Lēsoni 149
2 Sione–3 Sione
Talateú
Naʻe fakatokanga ʻa Sione ki he Kāingalotú fekauʻaki mo e kakai ʻoku nau kākā mo malangaʻi naʻe ʻikai haʻu ʻa Sīsū Kalaisi ʻi he kakanó. Naʻá ne fakahīkihikiʻi foki ʻa Keio ʻi heʻene faivelengá.
Fakatokangaʻi ange: ʻOku kau ʻi he lēsoni ko ʻení ha fokotuʻu ki hono akoʻí ki he Sione 3 ʻoku kau ai hono maʻu ʻe he kau akó e ngaahi tohi mei he mātuʻá pe kau taki ʻo e Siasí. Kapau te ke fili ke fakaʻaongaʻi e fokotuʻu ko ʻeni ki hono akoʻí, ʻe fie maʻu ke ke teuteu ʻi ha ngaahi ʻaho lahi kimuʻa. Fakaafeʻi e mātuʻá pe, kapau ʻe fie maʻu, kau taki fakalotofonua ʻo e Siasí ʻo e tokotaha ako takitaha ke fai ha kiʻi tohi nounou ki he tokotaha akó ʻo fakahaaʻi ʻa e fiefia kuo nau ongoʻi ʻi heʻenau mamata ki he ngaahi feinga ʻa e tokotaha akó ke moʻui ʻaki e ongoongoleleí. Fakapapauʻi kuó ke maʻu ha tohi ki he tokotaha ako takitaha mei heʻene mātuʻá pe ko ha taki ʻo e Siasí ʻi he ʻaho ʻokú ke akoʻi ai e lēsoni ko ʻení.
Ngaahi Fokotuʻu ki hono Akoʻí
2 Sione
Ko e fakatokanga ʻa Sione fekauʻaki mo e kakai ʻoku nau akoʻi ʻa e tokāteline halá
ʻOmi ha hingoa ʻo ha tokotaha sipoti ʻiloa ʻoku maheni mo e tokolahi taha ʻo e kau akó.
-
Ko e hā nai ʻe fai ʻe he tokotaha sipoti ko ʻení ke moʻui lelei maʻu pē ke vaʻinga leleí?
-
Ko e hā ʻe lava ke hoko kapau ʻe ʻikai ke toe ʻalu ki he fale fakamālohisinó ʻa e tokotahá ni pea kamata kai e meʻakai ʻoku ʻikai moʻui leleí, sio TV lahi, vaʻinga keimi vitiō, pea fakaʻaongaʻi e ngaahi meʻa ʻoku fakatuʻutāmaki ki he sinó hili ʻene ngāue mālohi ke moʻui leleí?
Fakaafeʻi e kau akó ke fakakaukau ki he founga ʻe lava ke fakahoa ai e ngāue kuo pau ke fai ʻe he kau sipoti tuʻukimuʻá ke pukepuke honau tuʻunga fakatuʻasinó ki he ngāue kuo pau ke fai ʻe he kāingalotu ʻo e Siasí ke tauhi ʻa e ngaahi tāpuaki kuo nau maʻu ʻi he ongoongoleleí. Fakaafeʻi kinautolu ke kumi ha tefitoʻi moʻoni ʻi heʻenau ako e 2 Sione ʻe lava ʻo tokoni ke nau tauhi e ngaahi tāpuaki kuo nau maʻu ʻi heʻenau hoko ko e kau mēmipa ʻo e Siasí.
Fakamatalaʻi fakanounou ʻa e 2 Sione 1:1–4 ʻaki hano fakamatalaʻi ange naʻe kamata ʻe he ʻAposetolo ko Sioné ʻene tohí ʻaki ʻene lea “ki he fineʻeiki kuo fili mo ʻene fānau”, ʻa ia mahalo ko ha lea fakahangatonu ki ha mēmipa fefine ʻo e Siasí pea mo ʻene fānau pe ko ha lea fakataipe ke fakamatalaʻi ʻaki ha fakatahaʻanga ʻo e Siasí.
Fakaafeʻi ha tokotaha ako ke lau leʻolahi e 2 Sione 1:5–6. Kole ki he kalasí ke muimui ki ai, ʻo kumi e fekau naʻe fakamanatu ʻe Sione ki he Kāingalotú.
-
Ko e hā e fekau naʻe fakamanatu ʻe Sione ki he Kāingalotú?
Fakaafeʻi ha tokotaha ako ke lau leʻolahi e 2 Sione 1:7. Kole ki he kalasí ke kumi e ʻuhinga naʻe faleʻi ai ʻe Sione e kāingalotu ʻo e Siasí ke “ʻaʻeva” (2 Sione 1:6), pe talangofua ki he ngaahi fekaú.
-
Ko e hā naʻe faleʻi ai ʻe Sione e kāingalotu ʻo e Siasí ke talangofua ki he ngaahi fekaú?
-
Ko e hā naʻe akoʻi ʻe he “kau kākaá” (veesi 7)?
Fakamatalaʻi ange ko e taimi naʻe fai ai ʻe Sione e tohi ní, naʻe kamata manakoa ha tui ne ʻiloa ko e Tosetisí. Naʻe tui e kau Tosetisí naʻe hakeakiʻi fau e ʻOtuá ʻo ʻikai ke Ne mamahi, pekia, pe maʻu ha faʻahinga aʻusia fakamatelie. Ko ia ai, naʻa nau aofangatuku ʻo pehē naʻe ʻikai haʻu moʻoni ʻa Sīsū Kalaisi ko e ʻAlo ʻo e ʻOtuá ʻi he kakanó ka naʻe hangē pē naʻe fai ʻe Hono laumālié e ngaahi meʻa ʻe fai pe aʻusia ʻe ha taha fakamatelie.
-
Ko e hā ha ngaahi sīpinga ʻo e ngaahi akonaki hala ʻi hotau kuongá ni ʻoku fepaki mo e ngaahi moʻoni ʻo e ongoongoleleí?
-
Ko e hā ʻoku fakatuʻutāmaki fakalaumālie ai e ngaahi akonaki ko ʻení?
Fakaafeʻi ha tokotaha ako ke lau leʻolahi e 2 Sione 1:8. Kole ki he kalasí ke muimui ki ai, ʻo kumi e meʻa naʻe faleʻi ʻe Sione ki he kāingalotu ʻo e Siasí ke fai koeʻuhí ko e ngaahi akonaki hala ko ʻení. Fakamatalaʻi ange ʻoku ʻuhinga e “vakai pē kiate kimoutolu,” ke tokanga ke ʻoua ʻe tali e ngaahi akonaki halá pea ʻe lava ke ʻuhinga e lavaʻi ke fakahoko pe maʻu.
-
Ko e hā e tefitoʻi moʻoni te tau lava ʻo ako mei he ngaahi akonaki ʻa Sione ʻi he veesi 6–8 fekauʻaki mo e founga ʻe lava ke hokohoko atu ai ʻetau fiefia ʻi he ngaahi tāpuaki ʻo e ongoongoleleí ʻa ia kuo tau maʻú? (ʻOku totonu ke ʻiloʻi ʻe he kau akó ʻi hono fakaʻaongaʻi ʻenau lea pē ʻanautolú, ha tefitoʻi moʻoni tatau mo ʻení: ʻI heʻetau tauhi e ngaahi fekaú pea tokangá, te tau lava ʻo hokohoko atu ke fiefia ʻi he ngaahi tāpuaki ʻo e ongoongoleleí ʻa ia kuo tau maʻú. Tohi ʻa e tefitoʻi moʻoni ko ʻení ʻi he palakipoé.)
Fakaafeʻi e kau akó ke hiki ʻi heʻenau pepa ki he kalasí pe tohinoa ako folofolá ha lisi ʻo e ngaahi tāpuaki ʻo e ongoongoleleí kuo nau ʻosi maʻu pe ʻamanaki atu ke maʻu. Kole ange ke nau vahevahe e meʻa ne nau hikí ki he kalasí. Hiki ʻenau talí he palakipoé.
-
Ko e hā ha founga ʻe lava ai ʻe hono tali e ngaahi akonaki halá ʻo taʻofi kitautolu mei hono maʻu mo hokohoko atu ke fiefia ʻi he ngaahi tāpuaki ko ʻeni ʻo e ongoongoleleí?
Fakaafeʻi ha tokotaha ako ke lau leʻolahi e 2 Sione 1:9. Kole ki he kalasí ke muimui ki ai, ʻo kumi e meʻa naʻe akoʻi ʻe Sione ʻe hoko kiate kinautolu ʻoku nofo maʻu ʻi he tokāteline ʻa Kalaisí, pe nofo ofi pea kātaki ʻi he ongoongoleleí.
-
Ko e hā ʻoku maʻu ʻe kinautolu ʻoku nofo maʻu ʻi he tokāteline ʻa Kalaisí? (Hili e tali ʻa e kau akó, hiki e tefitoʻi moʻoni ko ʻení ʻi he palakipoé: Kapau te tau nofo maʻu ʻi he tokāteline ʻo Kalaisí, te tau maʻu mo kitautolu e Tamaí mo e ʻAló.)
Fakamahinoʻi ange ko e founga ʻe taha ʻoku tau maʻu ai mo kitautolu e Tamaí mo e ʻAló ʻoku fakafou ʻi he takaua ʻo e Laumālie Māʻoniʻoní.
Kole ki he kau akó ke fakalaulauloto ki heʻenau ngaahi feinga ke tauhi e ngaahi fekaú, ke tokanga, pea ke nofo maʻu ʻi he ongoongoleleí. Fakaafeʻi kinautolu ke hiki hifo e ʻuhinga ʻoku nau fie tauhi ai e ngaahi tāpuaki kuo nau maʻu ʻi he ongoongoleleí mo e meʻa ʻe taha te nau fai he ʻahó ni ke faivelenga ange ai mo tauhi maʻu pē e ngaahi fekaú.
Fakamatalaʻi fakanounou ʻa e 2 Sione 1:10–13 ʻaki hano fakamatalaʻi ange naʻe poupouʻi ʻe Sione e Kāingalotú ke fakaʻehiʻehi mei he kakai ʻoku nau fakamafola e tokāteline halá. Naʻá ne toe fakahaaʻi foki ʻene loto-holi ke ʻaʻahi fakatāutaha ki he Kāingalotu naʻá ne tohi ki aí.
3 Sione
Ko e fakahīkihikiʻi ʻe Sione ʻa Keio ʻi heʻene faivelengá
ʻOmi ki he kalasí ha kiʻi foʻi maka mo ha poulu lahi ʻoku fonu vai. Kole ki ha tokotaha ako ke lī ʻa e foʻi maká ki he loto vaí ʻo ʻai ke ʻoua ʻe ngaue e vaí.
-
Ko e hā ʻoku ʻikai malava ai ke taʻengaue e vaí ʻi he foʻi maká?
-
Ko hai ha toe taha makehe meiate koe ʻe lava ke lelei ki ai hoʻo fili ke moʻui ʻaki e ongoongoleleí?
Fakamatalaʻi ange hangē ko ia ne lekooti ʻi he Sione 3, naʻe lea ʻa Sione ki ha mēmipa faivelenga ʻo e Siasí ko Keio.
Fakaafeʻi ha tokotaha ako ke lau leʻolahi e 3 Sione 1:1–4. Kole ki he kalasí ke muimui ki ai, ʻo kumi e founga naʻe kaunga ai kia Sione ʻa e faivelenga ʻa Keio ʻi hono moʻui ʻaki e ongoongoleleí. Fakamatalaʻi ange mahalo ʻoku ʻuhinga e fānau ʻi he veesi 4 ki he kāingalotu ʻo e Siasí naʻe tokoniʻi ʻe Sione ke ului ki he ongoongoleleí.
-
Naʻe kaunga fēfē kia Sione ʻa e faivelenga ʻa Keio ʻi hono moʻui ʻaki e ongoongoleleí?
-
Te ke fakamatalaʻi fakanounou fēfē ha moʻoni mei he ngaahi veesi ko ʻení fekauʻaki mo e founga ʻe lava ke kaunga ai hono moʻui ʻaki e ongoongoleleí kiate kitautolu mo e niʻihi kehé? (Mahalo ʻe ʻiloʻi ʻe he kau akó ha ngaahi moʻoni kehekehe, kae fakapapauʻi ʻoku nau ʻiloʻi ha foʻi moʻoni tatau mo ʻení: ʻOku ʻomi ʻe hono moʻui ʻaki e ongoongoleleí ʻa e fiefia ʻo ʻikai ngata pē kiate kitautolu, ka ki he niʻihi kehé.)
-
Ko e fē ha taimi kuó ke aʻusia ai ʻa e fiefiá koeʻuhí naʻe moʻui faivelenga ʻaki ʻe ha taha kehe ʻa e ongoongoleleí?
Ke toe fakamahinoʻi ʻa e moʻoni ko ʻení, kapau ʻokú ke fili ke faitohi ʻa e mātuʻá pe kau taki ʻo e Siasí ki he kau akó, tufa atu e ngaahi tohi ko iá he taimí ni. Fakapapauʻi ʻoku maʻu ʻe he tokotaha ako takitaha ha tohi mei heʻene mātuʻá pe ha taki ʻo e Siasí, pea tuku ha taimi ki he kau akó ke lau e ngaahi tohí.
Fakamatalaʻi fakanounou ʻa e 3 Sione 1:5–14 ʻaki hano fakamatalaʻi ange naʻe fakahīkihikiʻi ʻe Sione ʻa Keio ʻi heʻene loto fiemālie ke tali ʻa e kau taki ʻo e Siasí pe kau faifekau ne fefonongaʻakí, peá ne fakaangaʻi ha taki fakalotofonua ko Taiotifi, ʻa ia naʻe ʻikai ke ne tali ʻa Sione mo hono ngaahi hoá.
Toe vakaiʻi e ngaahi moʻoni ne ʻilo ʻi he lēsoni ko ʻení. Fakamoʻoni ki he ngaahi moʻoni ko ʻení, pea fakaafeʻi e kau akó ke fakaʻaongaʻi kinautolu ʻi heʻenau moʻuí.
Ngaahi Fakamatala Fakamahino mo e Puipuituʻá
2 Sione 1:1–5. Ko e “fineʻeiki kuo filí”
“Naʻe fakamatalaʻi ʻe Sione ia ʻko e motuʻa’; ko e ʻfineʻeiki kuo fili’ ʻa ia naʻá ne tohi ki aí (vakai, 2 Sione 1:1) mahalo ko ha fakataipe ia ki ha kolo ʻo e Siasí pe ko ha ʻuhinga moʻoni ki ha mēmipa fefine, mahalo naʻa mo hono uaifí. ʻI hotau kuonga fakakosipelí, naʻe ui ʻa ʻEma Sāmita, ko e uaifi ʻo e Palōfita ko Siosefa Sāmitá, ‘ko e fefine … kuo fili’ (T&F 25:3). Naʻe fiefia ʻa Sione naʻá ne maʻu e fānau ʻo e fefine kuo filí ʻoku ʻaʻeva ʻi he moʻoní mo muimui ki he ongoongolelei ʻo Sīsū Kalaisí” (New Testament Student Manual [Church Educational System manual, 2014], (00)519).
3 Sione 1:9–10. “Ko Taiotifi ʻoku manako ke lahi hake ʻiate kinautolú, ʻoku ʻikai te ne tali ʻa kinautolu”
Naʻe fakamatalaʻi ʻe ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa Taiotifi mo e meʻa naʻá ne faí:
“Ko Taiotifi ʻeni, ko ha ʻōfisa fakalotofonua mahuʻinga ʻo e siasí: (1) Naʻe ʻikai ke ne tali ke fakangofua e tokāteline mo e ngaahi fakahinohino ʻa ha mēmipa ʻo e Kau Palesitenisī ʻUluaki ʻo e Siasí ke lau ki hono haʻofangá; (2) Naʻá ne malanga ʻo fakafepaki ki he kau taki fakaeʻaposetolo ʻo e Siasí; (3) Naʻe fakafisi ke ne tali ʻa e kau fakafofonga ʻo e siasí ne fekauʻi atu kiate iá; (4) Naʻe fakafisi ke tuku ʻa e niʻihi kehe ʻi he haʻofangá ke tokangaʻi pe talangofua ki he kau maʻu mafai ʻo e siasí; pea (5) Naʻá ne tuli ki tuʻa (ko hono moʻoní naʻá ne fakamavahe mei he Siasí) ʻa e kāingalotu moʻui taau ʻo e Siasí” (Doctrinal New Testament Commentary, 3 vols. [1965–73], 3:413–14).