Lēsoni 3
Ko e Fatongia ʻo e Tokotaha Akó
Talateú
ʻOku ʻi ai e fatongia mahuʻinga ʻo e Laumālie Māʻoniʻoní, faiakó, mo e tokotaha akó ʻi hono ako ʻo e ongoongoleleí. ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi fatongia takitaha ko ʻení koeʻuhí ke nau lavameʻa ʻi heʻenau feinga fakaakó. ʻE ala fie maʻu ke toutou vakaiʻi ʻa e ngaahi tefitoʻi moʻoni ʻoku akoʻi ʻi he lēsoni ko ʻení ke fakamanatu ki he kau akó ʻa honau fatongia ʻi hono ako ʻo e ongoongoleleí.
Ngaahi Fokotuʻu ki hono Akoʻí
Ko e ngaahi fatongia ʻo e Laumālie Māʻoniʻoní, faiakó, mo e tokotaha akó ʻi hono ako ʻo e ongoongoleleí
Fakaafeʻi ha tokotaha ako ke lau leʻolahi ʻa e konga ko ʻení:
ʻOku ueʻi fakalaumālie mo langaki ha finemui ʻi heʻene ʻalu ki he seminelí. ʻOkú ne ongoʻi ai ʻa e ivi tākiekina ʻo e Laumālie Māʻoniʻoní pea mo houngaʻia ʻi he ngaahi meʻa ʻokú ne akó. ʻOku ʻi ai ha finemui ʻe taha ʻi he kalasi semineli tatau pē. Ka neongo iá, ʻokú ne faʻa taʻeoliʻia mo ongoʻi ʻoku ʻikai ke ne maʻu ha meʻa lahi mei he kalasí.
-
Ko e hā ha ngaahi ʻuhinga ʻoku kehekehe ai e aʻusia ʻa e ongo finemui ko ʻení lolotonga iá ʻokú na kau fakataha pē ʻi ha kalasi semineli tatau? (ʻE ala kau he ngaahi talí e ngaahi meʻa ko ʻení: mahalo ʻoku kau lahi ange ʻa e finemui ʻuluakí ki he lēsoní; mahalo ne lahi ange e ngaahi aʻusia ako fakalaumālie kimuʻa ʻa e finemui ʻuluakí, ʻa ia ʻe lava ke langa ai ʻene ako lolotongá; pea mahalo ʻoku tohoakiʻi e tokanga ʻa e finemui hono uá ʻi ha ngaahi hohaʻa kehe.)
Fakaafeʻi e kau akó ke kumi e ngaahi tokāteline mo e ngaahi tefitoʻi moʻoni ʻi he lēsoni ʻo e ʻaho ní ʻe lava ʻo tokoni ke nau fakahoko honau fatongia ʻi he seminelí mo fakamālohia ʻenau ngaahi fakamoʻoni ki he ongoongolelei ʻa Sīsū Kalaisí.
Fakamatalaʻi ange ʻoku ʻi ai ha ngaahi fatongia mahuʻinga ʻo ha niʻihi fakafoʻituitui ʻe toko tolu ʻi hono ako ʻo e ongoongoleleí ʻi ha ʻātakai hangē ko e seminelí: ko e Laumālie Māʻoniʻoní, faiakó mo e tokotaha akó.
Fakaafeʻi ha tokotaha ako ke lau leʻolahi ʻa e Sione 14:26 pea mo ha tokotaha ako kehe ke lau leʻolahi e Sione 16:13. Kole ki he kalasí ke muimui ki ai, ʻo kumi ha niʻihi ʻo e ngaahi fatongia ʻo e Laumālie Māʻoniʻoní.
-
Ko e hā ha moʻoni te tau lava ʻo ako mei he ngaahi vēsí ni ʻo kau ki he ngaahi fatongia ʻo e Laumālie Māʻoniʻoní? (Mahalo ʻe ʻomi ʻe he kau akó ha ngaahi tali kehekehe, kae fakapapauʻi ʻoku nau ʻiloʻi ʻa e tokāteline ko ʻení: ʻOku akoʻi ʻe he Laumālie Māʻoniʻoní ʻa e moʻoní.)
-
Te tau lava ʻo ʻiloʻi fēfē ʻa e taimi ʻoku akoʻi mai ai ʻe he Laumālie Māʻoniʻoní ʻa e moʻoní? (Mahalo te ke fie taki e tokanga ʻa e kau akó ki he Tokāteline mo e Ngaahi Fuakava 8:2–3.)
Kole ki ha tokotaha ako ke lau leʻolahi ʻa e Tokāteline mo e Ngaahi Fuakava 50:13–14. Fakaafeʻi e kalasí ke muimui ki ai, ʻo kumi e fatongia ʻo ha faiako ʻo e ongoongoleleí. Kimuʻa pea lau ʻa e tokotaha akó, fakamatalaʻi ange naʻe ʻoange ʻa e ngaahi veesi ko ʻení ki he fuofua Kāingalotu ʻo e Siasí ne fakanofo ke akoʻi e ongoongoleleí.
-
Ko e hā e fatongia ʻo ha faiako ʻo e ongoongoleleí? (Vakai foki, T&F 42:14.)
Fakaafeʻi ha tokotaha ako ke lau leʻolahi ʻa e 2 Nīfai 33:1. Kole ki he kalasí ke muimui ki ai, ʻo kumi e meʻa ʻoku fakahoko ʻe he Laumālie Māʻoniʻoní maʻatautolú ʻi he taimi ʻoku akoʻi ai ʻa e moʻoní ʻi Hono mālohí.
-
Fakatatau ki he veesi ko ʻení, ko e hā ʻoku fai ʻe he Laumālie Māʻoniʻoní maʻatautolú?
Ke tokoni ke mahino ki he kau akó e founga ke fakaafeʻi ai e Laumālie Māʻoniʻoní ke fakahū e moʻoní ki honau lotó, fakaafeʻi ha tokotaha ako ke lau leʻolahi ʻa e Tokāteline mo e Ngaahi Fuakava 88:118. Kole ki he kalasí ke muimui ki ai mo kumi e founga ʻoku totonu ke tau fekumi ai ki he ʻiló.
-
Ko e hā e founga ʻoku totonu ke tau fekumi ai ki he ʻiló? (ʻI he akó pea ʻi he tuí.)
Fakaafeʻi ha tokotaha ako ke lau leʻolahi e fakamatala ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kalasí ke fakafanongo ki he meʻa ʻoku tau fakaʻatā ke hoko ʻi heʻetau fekumi ki he ʻiló ʻi he tuí:
“ʻE lava ʻe ha faiako ke fakamatalaʻi, fakatātaaʻi, fakalotoʻi pea mo fakamoʻoniʻi, pea mo fakahoko ia ʻi he mālohi fakalaumālie lahi mo lelei. Neongo ia, ko e taupotu tahá, ko e kakano ʻo ha pōpoaki pea mo e fakamoʻoni ʻa e Laumālie Māʻoniʻoní ʻokú na toki hūfia pē ha loto kapau ʻe fakangofua ʻe he taha ʻokú ne tali kinauá ke na hū ange. ʻOku fakaava ʻe he ako ʻi he tuí ʻa e hala ki he lotó” (“Fekumi ki he ʻIló ʻi he Tui,” Liahona, Sepitema 2007, 17).
-
Ko e hā e tefitoʻi moʻoni te tau lava ʻo ako mei he fakamatala ko ʻení fekauʻaki mo e meʻa ʻe lava ke hoko kapau te tau fekumi ki he ʻiló ʻi he tuí? (Tokoni ki he kau akó ke nau ʻilo ʻa e tefitoʻi moʻoni ko ʻení: Kapau te tau fekumi ki he ʻiló ʻi he tui, ʻoku tau fakaafeʻi leva ʻa e Laumālie Māʻoniʻoní ki hotau lotó ke akoʻi mo fakamoʻoni ki he moʻoní. Fakakaukau ke tohi ʻa e moʻoni ko ʻení ʻi he palakipoé.)
Fakamahinoʻi ange ʻoku mahulu hake ʻa e tuí ʻi he tui ʻataʻatā peé. ʻOku tau fakahā ʻetau tuí ʻi heʻetau ngāué.
-
ʻOkú ke pehē ʻoku ʻuhinga ki he hā ke ako ʻi he tuí?
Ke fakatātaaʻi ʻa e ʻuhinga ke ako ʻi he tuí, kole ki ha tokotaha ʻoku teʻeki vaʻinga soka ke tokoni. (Mahalo te ke lava ʻo liliu e ʻekitivitī ko ʻení ke fakakau mai ha tokotaha ako ne teʻeki ai ke vaʻinga pasiketipolo, tā ha meʻalea, hiko, haʻi ha hēkesi, mo e ngaahi alā meʻa pehē.) Talaange ki he tokotaha tokoní ʻoku ʻamanaki ke ke akoʻi ia ke poto feʻunga he vaʻinga soká ke vaʻinga ʻi ha timi soka. ʻEke ki he tokotaha tokoní pe ʻokú ne tui ki hoʻo malava ke akoʻi iá pea ʻi heʻene malava ke akó. Hili iá pea fakamatalaʻi mo fakatātaaʻi e founga hono ʻakaʻaka ha foʻi pulu soka, kae ʻoua naʻa tuku ke feinga ʻahiʻahi ia ʻe he tokotaha tokoní. Fakamatalaʻi e founga ke paasi ha foʻi pulu soka. Hili iá pea fakatātaaʻi ʻaki hono paasi e foʻi pulú ki he tokotaha tokoní, kae toe ʻave e foʻi pulú ʻo ʻikai tuku ke ʻahiʻahi e tokotaha tokoní hono paasi fakafoki atú. Fai ʻa e meʻa tatau ki hono lī ha foʻi pulu soka ki he loto malaʻé hili ʻene tō ki tuʻa mei he vaʻingá. Fehuʻi ange leva ki he tokotaha tokoní:
-
ʻOkú ke ongoʻi mateuteu fēfē ke feinga ke ʻahiʻahi kau atu ki ha timi soka? Ko e hā hono ʻuhingá?
-
Neongo ʻe lava ke tokoni hono ako mo hono siofi ha niʻihi ʻoku nau poto he vaʻinga soká, ka ʻo kapau ʻokú ke fie fakatupulaki ʻa e ngaahi taukei ke lavameʻa ʻi he soká, ko e hā kuo pau ke ke faí?
-
ʻOku fekauʻaki fēfē nai ʻeni ki he ako ʻi he tuí? (ʻOku ʻikai feʻunga ke tau tui mo falala ʻataʻatā pē ʻe lava ke akoʻi kitautolu ʻe he Laumālié. Ke maʻu ha ʻilo ki he ngaahi moʻoni ʻa e ʻOtuá, kuo pau ke tau feinga ke ako mo fakaʻaongaʻi ʻa e meʻa ʻoku tau akó.)
Fakaafeʻi ha tokotaha ako ke lau leʻolahi e fakamatala ko ʻeni naʻe fai ʻe ʻEletā Petinaá. Kole ki he kalasí ke nau fakafanongo ki he meʻa ʻokú ne akoʻi fekauʻaki mo e ako ʻi he tuí (ʻe lava ke ke ʻai ha tatau ʻo e fakamatala ko ʻení maʻá e kau akó pea fakaafeʻi kinautolu ke nau fakaʻilongaʻi ʻa e meʻa te nau maʻú):
“Ko e taha teʻeki potó ʻokú ne fakaʻaongaʻi ʻa e tauʻatāina ke filí ke ngāue ai ʻo fakatatau mo e ngaahi tefitoʻi moʻoní, ʻokú ne fakaava hono lotó ki he Laumālie Māʻoniʻoní mo fakaafeʻi ʻEne ngaahi akonakí, ʻa hono mālohi fakamoʻoní, pea mo ʻene fakapapauʻi ʻo e fakamoʻoní. ʻOku fie maʻu ki he ako ʻi he tuí ha ivi fakalaumālie, fakaʻatamai, pea mo fakaesino ka ʻoku ʻikai ke tali mokomoko pē. ʻOku fakahaaʻi ʻe he fakamātoato mo e tuʻu ʻaliʻaliaki ʻo ʻetau ngāue ʻi he tui ʻoku fai ki heʻetau Tamai Hēvaní mo Hono ʻAlo ko Sīsū Kalaisí, ʻa ʻetau loto fie ako mo fie tali ʻa e fakahinohino mei he Laumālie Māʻoniʻoní. …
“… He ʻikai lava ʻa e ako ia ʻi he tuí ke hiki mei ha faiako ki ha taha ako ʻi he fakamatala, fakaʻaliʻali, pe ngāue ʻahiʻahi ʻoku fakahokó; ka, kuo pau ke fakaʻaongaʻi ʻe he taha akó ʻa e tuí mo ngāue ka ne lava ʻo maʻu ʻa e ʻiló maʻana” (“Fekumi ki he ʻIló ʻi he Tui,” 20).
-
Ko e hā ha ngaahi ngāue fakalaumālie, fakaʻatamai, pe fakatuʻasino te tau lava ʻo fai ke fakaafeʻi e Laumālié ke akoʻi mo fakamoʻoniʻi mai kiate kitautolu ʻa e moʻoní?
Fakatokangaʻi ange: Mahalo ko ha taimi lelei eni ke lau ʻa e Tokāteline mo e Ngaahi Fuakava 88:122 mo aleaʻi ʻa e mahuʻinga ʻo e māú mo e fakaʻapaʻapá ʻi he kalasí.
-
Ko e hā ha ngaahi tōʻonga fakakaukau pe tōʻonga te ne taʻofi e Laumālié mei hono akoʻi kitautolu ʻi ha kalasi semineli?
-
ʻE kehekehe fēfē nai e aʻusia ʻi he seminelí ʻa ha tokotaha ako ʻokú ne fekumi ke ako ʻi he tuí mei ha aʻusia ʻa ha taha ʻoku ʻikai ke ne fai iá?
Kole ki he kau akó ke kumi ʻa e Mātiu 4. Fakamatalaʻi ange ʻoku lava ke tau vakai ʻi he ʻausia ʻa e ʻAposetolo ko Pitá, ki ha sīpinga ʻo e founga ʻo e fekumi ki he ʻiló ʻi he tuí ʻo fakaafeʻi e Laumālie Māʻoniʻoní ki hotau lotó ke akoʻi mo fakamoʻoniʻi ʻa e moʻoní. Kole ki ha tokotaha ako ke lau leʻolahi ʻa e Mātiu 4:18–20. Kole ki he kalasí ke muimui ki ai, ʻo kumi e fakaafe ʻa e Fakamoʻuí kia Pita mo ʻAniteluú.
-
Ko e hā naʻe fakaafeʻi ʻe he Fakamoʻuí ʻa Pita mo ʻAnitelū ke faí?
-
Naʻe hoko fēfē ʻena talí ko ha sīpinga ʻo e fekumi ki he ʻilo ʻi he tuí?
Fakamahinoʻi ange naʻe fakaʻatā ʻe he ngāue ʻa Pita ʻo e muimui ʻia Sīsū Kalaisí ke ne fakataha ai mo e Fakamoʻuí ʻi he kotoa ʻo ʻEne ngāue ʻi he matelié. ʻI heʻetau tokanga ki he ui ʻa e Fakamoʻuí ke muimui ʻiate Iá, naʻe maʻu ʻe Pita ʻa e faingamālie ke fanongo ki he toutou faiako ʻa e Fakamoʻuí pea mo mamata ki ha ngaahi mana lahi. ʻI he fakaafe ʻa e Fakamoʻuí, naʻe lue ʻa Pita ʻi he fukahi tahí (vakai, Mātiu 14:28–29).
Fakamatalaʻi ange ki he kau akó ne ʻi ai ha taimi naʻe fai ange ai ʻe Sīsū ha fehuʻi ki Heʻene kau ākongá. Fakaafeʻi ha tokotaha ako ke lau leʻolahi ʻa e Mātiu 16:13–14. Kole ki he kalasí ke muimui ki ai, ʻo kumi e meʻa naʻe ʻeke ʻe he Fakamoʻuí.
-
Ko e hā naʻe ʻeke ʻe he Fakamoʻuí ki Heʻene kau ākongá?
-
Naʻe fēfē ʻenau talí?
Fakaafeʻi ha tokotaha ako ke lau leʻolahi ʻa e Mātiu 16:15–17. Kole ki he kalasí ke muimui ki ai, ʻo kumi ki he founga hono tali ʻe Pita ʻa e fehuʻi hono hoko ʻa e Fakamoʻuí.
-
Ko e hā e tali ʻa Pita ki he fehuʻi ʻa e Fakamoʻuí?
-
Ko e hā naʻe fakamatalaʻi ʻe he Fakamoʻuí ʻo kau ki he founga ne maʻu ai ʻe Pita ʻene ʻiló?
-
ʻOku hoko fēfē ʻa e aʻusia ʻa Pitá ko ha fakatātā ʻo e ngaahi moʻoni kuo tau ʻiloʻi ʻi he lēsoni ko ʻení?
Fakaafeʻi ʻa e kau akó ke nau tali ʻa e ngaahi fehuʻi ko ʻení ʻi heʻenau pepa ki he kalasí pe tohinoa ako folofolá (mahalo te ke fakakaukau ke hiki ʻa e ngaahi fehuʻí ni ʻi he palakipoé):
-
Ko e fē ha taimi kuó ke fekumi ai ke ako ʻi he tuí? Naʻe fakahoko fēfē ʻe he Laumālie Māʻoniʻoní ʻa Hono fatongia ʻi hono ako e ongoongoleleí ʻi hoʻo fai ʻení? (Te ke lava ke fakaafeʻi e kau akó ke fakakaukau ki ha ngaahi aʻusia ne nau maʻu kimuʻa ʻi he taimi ne nau fekumi ai ke ʻilo lahi ange ʻo kau kia Sīsū Kalaisí.)
Kapau ʻoku fiemālie pē ʻa e fānau akó ke vahevahe, fakaafeʻi ha niʻihi ke nau fakamatalaʻi ʻa e ngaahi aʻusia ne nau tohí. Mahalo te ke fie vahevahe foki haʻo aʻusia pea pehē ki hoʻo fakamoʻoni ki he ngaahi moʻoni kuo mou ʻosi aleaʻí.
Kole ki he kau akó ke fakakaukau ki ha meʻa ʻe taha pe ua te nau fai ke ako ʻi he tuí mo fakaafeʻi ʻa e Laumālie Māʻoniʻoní ki honau lotó ke akoʻi mo fakamoʻoni ki he moʻoní. Fakaafeʻi e kau akó ke nau hiki ʻa e meʻa te nau faí.
Fakaʻosi ʻaki haʻo vahevahe ʻa e fakamatala ko ʻeni ʻa Palesiteni Tōmasi S. Monisoní:
“Kakai kei talavou, ʻoku ou kole kiate kimoutolu ke mou kau ki he seminelí. Ako fakaʻaho hoʻomou folofolá. Fakafanongo fakalelei ki hoʻomou kau faiakó. Moʻui ʻaki e meʻa ʻokú ke akó ʻi he faʻa lotu” (“Participate in Seminary,” Aug. 12, 2011, seminary.lds.org).
Ngaahi Fakamatala Fakamahino mo e Puipuituʻá
ʻOku fakaafeʻi ʻe he loto ʻapasiá ʻa e maʻu fakahaá
ʻE lava ke hoko ʻa e ngaahi tōʻonga fakakaukaú mo e tōʻonga ʻapasiá ko ha konga ʻo e ako ʻi he tuí pea lava ke fakaafeʻi ʻa e Laumālé ke akoʻi mo fakamoʻoni ki he moʻoní. Naʻe akoʻi ʻe Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo kau ki he fekauʻaki ʻi he vahaʻa ʻo e ʻapasiá mo e fakahaá:
“ʻI he ngaahi taʻu kuo ʻosí kuo tau mamata ki ha ngaahi sīpinga ʻo e loto-ʻapasiá mo e taʻeʻapasiá ʻi he Siasí. Neongo ʻoku totonu ke fakalāngilangiʻi hotau tokolahi, ʻoku fakaʻau ke tau hē atu. ʻOku ʻi ai ha ʻuhinga ke tau mātuʻaki tokanga ki ai.
“ʻOku fakaʻau ke longoaʻa ange ʻa e māmaní. …
“ʻOku ʻikai hoko noa, taʻehalaia pe taʻefakatuʻutāmaki ʻa e fakahehema ko ʻeni ke longoaʻa, fakafiefia, pe fakakikihi lahi ange, siʻi ange e fakamaʻumaʻú, fakaʻapaʻapaʻi kitá, mo e anga-māú.
“Ko e ʻuluaki tuʻutuʻuni ʻe fakahoko ʻe ha komanitā ʻi ha feinga ke fai ha ʻohofi fakakautau ko e tāpuni ʻa e ngaahi halanga fetuʻutaki ʻo kinautolu ʻoku fakataumuʻa ke ne ikunaʻí.
“ʻOku feʻunga e taʻeʻapasiá mo e ngaahi taumuʻa ʻa e filí ʻi hono fakafeʻātungiaʻi ʻa e ngaahi founga pelepelengesi ʻo e maʻu fakahaá ʻi he ʻatamaí mo e laumālié fakatouʻosi. …
“… ʻOku totonu ke akoʻi ʻe he kau takí ʻoku fakaafeʻi mai ʻe he loto ʻapasiá ʻa e fakahaá” (“Reverence Invites Revelation,” Ensign, Nov. 1991, 22).
Naʻe akoʻi ʻe Sisitā Makalita S. Lifeti ʻo e kau palesitenisī lahi ʻo e Palaimelí ʻo kau ki he ʻapasia ʻi he ngaahi fakatahaʻanga ʻa e Siasí, pea ʻoku kaunga foki ʻene fakahinohinó ki ha kalasi semineli:
“ʻE toki lava pē ʻe he Laumālié ʻo fakapapauʻi ʻa e ngaahi moʻoni ʻo e ongoongoleleí ʻi he folofola ʻa e ʻOtuá, mūsiká, fakamoʻoní mo e lotú ʻi ha ʻulungaanga ʻo e loto ʻapasiá. …
“… ʻOku ʻikai ngata ʻi he loto taʻe ʻapasiá ʻa ʻetau fetohiʻaki ʻi he telefoni toʻotoʻó mo lau ʻī-meili ʻi ha fakatahaʻanga ʻa e Siasí, ka ʻokú ne tohoakiʻi ʻa e tokangá mo fakahaaʻi ʻa e ʻikai ke fakaʻapaʻapaʻi ʻa e nʻihi kehé. Ko ia, ʻoku tau tā ʻa e sīpinga ʻo e loto ʻapasiá ʻi heʻetau kau ki he fakatahá, fakafanongo ki he kau leá pea hivaʻi fakataha ʻa e ngaahi himi ʻo Saioné” (“Fakaʻapaʻapá mo e ʻApasiá,” Ensign pe Liahona, Mē 2009, 13).
Ko e ui ʻa ha palōfita ke kau ki he seminelí
Naʻe fai ʻe Palesiteni Tōmasi S. Monisoni ʻa e pōpoaki ko ʻení fekauʻaki mo e kau atu ki he seminelí:
“Kuo faitāpuekina ʻe he Seminelí ha moʻui ʻa ha toʻu tupu ʻe laukilu ʻi he Siasí. ʻOku ou manatuʻi e meʻa ne u aʻusia ʻi he seminelí. Naʻe fakahoko hengingia ʻeku seminelí ʻi ha kiʻi fale ne tuʻu fehangahangai mo e ʻapiako māʻolunga ne u ako aí. Ne u pehē, kapau ʻoku lava ʻeku faiakó ʻo ʻā hengihengi pehē, te u lava pē mo au ʻo ʻā hengihengia foki.
“ʻE tokoni atu e Seminelí ke ke maʻu ha mahino mo ke falala ki he ngaahi akonaki pea mo e Fakalelei ʻa Sīsū Kalaisí. Te ke ongoʻi ʻa e Laumālie ʻo e ʻEikí ʻi hoʻo ako ke saiʻia ʻi he folofolá. Te ke teuteuʻi koe ki he temipalé mo e ngāue fakafaifekaú.
“Kakai kei talavou, ʻoku ou kole kiate kimoutolu ke mou kau ki he seminelí. Ako fakaʻaho hoʻomou folofolá. Fakafanongo fakalelei ki hoʻomou kau faiakó. Moʻui ʻaki e meʻa ʻokú ke akó ʻi he faʻa lotu” (“Participate in Seminary,” 12 ʻAokosi 2011, seminary.lds.org).
Kau ki he kalasí
Naʻe akoʻi ʻe Eletā Lisiate G. Sikoti ‘o e Kōlomu ‘o e Kau ʻAposetolo ‘e Toko Hongofulu Mā Uá ‘a e meʻá ni ʻo kau ki he kau atu ki ha polokalama ako ki he ongoongoleleí:
“Ko e fili ʻa e [tokotaha akó] ke kau atú ko hono fakaʻaongaʻi ia ʻo e tauʻatāina ke filí ʻa ia ʻokú ne fakaʻatā ʻa e Laumālie Māʻoniʻoní ke ne fakahā mai ha pōpoaki fakatāutaha ʻoku fakataumuʻa ki heʻenau ngaahi fie maʻu fakafoʻituituí. ʻI hono fakatupu ha ʻātakai ʻe kau mai ai e kalasí ki he lēsoní, ʻe lahi ange ai e faingamālie ke akoʻi ʻe he Laumālié ha ngaahi lēsoni mahuʻinga ange ʻi he meʻa ʻe lava [ʻe he faiakó] ʻo fakahoko ki he kalasí.
“ʻE ‘omi ‘e he‘enau kau ko iá e fakahinohino ‘a e Laumālié ki he‘enau mo‘uí. ʻI hoʻo poupouʻi e kau akó ke hiki honau nimá ʻi heʻenau tali ha fehuʻi, neongo he ʻikai te nau fakatokangaʻi ia, ka ʻoku nau fakahaaʻi ki he Laumālie Māʻoniʻoní ʻenau loto fiemālie ke akó. ʻE fakaʻatā ʻa e Laumālié ʻe hono fakaʻaongaʻi ʻo e tauʻatāina ke filí ke fakaʻaiʻai mo ʻoange kiate kinautolu ha fakahinohino mālohi ange lolotonga hoʻomou fakatahá. ʻOku fakaʻatā ʻe he kau atu ki he lēsoní ke aʻusia ʻe he niʻihi fakafoʻituituí ʻa e tataki ʻa e Laumālié. ʻOku nau ako ke ʻiloʻi mo ongoʻi e tataki fakalaumālié” (“To Learn and Teach More Effectively” [Brigham Young University Campus Education Week devotional, Aug. 21, 2007], 4–5, speeches.byu.edu).
Ko e ngaahi founga kehe ke tokoniʻi e kau akó ke fakahoko honau fatongia ʻi hono ako e ongoongoleleí
Ke ako e founga ke tokoni ai ke fakahoko ʻe he kau akó honau fatongia ʻi hono ako e ongoongoleleí, vakai ki he ngaahi tefito ko ʻení ʻi he Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiakó mo e Kau Taki ʻi he Seminelí mo e ʻInisititiuti Fakalotú [2012]
-
“ʻOku tau tokoni ki he fānau akó ke fakahoko honau fatongia ʻi he akó pea teuteuʻi kinautolu ke nau akoʻi ʻa e ongoongoleleí ki ha niʻihi kehe.” (konga 1.3.3, peesi 8)
-
“ʻAmanaki ʻe fakahoko ʻe he fānau akó ʻa honau fatongiá, ʻi heʻenau hoko ko e kau akó” (konga 2.2.2, peesi 20).
-
“Aleaʻi ʻa e ngaahi tefitoʻi moʻoni ʻo e ako fakalaumālié” (konga 2.2.3, peesi 23).
-
“Fakataumuʻa ki hono tokoniʻi ʻo e fānau akó ke nau fakahoko honau fatongiá” (konga 4.3.4, peesi 77).