Mataupu Faavae ma Feagaiga 98:23–48

Folasaga

Na maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 98 i le aso 6 o Aokuso, 1833, pe a ma le lua vaiaso talu ona suia sauaga o le Au Paia i Misuri i vevesiga. O lenei faaaliga na tuuina mai ai le taitaiga mo le Au Paia o e sa agaleagaina. I lea faaaliga, na aoaoina e le Alii le Au Paia i auala e tatau ona latou tali atu ai i o latou fili.

Fautuaga mo le Aoaoina Atu

Mataupu Faavae ma Feagaiga 98:23-32

Ua faaali mai e le Alii le auala e tatau ona tali atu ai le Au Paia i sauaga

A o lei amataina le vasega, fai ni koluma se tolu i luga o le laupapa ma faaigoa i autu nei: O le Tulafono a le Alii i le Tauimasui (MF&F 98:23–32); O le Tulafono a le Alii i Taua (MF&F 98:33–38); ma le O le Tulafono a le Alii i le Faamagalo Atu (MF&F 98:39–48).

Fai atu i tagata aoga e faamatala mai ni nai auala e mafai ona tali atu ai pe a faaita pe faatiga mai se tasi. Faamalamalama atu i le faaaliga ua faamaumauina i le Mataupu Faavae ma Feagaiga 98, ua aoao mai e le Alii mataupu faavae e mafai ona fesoasoani ia i tatou e iloa ai le ala e tali atu ai pe a faatiga i tatou e upu ma faatinoga a isi tagata. Uunaia tagata aoga e vaavaai mo nei mataupu faavae i le lesona atoa o le aso.

Faamanatu i tagata aoga o le faaaliga ua faamaumauina i le Mataupu Faavae ma Feagaiga 98 na tuuina mai i le 1833, a’o le’i leva ona suia sauaga o le Au Paia i Misuri i vevesiga. Fai atu i tagata aoga e tomanatu i faamatalaga mai le lesona talu ai e uiga i faiga lelei na oo i le Au Paia.

Valaaulia tagata aoga e kopi le siata o loo i luga o le laupapa i a latou api o le vasega po o api talaaga mo le suesueina o tusitusiga paia. Fai atu i se tagata aoga e faitau leotele le Mataupu Faavae ma Feagaiga 98:23–27. Valaaulia le vasega e mulimuli i le faitauga, ma vaavaai mo mea na aoao mai e le Alii i le Au Paia e uiga i le tauimasui. Fai atu ia i latou e manatua le fautuaga ta’ua soo a le Alii o loo i nei fuaiupu.

O a fuaitau ta’ua soo o loo aoao mai e uiga i le tauimasui? (Atonu e te manao e fautua atu ia faailoga e tagata aoga fasifuaitau “lē upuleaga” ma “talia ma le onosai” i fuaiupu 23–27.)
O a mea na folafola mai e le Alii i le Au Paia pe afai o le a latou talia ma le onosai ia sauaga ma aua le saili e tauimasui?
O a mataupu faavae e mafai ona tatou aoao mai i afioga a le Alii i fuaiupu 23–27? (Fesoasoani i tagata o le vasega e faailoa mai le mataupu faavae lenei: Afai tatou te talia ma le onosai ia faiga le lelei ma ia le tauimasui atu, o le a tauia i tatou e le Alii. Valaaulia se tagata aoga e tusi lenei upumoni i lalo o autu O le Tulafono a le Alii i le Tauimasui.)

Faamalamalama atu e faapea, ina ua faapotopoto le vaega faatupu vevesi i le Itumalo o Jackson, Misuri, i le Aso Toonai, 20 Iulai, 1833, sa latou mananao e faia ni mea leaga e sili atu nai lo na o le faaleagaina o meatotino. Sa latou saili foi e fai ni mea leaga i tagata o le Ekalesia. Valaaulia se tagata aoga e faitau leotele le tala lenei o le talafaasolopito, ma fai atu i le vasega e faalogologo mo le auala na tali atu ai i sauaga ia Epikopo Eteuati Paterika ma Charles Allen, o se tagata liliu mai e 27 tausaga le matua mai Penisilevania.

“Na maua e le au faatupu faalavelave ia Epikopo Eteuati Paterika ma Charles Allen, ma toso faatata atu i laua i le mumu o tagata feita, lea na faalumaina ma sauaina ai i laua a’o agai atu i le auala seia tau atu i le nofoaga e faapotopoto ai tagata lautele. O iinei na fofola atu ai ia te i laua ni filifiliga se lua; a le o le faafitia o le la talitonuga i le Tusi a Mamona po o le tuua o le itumalo. Sa le mafai ona la faafitia le Tusi a Mamona, pe malilie foi e tuua le itumalo. Na faapea atu Epikopo Paterika, o le sa faatagaina e tautala, na puapuagatia le au paia i augatupulaga uma o le lalolagi, ma sa malie o ia e puapuaga mo Keriso, e pei ona sa faia e le au paia i vaitau na muamua atu; ma e leai se mea na ia faia e faatiga ai i se tasi, ma afai latou te sauaina o ia, o le a latou faamanualia se tagata le sala. O iinei na le lagona ai lona leo ona o le vavao o tagata, ma o le toatele o i latou sa alalaga atu: ‘Valaau i lou Atua e laveai oe … !’ Sa saeia ese lavalava o nei uso e toalua, o Paterika ma Allen, ae valiina [nini] i le ta, na palu faatasi ma vailaau vevela, po o isi aseti e aati i le aano [o le tino], ma se vaega o fulumanu na faasalalau i o la’ua luga. Sa laua onosaia lenei faiga mataga faatufanua ma sauaga ma le onosai ma le agamalu sa faapea ona sāō ai le anoano o tagata, ma na foliga sa maofa i le mea sa latou molimauina. Sa faapea ona faatagaina le usoga e o ese mai ma le filemu” (B. H. Roberts, A Comprehensive History of the Church, 1:333; tagai foi i le Church History in the Fulness of Times Student Manual, 2nd ed. [Church Educational System manual], 2003, 133).

O le a se mea e faagaeetia ai oe i le auala na tali atu ai Charles Allen ma Epikopo Paterika i sauaga?

Otooto le Mataupu Faavae ma Feagaiga 98:28–32 e ala i le faamalamalama atu e faapea, na fautuaina e le Alii le Au Paia afai na faatolu ona fasia i latou e se fili e aunoa ma le aumaia ai o le tauimasui o le Atua, e tatau ona latou lapataia le fili i le suafa o le Alii ia aua ne’i toe fasia i latou. Afai e faaauau pea ona fasia i latou e le fili i le uma ai o lenei lapataiga, na ta’uamiotonuina le Au Paia i le “tauia o ia e tusa ma ana galuega.” Ae ui i lea, sa ta’uina atu foi i le Au Paia, afai latou te faasaoina o latou fili e ui lava ina sa tauamiotonuina i latou i le tauimasui, o le a tauia i latou mo lo latou amiotonu.

Mataupu Faavae ma Feagaiga 98:32-38

Na faamalamalama mai e le Alii le taimi e taʼuamiotonuina ai taua

Fai atu i tagata aoga e mafaufau loloto pe ua latou iloa le fetalaiga a le Alii e uiga i taua. Atonu e te tuuina atu le fesili lenei:

O le a sou manatu o le a le tulafono a le Alii i taua?

Valaaulia se tagata aoga e faitau leotele le Mataupu Faavae ma Feagaiga 98:32–34. Fai atu i le vasega e mulimuli i le faitauga, ma vaavaai mo le mea na ta’u mai e le Alii i perofeta anamua e uiga i taua.

E tusa ai ma le fuaiupu e 33, o le a le tulafono na tuuina mai i perofeta anamua? (A o tali mai tagata aoga, tusi a latou tali i luga o le laupapa i lalo o le autu O le Tulafono a le Alii i Taua. Faamanino atu faapea, na tuuina mai e le Alii lenei tulafono e faapitoa lava i tagata o e sa ola i se vaitaimi ese ma i se aganuu ese. E ui e moni le mataupu faavae o le tulafono, ae o aso nei tatou te usiusitai foi i tulafono a malo ua tatou nonofo ai.)
O a mea na tatau ona faia e perofeta anamua pe afai e sii taua atu se tasi e faasaga ia i latou? (Faaopoopo atu le tali i luga o le laupapa i lalo o le autu O le Tulafono a le Alii i Taua.)

Valaaulia se tagata aoga e faitau leotele le Mataupu Faavae ma Feagaiga 98:35–38, ma fai atu i le vasega e vaavaai mo mea na ta‘u atu e le Alii i perofeta anamua e fai, pe afai sa lei taliaina lo latou ofo o le filemu. Fai atu i tamaiti aoga e lipoti mai mea latou te maua.

O le a se mea e mafai ona tatou aoao mai i nei fuaiupu, e uiga i le tulafono a le Alii e uiga i taua? (E ono fautua mai e tagata o le vasega ni mataupu faavae eseese, ae ia mautinoa e faamamafa atu le faamatalaga lenei: E mafai ona taʼuamiotonu taua i lalo o tulaga ua faatonuina e le Alii. Tusi lenei mataupu faavae i luga o le laupapa i lalo o le autu O le Tulafono a le Alii i Taua.)

Faamalamalama atu e faapea, o le toatele o i tatou o le a le filifili pe tatou te o i le taua e faasaga i se isi atunuu. Ae peitai, e mafai ona fesoasoani nei aoaoga tatou te iloa ai le mea e fai i o tatou lava fegalegaleaiga patino—mo se faataitaiga, pe a tatou feeseeseai ma isi.

E faavae i luga o mea ua tatou aoaoina i le fautuaga a le Alii e uiga i le taua, o le a le mea e tatau ona tatou faia pe a tatou le au faatasi ma isi? (Fesoasoani i tagata aoga e faailoa mai le upumoni lenei: E tatau ona tatou sailia ni fofo filemu i a tatou feeseeseaiga.)
O a ni faamanuiaga e ono oo mai i le sailia o ni fofo filemu?

Mataupu Faavae ma Feagaiga 98:39-48

Ua aoao mai e le Alii le Au Paia i auala e tatau ona latou tali atu ai i o latou fili

Valaaulia se tagata aoga e faitau leotele le tala lenei:

“I Holani i le taimi o le Taua Lona Lua a le Lalolagi, sa faaaoga ai e le aiga o Casper ten Boom lo latou fale e fai ma lafitaga mo i latou sa sailia e le Nazis. O la latou auala lenei sa ola ai i lo latou faatuatuaga faaKerisiano. E toafa tagata o le aiga na maliliu ai ona o le tuuina atu o lenei sulufaiga. Sa faaalu e Corrie ten Boom ma lona uso o, Betsie, ni masina matautia i le tolauapiga o le falepuipui inosia o Ravensbrück. Sa maliu ai Betsie iina—ae ola Corrie.

“ Ravensbrück, sa iloa ai e Corrie ma Betsie e fesoasoani le Atua ia i tatou ia loto faamagalo. Ina ua maea le taua, sa naunau ia Corrie e faasoa atu lenei savali. I se tasi taimi, sa faatoa talanoa atu ai lava i se vaega o tagata i Siamani sa mafatia mai le faatamaiaga a le taua. O lana savali o le, ‘E faamagaloina e le Atua.’ O iina na fotuai mai ai faamanu-iaga o le faamaoni o Corrie ten Boom.

“Sa alu atu se tamaloa ia te ia. Sa ia iloaina o ia, o se tasi o leoleo aupito saua sa i ai i le tolauapiga. ‘Sa e ta’ua Ravensbrück i lau tautalaga,’ o lana tala lea. ‘Sa ou leoleo ai iina. … Peitai, talu mai lena taimi, … ua avea au ma Kerisiano.’ Na ia faamatala e faapea, sa ia sailia le faamagaloga mai le Atua mo mea leaga sa ia faia. Sa ia faaloaloa mai lona lima ma fesili mai, ‘Pe mafai ona e faamagalo mai ia te au?’

“Ona faapea atu lea o Corrie ten Boom:

“‘Atonu e le’i tele ni sekone na tutu ai o ia iina—ma lona lima o loo faaloaloa mai—ae ia te au lava ia sa foliga mai e tele ni itula a o ou tauivi ma le mea aupito sili ona faigata sa tatau ona ou fai.

“’… O le savali faapea e faamagaloina e le Atua e i ai se … tuutuuga: tatou te faamagalo atu ia i latou na agaleaga mai ia i tatou. …

“… ‘Fesoasoani mai ia te a’u!’ Sa ou tatalo le leoa ai. ‘E mafai ona sii lo’u lima. Na pau lena o le mea e mafai ona ou fai. Auina e oe le lagona.

“’… Faatasi ma le musuã, ma le lå mafaufau i ai, sa ou tuu faamalosi atu lo’u lima i le lima sa faaloaloa mai ia te au. A o ou faia lena mea, sa tupu se mea e faigata ona talitonuina. O le ãu tafe na amata i lo’u tauau, ma puna vave a’e ai i lo’u lima, ma sosolo atu ai i o ma’ua lima ua soofaatasi. Ona foliga mai ai lea ua lilofia lo’u tagata atoa i lenei mafanafana faamalolo, ma au-maia ai loimata i o’u mata.

“’Ua ou faamagalo ia te oe, tuagane!’ Sa ou tagi ai. ‘Ma lo’u loto atoa.’

“Sa umi se taimi o ma taufai uumau e le tasi le lima o le isi, o lå sa leoleo ma lå sa pagota. Ou te lei iloaina muamua le o’oo’o o le alofa o le Atua e pei ona sa ou iloa ai i lena taimi.’ [Corrie ten Boom, Tramp for the Lord (1974), 54–55.] ” (Keith B. McMullin, “O Le Ala o Mea e Tatau ona Tatou Faia,” Ensign po o le Liahona, Me 2010, 13).

A uma ona faitau le tagata aoga, fai atu le fesili lenei:

O le a se mea ua faagaeetia ai oe e uiga i lenei tala?

Valaaulia se tagata aoga e faitau leotele le Mataupu Faavae ma Feagaiga 98:39–40, ma fai atu i le vasega e vaavaai mo le tulafono a le Alii o le faamagalo atu.

E tusa ai ma nei fuaiupu, o le a le mea e tatau ona tatou faia pe a talosaga mai se tasi mo le faamagaloga?
E tusa ai ma le fuaiupu e 40, e faafia ona tatou faamagalo atu i se tasi ua salamo ma sailia la tatou faamagaloga? (“Seia faafitugafulu ni fitu” ua faaalia mai ai le mea moni e faapea, e tatau ona tatou faamagalo atu i isi po o le a lava le tele o taimi latou te salamo ai ma sailia la tatou faamagaloga pe a uma ona faaita pe faatiga ia i tatou. (E ui lava ua poloaiina i tatou e faamagalo atu, ae e le faapea ai, e tatau ona tatou faatagaina isi e faaauau pea ona faatiga ia i tatou.)

Valaaulia se tagata aoga e faitau leotele le Mataupu Faavae ma Feagaiga 98:41-43. Fai atu i le vasega e mulimuli i le faitauga, ma vaavaai mo upumoni na aoao mai e le Alii i le Au Paia e faatatau i o latou fili o e o le a le salamo. Valaaulia tamaiti e lipoti mai mea latou te mauaina.

Aisea o le a taua ai nei upumoni mo le Au Paia i Misuri ina ia malamalama i ai?
E faapefea ona e aoteleina le tulafono a le Alii o le faamagalo atu? (Fesoasoani i tagata o le vasega e faailoa mai ai le poloaiga lenei: Ua poloaiina i tatou e le Alii ia faamagalo atu i o tatou fili. Tusi le poloaiga lenei i luga o le laupapa i lalo o le autu O le Tulafono a le Alii i le faamagalo Atu.)
Aisea e te manatu ua poloaiina ai i tatou e faamagalo atu i isi e tusa lava pe latou te le talosaga mai mo le faamagaloga?

Otooto le Mataupu Faavae ma Feagaiga 98:44–48 i le faamatala atu e faapea, na folafola mai le Alii, afai o le a salamo fili o le Au Paia, o le a latou sao i Lona tauimasui. (Manatua: I le fuaiupu e 44, o le fuaitau “ia e lē faamagalo atu” o lona uiga, o le a faamasinoina atoa le au faatuputupu leaga mo a latou amioga, ae e le faapea, e tatau i le Au Paia ona i ai pea ni lagona o le ita.)

Faaiu i le faamalosiauina o tagata aoga e mulimuli i le tulafono a le Alii o le faamagalo atu, e ala i le saili e faamagalo atu i soo se tasi sa faatiga ia i latou po o i latou latou te alolofa i ai.

Tala ma Faamatalaga o Talaaga

Mataupu Faavae ma Feagaiga 98. Ua faasao e Mary Elizabeth Rollins ma Caroline Rollins itulau o le Tusi o Poloaiga

Na faasoa mai e Elder Steven E. Snow o le au Peresitene o Fitugafulu le tala ia Mary Elizabeth ma Caroline Rollins:

“Ina ua latou siitia atu ma lo laua tina i Initipene, Misuri, i le tautoulu o le 1831, sa vave ona iloa e le auuso talavou o Mary Elizabeth ma Caroline Rollins ia faigata ma sauaga sa feagai ma le Au Paia iina. I se tasi po, sa osofaia ai e se vaega o tagata faatupu vevesi lo latou fale; ae o se isi taimi, sa latou vaaitino ai i le osofaia o le ofisa lomitusi sa le’i leva ona fauina, lea sa i le fogafale pito i luga o le maota o Viliamu W. Phelps.

“I le taimi o le osofaiga o le ofisa lomitusi [i le aso 20 o Iulai, 1833], sa tutuli ese faamalosi ai e le vaega o tagata faatupu vevesi le auaiga o Phelps mai lo latou fale ma tauai i le auala tele a latou meatotino. Ona galulue loa lea o le au talepe i le faaleagaina o masini lomitusi i le fogafale i luga ma tauai mai itulau o tusitusiga sa le’i faapipiiina mai le fale. Sa aumai e isi i fafo ni laupepa tetele ma folafola mai, ‘O Poloaiga nei a Mamona!’ [“Mary Elizabeth Rollins Lightner,” The Utah Genealogical and Historical Magazine, Iulai 1926, 196]. E oo ane i le taimi lea, ua uma ona maua e le Perofeta o Iosefa Samita le tele o faaaliga paia, o ni isi sa vave e pei o le 1823, ina ua faaali mai le agelu o Moronae i le perofeta taulealea. Sa faamaumauina e Iosefa le tele o faaaliga i lana lava tusitusi, ae e leai ni anotusi na saunia ma tufatufaina mo le manuia o tagata o le Ekalesia. I le fiafia tele, sa tulimatai atu ai le Au Paia i Misuri i le lolomiina o nei faaaliga e avea ma se ‘Tusi o Poloaiga.’ Sa faagasolo lenei galuega i le ofisa lomitusi i le taimi na osofai ai le au faatupu vevesi. Sa faamatalaina e Mary Elizabeth, o le sa 15 ona tausaga i lena taimi, le mea na tupu:

“‘Sa ma i ai ma lo’u uso o Caroline [e 13 tausaga le matua] i se tulimanu o se pa ma vaavaai atu ia i latou; ina ua latou tautatala e uiga i poloaiga, sa ou naunau ia ou maua nisi o ia [pepa]. Na fai mai [lo’u] uso, afai ou te alu e aumai ni [itulau] o le a alu foi ma ia, ae sa fai mai “o le a latou fasiotia i ta’ua”’ [“Mary Elizabeth Rollins Lightner,” 196].

“A’o pisi le au faatupu vevesi i le tasi tulimanu o le fale, sa taufetuli atu teineiti ma faatumu o la’ua lima i itulau faapelepele. Sa iloa mai i la’ua e le vaega faatupu vevesi ma faatonu teineiti e taofi. Sa toe manatua e Mary Elizabeth: ‘Sa ma tamomoe i le saoasaoa sa ma mafaia. E toalua nisi o i latou sa tuli maia i ma’ua. O le vaaia o se avanoa i se pa, sa ma oo atu ai i se togasana tele lava, faataatitia pepa i luga o le eleele ma ma nanaina ia i ma’ua lava. O sana sa pe a ma le lima i le ono futu le uumi, ma sa ese le mafiafia; sa leva ona laua sueina solo i maua, ma sa latalata mai lava ia i ma’ua, ae sa le’i maua i ma’ua’ [“Mary Elizabeth Rollins Lightner,” 196]” ‘“Treasuring the Doctrine and Covenants,” Ensign, Jan. 2009, 50).

Mataupu Faavae ma Feagaiga 98:23–27. “[Ia] lē upuleaga faasaga atu i lo outou fili, ma talia ma le onosai”

E ui lava ina tatau ona tatou talia ma le onosai ia faiga le lelei ma ia le tauimasui, ae e le faapea ai la e tatau ona tatou faatagaina isi e sauaina pe faatiga ia i tatou. Fai mai leTusitaulima 2: Taitaiina o le Ekalesia “E le mafai ona taliaina le sauaina i soo se ituaiga. O i latou o e saua pe agaleaga i o latou taitoalua, fanau, isi tagata o le aiga, po o se isi lava tagata, ua ia solia tulafono a le Atua ma tagata” (Tusitaulima 2: Taitaiina o le Ekalesia [2010], 21.4.2).