Lēsoni Ako ʻi ʻApí

Ko e Palani ʻo e Fakamo’uí–Talateu mo e Kaveinga ʻo e Fuakava Foʻoú (ʻIuniti 1)

Nāunau ʻOku Teuteu maʻá e Faiako Ako ʻi ʻApí

Fakamatala Fakanounou ʻo e Ngaahi Lēsoni Ako ʻi ʻApi Fakaʻahó

Ko e ngaahi meʻá ni ko ha fakamatala fakanounou ia ʻo e ngaahi meʻa naʻe hokó, ngaahi tokāteliné mo e ngaahi tefitoʻi moʻoni ne ako ʻe he kau akó ʻi heʻenau ako ʻa e ngaahi lēsoni ʻe fā maʻá e fānau ako mei ʻapí ki he ‘iuniti 1. ʻE tokoniʻi koe ʻi hoʻo ʻilo ʻa e meʻa kuo ako ki ai ʻa e kau akó ke ke mateuteu ki he kalasí. Ko e fakamatala fakanounoú ʻoku ʻikai ko ha konga ia ʻo e lēsoní pea ʻoku ʻikai fakataumuʻa ia ke vahevahe mo e kau akó. Koeʻuhí ʻoku nofotaha pē ʻa e ngaahi lēsoni te ke akoʻi ʻi he ʻiuniti 1 ʻi ha niʻihi ʻo e ngaahi tokāteline mo e ngaahi tefitoʻi moʻoni ʻoku lisi ʻi he fakamatala fakanounoú, mahalo te ke ongoʻi he taimi ʻe niʻihi ke vakaiʻi pe aleaʻi ha niʻihi kehe ʻo fakatatau ki he ueʻi ʻa e Laumālié pea mo e fie maʻu ʻa hoʻo kau akó.

ʻAho 1 (Ko e Palani ʻo e Fakamoʻuí)

ʻI heʻenau ako ʻa e palani ʻo e fakamoʻuí, naʻe ako ʻe he kau akó naʻe fili ʻa Sīsū Kalaisi ʻi he maama fakalaumālié ke hoko ko e Huhuʻi ʻo e faʻahinga ʻo e tangatá pea ʻi he malumalu ʻo e fakahinohino ʻa e Tamai Hēvaní, naʻá Ne fakatupu ʻa e māmani ko ʻení. Naʻa nau ako foki ai ʻa e ngaahi moʻoni ko ʻení: Naʻe hāʻele mai ʻa Sīsū Kalaisi ke fakahaofi kitautolu mei heʻetau ngaahi angahalá. ʻE toetuʻu ʻa e kakai kotoa pē, koeʻuhí ko e Toetuʻu ʻa Sīsū Kalaisí. ʻE fakamāuʻi ʻe Sīsū Kalaisi ʻa e faʻahinga kotoa ʻo e tangatá. Kapau te tau ngāue ʻaki e tui kia Sīsū Kalaisí pea moʻui ʻo fakatatau mo ʻEne ongoongoleleí, te tau lava leva ke maʻu ʻa e moʻui taʻengatá.

Lēsoni 2 (Ko e Fatongia ʻo e Tokotaha Akó)

Naʻe ako ʻe he kau akó ʻoku akoʻi ʻe he Laumālie Māʻoniʻoní ʻa e moʻoní. Naʻa nau ʻiloʻi foki kapau te tau fekumi ke ako ʻi he tui, ʻoku tau fakaafeʻi leva ʻa e Laumālie Māʻoniʻoní ki hotau lotó ke akoʻi mo fakamoʻoni ki he moʻoní.

ʻAho 3 (Ko Hono Ako ʻo e Folofolá)

Naʻe ako ʻe he kau akó e mahuʻinga hono lau kotoa e Fuakava Foʻoú mo hono ako fakaʻaho e folofolá. Ko e tahá, naʻe ʻilo ʻe he kau akó ʻa e toe mahulu hake ʻa ʻetau fie maʻu e ngaahi folofolá ʻi he kuonga ko ʻení ʻi ha toe taimi kimuʻa pea ʻi heʻetau ako e ngaahi folofolá, te tau lava ʻo maʻu ʻa e potó, māmá, moʻoní, fakatonutonú, pea mo e fakahinohino te ne taki kitautolu ki he fakamoʻuí. Naʻa nau ʻilo foki ʻi heʻetau ako fakaʻaho e folofolá, ʻoku tau maʻu e “vai moʻuí”, pe ko e meʻakai fakalaumālie, ʻoku tau fie maʻú.

ʻAho 4 (Ko e Talateú mo e Kaveinga ʻo e Fuakava Foʻoú)

Ne ʻilo ʻe he kau akó ko ʻenau taukei ange mo e kaveinga fakahisitōlia mo fakafonua ʻo e Fuakava Foʻoú, ʻe mahino lelei ange ai kiate kinautolu hono ngaahi akonakí pea lava ke nau moʻui ʻaki ia. Naʻa nau ako foki naʻe fekauʻi mai ʻa Sīsū Kalaisí ke ʻomi ʻa e fakamoʻuí ki he kakai kotoa pē pea ʻi heʻetau haʻu kia Sīsū Kalaisí, te tau maʻu ha holi lahi ange ke fakaafeʻi e niʻihi kehé ke haʻu kiate Ia.

Talateú

ʻOku fakataumuʻa ʻa e lēsoni ko ʻení ke teuteuʻi mo poupouʻi e kau akó ke ako ʻa e Fuakava Foʻoú ʻaki hono fakafeʻiloaki kinautolu ki ha kaveinga mahuʻinga ʻoku maʻu ʻi he ngaahi akonaki ʻa Sīsū Kalaisí mo ʻEne Kau ʻAposetolo ʻi he kuonga muʻá. ʻI he ako ʻe he kau akó ʻa e Fuakava Foʻoú, te nau ako ai ʻa e founga ke tali ʻaki ki he toutou fakaafe ʻa e Fakamoʻuí ke haʻu kiate Iá pea maʻu ʻEne tokoní mo e fakahinohinó ʻi heʻenau moʻuí.

Ngaahi Fokotuʻu ki hono Akoʻí

Talateu ki he Fuakava Foʻoú

ʻOku tokoniʻi kitautolu ʻe he Fuakava Foʻoú ke haʻu kia Sīsū Kalaisi

Hiki ʻa e fehuʻi ko ʻení he palakipoé kimuʻa pea kamata e kalasí: Ko e hā ha niʻihi ʻo e ngaahi kavenga faingataʻa ʻoku aʻusia ʻe he toʻu tupú ʻi hotau kuongá ni?

ʻOmi ki he kalasí ha ngeʻesi puha pe ha kato āfei mo ha ngaahi meʻa mamafa hangē ko ha foʻi maka fōlahi pe ngaahi tohi, ke faʻo ʻi he ngeʻesi puhá pe kato āfeí. Fakaafeʻi ha tokotaha ako ke haʻu ki muʻa ʻi he lokí, pea kole ange kiate ia ke ne puke ʻa e ngeʻesi puhá pe tui ʻa e kato āfeí. Kole ki he kalasí ke nau tali ʻa e fehuʻi ʻoku hiki ʻi he palakipoé, pea kole ki ha tokotaha ako ʻe taha ke hiki ʻa e ngaahi tali ʻa e kau akó ʻi he palakipoé. Hili ʻa e tali takitaha, faʻo ha meʻa mamafa ʻi he loto puhá pe kato āfeí kae ʻoua kuo fonu.

• Te ke ongoʻi fēfē kapau te ke haʻamo ʻa e kavengá ni he ʻahó kakato?

Kole ki he kau akó ke nau fakamatalaʻi ʻa e ngaahi pole pe faingataʻa ʻe fakatupu ʻe ha niʻihi ʻo e ngaahi kavenga ʻoku hiki ʻi he palakipoé ki ha tokotaha.

Fakamatalaʻi ange ʻoku akoʻi kitautolu ʻe he Fuakava Foʻoú ʻo kau ki he ngāue ʻa Sīsū Kalaisi ʻi he matelié pea hili e toetuʻú, kau ai ʻa ʻEne ngaahi akonakí, maná, feilaulau fakaleleí, mo e ʻaʻahi ki he kau ākonga kimuʻa ʻo e siasí. ʻOku ʻi ai ha foʻi moʻoni naʻe toutou ʻasi ʻi Heʻene ngaahi akonakí pea mo ʻEne fengāueʻaki mo e niʻihi kehé ʻe lava ke ne tokoniʻi kitautolu ʻi he ngaahi kavenga ʻoku tau fuesiá.

Fakamatalaʻi ange ʻoku fakakau ʻi he Mātiu 11 ha sīpinga ʻo e kaveinga mahuʻinga ko ʻení ʻa ia ʻe faʻa fakatokangaʻi ʻe he kau akó ʻi heʻenau ako ʻa e Fuakava Foʻoú ʻi he taʻu ní. Fakaafeʻi ha tokotaha ako ke lau leʻolahi ʻa e Mātiu 11:28. Kole ki he kalasí ke muimui ki ai, ʻo kumi ʻa e fakaafe ʻa e Fakamoʻuí kiate kinautolu ʻoku nau fua ʻa e ngaahi kavenga faingataʻá.

• ʻOkú ke pehē ko e hā hono ʻuhinga ke feinga mo māfasiá?

• Ko e hā naʻe pehē ʻe he Fakamoʻuí kuo pau ke tau fai kae toki maʻu ʻEne fiemālié? (Fakaʻaongaʻi e ngaahi lea ʻa e kau akó, ʻo tohi ʻa e tefitoʻi moʻoni ko ʻení ʻi he palakipoék: ʻI heʻetau haʻu kia Sīsū Kalaisi mo ʻetau ngaahi kavengá, te Ne foaki kiate kitautolu ʻa e fiemālié.)

• ʻOkú ke pehē ʻoku ʻuhinga ki he hā ke haʻu kia Sīsū Kalaisí?

Ke tokoni ke mahino ki he kau akó ʻa e ʻuhinga ʻo e haʻu kia Kalaisí, fakaafeʻi ha tokotaha ako ke lau leʻolahi ʻa e Mātiu 11:29–30 Kole ki he kalasí ke nau muimui pē, ʻo fekumi ki he ngaahi fakahinohino ʻa e Fakamoʻuí kiate kinautolu ʻoku nau loto ke haʻu kiate Iá.

• Fakatatau ki he ngaahi veesi ko ʻení, ko e hā kuo pau ke tau fai ke haʻu kia Kalaisí?

Tā ha fakatātā ʻo ha haʻamonga ki ha pulu ʻi he palakipoé, pe fakaʻaliʻali ha fakatātā ʻo ha haʻamonga.

Fakamatalaʻi ko e haʻamongá ko ha ʻakau ʻoku faʻa ngāue ʻaki ke haʻi fakataha ki ai ha ongo pulu pe ha ongo monumanu kehe, ke na lava ʻo toho fakataha ha uta.

• Ko e hā e taumuʻa mo e lelei ʻo ha haʻamongá? (Neongo ko e haʻamongá ko ha meʻa mamafa pe kavenga, ka ʻokú ne fakaʻatā e ongo monumanú ke fakatahaʻi hona mālohí mo e iví, ʻo fakalahi ai e ngāue ʻokú na lavá.)

• ʻOkú ke pehē ʻoku ʻuhinga ki he hā ke toʻo kiate kitautolu ʻa e haʻamonga ʻa e Fakamoʻuí?

Fakaafeʻi ha tokotaha ako ke lau leʻolahi e fakamatala ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kalasí ke nau fakafanongo ki he founga te tau lava ʻo toʻo kiate kitautolu ʻa e haʻamonga ʻa e Fakamoʻuí pea mo e ngaahi tāpuaki te tau lava ʻo maʻu ʻi heʻetau fai iá.

“ʻOku ʻai ʻe he haʻamongá ʻa e ongo monumanú ke na tuʻu ʻo ngāue fakataha ke fakahoko ha ngāue.

“Fakakaukau ki he fakaafe fakafoʻituitui makehe ko ia ʻa e ʻEikí ke ʻtoʻo ʻeku haʻamongá kiate kimoutolú.’ ʻOku hanga ʻe heʻetau fakahoko mo tauhi e ngaahi fuakava toputapú ʻo haʻi kitautolu ki he ʻEiki ko Sīsū Kalaisí. Ko hono moʻoní, ʻoku fakaafe mai e Fakamoʻuí ke tau falala pea ngāue fakataha mo Ia, neongo ʻoku ʻikai tatau mo lava ke fakatatau ʻetau ngāue lelei tahá ki Heʻene ngāué. ʻI heʻetau falala pea ngāue fakataha mo Ia ʻi he fononga ʻo e matelié, ko e moʻoni ʻoku faingofua pē ʻa ʻEne haʻamongá pea maʻamaʻa ʻa ʻEne kavengá.

“ʻOku ʻikai pea ʻoku ʻikai fie maʻu ke tau tuenoa. ʻE lava ke tau fakalakalaka ʻi heʻetau moʻuí ʻaki ha tokoni fakalangi. Te tau malava ʻo maʻu ha ivi pea mo ‘[ha mālohi ʻoku mahulu ange ʻi haʻatautolú]’ (‘ʻEiki, Te u Muimui Atu,’ Ngaahi Himí, fika 127)” (“Ke Nau Lava ʻo Fua Faingofua ʻEnau Kavengá,” Ensign pe Liahona, Mē 2014, 88).

• Ko e hā ʻokú ne “haʻi” kitautolu ki he Fakamoʻui ko Sīsū Kalaisí?

• Fakatatau kia ʻEletā Petinā, ko e hā e ngaahi tāpauaki ʻo hono haʻi kitautolu ki he Fakamoʻuí?

Fakamahinoʻi ange ʻoku ʻikai ʻuhinga ʻa e ngaahi talaʻofa ʻo e “fiemālie” ʻa e Fakamoʻuí ʻi he Mātiu 11:28–29 te Ne toʻo ʻa ʻetau ngaahi palopalemá pe faingataʻá. ʻOku faʻa ʻomi ʻe he Fakamoʻuí kiate kitautolu ʻa e nonga mo e mālohi ʻoku tau fie maʻu ke ikunaʻi pe kātakiʻi ʻaki hotau ngaahi ʻahiʻahí, ʻo fakamaʻamaʻa ai ʻetau ngaahi kavengá. Kapau te tau faivelenga ʻi he ngaahi faingataʻa ʻo e matelié, ko e fiemālie taupotu te tau maʻú ko e hakeakiʻi fakataha mo e ʻOtuá (vakai, T&F 84:23–24).

Kole ki he kau akó ke nau fakalaulauloto ki he founga kuo foaki ai ʻe he Fakamoʻuí ʻa e fiemālié kiate kinautolu ʻi he taimi ne nau haʻu ai kiate Iá. Fakaafeʻi ha niʻihi ʻo e kau akó ke vahevahe e ngaahi meʻa kuo nau aʻusiá mo e kalasí.

Fakaafeʻi e kau akó ke nau fokotuʻu ha ngaahi taumuʻa pau fekauʻaki mo ha ngaahi founga ʻe lava ke nau haʻu ai kia Sīsū Kalaisi ʻi heʻenau ako ki he Fuakava Foʻoú ʻi he lolotonga ʻenau ako ki he Fuakava Foʻoú ʻi he taʻu ní. Poupouʻi kinautolu ke fakakau ʻi heʻenau ngaahi taumuʻá hono ako fakaʻaho ʻo e folofolá pea mo lau kotoa e Fuakava Foʻoú ʻi he taʻú ni.

Ko e Vakaiʻi Fakalūkufua Nounou ʻo e Fuakava Foʻoú

ʻOku fakamoʻoniʻi ʻe he ngaahi tohi ʻi he Fuakava Foʻoú ko Sīsū Kalaisí ko e ʻAlo ia ʻo e ʻOtuá mo hotau Fakamoʻuí?

Hiki e hingoa ʻo kinautolu ne nau tohi ʻa e faaʻi Kosipelí ʻi he palakipoé: Mātiu, Maʻake, Luke, mo Sione. Fakamatalaʻi ange naʻe hiki ʻe he kau ākonga takitaha ko ʻeni ʻa Sīsū Kalaisí e ngaahi meʻa ne hokó mo e ngaahi akonaki mei he moʻui ʻa e Fakamoʻuí. ʻOku ui ʻa ʻenau ngaahi lekōtí ko e Ngaahi Kosipelí. ʻOku ʻuhinga ʻa e foʻi lea kosipelí ki he “ongoongo lelei.” Fakamatalaʻi ange ʻoku liliu ʻe he Liliu ʻa Siosefa Sāmitá ʻa e hingoa ʻo e Kosipeli takitaha ki he fakamoʻoni, ʻo hangē “Ko e Fakamoʻoni ʻa Mātiú.”

• Ko e hā ʻoku tokoni ai ke lahi hake ʻi he tahá ʻa e ongoongolelei pe fakamoʻoni ki he moʻui mo e ngaahi akonaki ʻa Sīsū Kalaisí?

Fakamatalaʻi ange neongo e kehekehe ʻa e faaʻi Kosipelí ʻi ha fanga kiʻi fakamatala fakaikiiki mo e fakakaukau, ka ʻoku nau fakamatala kotoa pē ki he ngaahi meʻa naʻe hoko ʻi he moʻui mo e ngāue fakamatelie ʻa e Fakamoʻuí ʻi he lotolotonga ʻo e kau Siú. ʻOku fakamoʻoniʻi ʻe he faaʻi Kosipeli kotoa ko Sīsū Kalaisí ʻa e ʻAlo ʻo e ʻOtuá pea mo e Fakamoʻui ʻo e māmaní. Fekau ʻa e kau akó ke nau sio ki he saati “Ko ha Vakai Nounou ki he Moʻui ʻa Sīsū Kalaisi ʻi he Matelié,” ʻi he fakaʻosinga ʻo e ʻIuniti 1: Lēsoni ʻo e ʻAho 4 Fakaafeʻi kinautolu ke nau fakaʻaongaʻi ʻa e sātí ke ʻiloʻi e ngaahi meʻa lalahi ne hoko ʻi he ngāue ʻa e Fakamoʻuí ʻi he māmaní.

• Fakatatau ki he sātí, ko e hā e fuoloa ʻo e ngāue fakafaifekau ʻa e Fakamoʻuí ʻi he matelié?

• Ko e fē ʻa e feituʻu ne ngāue fuoloa taha ai e Fakamoʻuí lolotonga ʻEne ngāue fakafaifekaú?

Fakaafeʻi e kau akó ke fakaʻaongaʻi ʻa e saati ko ʻení ke mahino lelei ange ʻa e kaveinga ʻo e faaʻi Kosipelí ʻi heʻenau ako ʻa e Fuakava Foʻoú.

Fakaafeʻi e kau akó ke fakaava ki he fakahokohoko ʻo e Tohi Tapú. Fakamatalaʻi ange neongo ʻoku ʻomi ʻe he Ngaahi Kosipelí ha fakamatala ki he ngāue ʻa e Fakamoʻuí, ʻoku ʻomi ʻe he ngaahi tohi meia Ngāue kia Fakahaá ʻa e lekooti ʻo e ngāue ʻa e Kau ʻAposetolo ʻa Kalaisi ʻi he kuonga muʻá hili Hono Tutukí, Toetuʻú, mo e Hāʻele Haké. Naʻe fononga ʻa e Kau ʻAposetoló ni ʻo malanga ʻaki ʻa e ongoongoleleí mo fokotuʻu e ngaahi kolo ʻo e Siasí ʻi he kotoa ʻo e ngaahi fonua ʻo ʻIsilelí mo e Puleʻanga ʻo Lomá. ʻI hono ako e ngaahi ngāue mo e tohi ʻa e Kau ʻAposetoló ni, ʻe lava ke fakamālohia ʻetau tui ki he Fakamoʻuí mo ako e founga ke maʻu ai e ngaahi tāpuaki ʻo ʻEne Fakaleleí. Te tau lava foki ʻo vakai ki he vāofi ʻa e faitatau ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo e siasi ʻo Sīsū Kalaisi ʻi he kuonga muʻá.

Fakakaukau ke vahevahe hoʻo fakamoʻoni ki he Fuakava Foʻoú, pea fakaafeʻi e kau akó ke nau kumi ki he ngaahi moʻoni te ne tāpuekina kinautolu ʻi heʻenau ako ʻa e moʻui mo e ngaahi akonaki ʻa Sīsū Kalaisí mo ʻEne Kau ʻAposetoló ʻi he Fuakava Foʻoú.

ʻIuniti Hokó (Mātiu 1–5)

Fakamatalaʻi ange te nau ako ʻi he ʻiuniti hokó ki he niʻihi ʻo e ngaahi fakaikiiki fekauʻaki mo hono ʻaloʻi e ʻAlo ʻo e ʻOtuá. Te nau ako foki ki he ngaahi akonaki ʻa Sīsū Kalaisí ʻo kau ki he founga ke tau fiefia moʻoni ai ʻi he moʻuí ni pea hoko ʻo haohaoa ʻo hangē ko e Tamai Hēvaní.