Talateu ki he Tohi Hono Tolu ʻa Sioné
Ko e hā hono ʻuhinga ʻoku ako ai e tohí ni?
Naʻe fakahīkihikiʻi ʻe Sione ʻi he tohi nounou ko ʻení, ʻa Keio, ko ha mēmipa ʻo e Siasí naʻe moʻui mateaki lolotonga e taimi ʻo e fakafepaki ki he kau taki ʻo e Siasí. ʻE lava ke tokoni e ngaahi akonaki ʻa Sioné ke mahino lelei ange ki he kau akó naʻe hoko e hē mei he moʻoní ʻi he Siasi ʻo e Fuakava Foʻoú pea ʻe lava ke ueʻi kinautolu ke kei faivelenga ki he kau taki ʻo e Siasí neongo e fakafepakí.
Ko hai naʻá ne hiki e tohí ni?
Naʻe fakahā ʻe he tokotaha faʻu tohí ia “ko e motuʻa” (3 Sione 1:1) pea ʻoku mahino ki he tokolahi ko e ʻAposetolo ia ko Sioné.
Ko e fē e taimi mo e feituʻu ne tohi aí?
ʻOku ʻikai ʻiloʻi pau e taimi mo e feituʻu ne tohi ai e 3 Sione.
Kapau ʻoku tonu e tukufakaholo ʻo e nofo fuoloa ʻa Sione ʻi ʻEfesoó, naʻá ne mei lava ʻo fai e tohí ni mei ai ʻi he vahaʻa ʻo e A.D. 70 mo e 100.
Ko hai naʻe fakataumuʻa ki ai hono hikí pea ko e hā hono ʻuhingá?
Naʻe hiki ʻa e Tohi Hono Tolu ʻa Sioné kia Keio, ko ha mēmipa faivelenga ʻo e Siasí, naʻe fakahīkihikiʻi ʻe Sione ki hono fakahaaʻi ʻo ʻene līʻoa taʻe-siokita ki he ngāue ʻa Kalaisí ʻaki hono foaki ha nofoʻanga maʻá e kau tamaioʻeiki ʻa e ʻOtuá ʻa ia ne fononga holó (vakai, 3 Sione 1:5–8).
Naʻe toe fakatokanga foki ʻa Sione kia Keio fekauʻaki mo ha taha ko Taiotifi, ʻa ia ʻe lava ke fakahoko ha fatongia ʻo e kau taki fakalotofonuá ʻi he Siasí. Naʻe fakafepakiʻi fakahāhā ʻe Taiotifi ʻa Sione mo e kau ʻōfisa kehe ʻo e Siasí pea aʻu ki hono taʻofi e kāingalotu fakalotofonua ʻo e Siasí ʻa ia ne nau fakaʻamu ke tali kinautolu mei heʻenau ʻalu ki he ngaahi fakataha ʻa e Siasí (vakai, 3 Sione 1:9–10). Naʻe poupouʻi ʻe Sione ʻa Keio ke hokohoko atu ʻi he leleí mo pehē naʻá ne ʻamanaki atu ke ʻaʻahi vavé ni pē kia Keio (vakai, 3 Sione 1:11–14).
Ko e hā e ngaahi fōtunga makehe ʻo e tohí ni?
ʻOku tau vakai ʻi he 3 Sione ki he hohaʻa ʻa Sione fekauʻaki mo e ngaahi ivi tākiekina ʻo e hē mei he moʻoní ʻi he Siasí. ʻOku tau vakai foki ki he ʻofa ʻa Sione ki he niʻihi kehé mo e fiefia naʻá ne ongoʻi kiate kinautolu ne fili ki he moʻui talangofua (vakai, 3 Sione 1:4).
Fokotuʻutuʻú
3 Sione 1 Ko e fakahīkihikiʻi ʻe Sione ʻa Keio ʻi heʻene faivelengá mo fakatokanga kau ki ha taki ʻokú ne fakafepakiʻi ʻa Sione mo e kau taki kehe ʻo e Siasí.