2 Pita–Sute (ʻIuniti 30)

Nāunau ʻOku Teuteu maʻá e Faiako Ako ʻi ʻApí

Fakamatala Fakanounou ʻo e Ngaahi Lēsoni Ako ʻi ʻApi Fakaʻahó

ʻOku ʻikai fakataumuʻa ʻa e fakamatala fakanounou ko ʻeni ʻo e ngaahi meʻa naʻe hokó, ngaahi tokāteliné mo e ngaahi tefitoʻi moʻoni naʻe ako ʻe he kau akó ʻi heʻenau ako e 2 Pita–Sute (ʻiuniti 30) ke akoʻi ko ha konga hoʻo lēsoní. ʻOku nofotaha e lēsoni ʻokú ke akoʻí ʻi he niʻihi pē ʻo e ngaahi tokāteline mo e tefitoʻi moʻoni ko ʻení. Muimui ki he ngaahi ueʻi ʻa e Laumālie Māʻoniʻoní ʻi hoʻo fakakaukauʻi e ngaahi fie maʻu hoʻo kau akó.

ʻAho 1 (2 Pita)

Naʻe tohi ʻe he ʻAposetolo ko Pitá e tohí ni ki he Kāingalotú ke tokoniʻi kinautolu ʻi he lotolotonga ʻo e fakatangá, ʻahiʻahí mo e hē mei he moʻoní ʻi he Siasí. ʻI hono ako ʻe he kau akó e ngaahi lea ʻa Pitá, naʻa nau ako ai ʻoku maʻu ʻe he kau palōfitá e folofolá ʻi he Laumālie Māʻoniʻoní pea ʻoku feinga e kau akonaki loí ke kākaaʻi kitautolu ki he tui ko ia ʻoku iku e angahalá ki ha tauʻatāina lahi ange. Naʻe ako foki ʻe he kau akó te tau lava ʻo teuteu ki he Hāʻele ʻAnga Ua Mai ʻa e Fakamoʻuí ʻaki ʻetau moʻui anga faka-ʻOtua mo tokanga fakamātoato ki Heʻene hāʻele maí.

ʻAho 2 (1 Sione)

Naʻe ako ʻe he kau akó mei he 1 Sione, kapau te tau maʻu mo muimui ki he ngaahi akonaki ʻa e kau palōfitá mo e kau ʻaposetoló, te tau lava ʻo ngāue fakataha mo e Tamaí pea mo e ʻAló. ʻIkai ngata aí, ʻoku nau ako ko e taimi ʻoku tau ʻofa ai ki he ʻOtuá, te tau ʻofa ki he niʻihi kehé.

ʻAho 3 (2 Sione–3 Sione)

ʻI he ongo tohi kehe ʻa e ʻAposetolo ko Sioné ki he Kāingalotú, naʻá ne hokohoko atu ke fakahaaʻi e hohaʻa ki he tākiekina ʻo e hē mei he moʻoní ʻi he Siasí. Naʻe ako ʻe he kau akó mei he ongo tohi ko ʻení ko e taimi ʻoku tau tauhi ai e ngaahi fekaú mo tokangá, te tau lava ʻo hokohoko atu ke fiefia ʻi he ngaahi tāpuaki ʻo e ongoongoleleí kuo tau maʻú, pea kapau te tau nofo maʻu ʻi he tokāteline ʻo Kalaisí, te tau maʻu e Tamaí mo e ʻAló moʻotautolu. Naʻe ʻiloʻi foki ʻe he kau akó ʻoku ʻomi ʻe hono moʻui ʻaki e ongoongoleleí ʻa e fiefia ʻo ʻikai ngata pē kiate kitautolu, ka ki he niʻihi kehé pea ʻoku totonu ke tali mo poupouʻi e kau tamaioʻeiki kotoa ʻa e ʻEikí.

ʻAho 4 (Sute)

ʻI hono ako ʻe he kau akó e tohi ʻa Sute ki he Kāingalotu naʻa nau aʻusia e fakafepaki lahí, naʻa nau ʻilo ʻoku totonu ke fakafepakiʻi fakamātoato ʻe he kau ākonga ʻa Sīsū Kalaisí e ngaahi akonaki halá mo e ngaahi angafai koví. Naʻe ako foki ʻe he kau akó ʻoku fakatokanga mai e kau ʻaposetoló mo e kau palōfitá mo tokoni ke tau ʻiloʻi ʻa kinautolu ʻoku feinga ke fakavaivaiʻi ʻetau tuí mo e talangofuá pea te tau lava ʻo kei tuʻu maʻu ʻi he tuí ʻaki hono langa ʻetau moʻuí ʻi he ongoongolelei ʻo Sīsū Kalaisí.

Talateú

Naʻe poupouʻi ʻe he ʻAposetolo ko Pitá e Kāingalotú ke tupulaki ʻi heʻenau ʻilo kia Sīsū Kalaisí ʻi he feinga ke hoko ʻo hangē ko Iá. Naʻá ne fakapapauʻi ange kiate kinautolu ʻe lava ke tokoni e tupulaki fakalaumālie ko ʻení ke “fakatuʻu maʻu homou uí mo homou filí” (2 Pita 1:10).

Ngaahi Fokotuʻu ki hono Akoʻí

2 Pita 1:1–11

Ko e akoʻi ʻe Pita e founga ke maʻu ai e natula faka-ʻOtua ʻo Sīsū Kalaisí

Fakatokangaʻi ange: ʻI hono aleaʻi e tefitoʻi moʻoni mo e potufolofola ko ʻení, tokanga ke ʻoua ʻe aleaʻi e ngaahi tefito fekauʻaki mo e ngaahi ouau ʻo e temipalé mo e ngaahi tokāteliné.

Kimuʻa pea kamata e kalasí, hiki e fakamatala ko ʻení ʻi he palakipoé (mei he “The Will Within,” Ensign, May 1987, 68):

“Ko hotau ngafá ke aʻusia hotau tuʻunga lelei tahá” (Palesiteni Thomas S. Monson).

Vahevahe tautau toko ua e fānau akó. Fakaafeʻi kinautolu ke lau ʻa e fakamatala ʻi he palakipoé pea aleaʻi e ngaahi fehuʻi ko ʻení mo honau hoá:

ʻOkú ke pehē ko e hā ne ʻuhinga ki ai ʻa Palesiteni Monisoni ʻi heʻene pehē “hotau tuʻunga lelei tahá”?
ʻOkú ke pehē ko e hā ʻoku mahuʻinga ai ke tau hoko ʻo maʻu hotau tuʻunga lelei tahá?
Ko e hā te ne lava ʻo taʻofi kitautolu mei he hoko ki hotau lelei tahá?

Fakaafeʻi e kau akó ke kumi e foʻi moʻoni ʻi heʻenau ako e 2 Pita 1 ʻe tokoni ke nau ʻiloʻi e founga te nau lava ai ʻo hoko ko honau lelei tahá.

Fakamatalaʻi fakanounou ʻa e 2 Pita 1:1–2 ʻaki hano fakamatalaʻi ange naʻe tohi ʻa Pita ki he kāingalotu ʻo e Siasí ne nau maʻu ʻa e tui kia Sīsū Kalaisí, ka naʻe ʻahiʻahiʻi kinautolu ke toe foki ki he ngaahi founga faiangahala ʻo e māmaní.

Fakaafeʻi ha tokotaha ako ke lau leʻolahi e 2 Pita 1:3–4. Kole ki he kalasí ke muimui ki ai, ʻo kumi e meʻa naʻe akoʻi ʻe Pita ke tokoni ke tuʻu maʻu e Kāingalotú ʻi heʻenau fakamoʻoni ki he Fakamoʻuí.

Fakatatau ki he ngaahi veesi ko ʻení, ko e hā naʻe akoʻi ʻe Pita ki he Kāingalotú?
Ko e hā ʻene ʻuhinga ke “kau … ʻi he anga ʻa e ʻOtuá”? (2 Pita 1:4).

Fakaafeʻi e kau akó ke lau fakalongolongo e 2 Pita 1:5–7, ʻo kumi e ngaahi ʻulungaanga ʻo Sīsū Kalaisi naʻe fakaafeʻi ʻe Pita e Kāingalotú ke fakatupulakí. Kole leva ki he kau akó ke hiki he palakipoé ʻa e ngaahi ʻulungaanga ʻoku nau maʻú. Fakakaukau ke fakaafeʻi e kau akó ke kumi ʻi ha tikisinale ʻa e ʻuhinga ʻo ha taha ʻo e ngaahi ʻulungaanga ko ʻení te nau loto ke mahinoʻi lelei angé.

Fakaafeʻi ʻa e kau akó ke fakakaukau ki he ngaahi sīpinga naʻe fakahaaʻi ai ʻe he Fakamoʻuí ha taha ʻo e ngaahi ʻulungaanga fakalangi ko ʻení. Kole ki ha kau ako ʻe niʻihi ke lipooti ʻenau ngaahi fakakaukaú ki he kalasí.

Hiki ʻa e tefitoʻi moʻoni taʻekakato ko ʻení ʻi he palakipoé: ʻI heʻetau fakatupulaki ʻa e ngaahi ʻulungaanga faka-ʻOtuá ʻiate kitautolú, te tau lava …

Fakaafeʻi ha tokotaha ako ke lau leʻolahi e 2 Pita 1:8–9. Kole ki he kalasí ke muimui ki ai, ʻo kumi ha tāpuaki te tau lava ʻo maʻu ʻi heʻetau fakatupulaki e ngaahi ʻulungaanga faka-ʻOtua ʻo e Fakamoʻuí.

Ko e hā e tāpuaki te tau lava ʻo maʻu ʻi heʻetau fakatupulaki e ngaahi ʻulungaanga faka-ʻOtuá? (Hili e tali ʻa e kau akó, fakakakato e fakamatala ʻi he palakipoé koeʻuhí ke peheni: ʻI heʻetau fakatupulaki e ngaahi ʻulungaanga faka-ʻOtuá ʻiate kitautolu peé, te tau lava ʻo ʻiloʻi ʻa Sīsū Kalaisi.)
ʻOkú ke pehē ko e hā ʻoku tokoni ai hono fakatupulaki e ngaahi ʻulungaanga faka-ʻOtuá ke tau ʻiloʻi ʻa Sīsū Kalaisí?

Fakaafeʻi ha tokotaha ako ke lau leʻolahi e 2 Pita 1:10–11. Kole ki he kalasí ke muimui ki ai, ʻo kumi ha toe tāpuaki kehe ʻe lava ʻo maʻu ʻe kinautolu ʻoku faivelenga ʻi hono fakatupulaki e ngaahi ʻulungaanga faka-ʻOtuá.

Ko e hā e tāpuaki ʻe lava ke maʻu ʻe kinautolu ʻoku faivelenga ʻi hono fakatupulaki e ngaahi ʻulungaanga faka-ʻOtua ʻo Sīsū Kalaisí? (Fakamatalaʻi ange ʻoku ʻuhinga e kupuʻi lea “ke fakatuʻu maʻu homou uí mo homou filí” [veesi 10] ke maʻu ʻi he moʻuí ni e fakapapau ʻa e ʻOtuá te ke maʻu ʻa e moʻui taʻengatá. Naʻe ʻuhinga foki ʻa Pita ki he meʻá ni ko ha “lea moʻoni lahi ʻo e kikité” [2 Pita 1:19]. Vakai foki, T&F 131:5.)
Ko e hā e tefitoʻi moʻoni te tau lava ʻo ako mei he ngaahi veesi ko ʻení fekauʻaki mo e ʻuhinga ʻoku totonu ke tau faivelenga ai ʻi hono fakatupulaki hotau mālohi fakalangí? (Mahalo ʻe fakaʻaongaʻi ʻe he kau akó ha ngaahi lea kehe, kae fakapapauʻi ʻoku nau ʻiloʻi ʻa e tefitoʻi moʻoni ko ʻení: Kapau ʻoku tau faivelenga ʻi hono fakatupulaki hotau mālohi fakalangí ʻi he moʻuí ni, te tau lava ʻo maʻu e fakapapau ʻa e ʻOtuá ʻo e moʻui taʻengatá. Tohi ʻa e tefitoʻi moʻoni ko ʻení ʻi he palakipoé.)

Fakaafeʻi e kau akó ke fakakaukau ki ha kakai ʻoku nau ʻiloʻi kuo feinga faivelenga ke fakatupulaki ʻa e ngaahi ʻulungaanga faka-Kalaisí.

Ko e fē ʻi he ngaahi ʻulungaanga faka-Kalaisí kuo fakatupulaki ʻe he kakai naʻá ke fakakaukau ki aí?
Ko e hā ha ngaahi founga naʻe tokoniʻi ai kinautolu mo e niʻihi kehe ne nau feohí ʻi heʻenau ngaahi ngāué mo e ʻulungāngá?

Mahalo te ke fie vahevahe hoʻo fakamoʻoní ʻoku tokoni hono fakatupulaki e ngaahi ʻulungaanga faka-ʻOtuá ke tau ʻiloʻi ʻa Sīsū Kalaisi mo teuteuʻi kitautolu ke maʻu ʻa e moʻui taʻengatá.

Fakaafeʻi e kau akó ke hiki ʻi heʻenau pepa ki he kalasí pe tohinoa ako folofolá ha taha ʻo e ngaahi ʻulungaanga faka-ʻOtua te nau fie fakatupulaki lahi tahá. Kole ange ke nau hiki ha ngāue pau te nau lava ʻo fai ke fakatupulaki ai e ʻulungaanga ko iá.

‘Iuniti Hokó (Fakahā 1–11)

Kole ki he kau akó pe kuo nau ʻosi fanongo he ʻApokalipí. Fakamatalaʻi ange ʻoku faʻa ui e tohi ʻa Fakahaá ko e ʻApokalipí, ʻa ia ko e lea faka-Kalisi ki he “fakahā.” Naʻe fakamatalaʻi ʻe he ʻAposetolo ko Sioné ʻi he tohi ʻa Fakahaá ha mata meʻa-hā-mai naʻá ne maʻu ne kau ai ha ngaahi kikite lahi fekauʻaki mo hotau kuongá mo e ngaahi meʻa ʻe hoko he kahaʻú, kau ai e Hāʻele ʻAnga Ua Mai ʻa Sīsū Kalaisí mo e ʻosi ʻa e māmaní. ʻOku kau ʻi he konga lahi ʻo e mata meʻa-hā-mai ʻa Sioné ha ngaahi fakataipe. Fakaafeʻi e kau akó ke fakasio ha ngaahi fakaʻilonga ʻoku hā ai hono ikunaʻi fakaʻosi ʻe he leleí ʻa e koví ʻi heʻenau ako e tohi ʻa Fakahaá.