Talateu ki he Ngaahi Tefitoʻi Tokāteliné
ʻOku totonu ke fakamamafaʻi e Ngaahi Tefitoʻi Tokāteline ko ʻení he seminelí:
-
Toluʻi ‘Otuá
-
Palani ʻo e Fakamoʻuí
-
Fakalelei ʻa Sīsū Kalaisí
-
Kuonga Fakakosipelí, Hē mei he Moʻoní, mo Hono Fakafoki Mai ʻo e Ongoongoleleí
-
Kau Palōfitá mo e Fakahaá
-
Lakanga Fakataulaʻeikí mo e Ngaahi Kī ‘o e Lakanga Fakataulaʻeikí
-
Ngaahi Ouaú mo e Ngaahi Fuakavá
-
Nofomalí mo e Fāmilí
-
Ngaahi Fekaú
ʻE tokoni e kau faiakó ki he kau akó ke nau ʻiloʻi, mahino, tui, fakamatalaʻi pea mo fakaʻaongaʻi e ngaahi tefitoʻi tokāteline ko ʻeni ʻo e ongoongoleleí ʻi heʻenau ako e folofolá. ʻE hanga ʻe hono fai iá ʻo tokoniʻi e kau akó ke fakamālohia ʻenau fakamoʻoní mo fakatupulaki ʻenau houngaʻia ʻi he ongoongolelei ʻo Sīsū Kalaisi kuo fakafoki maí. ʻE tokoni foki hono ako ʻa e Ngaahi Tefitoʻi Tokāteliné ke mateuteu lelei ange e kau akó ke moʻui ʻaki e ongoongoleleí mo akoʻi ʻa e ngaahi moʻoni mahuʻinga ko ʻení ki he niʻihi kehé. Naʻe faʻu e ngaahi lēsoni ʻi he tohi lēsoni ko ʻení mo e fakakaukau ki he Ngaahi Tefitoʻi Tokāteliné. ‘Oku mahuʻinga ke ʻiloʻi ʻe fakamamafaʻi foki mo ha ngaahi tokāteline mahuʻinga kehe ‘o e ongoongoleleí ʻi he tohi lēsoni ko ʻení, neongo ‘oku ‘ikai lisi atu ʻi he Ngaahi Tefitoʻi Tokāteliné. ʻOku hoko hono akoʻi ʻo e ngaahi tefitoʻi tokāteline ʻo e ongoongoleleí ʻi hoʻo ako fakaʻaho ʻa e folofolá pea ʻi hoʻo tokoniʻi kinautolu ke maʻuloto e ngaahi potufolofola mahuʻingá. Ko e tupulaki ʻi he mahinó, tuí, mo hono moʻui ʻaki ʻa e Ngaahi Tefitoʻi Tokāteliné ko ha founga ia ʻoku hoko ʻi he taʻu ʻe fā ʻo e seminelí pea hokohoko atu he toenga ʻo e moʻui ʻa e tokotaha akó. Mahalo te ke fie ʻoange ki he kau akó ha lisi ʻo e Ngaahi Tefitoʻi Tokāteliné.
Sivi ʻo e Ngaahi Tefitoʻi Tokāteliné
Kuo faʻu ha Sivi ʻo e Ngaahi Tefitoʻi Tokāteliné ke ʻoange ki he kau faiakó ha fakamatala te nau lava ʻo fakaʻaongaʻi ke tāpuekina lelei ange ai e moʻui ʻa ʻenau kau akó. ʻOku mau fokotuʻu atu ke fakahoko ʻe he kau faiakó ʻa e sivi ko ʻení lolotonga e ʻuluaki uike ʻo e kalasí pea ofi ki he fakaʻosinga ʻo e taʻú. Ke kumi ʻa e Sivi ʻo e Ngaahi Tefitoʻi Tokāteliné mo e ngaahi sivi kehe ʻi he uepisaiti ʻa e S&I (si.lds.org), fekumi ʻo fakaʻaongaʻi ʻa e foʻi lea mahuʻinga ko e assessment.
ʻE maʻu ʻe he kau faiako ʻoku ʻave e ola ʻo ʻenau siví ki he ʻŌfisi Fekumi ʻa e S&I ha lipooti te ne tokoniʻi kinautolu ke liliu ʻenau faiakó ke feau lelei ange e ngaahi fie maʻu ʻa e kau akó. Hangē ko ʻení, kapau ʻoku fakahaaʻi mai ʻe he ngaahi olá naʻe ʻikai mahino ki he kau akó ʻa e tokāteline ʻo e fakatomalá, ʻe ʻiloʻi ha ngaahi lēsoni he silapa fakataʻú ʻa ia ʻe lava ʻo tokoni ke mahino lelei ange ki he kau akó ʻa e tokāteline ko ʻení. ʻI hono lotua ʻe he kau faiakó hono fakaʻaongaʻi e fakamatala ko ʻení ʻi heʻenau akoʻi fakahokohoko ʻa e folofolá, ʻe mateuteu lelei ange ʻetau kau talavoú mo e taautaha kei talavoú ke fakahoko ʻa e Taumuʻa ʻo e Seminelí mo e ʻInisititiuti Fakalotú.