Sura ya 22
Mtu Mwenye Mapepo wachafu
Mtu aliyeishi makaburini kando ya Bahari ya Galilaya alikuwa na pepo wachafu ndani yake ambao walimfanya awe na tabia ya wenda wazimu. Watu walimfunga na minyororo ili kumdhibiti, lakini aliikata minyororo.
Mtu yule alishinda siku nzima na usiku mzima kwenye milima na mapango. Alilia siku zote na kujikata kata kwa mawe.
Siku moja Yesu na wanafunzi Wake walivuka Bahari ya Galilaya kwenye mashua. Mwokozi aliposhuka kutoka kwenye mashua, mtu yule alimkimbilia.
Yesu aliliambia pepo limtoke mtu huyo. Pepo lilijua Yesu alikuwa Mwana wa Mungu. Lilimsihi Yesu asilitese.
Mwokozi alipoliuliza pepo jina lake lilikuwa nani, lilisema, “Jina langu ni Legioni,” ikimaanisha wengi. Mapepo mengi wachafu walikuwa ndani ya mtu yule. Walimsihi Yesu awaruhusu waingie ndani ya miili ya baadhi ya nguruwe waliokuwa karibu.
Yesu alikubali. Mapepo yalimtoka mtu yule na kwenda katika miili ya takribani nguruwe 2,000. Nguruwe walikimbia chini ya mlima hadi ndani ya bahari na kuzama.
Watu waliokuwa wakichunga nguruwe walikimbia mjini na kuwaambia watu kile kilichokuwa kimetokea. Watu walikuja na kumuona Yesu na yule mtu aliyekuwa mwenda wazimu. Lakini mtu yule hakuwa mwenda wazimu tena.
Hii iliwafanya watu wamwogope Yesu. Walimsihi Yeye aondoke. Alirudi kwenye mashua.
Mtu aliyeponywa alitaka aondoke pamoja Naye. Badala yake Mwokozi alimwambia aende nyumbani na awaambie rafiki zake kile kilichomtokea.
Mtu yule aliwaambia rafiki zake, na walishangazwa na uwezo mkubwa wa Yesu.