watakatifu walifanya kazi kwa bidii kukausha ardhi ili waweze kujenga nyumba na kupanda bustani. Walianza kujenga mji mzuri, ambao waliuita Nauvoo. Nauvoo humaanisha nzuri.
Wakati Watakatifu walipokuwa wakianza kujenga Nauvoo, Joseph Smith alikwenda kumwona rais wa Marekani. Joseph alimwambia rais kuhusu magenge ya watu wenye fujo katika Missouri. Alieleza jinsi magenge hayo ya watu wenye fujo yalivyochoma nyumba za Watakatifu, kuwaibia mifugo yao, na kuwalazimisha kuondoka kwenye ardhi yao.
Joseph alisema baadhi ya Watakatifu waliuawa. Wengine walifungwa jela. Alimwonyesha rais kile Watakatifu walichokuwa wameandika kuhusu mambo mabaya yaliyotendwa kwao. Joseph alisema viongozi katika Missouri hawangeweza kuwasaidia Watakatifu. Alimuomba rais awasaidie.
Rais alisema alijua Watakatifu walikuwa wameteseka, lakini asingefanya kitu cho chote ili kuwasaidia. Kama angewasaidia Watakatifu, watu katika Missouri wangekasirika.
Joseph alihuzunika kwa sababu rais hakuweza kuwasaidia Watakatifu. Alirudi Nauvoo.