Fakatapui ʻo e Temipalé mo e Ngaahi Lotu Fakatapuí

ʻOku ʻi he Tohi Tapú ha talanoa fakaikiiki ʻo e founga naʻe fakatapui ai ʻe he kakai ʻIsilelí honau ngaahi tāpanekalé mo e ngaahi temipalé ʻo fokotuʻu kinaua ko ha ongo feituʻu toputapu.¹ Kuo fakatapui foki ʻe he Kāingalotu ʻo e Siasí ha ngaahi temipale mo ha ngaahi feituʻu toputapu ke fakaʻaongaʻi ki he ngāue ʻa e ʻEikí, ʻo kamata mei he Temipale Ketilaní.

ʻIkai ngata pē ʻi he ngaahi ouau fakatapui totonu ʻoku fakahoko ʻi he ngaahi temipale kuo kakató, ka naʻe fokotuʻu foki ʻe he Kāingalotu ʻo e Siasí he kuonga muʻá ha sīpinga ʻo e ouau ki hono fakatapui ʻo e ngaahi feituʻu ʻoku tuʻu ai e temipalé. Naʻe fakahoko ʻe he Kāingalotu he kuonga muʻá ha ngaahi ouau makehe ʻi hono tō ʻo e ngaahi makatuliki ʻi he ngaahi temipale ʻi Tauʻatāina, Mīsuli, ʻi he 1831; Ketilani, ʻOhaiō, ʻi he 1833; Hihifo  Mamaʻo, Mīsuli, ʻi he 1838; Nāvū, ʻIlinoisi, ʻi he 1841; mo Sōleki Siti, ʻIutā, ʻi he 1853.² Naʻe kau he ngaahi ouaú ha ngaahi hiva, malanga, ngaahi polokalama, mo ha ngaahi lotu, pea naʻe fakalangilangiʻi ʻaki ia ʻi Nāvū ha kau sōtia leʻo mo ha ifi palasa. Naʻe kamata mei Nāvū, hono fakaava ha taha ʻo e ngaahi makatulikí kae lava ke fakahū ai ha ngaahi fakamatala pe ha meʻa kehe fekauaʻaki mo e temipalé. ʻOku kei fakahoko pē e ngāue ko ʻení he ʻahó ni, neongo ʻoku ʻikai toe fai e ngaahi ouau fakaikiiki ʻo e makatulikí. Ne ʻi ai ha ngaahi temipale ʻe niʻihi, kau ai e ngaahi tempale ʻi Nāvū mo Sōleki Sití, naʻe fakaʻilongaʻi foki hono fokotuʻu e maka tumuʻaki ʻo e temipalé ʻaki ha ouau, ʻa ia ne kau ai ʻa e hivá, lotú, mo e ngaahi kalanga “Hosaná.”

Hili e langá, ne teuteu ʻe he fakatapuí e ngaahi temipalé ki honau ngaahi taumuʻa toputapú. ʻI hono fakatapui e Fale ʻo e ʻEikí ʻi Ketilani he ʻaho 27 ʻo Māʻasi 1836 , ne fokotuʻu ai ha sīpinga ki hono fakatapui ʻo e ngaahi temipalé he kahaʻú. Naʻe kau he ngaahi ouau ʻo e ʻahó ha ngaahi lea, hiva, tufa ʻo e sākalamēnití, ko ha lotu fakatapui, mo e Kalanga Hōsaná. Naʻe lekooti ʻe ha Kāingalotu tokolahi ʻo e Siasí ʻa ia ne nau kau ʻi he fuofua fakatapui ʻo e temipalé ha ngaahi fakahā fakalaumālie maʻongoʻonga, kau ai ha ongo ʻo ha tuʻoni matangi mālohi, lea ʻi he ngaahi lea kehekehé, ngaahi mata meʻa-hā-mai, mo e ʻaʻahi mai ʻa e kau ʻangeló. Naʻe fakahoko kimui ange ha ouau fakatapui ʻe taha ne ʻaho ʻe fā, maʻanautolu ne ʻikai ke nau lava ʻo hū ʻi he fuʻu tokolahi ʻa e kakai he fuofua fakatapuí. Naʻe ʻatā e ngaahi fakatahá ki he kakaí, ʻi Ketilani. ʻI Nāvuú, ne fakahoko ai e ngaahi ouau fakatapui ki he kakaí mo fūfūnakí fakatouʻosi. ʻI he ngaahi temipale kimui angé, ko e kau memipa pē ʻo e Siasí ne ʻoange ʻenau ngaahi tikite pe fakaongoongoleleí ne hū ki he ngaahi fakataha fakatapuí. Kuo hoko atu hono toutou fakahoko e ngaahi fakataha fakatapuí, ʻo fakaʻatā ai ha kau mēmipa tokolahi ke kau ki ai.

Naʻe fakahoko ʻe Siosefa Sāmita ʻa e lotu fakatapui ʻo e Temipale Ketilaní, ʻo lau mei ha fakamatala naʻe tomuʻa teuteu. Naʻe lekooti e lotu ueʻi fakalaumālié ʻe Siosefa Sāmita, ʻŌliva Kautele, mo ha niʻihi kehe ʻi he ʻaho kimuʻa he fakatapuí.³ ʻI he ngaahi temipale ne hokohoko mai aí, kuo hiki e ngaahi lotu fakatapui ueʻi fakalaumālié ʻe ha taki maʻu mafai pule ʻi he Siasí, ʻo teuteu fakapatonu ki he temipale ko iá. Naʻe kole ʻi he ngaahi lotú ki he ʻEikí ke Ne tali hono ʻohake ʻo e temipalé pea mo e tautapa kiate Ia ke fakamāʻoniʻoniʻi mo maluʻi e temipalé. ʻI he ngaahi lotú, tautautefito ki he ngaahi temipale he kuonga muʻá, ne tāpuakiʻi ai e ngaahi meʻangāue ne fakaʻaongaʻi he langá—makamaká, sima motá, ʻoneʻoné, sima ʻo e holisí, pe ngaahi matapā sioʻatá. Naʻe fakakau ʻi ha ngaahi lotu fakatapui lahi ʻa hono vaheʻi ko ia ʻo ha ngaahi loki pau ʻi he temipalé, ʻo fakamahinoʻi e ngaahi ngāue ke fai aí. Naʻe ʻohifo ʻe he ngaahi lotu ko ʻení e ʻao ʻo e ʻEikí pea vaheʻi e temipalé ko Hono fale, ʻo fakaʻilongaʻi ia ko ha potu ʻo e fetuʻutaki mo e langí.

ʻE kau ʻa kinautolu he fakatapui temipalé he Kalanga Hōsaná. Ko e kalanga ko ʻení ko ha fakamanatu ia ʻo e fakalangilangi naʻe fai ʻe he kau muimui ʻo Sīsū Kalaisí ʻi Heʻene hū langilangiʻia ki Selusalemá.⁴ ʻOku tuʻu e haʻofangá, taʻalo ha ngaahi holoholo hinehina, mo kalanga fakataha tuʻo tolu ʻa e ngaahi kupuʻi lea, “Hōsana, Hōsana, Hōsana ki he ʻOtuá pea mo e Lamí.”⁵ ʻOku fakaʻosi ʻaki e kalangá ʻa e “ʻĒmeni, ʻĒmeni, ʻĒmeni.”⁶ ʻI he Temipale Ketilaní, naʻe muiaki mai ʻi he lotú hono hivaʻi ʻo e himi “Hōsana ki he ʻOtuá mo e Lamí,” ʻa ia ʻoku ʻiloa he ʻahó ni “Ko e Laumālie ʻo e ʻOtuá.” Kuo hivaʻi ʻa e himi ko ʻení ʻi he fakatapui temipale kotoa pē talu mei ai.

ʻI he vahaʻa ʻo e 1999 mo e 2002, naʻe fakamafola fakahangatonu ʻi ha polokalama fakasatelaite pau e ngaahi polokalama fakatapui ʻo ha ngaahi temipale foʻou ʻe niʻihi he ngaahi feituʻu fakahisitōlia mahuʻingá, kau ai ʻa Palemaila, Niu ʻIoke; Nofoʻanga Fakafaʻahitaʻu Momokó, Nepulasikā; mo Nāvū, ʻIlinoisi, ʻo fakaʻatā ai ke kau atu e kau mēmipa ʻo Siasí mei he ngaahi feituʻu mamaʻó. Naʻe fokotuʻu ʻe he meʻá ni ha sīpinga ʻo hono fakamafola e fakatapui ʻo e ngaahi temipalé ki he ngaahi siteiki senitā fakalotofonuá koeʻuhi ke lava e kau mēmipa taau kotoa pē ʻi he vahefonua ʻo e temipalé mo e ngaahi feituʻu mamaʻo kehé ʻo kau ki ai.

Kuo fakatapui tatau ʻe he Siasí mo ha ngaahi feituʻu kehe ki he ngāue ʻa e ʻOtuá. ʻOku kau ki heni e ngaahi tāpanekalé, ngaahi falelotú, ngaahi holo ʻo e Fineʻofá, mo e ngaahi ʻapí. ʻOku fakatapui foki mo e ngaahi fonua mo e ʻēlia ʻi he māmaní ki hono malangaʻi ʻo e ongoongoleleí.

Ngaahi Maʻuʻanga Tokoni ʻa e Siasí

Gordon B. Hinckley, “Why These Temples?” Ensign, Aug. 1974, 37–47.

“Minutes and Prayer of Dedication, 27 March 1836 [DC 109],” ʻi he Brent M. Rogers, Elizabeth A. Kuehn, Christian K. Heimburger, Max H Parkin, Alexander L. Baugh, and Steven C. Harper, eds., Documents, Volume 5: October 1835–January 1838. Vol. 5 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 188–209.

Ngaahi Fakamatalá

ʻOku ʻoatu ʻe he pulusinga ko ʻení ha ngaahi fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu e kanotohí pe ngaahi fakakaukau ʻa e tokotaha faʻu tohí.

D. Arthur Haycock, “Temples: LDS Temple Dedications,” ʻi he Daniel H. Ludlow, ed., Encyclopedia of Mormonism (New York: MacMillan, 1992), 4:1455–56.

Ngaahi Tefito Fekauʻakí: Temipale Ketilaní, Ngaahi Fakataha Molumalú, ʻEnitaumeni Faka-Temipalé, Fakatapui ʻo e Fonua Toputapú

Maʻuʻanga Fakamatalá

1. Vakai, Nōmipa 7; 1 Ngaahi Tuʻi 8.

2. Neongo ne ʻikai fakakakato e ngaahi temipale ʻi Mīsuli he kuonga muʻá, ne kei tuʻu pē e ngaahi makatulikí ʻi he ngaahi feituʻu ko iá ko ha fakamanatu.

3. Vakai ki he Talateu Fakahisitōlia ʻo e “Minutes and Prayer of Dedication, 27 March 1836 [DC 109],” ʻi he Brent M. Rogers, Elizabeth A. Kuehn, Christian K. Heimburger, Max H Parkin, Alexander L. Baugh, and Steven C. Harper, eds., Documents, Volume 5: October 1835–January 1838. Vol. 5 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 188–91.

4. Vakai, Mātiu 21:1, 8–9; Maʻake 11:8–10; Sione 12:12–13.

5. Vakai, 2 Fakamatala Meʻa Hokohoko 5:11–14; Siope 38:7; Mātiu 21:1–11; 3 Nīfai 11:17; Tokāteline mo e Ngaahi Fuakava 19:37; 36:3; 39:19; 124:101.

6. Gordon B. Hinckley, “This Great Millennial Year,” Ensign, Nov. 2000, 70. Ki ha fakamatala fekauʻaki mo e kamataʻanga fakahisitōlia ʻo e kalangá, vakai, Jacob W. Olmstead, “From Pentecost to Administration: A Reappraisal of the History of the Hosanna Shout,” Mormon Historical Studies, vol. 2, no. 2 (Fall 2001), 7–37.